Kabanata 47
Binasbasan ni Jesucristo ang Kanyang mga Disipulo
Isang araw, nang ang mga disipulo ay magkakasamang nag-aayuno at nananalangin, lumapit sa kanila si Jesucristo.
Tinanong siya ng mga disipulo kung ano ang ipapangalan nila sa Simbahan. Sinabi ni Jesus na dapat itong ipangalan sa kanya sapagkat sa kanya ang Simbahang ito.
Ipinaliwanag ni Jesus sa kanyang mga disipulo na ipinadala siya sa lupa ng Ama sa Langit upang ibigay ang kanyang buhay sa lahat ng tao.
Sinabi niya na ang bawat isa na nagsisisi, nabinyagan sa kanyang pangalan, at sumusunod sa kanyang mga kautusan ay ituturing na walang kasalanan sa harap ng Ama sa Langit.
Sinabi ng Tagapagligtas sa mga disipulo na gawin ang mga bagay na nakita nilang ginawa niya. Ibinigay niya ang halimbawa para sa kanila.
Sinabi rin niya sa kanila na isulat kung ano ang kanilang nakita at narinig upang malaman ang mga ito ng iba.
Tinanong ni Jesus ang kanyang mga disipulo kung ano ang nais nila sa kanya. Siyam sa kanila ang nagnais na makasama niya pagkatapos ng kanilang buhay sa lupa.
Ipinangako ni Jesus sa kanila na pagdating nila ng 72 taong gulang, paroroon sila sa kanya sa langit.
Ang tatlo pang disipulo ay hindi humiling ng kung ano ang nais nila, ngunit alam ito ni Jesus. Nais nilang manatili sa lupa at magturo ng ebanghelyo hanggang sa bumalik si Jesus.
Ipinangako ng Tagapagligtas sa kanila na hindi sila makararamdam ng sakit o kalungkutan at kamatayan. Ituturo nila sa mga tao ang ebanghelyo hanggang sa kanyang pagbalik.
Hinipo ni Jesus ang lahat ng disipulo maliban sa tatlo na mananatili sa lupa. Pagkatapos ay umalis na siya.
Ang tatlong disipulo ay napasalangit, kung saan sila ay nakakita at nakarinig ng maraming kamanghamanghang bagay. Higit nilang naunawaan ang mga bagay ng Diyos.
Nagbagong-anyo ang kanilang katawan upang hindi sila mamatay.
Bumalik ang tatlong disipulo sa lupa at nagsimulang mangaral at magbinyag.
Itinapon ng masasamang Nephita ang tatlong disipulo sa bilangguan at malalalim na hukay, ngunit tinulungan sila ng kapangyarihan ng Diyos na makatakas.
Nang ihagis sila sa mga hurno at mga lungga na may mababangis na hayop, iningatan din sila ng kapangyarihan ng Diyos.
Nagpatuloy ang tatlong disipulo sa pangangaral ng ebanghelyo ni Jesucristo sa mga Nephita. Nangangaral pa rin sila ng kanyang ebanghelyo.