፩ ለአንቺ እየተናገርኩ ሳለ፣ ልጄ ኤማ ስሚዝ፣ የጌታ አምላክሽን ድምጽ አድምጪ፤ እውነት እልሻለሁ፣ ወንጌሌን የሚቀበሉ ሁሉ በመንግስቴ ወንድ እና ሴት ልጆች ናቸው።

፪ ፈቀዴን በተመለከተ ራእዬን እሰጥሻለሁ፤ ታማኝ ከሆንሽ እና በምግባረ በጎነት መንገድ በፊቴ የምትጓዢ ከሆነ፣ ህይወትሽን እጠብቀዋለሁ እናም በፅዮን ርስትን ትቀበያለሽ።

፫ እነሆ፣ ኃጢአቶችሽ ተሰርየውልሻል፣ እናም እኔ የጠራሁሽ አንቺ የተመረጥሽ ሴት ነሽ።

፬ ስላላየሻቸው ነገሮች አታጉረምርሚ፣ ከአንቺ እና ከአለም ታግደዋል፣ ይህም ወደፊት በሚመጣው በእኔ ዘንድ ጥበብ ነው።

፭ የጥሪሽ ሀላፊነት ለባለቤትሽ ለአገልጋዬ ለጆሴፍ ስሚዝ፣ ዳግማዊ በመከራው ወቅት በአበረታች ቃላት፣ በትህትና መንፈስ፣ በመስጠት መጽናኛው እንድትሆኚው ነው።

፮ እናም በሚሄድበት ጊዜ አብረሽው ትሄጂያለሽ፣ እናም አገልጋዬን ኦሊቨር ካውድሪን ወደፈቀድኩበት ስፍራ እልከው ዘንድ፣ የሚጽፍለት ሰው ሳይኖር ለእርሱም ጸሀፊም ትሆኛለሽ።

፯ ቅዱሳን መጻህፍትን ለማብራራት እናም መንፈሴ እንደሰጠሽ ቤተክርስቲያኗን ታበረታቺ ዘንድ፣ በእርሱም እጅ ትሾሚያለሽ።

፰ እጁንም በራስሽ ላይ ይጭናል እናም መንፈስ ቅዱስን ትቀበያለሽ፣ እናም ጊዜሽ ለመጻፍ እና ብዙ ለመማር የተሰጠ ይሆናል።

፱ እናም ባለቤትሽ ቤተክርስቲያን ውስጥ ስለሚረዳሽ መፍርሀት የለብሽም፤ እንደ እምነታቸው፣ እንደ ፈቃዴ፣ ሁሉም ነገሮች ይገለጡላቸው ዘንድ፣ የእርሱ ጥሪ ለእነርሱ ነው።

፲ እናም እውነት እልሻለሁ የዚህን አለም ነገሮች ወደጎን ትተያቸዋለሽ እናም የተሻሉ ነገሮችን ትሺያለሽ።

፲፩ እናም እንዲሁም፣ በቤተክርስቲያኔ ውስጥ መኖራቸው ይህም ስለሚያስደስተኝ፣ እንደሚሰጥሽም መጠን የተቀደሱ መዝሙሮችን ትመርጪ ዘንድ ይሰጥሻል።

፲፪ ከልብ ከሆነ ዝማሬ ነፍሴ ትደሰታለችና፣ አዎን የጻድቅን መዝሙር በእኔ ዘንድ ጸሎት ነው፣ በረከትንም በራሳቸው ላይ በማድረግ ይመለስላቸዋልና።

፲፫ ልብሽን አቅኚ እናም ተደሰቺ፣ እና ከገባሽውም ቃል ኪዳን ጋርም ተጣበቂ።

፲፬ በትህትና መንፈስ ቀጥዪ፣ እናም ከትዕቢትም ተጠበቁ። ነፍስሽ በባልሽ እናም በእርሱ ላይ በሚመጣው ክብር ሀሴትን ታድርግ።

፲፭ ዘወትር ትእዛዛቴን ጠብቂ፣ እናም የጽድቅ አክሊልን ትቀበያለሽ። ይህንን ባታደርጊ፣ እኔ ወዳለሁበት ስፍራ መምጣት አትችዪምና።

፲፮ እናም እውነት፣ እውነት እልሻለሁ፣ ለሁሉም የሆነው ይህ የእኔ ድምጽ ነው። አሜን።