“Khaolo ea 38: Polao ea Moahloli e Moholo,” Lipale tsa Buka ea Mormone (1997), 103–7
“Khaolo ea 38,” Lipale tsa Buka ea Mormone, 103–7
Khaolo ea 38
Polao ea Moahloli e Moholo
Banna ba khopo e ile ba fetoha baahloli ba Ba-Nefi. Ba ne ba fa batho ba lokileng likotlo empa e seng batho ba khopo.
Nefi o ne a sa thabela ho bona bokhopo bo bokaalo har´a batho.
Ka letsatsi le leng o ne a ntse a rapela toreng serapeng sa hae. serapa sa hae se ne se le pela tsela e kholo e lebang ´marakeng Zarahemla.
Batho ba neng ba feta ka tsela ba ile ba utloa Nefi a ntse a rapela. Sehlopha se seholo sa batho se ile sa bokana, ba ipotsa hore ke hobaneng a sa thaba.
Ha Nefi a bona batho, o ile a ba bolella hore ha a thaba ka lebaka la bokhopo ba bona. O ile a ba bolella hore ba bake.
O ile a ba hlokomelisa hore ha ba sa bake, lira tsa bona li tla nka mahae a bona le metse ´me Morena ha na ho ba thusa ho loantśa lira tsa bona.
Nefi o ile a re Ba-Nefi ba ne ba le khopo ho feta Ba-Lamane hobane Ba-Nefi ba ne ba rutiloe melao empa ba ne ba sa e mamele.
O ile a re haeba Ba-Nefi ba sa bake, ba tla timetsoa.
Ba bang ba baahloli ba khopo ba ne ba le teng moo. Ba ne ba batla hore batho ba otle Nefi ka ho bua khahlanong le bona le molao oa bona.
Batho ba bang ba ne ba lumellana le baahloli bao ba khopo. Ba bang ba ne ba lumela Nefi; ba ne ba tseba hore ke moporofeta ´me o ne a bua ´nete.
Nefi o ile a bolella batho hore ba fetohile khahlanong le Molimo ´me haufinyane ba tla otloa haeba ba sa bake.
Nefi o ile a bolella batho ho ea batla moahloli oa bona e moholo. Ba tla mo fumana a rapaletse ka har´a mali a hae, a bolailoe ke ngoanabo ea batlang boemo ba hae.
Banna ba bahlano ho tsoa letśoeleng ba ile ba matha ho ea bona moahloli e moholo. Ba ne ba sa lumele hore Nefi ke moporofeta oa Molimo.
Ha ba fumana Seezorame, moahloli e moholo, a rapaletse ka har´a mali a hae, ba ile ba oela fatśe ke letsoalo. Joale ba ile ba tseba hore Nefi ke moporofeta.
Basebeletsi ba Seezorame ba ne ba se ba ile ba fumana moahloli e moholo ´me ba mathile ho ea bolella batho. Ba ile ba khutla ´me ba fumana banna ba bahlano ba rapaletse moo.
Batho ba ne ba nahana hore banna bao ba bahlano ba bolaile Seezorame.
Ba ile ba lahlela banna bao ba bahlano chankaneng ´me ba romela lentsoe motseng ka bophara hore moahloli e moholo o bolailoe ´me babolai ba chankaneng.
Letsatsi le hlahlamang batho ba ile ba leba moo moahloli e moholo a tlang ho patoa. Baahloli ba neng ba le teng serapeng sa Nefi ba ile ba botsa hore na banna ba bahlano bao ba kae.
Baahloli ba ile ba kopa ho bona baqosuoa ba babolai.
Baqosuoa ba babolai e ne e le banna ba bahlano ba ileng ba matha ho tloha serapeng sa Nefi ho leba ho moahloli e moholo.
Banna bao ba bahlano ba ile ba re ba fumane moahloli e moholo a rapaletse ka har´a mali, joaloka ha Nefi a ile a bolela. Eaba baahloli ba qosa Nefi ka ho romela motho ho ea bolaea Seezoram.
Ka ho tseba hore Nefi ke moporofeta, banna bao ba bahlano ba ile ba ngangisana le baahloli, empa bao ba se ke ba mamela. Ba ile ba tlama Nefi.
Baahloli ba ile ba tśepisa Nefi chelete le bophelo ba hae ha a ka a re o ile a rera ho bolaea moahloli e moholo.
Nefi o ile a bolella baahloli hore ba bakele bokhopo ba bona. Eaba o ba bolella hore ba lebe ho Seantume, ngoanabo Zeezorame.
Nefi o ile a ba bolella hore ba botse Seantume haeba eena le Nefi ba ne ba rerile ho balaea Seezorame. Nefi o ile a re Seantume o tla re “che.”
´Me baahloli ba tle ba botse Seantume hore o bolaile ngoanabo na. Seantume o tla a boela a re “che,”empa baahloli ba tla fumana mali liaparong tsa Seamtume.
Nefi a re Seantume o tla thothomela le ho pulufala ´me o tla qetella a ipoletse hore o bolaile ngoanabo.
Baahloli ba ile ba leba ntlong ea Seantume, ´me tsohle li ile tsa etsahala joalo ka ha Nefi a ne a boletse hore li tla etsahala ka teng. Nefi le banna ba bahlano ba ile ba lokolloa.
Ha batho ba tloha ho Nefi, ba bang ba ne ba re ke moporofeta; ha ba bang ba ne ba re ke molimo. Nefi o ile a leba hae, a ntse a sa thaba ke bokhopo ba bona.