“Khaolo ea 43: Jesu Kreste o hlaha ho Ba-Nefi,” Lipale tsa Buka ea Mormone (1997), 120–23
“Khaolo ea 43,” Lipale tsa Buka ea Mormone 120–23
Khaolo ea 43
Jesu Kreste o hlaha ho Ba-Nefi
Ba-Nefi ba bangata ba ile ba bokellana tempeleng Bountiful. Ba ne ba makaletse liphetoho tse kholo lefatśeng leo.
Batho ba ne ba bua ka Jesu Kreste le matśoao a lefu la hae.
Ha ba ntse ba bua, ba ile ba utloa lentsoe le bonolo ho tsoa maholimong. Le ile la etsa hore lipelo tsa bona li chesehe.
Qalong ba ne ba sa utloisisi lentsoe leo, empa ha le bua lekhetlo la boraro, ba ile ba le utloisisa.
Lentsoe leo e ne ele la Ntate ea Maholimong. Le ne le tsebisa ka Jesu Kreste ´me la bolella batho hore ba mo mamele.
Jesu Kreste o ile a theoha maholimong ´me a ema har´a batho. Ba ne ba tśaba ho bua hobane ba ne ba sa utloisisi se etsahalang. Ba ne ba nahana hore Jesu ke lengeloi.
O ile a ba bolella hore ke Jesu Kreste, eo baporofeta ba ileng ba re o tla tla.
Jesu o ile a bolella batho ho tla ´me ba utloe matheba lehlakoreng la hae le matsohong le maotong, moo a neng a kokoteletsoe sefapanong.
Jesu o ne a batla batho ba tsebe hore ke Molimo oa bona ´me o shoetse libe tsa bona.
Batho ka bo mong ba ile ba utloa matheba lehlakoreng, matsohong, le maotong a Jesu. Batho ba ile ba tseba hore ke Molopolli.
Eaba batho ba rorisa Jesu ´me ba khumama maotong a hae ba mo khumamela.
Jesu o ile a bitsa Nefi le banna ba bang ba leshome le motso o mong. O ile a ba fa matla a boprista ´me a ba ruta tsela e nepahetseng ea ho kolobetsa.
O ile a bolella Ba-Nefi ho lumela ho eena, ho baka, le ho boloka melao. Ha ba sa etse joalo, ba ke ke ba kena ´musong oa hae.
O ile a ruta Ba-Nefi ho rapela ho Ntate ea Maholimong. O ile a boela a ba ruta ka ho itima ´me a re ba tla tśoareloa ha ba ka tśoarelana.
Kamora ho ruta batho lintho tse ngata, Jesu o ile a ba bolella hore ba ee hae ´me ba nahane le ho rapela ka tseo a li buileng.
Ba-Nefi ba ile ba qalella ho lla. Ba ne ba sa batle ha Jesu a tsamaea nakong eo.
Jesu o ne a rata Ba-Nefi. O ile a ba bolella hore ba tlise batho ba kulang le ba lemetseng ho eena hore a tlo ba folisa.
Jesu o ile a folisa batho bao. Bohle ba ile ba inama ´me ba mo khumamela.