Kabanata 29
Lumakad si Jesus sa Tubig
Matapos pakainin ang 5,000, umakyat si Jesus sa isang bundok para manalangin. Tinawid ng Kanyang mga disipulo ang Dagat ng Galilea sakay ng bangka. Pagsapit ng gabi, nagsimulang umihip ang hangin, at tumaas ang mga alon.
Kinahatinggabihan, pumaroon si Jesus para sumama sa Kanyang mga disipulo. Naglakad Siya sa tubig para makarating sa bangka.
Nakita Siya ng mga disipulo na naglalakad sa tubig. Natakot sila. Akala nila isa Siyang multo. Nagsalita sa kanila si Jesus, “Ako nga; huwag kayong mangatakot.”
Gusto ring lumakad ni Pedro sa tubig. Pinapunta ni Jesus si Pedro sa Kanya. Bumaba ng bangka si Pedro. Naglakad siya sa tubig papunta sa Tagapagligtas.
Dahil malakas ang ihip ng hangin, natakot si Pedro. Nagsimula siyang lumubog sa tubig at isinigaw niya kay Jesus na iligtas siya.
Hinawakan ng Tagapagligtas ang kamay ni Pedro. Tinanong Niya si Pedro kung bakit kaunti ang pananampalataya niya.
Pagdating nina Jesus at Pedro sa bangka, tumigil ang bagyo. Sinamba ng lahat ng disipulo ang Tagapagligtas. Nalaman nila na Siya ang Anak ng Diyos.