“Khaolo ea 1: Re fumane Buka ea Mormone joang,” Lipale tsa Buka ea Mormone (1997), 2–4
“Khaolo ea 1,” Lipale tsa Buka ea Mormone, 2–4
Khaolo ea 1
Re fumane Buka ea Mormone joang
Ha Joseph Smith a le lilemo li 14, likereke tse ngata li ne li tseka hore ke tsa ´nete, ´me o ne a sa tsebe hore a kene efe.
Ka letsatsi le leng Joseph o ile a bala Jakobo 1:5 ka har´a Bibele:” Ha e mong ho lona a hloka bohlale, a bo kope ho Molimo” Joseph o ne a hloka ho tseba hore na ke kereke efe e nepahetseng, ´me o ile a etsa qeto ea ho botsa Molimo.
Hoseng ho hong ka nako ea selemo Joseph a leba morung o neng o le haufi le lehae la hae ho ea rapela.
Ha a khumame a se a qalile ho rapela, Satane a leka ho mo thiba. Joseph a rapela ka thata, a kopa thuso ho Ntate ea Maholimong.
Ntate ea Maholimong le Jesu Kreste ba itlhahisa ho Joseph ka har´a khanya. Ntate ea Maholimong a supa Jesu a re: “Enoa Ke Mora oa Ka Ea Ratoang. Mo utloe!”
Joseph a botsa hore na a kene kereke efe. Jesu a re ho eena a se kene efe kapa efe ea tsona hobane tsohle li ne li fosahetse.
Ha Joseph Smith a bolella batho ka seo a se boneng le ho se utloa, ba ile ba mo tśeha. Baetapele ba likereke tsa lehae ba ile ba mo phelisa habohloko.
Lilemo tse tharo li ile tsa feta. Bosiung bo bong Joseph o ne a rapella tśoarelo ea libe tsa hae le ho tseba hore ke eng seo a tśoanetseng ho se etsa.
Lengeloi le bitsoang Moroni la itlhahisa ´me la bolella Joseph ka buka e ngotsoeng matlapeng a khauta. Joseph o ne a tlo fetolela matlapa ana ho Sekhooa.
Kamora hore Moroni a tsamaee, Joseph o ile a nahana ka tseo Moroni a mo boleletseng tsona. Moroni o khutlile makhetlo a mang a mabeli bosiung boo.
Letsatsing le hlahlamang Joseph a ea ka holima leralla la Kumora, leo a neng a le bone ponong. A fumana lefika le leholo. A phahamisa lefika leo ka thupa.
Tlasa lefika ho ne ho ena le lebokose la lejoe. Ha Joseph a sheba ka hare ho lebokose, a bona matlapa a khauta.
Moroni a itlhahisa ´me a bolella Joseph hore a se ke a nka matlapa empa a khutle ka lona letsatsi le tśoanang selemo se seng le se seng ka lilemo tse nne. Nako eohle ha Joseph a ile, Moroni o ne a mo ruta.
Kamora lilemo tse ´ne Joseph o ile a lumelloa ho nka matlapa a khauta. O sebelisitse Urim le Thummim ho fetolela a mang a oona.
Bangoli ba thusitse Joseph Smith ka ho ngola mantsoe ha a ntse a a fetolela ho tsoa matlapeng a khauta.
Joseph o ile a nka mantsoe a fetoletsoeng a a isa ho mohatisi ´me a hatisoa a etsoa buka.
Nalane ea Kereke 1:71
Buka ena e bitsoa Buka ea Mormone. E bolela ka batho ba phetseng Amerika ilemong tse ngata tse fetileng. E boetse e bolela ka Jesu Kreste, Mora oa Molimo.