Pagkaraan ng Bagong Tipan

Nagsumikap ang mga pinuno ng Simbahan na magturo sa mga tao tungkol kay Jesucristo. Binisita nila ang mga Banal at lumiham sila sa kanila. Sumapi ang mga tao sa Simbahan sa maraming lupain. Ayaw ng masasamang tao na maniwala ang mga tao kay Jesucristo.

Ang Mga Gawa 6:2–4, 7; 11:19–21

Gusto ng masasamang tao na baguhin ang mga kautusan. Nakinig sa kanila ang ilang Banal. Maraming tumigil sa paniniwala kay Jesus at hindi sumunod sa Kanyang mga utos.

Mga Taga Galacia 1:6–8; Kay Tito 1:10–11; I Ni Juan 2:18–19

Pinatay ang mga Apostol at maraming Banal. Wala nang namuno sa Simbahan. Binawi ang mga susi ng priesthood sa daigdig. Wala nang mga propetang gagabay sa mga tao. Wala na sa daigdig ang Simbahan ni Jesucristo. Sinabi nina Apostol Pedro at Pablo na mangyayari ito.

Mateo 23:34; 24:8–10; Mga Taga Roma 8:36; I Mga Taga Corinto 4:9–13; I Ni Pedro 4:12; Jesus the Christ, 745–46

Daan-daang taon ang lumipas. Marami nang iba’t ibang simbahan. Wala silang mga Apostol o priesthood ng Diyos. Wala sa mga simbahan ang Simbahan ni Jesucristo. Pero sinabi ng mga propeta na pagkaraan ng maraming taon babalik na muli ang Simbahan ni Jesucristo sa daigdig.

Ang Mga Gawa 3:19–26; II Mga Taga Tesalonica 2:1–4; II Kay Timoteo 4:3–4

Noong 1820 isang batang nagngangalang Joseph Smith ang gustong makaalam kung aling simbahan ang Simbahan ni Jesucristo. Nagpunta siya sa kakahuyan malapit sa bahay niya at nanalangin. Hiniling niya sa Diyos na sabihin sa kanya kung aling simbahan ang tama.

Joseph Smith—Kasaysayan 1:3, 5, 10, 14–15

Nagpakita ang Ama sa Langit at si Jesucristo kay Joseph Smith. Sinabi ng Tagapagligtas kay Joseph na huwag sumapi sa anumang simbahan dahil wala sa mga ito ang Kanyang Simbahan.

Joseph Smith—Kasaysayan 1:17–19

Pinili ng Diyos na ibalik ang Simbahan ni Jesucristo sa daigdig sa pamamagitan ni Joseph Smith. Nagsugo ng mga anghel ang Diyos para ibigay kay Joseph Smith ang priesthood. Tinulungan Niya si Joseph na maisalin ang Aklat ni Mormon. Noong Abril 6, 1830, muling itinatag ang Simbahan ni Jesucristo sa daigdig.

Joseph Smith—Kasaysayan 1:33, 66–75

Tulad ng pagpili ni Jesus sa Labindalawang Apostol noong narito Siya sa daigdig, tinulungan ng Diyos si Joseph Smith na pumili ng Labindalawang Apostol para tulungan siyang pamunuan ang Simbahan. Ang mga lalaking ito ay binigyan ng kapangyarihang magturo ng ebanghelyo at gumawa ng mga himala.

Doktrina at mga Tipan 102:3; 107:22–23, 35

Gusto ni Jesus na malaman ng lahat ang tungkol sa Kanyang Simbahan. Sinabi Niya kay Joseph Smith na magpadala ng mga misyonero para ituro sa lahat ng tao ang tungkol sa Ang Simbahan ni Jesucristo ng mga Banal sa mga Huling Araw.

Doktrina at mga Tipan 1:18, 30

Ang Simbahan ni Jesucristo ng mga Banal sa mga Huling Araw ang simbahang itinatag ni Jesus noong nabuhay Siya sa daigdig.

Doktrina at mga Tipan 115:4