Khaolo ea 28

Ba-Zorame le Ba-Rameamptome

Ba-Zorame ba ne ba kile ba eba litho tsa Kereke ea Molimo empa ba ile ba fetoha ho ba khopo ´me ba rapela melimo ea litśoantśo.

Alma 31:1, 8 - 9

Ba-Nefi ba ne ba batla hore Ba-Zorame ba se kopane le Ba-Lamane, ´me Alma le barumuoa ba boruti lichabeng ba bang ba ile ba ea ho ruta Ba-Zorame lentsoe la Molimo.

Alma 31:4, 11

Baruti bana ba ne ba maketse ´me ba hloname ke kamoo Ba-Zorame ba neng ba khumamela ka likerekeng tsa bona, tseo ba neng ba li bitsa lisinagoge.

Alma 31:12

Bohareng ba kereke, Ba-Zorame ba ne ba ahile sethala se selelele se bitsoang Rameamptome. Ho ne ho na le sebaka sa hore ho eme motho a le mong tlhorong ea sona.

Alma 31:13, 21

Ba-Zorame ba ne ba fapanyetsana ho ema moo, ba phahamisetsa matsoho holimo ´me kaofela ba hoeeletsa thapelo e tśoanang.

Alma 31:14, 20

Thapelong ena, Ba-Zorame ba ne ba re Molimo ha a na ´mele; ke moea feela. Ba ne ba boetse ba re ha hona ho ba le Kreste.

Alma 31:15 - 16

Ba-Zorame ba ne ba nahana hore Molimo o khethile bona feela ho pholosoa ´musong oa maholimo. Ba ne ba leboha ha e ne e le bona lithatohatsi tsa hae.

Alma 31:17 - 18

Kamora hore e mong le e mong oa Ba-Zorame a se a rapetse, ba ne ba sa rapele kapa ho bua ka Molimo hape beke kaofela.

Alma 31:12, 23

Barui ba Ba-Zorame ba ne ba rata khauta le silivera, ´me ba ne ba bolelisa ka maruo a bona a lefatśe. Alma o ne a sa thaba ke ho bona hore na ba ne ba le khopo ha kakang.

Alma 31:24 - 25

Alma o ile a rapella hore eena le barumuoa ba boruti lichabeng ba habo ba fumane matla, mats´eliso, le katleho mosebetsing oa bona.

Alma 31:26, 32 - 33

Kamora ho kopa thuso ea ho khutlisetsa Ba-Zorame ´neteng, Alma le barumuoa ba boruti lichabeng ba bang ba ile ba tlala ka Moea o Halalelang.

Alma 31:34 - 36

Barumuoa ba baruti lichabeng ba ile ba leba ka litsela tse fapakaneng ho ea ruta. Molimo o ile a ba hlohonolofatsa ka lijo le liaparo ´me a ba matlafatsa mosebetsing oa bona.

Alma 31:37 - 38

Ba-Zorame bao e neng e le mafutsana ba ne ba sa lumelloa ka hare ho likereke. Batho bana ba ile ba qalella ho mamela barumuoa ba boruti lichabeng.

Alma 32:2 - 3

Ba bangata ba ile ba botsa Alma hore na ba etse eng. Alma o ile a ba bolella hore ba ne ba sa hloke ho ba ka hare ho kereke ho rapela kapa ho rorisa Molimo.

Alma 32:5, 10 - 11

O ile a ba bolella hore ba be le tumelo ho Molimo. Eaba Amuleke o ba ruta ka Jesu Kreste le ka morero oa Molimo bakeng sa bana ba hae.

Alma 32:17–21; 34:8–9

Barumuoa ba boruti lichabeng ba ile ba tsamaea, ´me Ba-Zorame ba ileng ba ba lumela ba ile ba lelekoa motseng. Balumeli ba ile ba ea phela lefatśeng la Jershone le batho ba Ammone.

Alma 35:1 – 2, 6

Le ha e le hore Ba-Zorame ba khopo ba ne ba tśosa batho ba Ammone, batho ba Ammone ba ile ba thusa Ba-Zorame ba lokileng ´me ba ba fa lijo, liaparo, le lefatśe.

Alma 35:8 - 9