“Khaolo ea 46: Jesu Kreste o Ruta le Ho Rapela le Ba-Nefi,” Lipale tsa Buka ea Mormone (1997), 128–30
“Khaolo ea 46,” Lipale tsa Buka ea Mormone 128–30
Khaolo ea 46
Jesu Kreste o Ruta le Ho Rapela le Ba-Nefi.
Ba-Nefi ba ileng ba bona Jesu Kreste ba ile ba bolella metsoalle ea bona hore o tla khutla letsatsi le hlahlamang. Batho ba bangata ba ile ba sebetsa ka thata ho ea fihla moo Jesu a tla ba hona teng.
Letsatsi le hlahlamang Nefi le barutuoa ba bang ba ile ba ruta sehlopha se neng se bokane. Barutuoa ba ile ba rapela hore ba fumane Moea o Halalelang.
Nefi o ile a kena ka metsing ´me a kolobetsoa. Eaba o kolobetsa barutuoa ba bang.
Kamorao ho hore ba kolobetsoe, ba ile ba fumana Moea o Halalelang. Mollo o ile oa bonahala o ba potapotile, ´me mangeloi a ile a theoha maholimong ´me a ba sebeletsa.
Ha mangeloi a ntse a ena le barutuoa, Jesu o ile a fihla a ema har´a bona.
Kreste o ile a bolella Ba-Nefi ho khumama fatśe. O ile a bolella barutuoa ba hae hore ba rapele.
Ha ba ntse ba rapela, Jesu o ile a leba sebakana ho batho ´me a khumama ´me a rapela ho Ntate a Maholimong.
Jesu o ile a leboha Ntate ea Maholimong ka ho fa barutuoa ba hae Moea o Halalelang. Eaba o kopa hore Moea o Halalelang o fuoe bohle ba lumelang mantsoe a barutuoa ba hae.
Jesu o ile a hlohonolofatsa barutuoa ba hae ha ba ntse ba rapela. O ile a bososela le bona ´me ba ile ba eba basoeu joaloka sefahleho le liaparo tsa hae.
Jesu o ile a boela a rapella barutuoa ba hae. O ne a thabile ke tumelo ea bona e matla.
Kreste o ile a bolella batho hore ba emise ho rapela empa ba tsoele pele ho rapella ka lipelong tsa bona. Eaba o ba fa selallo.
Ho ne ho sena motho ea tlileng le bohobe kapa veine, empa Mopholosi o ile a fana ka tsona ka tsela ea mohlolo.
Jesu Kreste o ile a bolella Ba-Nefi hore evangeli ea hae e tla khutlela lefatśeng matsatsing a ho qetela.
O ile a ba bolella hore ba ithute mangolo a halalelang, ´me o ile a etsa hore Nefi a ngole ka har´a lingoliloeng phethahatso ea litśenolo tsa Samuele oa Mo-Lamane.
Eaba Jesu o ruta batho ho tsoa ka mangolong a halalelang. O ile a ba bolella hore ba rutane lintho tseo a ba rutileng tsona.
Jesu o ile a khutlela maholimong, ´me barutuoa ba hae ba ile ba ruta batho. Bao ba neng ba lumela ba ile ba kolobetsoa ´me ba fumana Moea o Halalelang.
Ba-Nefi ba ile ba qalella ho mamela litaelo tsohle.