Kabanata 1
Paano Natin Nakuha ang Aklat ni Mormon
Noong si Joseph Smith ay 14 na taong gulang, maraming simbahan ang nagsabing ang mga ito ang totoo, at hindi niya malaman kung saan siya sasapi.
Isang araw, binasa ni Joseph ang Santiago 1:5 sa Biblia: “Ngunit kung nagkukulang ng karunungan ang sinuman sa inyo, ay humingi sa Diyos.” Kailangang malaman ni Joseph kung aling simbahan ang tama, kung kaya’t ipinasiya niyang magtanong sa Diyos.
Isang umaga ng tagsibol, pumunta si Joseph sa kakahuyan na malapit sa kanilang tahanan upang magdasal.
Habang nakaluhod siya at nagsisimulang magdasal, tinangka ni Satanas na pigilin siya. Nanalangin nang higit na mataimtim si Joseph, humihiling sa Ama sa Langit na tulungan siya.
Ang Ama sa Langit at si Jesucristo ay nagpakita kay Joseph sa isang haligi ng liwanag. Itinuro ng Ama sa Langit si Jesus at nagsabing: “Ito ang Aking Pinakamamahal na Anak. Pakinggan Siya!”
Nagtanong si Joseph kung aling simbahan ang sasapian niya. Sinabi sa kanya ni Jesus na huwag siyang sasapi sa alin man sa mga ito sapagkat ang mga ito lahat ay mali.
Nang sabihin ni Joseph sa ilang tao kung ano ang kanyang nakita at narinig, pinagtawanan siya nila. Ang mga namumuno sa maraming simbahang lokal ay pinag-usig siya.
Lumipas ang tatlong taon. Isang gabi, nagdasal si Joseph upang mapatawad sa kanyang mga kasalanan at upang malaman kung ano ang dapat niyang gawin.
Isang anghel na nagngangalang Moroni ang nagpakita kay Joseph at nagsabi sa kanya tungkol sa isang aklat na nakasulat sa mga laminang ginto. Kailangang isalin ni Joseph ang mga laminang ito sa Ingles.
Makaraang umalis si Moroni, inisip ni Joseph ang sinabi sa kanya ni Moroni. Dalawang ulit pang bumalik si Moroni nang gabing iyon.
Kinabukasan, pumunta si Joseph sa tuktok ng Burol Cumorah, na kanyang nakita sa pangitain. Doon ay may nakita siyang malaking bato. Iniangat niya ang bato sa pamamagitan ng isang patpat.
Sa ilalim ng malaking bato ay may isang kahon na yari sa bato. Nang tumingin si Joseph sa loob ng kahon, nakita niya ang mga laminang ginto.
Nagpakita si Moroni kay Joseph at sinabi sa kanya na huwag kunin ang mga lamina bagkus bumalik sa ganoon ding araw bawat taon sa loob ng apat na taon. Sa bawat pagpunta ni Joseph, tinuturuan siya ni Moroni.
Pagkatapos ng apat na taon, pinayagan sa wakas si Joseph na kunin ang mga laminang ginto. Ginamit niya ang Urim at Tummim upang isalin ang ilan sa kanila.
Ang ilang tagasulat ay tumulong kay Joseph sa pamamagitan ng pagsulat sa mga salita habang isinasalin niya ang mga ito mula sa mga laminang ginto.
Dinala ni Joseph ang naisaling mga salita sa isang manlilimbag at ipinagawa itong isang aklat.
History of the Church 1:71
Ang aklat ay tinawag na Aklat ni Mormon. Nagkukuwento ito tungkol sa mga taong tumira sa Amerika maraming taon na ang nakalilipas. Nagkukuwento rin ito tungkol kay Jesucristo, ang Anak ng Diyos.