Khaolo ea 22

Leeto la thomo ea Alma Ammoniha

Alma o ne a tśoenyehile ke bokhopo ba Ba-Nefi, ´me o ile a etsa qeto ea ho sebelisa nako eohle ea hae a ruta evengeli. O ile a khetha Nefiha ho nka sebaka sa hae e le moahloli e moholo.

Alma 4:7,18 - 19

Alma o ile a ruta evangeli naha ka bophara. Ha a leka ho ruta Ammoniha, batho ba ne ba sa mo mamele. Ba ile ba mo leleka motseng.

Alma 5:1; 8:8–9, 11, 13

Alma o ne hloname hore batho ba Ammoniha ba ne ba le khopo hakaalo. O ile a tsamaea ho leba motseng o mong.

Alma 8:13 - 14

Lengeloi le ile la itlhahisa ho Alma ´me la mo khothatsa. Lengeloi le ile la re ho eena a khutlele Ammoniha ´me a rute hape. Alma o ile a potlakela morao.

Alma 8 : 15 – 16, 18

Alma o ne a lapile. Ha a kena motseng, o ile a kopa monna e mong lijo. Lengeloi le ne le ile la bolella monna eo hore Alma o tla fihla ´me ke moporofeta oa Molimo.

Alma 8:19 - 20

Monna enoa, Amuleke, o ile a lebisa Alma lehaeng la hae ´me a mo fepa. Alma o lutse le Amuleke le lelapa la hae matsatsi a mangata. O ile a leboha Molimo ka lelapa la Amuleke ´me a ba hlohonolofatsa.

Alma 8:21 – 22, 27

Alma o ile a bolella Amuleke ka pitso ea hae ea ho ruta batho ba Ammoniha. Amuleke o ile a tsamaea le Alma ho ea ruta batho. Moea o Halalelang o ile oa ba thusa.

Alma 8:24 – 25, 30

Alma o ile a bolella batho hore ba bake kapa Molimo o tla ba timetsa. A re Jesu Kreste o tla tla ´me o tlo lopolla bao ba nang le tumelo ho eena ´me ba bakile.

Alma 9:12, 26 - 27

Batho ba Ammoniha ba ile ba halefa. Ba ile ba leka ho hlahlela Alma chankaneng, empa Morena o ile a mo sireletsa.

Alma 9:31 - 33

Eaba Amuleke o qala ho ruta. Batho ba bangata ba ne ba tseba Amuleke; e ne e se molichaba joalo ka Alma. O ile a ba bolella ka lengeloi leo a ileng a le bona.

Alma 9:34; 10:4, 7

Amuleke o ile a re Alma ke moporofeta oa Molimo ´me o ne a bua ´nete. Batho ba ne ba maketse ho utloa bopaki ba Amuleke.

Alma 10:9 -10, 12

Batho ba bang ba ile ba halefa, haholo monna a le mong ea neng a le khopo ea neng a bitsoa Zeezrome. Ba ile ba leka ho qhekanyetsa Amuleke ka lipotso, empa o ile a ba bolella hore o tseba morero oa bona.

Alma 10:13 – 17, 31

Zeezrome o ne a batla ho timetsa tsohle tse neng li lokile. O ne a baka mathata, ´me e be batho ba tla mo lefa chelete ho lokisa mathata ao a neng a a bakile.

Alma 11:20 - 21

Zeezrome o ile a hloleha ho qhekanyetsa Amuleke, ´me o ile a mo tśepisa chelete hore a re ha hona Molimo. Amuleke o ne a tseba hore Molimo o oa phela ´me a re Zeezrome oa tseba empa o rata chelete ho feta Molimo.

Alma 11:22, 24, 27

Eaba Amuleke o ruta Zeezrome ka Jesu le Tsoho ea Bafu le Bophelo ba bosafeleng. Batho ba ile ba Makala. Zeezrome o ile a qalella ho thothomela ke letsoalo.

Alma 11:40 - 46

Zeezrome o ne a tseba hore Alma le Amuleke ba ne ba na le matla a Molimo hobane ba ne ba tseba mehopolo ea hae. Zeezrome o ile a botsa lipotso ´me a mamela ha Alma a mo ruta evangeli.

Alma 12:1, 7 - 9

Batho ba bang ba ile ba lumela Alma le Amuleke ´me ba qala ho baka le ho ithuta mangolo a halalelang.

Alma 14:1

Empa boholo ba batho ba ne ba batla ho bolaea Alma le Amuleke. Ba ile ba tlama banna bao ba babeli ´me ba ba isa ho moahloli e moholo.

Alma 114:2 - 4

Zeezrome o ne a soabile hore o kile a ba khopo ´me a ruta batho mashano. O ile a kopa batho hore ba lokolle Alma le Amuleke.

Alma 14:6 - 7

Zeezrome le banna ba bang ba neng ba lumela lithuto tsa Alma le Amuleke ba ile ba lelekoa motseng. Batho ba khopo ba ile ba ba betsa ka majoe.

Alma 14:7

Eaba batho bana ba khopo ba bokella basali le bana ba neng ba lumela ´me ba ba lahlela ka mollong le mangolo a bona a halalelang.

Alma 14:8

Alma le Amuleke ba ile ba qobelloa ho shebella basali le bana ha ba shoa ka mollong. Amuleke o ne a batla ho sebelisa matla a Molimo ho ba pholosa.

Alma 14:9 - 10

Empa Alma a bolella Amuleke hore a se ke a emisa polao ea batho bao hobane ba tla be ba e na le Molimo ka sebakanyana ´me batho ba khopo ba tla fuoa kotlo.

Alma 14:11

Moahloli e moholo o ile a otla Alma le Amuleke makhetlo a ´maloa ´me a ba nyefola hobane ba ne ba sa pholose basali le bana ba neng ba tuka. Eaba o ba hlahlela chankaneng.

Alma 14:14 - 17

Banna ba bang ba khopo ba ile ba leba chankaneng ´me ba hlokofatsa Alma le Amuleke ka mekhoa e mengata, ba kenyelelitse ho ba tima lijo le ho ba tśoela.

Alma 14:18 - 22

Moahloli e moholo o ile a re ha Alma le Amuleke ba ka sebelisa matla a Molimo ho itokolla, o tla lumela. O ile a ba otla hape.

Alma 14:24

Alma le Amuleke ba ile ba phahama. Alma o ile a rapela ´me a kopa Molimo ho ba matlafatsa ka lebaka la tumelo e bona e matla ho Kreste.

Alma 14:25 - 26

Matla a Molimo a ile a tlala Alma le Amuleke, ´me ba ile ba khaola lithapo tseo ba neng ba tlangoe ka tsona. Banna ba khopo ba ne ba tśohile ´me ba leka ho baleha empa ba oela fatśe.

Alma 14:25 - 27

Lefatśe le ile la thothomela, ´me marako a chankana a oela holima banna ba khopo. Morena o ile a sireletsa Alma le Amuleke, ´me ha ba ka ba lemala.

Alma 14:27 - 28

Batho ba Ammoniha ba ile ba tla ho tla bona hore ho etsahalang. Ha ba bona Alma le Amuleke ba tsoa ka hare ho chankana e oeleng, ba ile ba tśoha ´me ba baleha

Alma 14:28 - 29

Morena o ile a bolella Alma le Amuleke hore ba lebe Sidome. Moo ba ile ba fumana batho ba lokileng. Zeezrome o ne a le hona teng ´me o ne a kula haholo.

Alma 15:1 -3

Zeezrome o ile a thabela ho bona Alma le Amuleke. O ne a tśoenyehile hore ba bolauoe ka lebaka la tseo a neng a li entse. O ile a kopa hore ba mo folise.

Alma 15:4 - 5

Zeezrome o ne a lumela ho Jesu Kreste ´me a bakile libeng tsa hae. Ha Alma a mo rapella, Zeezrom o ile a fola hang hang.

Alma 15:10 - 11

Zeezrome o ile a kolobetsoa ´me a qalella ho ruta evangeli. Ba bang ba bangata le bona ba ile ba kolobetsoa.

Alma 15:12, 14

Batho ba khopo ba Ammoniha ba ile ba bolaoa ke lebotho la Ba-Lamane, joalo ka ha Alma a ile a porofeta.

Alma 10:23; 16:2, 9