“Khaolo ea 39: Nefi o Fumana Matla a Maholo,” Lipale tsa Buka ea Mormone (1997), 108–10
“Khaolo ea39,” Lipale tsa Buka ea Mormone, 108–10
Khaolo ea 39
Nefi o Fumana Matla a Maholo
Morena o ile a bua le Nefi ´me a mo babatsa ka ho mamela le ho sebetsa ka thata ho ruta evangeli.
Nefi o ile a fuoa matla a ho etsa ntho e ´ngoe le e ´ngoe. Morena o ne a tseba hore o tla sebelisa matla ao ka ho loka.
Morena o ile a bolella Nefi hore a hlokomelise Ba-Nefi hore ha ba sa bake, ba tla timetsoa. Hang hang Nefi o ile a lo hlokomelisa batho.
Ba-Nefi ha ba ka ba kholoa Nefi. Ba ile ba leka ho mo akhela chankaneng, empa matla a Molimo a ile a mo sireletsa.
Nefi o ile a phatlalatsa lentsoe la Molimo ho Ba-Nefi bohle.
Empa batho ba ile ba fetoha ho ba khopo le ho feta ´me ba qalella ho loants´ana.
Nefi o ile a rapella tlala, a tśepile hore ho hloka lijo ho tla tlisa boikokobetso ho Ba-Nefi ´me ho ba thuse ho baka.
Tlala e ile ea fihla. Ho ne ho se pula, joale lefatśe le ile la omella ´me lijalo li ne li sa mele. Batho ba ile ba tlohela ho loana.
Ba-Nefi ba ne ba lapile, ´me ba bangata ba ile ba shoa. Ba ileng ba phela ba ile ba qalella ho hopola Morena le seo Nefi a ileng a ba ruta sona.
Batho ba ile ba bakela libe tsa bona ´me ba kopa baahloli ba bona hore ba kope Nefi ho felisa tlala. Baahloli ba ile ba ea ho Nefi.
Ha Nefi a bona hore batho ba se ba ikokobelitse ´me ba bakile, o ile a kopa Morena ho felisa tlala.
Morena o ile a araba thapelo ea Nefi, ´me pula e ile ea qala ho na. Kapele lijalo li ile tsa mela hape. Batho ba ile ba rorisa Molimo ´me ba ne ba tseba hore Nefi e ne e le moporofeta oa sebele.
Boholo ba Ba-Nefi ba ile ba kena Kereke. Ba ile ba rua, ´me metse ea bona ea hola. Ho ne ho ena le khotso lefatśeng leo.
Eaba Ba-Nefi ba ileng ba ikopanya pele le Ba-Lamane ba hlasela Ba-Nefi.
Ba-Nefi ba ile ba leka ho hlola lira tsa bona, tseo e neng e se e le masholu a Gadiantone, empa ba ne ba sa khone hobane le bona ba ne ba se ba le khopo hape.
Ha Ba-Nefi ba ne ba lokile, Morena o ne a ba hlohonolofatsa. Ha ba ne ba ikhohomosa ´me ba lebala Morena, o ne a ba fa mathata hore ba tsebe ho mo hopola.