Kabanata 34
Si Helaman at ang 2,000 Kabataang Mandirigma
Nangako sa Diyos ang mga tao ni Ammon na hindi na sila muling makikipaglaban. Nanirahan sila malapit sa mga Nephita, at ipinagtatanggol sila ng mga Nephita.
Nang lusubin ng mga kalaban ng mga tao ni Ammon ang mga Nephita, ninais ng mga tao ni Ammon na sirain ang kanilang pangako at tulungan ang mga Nephita na makipaglaban.
Hindi nais ni Helaman at ng iba pang mga pinunong Nephita na sirain ng mga tao ni Ammon ang kanilang pangako sa Diyos.
Ang mga batang anak na lalaki ng mga tao ni Ammon ay walang pangakong ganito. Nais nilang tumulong sa hukbo ng mga Nephita na ipaglaban ang kanilang kalayaan.
Dalawang libo sa mga kabataang lalaking ito ang pumili na ipagtanggol ang kanilang bayan. Hiniling nila kay Helaman na maging pinuno nila.
Ang mga kabataang lalaking ito ay magigiting, matatapang, at malalakas. Matatapat at mapagkakatiwalaan din sila, at tumutupad sila sa mga kautusan ng Diyos.
Pinamunuan ni Helaman sa pakikipaglaban ang kanyang 2,000 kabataang mandirigma. Tinawag niya silang kanyang mga anak, at tinawag nila siyang kanilang ama.
Bagamat hindi pa nakipaglaban ang mga anak ni Helaman, hindi sila natakot. Tinuruan sila ng kanilang mga ina na magkaroon ng pananampalataya sa Diyos at malaman na nilang tutulungan niya sila.
Nakipaglaban si Helaman at ang kanyang hukbo nang ilang ulit sa mga Lamanita. Sinunod ng mga kabataang lalaking ito ang lahat ng utos ni Helaman.
Matapang silang nakipaglaban at tumulong upang maitaboy papalayo ang mga kaaway. Pagkatapos ng labanan, natuklasan ni Helaman na ang lahat ng kanyang anak ay nasaktan ngunit walang isa man ang napatay.
Isa itong himala. Masayang-masaya si Helaman. Alam niyang pinangalagaan ang mga kabataang lalaking ito dahil sa kanilang malaking pananampalataya sa Diyos.