“Khaolo ea 34: Helamane le Bahlankana ba Bahlabani ba 2,000.,” Lipale tsa Buka ea Mormone (1997), 93–94
“Khaolo ea 34,” Lipale tsa Buka ea Mormone, 93–94
Khaolo ea 34
Helamane le Bahlankana ba Bahlabani ba 2,000
Batho ba Ammone ba ile ba tśepisa Molimo hore ba ke ke ba hlola ba loana hape. Ba ne ba phela haufi le Ba-Nefi ´me Ba-Nefi ba ne ba ba sireletsa.
Ha lira tsa batho ba Ammone li hlasela Ba-Nefi, batho ba Ammone ba ne ba batla ho koenehela ts´episo ea bona ´me ba thuse Ba-Nefi ho loana.
Helamane le baetapele ba Ba-Nefi ba ne ba sa batle ha batho ba Ammone ba ka roba ts´episo ea bona ho Molimo.
Bara ba batho ba Ammone ba ne ba sa etsa tśepiso eo. Ba ne ba batla ho thusa lebotho la Ba-Nefi ho loanela tokoloho.
Likete tse peli tsa bahlankana bana li ile tsa khetha ho sireletsa naha ea bona. Ba ile ba kopa Helamane ho ba moetapele oa bona.
Bahlankana bana ba ne ba le sebete ´me ba le matla. Ba ne ba boetse ba na le ´nete ´me ba tśepahala, ´me ba ne ba boloka melao ea Molimo.
Helamane o ile a etella pele bahlankana bana ba bahlabani ho ea ntoeng. O ne a ba bitsa bara ba hae, ´me ba ne ba ´mitsa ntat´a bona.
Leha e le hore bara ba Helamane ba ne ba so ka ba loana, ba ne ba sa tśoha. Bo ´m´a bona ba ne ba ba rutile ho ba le tumelo ho Molimo le ho tseba hore o tla ba thusa.
Helamane le lebotho la hae ba ile ba loana lintoa tse ´maloa khahlanong le Ba-Lamane. Bahlankana bana ba ne ba mamela litaelo tsohle tsa Helamane.
Ba ile ba loana ka sebete ´me ba thusa ho leleka sera. Kamora ntoa Helamane o ile a fumana hore bara bohle ba hae ba ne lemetse empa ho ne ho sena ea bolailoeng.
E ne e le mohlolo. Helamane o ne a thabile haholo. O ne a tseba hore bahlankana bana ba ne ba sirelelitsoe ka lebaka la tumelo ea bona e kholo.