14-р бүлэг
Абинадай ба хаан Ноа
Зениф бол бүлэг нифайчуудын зөв шударга хаан байв. Түүнийг нас дээр гарах үед хүү Ноа нь хаан болжээ.
Ноа эцгийнхээ адил сайн хаан байсангүй. Тэр ёс бус хүн байсан бөгөөд Бурханы зарлигуудыг дуулгавартай дагадаггүй байлаа.
Тэр хүмүүсээ үр тариа, мал амьтан, алт мөнгөнөөсөө өөрт нь өгөхийг албаддаг байв.
Хаан Ноа залхуу хойрго байсан тул энэ бүгдийг хийдэг байжээ. Тэр амьдралд нь хэрэгцээтэй бүх зүйлийг нифайчуудаас авдаг байв.
Тэр эцгийнхээ дуудсан сайн пристүүдийг ёс бус пристүүдээр солив. Эдгээр ёс бус прист ард түмэнд нүгэл үйлдэхийг заадаг байлаа.
Хаан Ноа маш олон гоёмсог орд харшийг, тэр дундаа хаан сэнтийтэй том ордон бариулжээ. Уг барилгуудыг алт, мөнгө, үнэт модоор чимэглэсэн байлаа.
Хаан Ноа ард түмнээсээ авсан эд баялагтаа дуртай байлаа. Тэр пристүүдтэйгээ дарс ууж, ёс бус зүйл хийж цаг нөхцөөдөг байв.
Бурхан Абинадай гэдэг бошиглогчийг Ноагийн ард түмэн рүү илгээв. Абинадай тэдэнд хэрэв нүглээ наманчлахгүй бол леменчүүдийн боол болно гэж сэрэмжлүүлэв.
Абинадайн хэлсэн үгийг сонсоод хаан Ноа ихэд хилэгнэв. Тэр Абинадайг алахын тулд ордонд авчруулахаар өөрийн хүмүүсийг илгээсэн.
Абинадайг хаан дээр авчрав. Хаан Ноа болон түүний пристүүд түүнээс олон зүйл асуув. Тэд түүгээр ямар нэгэн зүйлийг буруу хэлүүлэх гэж башир арга хэрэглэж байлаа.
Абинадай тэдний асуултад хариулахаас айхгүй байсан. Тэр Бурханыг өөрт нь тусална гэдгийг мэдэж байлаа. Абинадайн хариултад пристүүд ихэд гайхаж байв.
Хаан Ноа ихэд уурлан, пристүүддээ Абинадайг алахыг тушаав. Абинадай хэрэв өөрт нь гар хүрвэл Бурхан тэднийг алах болно гэж тэдэнд хэлэв.
Ариун Сүнс Абинадайг хамгаалснаар тэр Их Эзэний өөрөөр нь хэлүүлэхийг хүссэн зүйлийг хэлж дуусах боломжтой болов. Абинадайн царай гэрэлтэж байлаа. Пристүүд түүнд гар хүрэхээс айж байв.
Абинадай Бурханаас ирж байгаа хүч чадлаар ярьж, хүмүүст гэм нүглийнх нь тухай хэлэв. Тэр Бурханы зарлигуудыг тэдэнд уншиж өгөв.
Тэрээр Есүс Христ дэлхийд мэндлэх болно мөн Есүс хүмүүст наманчлан, амилуулагдаж, Бурхантай амьдрах боломжийг өгнө гэдгийг тэдэнд хэлэв.
Нүглээ наманчилж, Есүс Христэд итгэхгүй юм бол аврагдахгүй гэдгийг Абинадай хүмүүст хэлсэн.
Хаан Ноа болон түүний пристүүдийн нэгээс бусад нь бүгд Абинадайн үгсэд итгэхээс татгалзав. Ноа пристүүддээ Абинадайг алахыг тушаасан. Тэд түүнийг хүлж, шоронд хорив.
Абинадайд итгэсэн нэг пристийг Алма гэдэг байв. Тэр Хаан Ноагаас Абинадайг суллахыг гуйв.
Хаан Алмад уурлан, түүнийг хөөн гаргасан ба түүнийг алуулахаар зарц нараа илгээв. Алма зугтаж, нуугдсан тул зарц нар нь түүнийг олсонгүй.
Шоронд гурван өдрийг өнгөрөөсний дараа Абинадайг хаан Ноагийн өмнө дахин авчрав. Хаан Абинадайд өөрийнх нь болон хүмүүсийнх нь эсрэг хэлсэн зүйлээ няцаа гэж хэлэв.
Хаан Ноа Абинадайд хэлсэн зүйлээ няцаахгүй бол түүнийг алах болно гэж хэлэв.
Абинадай үнэнийг ярьсан гэдгээ мэдэж байлаа. Тэр Бурханы өөрөөр нь хэлүүлэхээр илгээсэн зүйлийг няцаахын оронд үхэхэд бэлэн байлаа.
Хаан Ноа пристүүддээ Абинадайг алахыг тушаав. Тэд түүнийг хүлж, ташуурдан, шатааж алав. Үхэхийнхээ өмнө Абинадай хаан Ноаг бас галд шатаж үхэх болно гэж хэлжээ.
Нифайчуудын зарим нь хаан Ноаг эсэргүүцэн, алахыг оролдов. Леменчүүдийн цэрэг бас хаантай мөн түүний дагалдагчидтай дайтахаар ирэв.
Хаан ба түүний дагалдагчид леменчүүдээс зугтаасан боловч леменчүүд тэднийг гүйцэн, алж эхлэв. Хаан эрчүүддээ гэр бүлийнхнээ орхин, зугтацгаа гэж хэлэв.
Эрчүүдийн олон нь зугтсангүй. Тэд леменчүүдэд олзлогдов.
Хаан Ноаг дагаж зугтсан ихэнх эр хийсэн зүйлдээ харамсаж байлаа. Тэд эхнэр, хүүхэд, ард түмэндээ эргэж очин, туслахыг хүсэж байв.
Хаан Ноа эрчүүдийг гэртээ буцаж очихыг зөвшөөрсөнгүй. Тэр тэдэнд өөртэй нь хамт үлдэхийг тушаав.
Эрчүүд хаан Ноад уурлаж, Абинадайн бошиглосны дагуу түүнийг шатааж алав. Дараа нь тэд гэр бүлийнхэн рүүгээ буцав.