“Khaolo ea 23: Ammone: Mohlanka ea Babatsehang” Lipale tsa Buka ea Mormone (1997), 64–68
“Khaolo ea 23,” Lipale tsa Buka ea Mormone, 64–68
Khaolo ea 23
Ammone: Mohlanka ea Babatsehang
Bara ba Mosaia ba ile ba tloha Zarahemla ho ea ruta Ba-Lamane evangeli. Ba ile ba leba metseng e fapaneng ka bo mong.
Ammone o ile a ea naheng ea Ishmaele. Ha a kena motseng, Ba-Lamane ba ile ba mo tlama ´me ba mo isa ho morena oa bona, Lamoni.
Ammone o ile a bolella Morena Lamoni hore o batla ho phela le Ba-Lamane. Lamoni o ile a thaba ´me a re banna ba hae ba tlamolle Ammone.
Ammone o ile a re e tla ba e mong oa bahlanka ba morena. Morena o ile a mo romela ho ea lisa mohlape oa hae.
Ka letsatsi le leng ha Ammone le bahlanka ba bang ba ne ba ilo noesa mehlape, masholu a Ba-Lamane a qhalakanya mehlape ´me ba leka ho e utsoa.
Bahlanka ba neng ba ena le Ammone ba ne ba tśohile. Morena Lamoni o ne a ile a bolaea basebeletsi ba bang ba neng ba ile ba lahleheloa ke liphoofolo ho masholu ao.
Ammone o ne a tseba hore ona ke monyetla oa hae oa ho sebelisa matla a Morena ho hapa lipelo tsa Ba-Lamane. Joale ba ne ba tla mamela lithuto tsa hae.
Ammone o ile a bolella bahlanka hore ha ba ka bokella liphoofolo tse qhalakaneng, morena ha a na ho ba bolaea.
Ammone le bahlanka ba bang ba ile ba fumana liphoofolo kapele ´me ba li qhobela metsing.
Masholu a Ba-Lamane a ile a khutla. Ammone o ile a bolella bahlanka ba bang ho lebela mehlape ha eena a loants´a masholu.
Masholu a Ba-Lamane a ne a sa tśabe Ammone. Ba ne ba nahana hore ba ka mo bolaea ha bonolo.
Matla a Molimo a ne a ena le Ammone. O ile a otla le ho bolaea a mang a masholu ao ka majoe, seo se ileng sa halefisa masholu a mang.
Ba ile ba leka ho bolaea Ammone ka likoakoa tsa bona , empa nako eohle ha lesholu le phahamisa koakoa ho otla Ammone, o ne a khaola sephaka sa lesholu. Masholu ke ho tśoha , a ile a baleha.
Bahlanka ba ile ba nka liphaka tseo tse khaohileng ba li isa ho Morena Lamoni ´me ba mo bolella seo Ammone a se entseng.
Morena o ne a maketse ke boholo ba matla a Ammone. O ne a batla ho bona Ammone empa o ne a tśaba hobane a ne a nahana hore Ammone ke Moea o Moholo.
Ha Ammone a kena ho tla mo bona , morena Lamoni o ne a sa tsebe hore a bue eng. Ha a ka a bua nako e etsang hora.
Moea o Halalelang o ile oa thusa Ammone ho tseba seo morena a neng a ntse a se nahana. Ammone o ile a hlalosetsa morena hore ha se Moea o Moholo. E ne e le motho.
Morena o ile a tśepisa Ammone ntho e ngoe le e ngoe ha a ka mo bolella hore ke ka matla a fe ao a a sebelisitseng ho hlola masholu ao le ho tseba menahano ea morena.
Ammone o ile a re ntho e le ´ngoe feela eo a neng a e batla ho Morena Lamoni ke ho lumela seo a tlang ho mo bolella sona. Morena o ile a re o tla lumela tsohle tseo Ammone a tlang ho mo bolella tsona.
Ammone o ile a botsa Morena Lamoni hore na o lumela ho Molimo. Morena o ile a re o lumela ho Moea o Moholo.
Ammone o ile a re Moea o Moholo ke Molimo, ea bopileng tsohle tse maholimong le lefatśeng, ´me O tseba mehopolo ea batho.
Ammone o ile a re batho ba bopiloe ka setśoantso sa Molimo. A boela a re Molimo o mo bitsitse ho tla ruta evangeli ho Lamoni le batho ba hae.
Ha a sebelisa mangolo a halalelang, Ammone o ile a ruta Morena Lamoni ka popo, Adama, le ka Jesu Kreste.
Morena Lamoni o ile a lumela ´me a rapella ts´oarelo ea libe tsa hae. Eaba o oela fats´e ´me o ne a shebahala e ka o shoele.
Bahlanka ba ile ba nka morena ba mo isa ho mosali oa hae ´me ba mo beha holima mealo. Kamora matsatsi a mabeli bahlanka ba ne ba nahana hore o shoele ´me ba etsa qeto ea ho mo pata.
Mofumahali o ne a sa lumele hore monna oa hae o shoele. Ka ha o ne a utloile ka matla a maholo a Ammone, o ile a kopa hore a thuse morena.
Ammone o ne a tseba hore Lamoni o tlasa matla a Molimo. O ile a bolella mofumahali hore Lamoni o tla tsoha letsatsi le hlahlamang.
O ile a lula bosiu bohle lehlakoreng la Lamoni. Letsatsi le hlahlamang Lamoni o ile a tsoha ´me a re o bone Jesu Kreste. Morena le mofumahali ba ile ba tlaloa ke Moea o Halalelang.
Lamoni o ile a ruta batho ba hae ka Molimo le Jesu Kreste. Ba ileng ba lumela ba ile ba baka libeng tsa bona ´me ba kolobetsoa.