“Khaolo ea 3: Lehi o Tloha Jerusalema,” Lipale tsa Buka ea Mormone (1997), 6–7
“Khaolo ea 3,” Lipale tsa Buka ea Mormone, 6–7
Khaolo ea 3
Lehi o Tloha Jerusalema
Morena o ne a thabisitsoe ke Lehi ´me bosiu bo bong a bua le eena ka toro. A bolella Lehi ho nka lelapa la hae ´me a tlohe Jerusalema. Lehi o ile a mamela Morena.
Lelapa la Lehi la thotha lijo le litente. Ba ile ba siea ntlo ea bona le khauta le silivera ´me ba tsamaea lefelleng.
Lehi le molekane oa hae, Saria, ba ne ba na le bara ba bane. Mabitso a bona e ne e le Lamane, lemuele, Seme le Nefi.
Kamora ho tsamaea matsatsi a mararo, lelapa la Lehi le ile la fihla la lula phuleng e pela noka.
Lehi o ile a aha aletare ka majoe ´me a etsa sehlabelo ho Molimo. A leboha Molimo ka ho pholosa lelapa la hae timelong.
Lehi o ile a reha noka Lamane ´me a reha phula Lemuele. Lehi o ne a batla bara ba hae ba ts´oane le noka le thota, ba phallele ho Molimo ka linako tsohle le ho tsitlallela ho boloka melao.
Lamane le Lemuele ba ne ba nahana hore ntat’a bona ke sephoqo ka ho tloha Jerusalema le ho sia maruo a bona. Ba ne ba sa lumele hore Jerusalema e tla timetsoa.
Nefi o ne a batla ho utloisisa lintho tseo Lehi a li boneng. O ile a rapella ho tseba hore na ntata´e o entse se nepahetseng ka ho tloha Jerusalema.
Jesu Kreste o ile a etela Nefi ´me a mo bolella hore mantsoe a Lehi e ne e le ´nete. Nefi o ile a kholoa ´me a se ke a ba manganga joalo ka Lamane le Lemuele.
Nefi o ile a bolella baholoane ba hae ka seo Jesu a mo boleletseng sona. Seme o ile a kholoa Nefi, empa Lamane le Lemuele ha ba ka ba kholoa.
Molimo o ile a tśepisa Nefi hore o tla hlohonolofala ka lebaka la tumelo ea hae. O tla fetoha moetapele oa baholoane ba hae.