Igice cya 27

Korihori

Umugabo witwaga Korihori yaje i Zarahemula. Ntabwo yemeye Yesu Kristo kandi yabwirije ko ibyo abahanuzi bari baravuze ku Mukiza bitari ukuri.

Aluma 30:6, 12–14

Korihori yabwiye abantu ko basaze k’ubwo kwemera ko Yesu azaza ku isi kandi akababazwa kubera ibyaha byabo.

Aluma 30:16

Yavuze ko abantu badashobora guhanwa kubera ibyaha byabo kuko nyuma y’urupfu nta buzima buhari. Abantu benshi bemeye Korihori. Bahindutse abagome.

Aluma 30:17–18

Korihori yagerageje kubwiriza abantu ba Amoni, ariko ntibategaga amatwi. Baramuboshye nuko bamutwara kwa Amoni, wamwirukanye mu mujyi.

Aluma 30:19–21

Korihori yagiye ku butaka bwa Gidiyoni, ariko abantu b’aho na bo ntibamuteze amatwi. Umucamanza mukuru yamwohereje kwa Aluma.

Aluma 30:21, 29

Aluma yabajije Korihori niba yemera Imana. Korihori yavuze ko atayemera. Aluma yahamije ko Imana iriho kandi ko Kristo azaza.

Aluma 30:21, 29

Korihori yashakaga ko Aluma akora igitangaza ngo yerekane ko Imana iriho. Korihori yavuze ko azemera Imana niba abonye ikimenyetso cy’ububasha bw’Imana.

Aluma 30:43

Aluma yabwiye Korihori ko yamaze kubona ibimenyetso byinshi by’ububasha bw’Imana binyuze mu byanditswe bitagatifu n’ubuhamya bw’abahanuzi bose.

Aluma 30:44

Aluma yavuze ko isi n’ibintu byose biyiriho n’uburyo imibumbe izenguruka mu kirere na byo ari ibimenyetso ko Imana iriho.

Aluma 30:44

Korihori yakomeje kwanga kwemera. Aluma yarababaye kubera ubugome bwa Korihori kandi yamuburiye ko ubugingo bwe bushobora kurimburwa.

Aluma 30:45–46

Korihori yakomeje gushaka ikimenyetso cyemeza ko Imana iriho. Aluma yavuze ko ikimeneyetso kivuye ku Mana kizaba ko Korihori atazabasha kuvuga.

Aluma 30:48–49

Nyuma y’aho Aluma avuze ibi, Korihori ntiyabashije kuvuga.

Aluma 30:50

Korihori yanditse ko yamenye ko iki kimenyetso ari icyavuye ku Mana kandi ko igihe cyose yari asanzwe azi ko Imana iriho. Yasabye Aluma gusenga no gukuraho uwo muvumo.

Aluma 30:52, 54

Aluma yari azi ko niba Korihori yashoboraga kuvuga yazongera akabeshya abantu. Aluma yavuze ko Nyagasani azanzura niba Korihori azongera kuvuga.

Aluma 30:55

Nyagasani ntabwo yasubije Korihori ijwi rye. Korihori yagiye inzu ku yindi, asabiriza ibyo kurya.

Aluma 30:56

Umucamanza mukuru yohereje ibaruwa mu gihugu hose ivuga ibyabaye kuri Korihori. Yabwiye abari baremeye Korihori bose kwihana. Abantu barihannye.

Aluma 30:57–58

Korihori yagiye kubana n’Abazoramu. Umunsi umwe mu gihe yariho asabiriza, yaranyukanyutswe kugeza apfuye.

Aluma 30:59