6-р бүлэг
Лихайн зүүд
Лихай гэрийнхэндээ зүүдэндээ үзсэн чухал үзэгдлийнхээ талаар ярив. Лихайн зүүд түүнийг Нифай, Сам хоёрын талаар баярлах болгож, харин Лемен, Лемүел хоёрын талаар гуниглах болгов.
Лихай зүүдэндээ цагаан орхимжтой хүн Лихайд өөрийг нь дага хэмээн хэлж байгааг үзжээ. Лихай уг хүнийг даган, бүрэнхий мөн дүнсгэр зэлүүд талд ирэв.
Лихай олон цагийн турш харанхуйд аялсны эцэст тусламж гуйн залбирчээ.
Дараа нь тэр цагаан жимстэй модыг олж харсан. Энэ амтат жимсийг идсэн хүн бүр аз жаргалтай болж байв.
Лихай жимснээс идээд, баяр баяслаар дүүрэв. Тэр гэр бүлийнхнээ жимснээс идээсэй гэж хүсэж байлаа. Учир нь уг жимс тэднийг ч мөн аз жаргалтай болгоно гэдгийг тэр мэдэж байв.
Лихай тэрхүү модны хажуугаар гол урсаж байхыг харлаа. Мөн голын эхэн дээр Сариа, Сам, Нифай нарыг зогсож байхыг тэр харав.
Лихай эхнэр мөн хөвгүүдээ хүрч ирэн, жимснээс амсахыг хүслээ. Сариа, Сам, Нифай нар ирж, жимснээс идсэн ч Лемен, Лемүел хоёр идсэнгүй.
Лихай мөн уг мод руу хөтлөх төмөр бариулыг бас давчуу бөгөөд нарийн замыг харав.
Олон хүн уг замаар урагшлан явж байхыг тэр харав. Харанхуй манангийн улмаас зарим нь замаа алдан, төөрчээ.
Бусад нь төмөр бариулаас чанга атган зуурсаар, харанхуйг гэтлэн модонд хүрч байсан. Тэд жимснээс идлээ.
Голын нөгөө талын том байшинд байгаа хүмүүс жимснээс хүртсэн хүмүүсийг дооглон тохуурхаж байлаа. Жимснээс идсэн зарим хүн ичиж, модноос холдон явав.
Лихай зүүдэндээ олон хүнийг харжээ. Зарим нь төмөр бариулаас бат бөх атгаж, гүн харанхуйг туулан, модонд хүрч байв. Тэд жимснээс идлээ. Зарим нь том барилга руу очиж, зарим нь усанд живж эсвэл зарим нь төөрөлдөж байсан. Лемен, Лемүел хоёр жимснээс хүртсэнгүй. Лихай тэдний төлөө санаа зовж, Бурханы зарлигуудыг дуулгавартай дагахад нь туслахыг хичээж байлаа.