Kabanata 18
Nagsisi ang Nakababatang Alma
Ginawa ni Haring Mosias si Alma na pinuno ng Simbahan sa Zarahemla. Pagkatapos ay pumili si Alma ng ibang kalalakihan upang tulungan siyang turuan ang mga Nephita.
Nag-alala sina Alma at Haring Mosias dahil ang mga hindi nananampalataya ay nagpapahirap sa mga kasapi ng Simbahan dahil sa kanilang mga paniniwala.
Si Alma ay may anak na lalaki na nagngangalang Alma. Ang Nakababatang Alma ay hindi naniniwala sa mga turo ng kanyang ama at naging masamang tao.
Ang Nakababatang Alma at ang apat na anak na lalaki ni Haring Mosias ay lumaban sa Simbahan. Nahimok nila ang maraming tao na iwan ang Simbahan at maging masama.
Nanalangin si Alma na matutuhan ng kanyang anak ang katotohanan at magsisi.
Nagpatuloy ang Nakababatang Alma at ang mga anak na lalaki ni Haring Mosias sa pagsisikap na sirain ang Simbahan.
Isang araw, isang anghel ang nagpakita sa kanila. Nagsalita ang anghel sa isang malakas na tinig na nagpayanig sa lupa.
Lubos na natakot ang limang kabataang lalaki kung kaya’t nabuwal sila sa lupa. Sa simula hindi nila maunawaan kung ano ang sinasabi ng anghel.
Dumating ang anghel bilang pagtugon sa mga panalangin ng mga kasapi ng Simbahan. Tinanong ng anghel ang Nakababatang Alma kung bakit nilalabanan niya ang Simbahan.
Yumayanig ang lupa habang sinasabihan ng anghel ang Nakababatang Alma na tumigil sa pagtatangkang sirain ang Simbahan.
Ang Nakababatang Alma at ang mga anak na lalaki ni Mosias ay muling nabuwal. Nakakita sila ng anghel, at alam nila na ang kapangyarihan ng Diyos ang nagpayanig sa lupa.
Lubhang namangha ang Nakababatang Alma kung kaya’t hindi siya nakapagsalita. Lubos siyang nanghina kung kaya’t ni hindi niya naigalaw ang kanyang mga kamay.
Binuhat ng mga anak na lalaki ni Mosias ang Nakababatang Alma patungo sa kanyang ama at sinabi sa kanya ang lahat nang nangyari sa kanila.
Naging masaya si Alma. Alam niyang tinugon ng Diyos ang kanyang mga panalangin.
Tinawag ni Alma ang maraming tao upang makita kung ano ang ginawa ng Panginoon para sa kanyang anak at sa apat na anak na lalaki ni Mosias.
Si Alma, kasama ang ilang pinuno ng Simbahan, ay nagayuno at nanalangin at hiniling sa Diyos na tulungan ang Nakababatang Alma na muling lumakas.
Pagkaraan ng dalawang araw at gabi, muling nakapagsalita at nakakilos ang Nakababatang Alma.
Sinabi niya sa mga tao na nagsisi na siya sa kanyang mga kasalanan at siya ay pinatawad ng Diyos.
Itinuro niya na ang bawat isa ay dapat na maging mabuti upang makapasok sa kaharian ng Diyos. Sinabi rin niya ang matinding hirap na kanyang pinagdusahan dahil sa kanyang mga kasalanan.
Naging masaya ang Nakababatang Alma dahil siya ay nagsisi at pinatawad ng Diyos. Alam niyang mahal siya ng Diyos.
Ang Nakababatang Alma at ang mga anak na lalaki ni Haring Mosias ay nagsimulang magturo ng katotohanan sa buong lupain, na sinasabi sa lahat kung ano ang kanilang nakita at narinig.
Sinikap nilang iwasto ang mali na kanilang nagawa. Ipinaliwanag nila sa mga tao ang mga banal na kasulatan at itinuro sa kanila ang tungkol kay Jesucristo.
Binasbasan ng Diyos ang Nakababatang Alma at ang mga anak na lalaki ni Mosias sa kanilang pagtuturo ng ebanghelyo. Maraming tao ang nakinig sa kanila at naniwala.