Kabanata 14
Si Abinadi at si Haring Noe
Si Zenif ay isang mabuting hari ng isang grupo ng mga Nephita. Nang tumanda na siya, ang kanyang anak na si Noe ang naging hari.
Si Noe ay hindi mabuting hari katulad ng kanyang ama. Siya ay masama at hindi sumusunod sa mga kautusan ng Diyos.
Pinilit niya ang kanyang mga tao na bigyan siya ng bahagi ng kanilang butil, mga hayop, ginto, at pilak.
Ginagawa ito ni Haring Noe dahil tamad siya. Pinilit niya ang mga Nephita na ibigay sa kanya ang lahat ng bagay na kailangan niya upang mabuhay.
Pinalitan niya ang mabubuting saserdote na tinawag ng kanyang ama ng masasamang saserdote. Tinuruan ng masasamang saserdoteng ito ang mga tao na magkasala.
Nagpatayo ng maraming magagandang gusali si Haring Noe, kabilang na ang isang malaking palasyo na may trono. Ang mga gusali ay pinalamutian ng ginto, pilak, at mamahaling kahoy.
Minahal ni Haring Noe ang mga kayamanan na kinuha niya mula sa kanyang mga tao. Pinalipas niya at ng kanyang masasamang saserdote ang panahon sa pamamagitan ng pag-inom ng alak at paggawa ng masama.
Nagpadala ang Diyos ng isang propetang nagngangalang Abinadi sa mga tao ni Noe. Binigyan sila ng babala ni Abinadi na kung hindi sila magsisisi, magiging alipin sila ng mga Lamanita.
Nang marinig ni Haring Noe ang sinabi ni Abinadi, nagalit siya. Nagpadala siya ng mga kalalakihan upang dalhin si Abinadi sa palasyo upang patayin niya.
Dinala si Abinadi sa hari. Maraming itinanong sa kanya si Haring Noe at ang mga saserdote nito. Tinangka nilang linlangin siya na magsalita ng mali.
Hindi natakot si Abinadi na sagutin ang kanilang mga tanong. Alam niyang tutulungan siya ng Diyos. Nagulat ang mga saserdote sa mga sagot ni Abinadi.
Nagalit si Haring Noe at ipinag-utos sa kanyang mga saserdote na patayin si Abinadi. Sinabi ni Abinadi na kung hahawakan nila siya, papatayin sila ng Diyos.
Pinangalagaan ng Espiritu Santo si Abinadi upang matapos niyang sabihin ang nais ng Panginoon na sabihin niya. Nagningning ang mukha ni Abinadi. Natakot ang mga saserdote na hawakan siya.
Sinabi ni Abinadi sa mga tao ang tungkol sa kanilang kasamaan nang may kapangyarihan mula sa Diyos. Binasa niya sa kanila ang mga kautusan ng Diyos.
Sinabi niya sa kanila na si Jesucristo ay isisilang sa daigdig. Nang dahil kay Jesus ang mga tao ay maaaring makapagsisi, mabuhay na muli, at mabuhay kasama ng Diyos.
Sinabi ni Abinadi sa mga tao na magsisi at maniwala kay Jesucristo o hindi sila maliligtas.
Si Haring Noe at ang lahat ng kanyang saserdote, maliban sa isa, ay hindi naniwala kay Abinadi. Sinabi ni Noe sa mga saserdote na patayin si Abinadi. Iginapos nila siya at itinapon sa bilangguan.
Ang nag-iisang saserdote na naniwala kay Abinadi ay nagngangalang Alma. Hiniling niya kay Haring Noe na palayain si Abinadi.
Nagalit ang hari kay Alma at pinalayas siya. Pagkatapos ay ipinadala niya ang kanyang mga tagapaglingkod upang patayin siya. Tumakbo si Alma at nagtago, at hindi siya kailanman natagpuan ng mga tagapaglingkod.
Pagkatapos ng tatlong araw sa bilangguan, si Abinadi ay muling iniharap kay Haring Noe. Sinabi ng hari kay Abinadi na bawiin ang sinabi niya laban sa kanya at sa kanyang mga tao.
Sinabi ni Haring Noe kay Abinadi na kung hindi niya babawiin ang lahat ng kanyang sinabi, papatayin siya.
Alam ni Abinadi na katotohanan ang sinabi niya. Nakahanda siyang mamatay kaysa bawiin ang ipinasasabi sa kanya ng Diyos.
Ipinag-utos ni Haring Noe sa kanyang mga saserdote na patayin si Abinadi. Iginapos nila siya, hinagupit, at sinunog hanggang mamatay. Bago siya namatay, sinabi ni Abinadi na si Haring Noe ay mamamatay din sa pamamagitan ng apoy.
Ang ilan sa mga Nephita ay lumaban kay Haring Noe at tinangkang patayin siya. Ang hukbo ng mga Lamanita ay dumating din upang makipagdigma sa hari at sa kanyang mga tagasunod.
Ang hari at ang kanyang mga tagasunod ay tumakas mula sa mga Lamanita, ngunit naabutan sila ng mga Lamanita at sinimulang patayin sila. Sinabi ng hari sa kanyang mga tao na iwan ang kanilang mga mag-anak at magpatuloy sa pagtakas.
Marami sa kalalakihan ang hindi umalis. Nahuli sila ng mga Lamanita.
Ang karamihan sa kalalakihan na tumakas kasama ni Haring Noe ay nagsisi. Nais nilang bumalik at tulungan ang kanilang mga asawa at anak at ang kanilang mga tao.
Ayaw ni Haring Noe na pabalikin ang mga kalalakihan sa kanilang mga mag-anak. Pinag-utusan niya sila na manatiling kasama niya.
Nagalit ang mga kalalakihan kay Haring Noe. Sinunog nila siya hanggang mamatay, tulad ng sinabi ni Abinadi. Pagkatapos ay bumalik sila sa kanilang mga mag-anak.