Iteraera
Te Uea e angan Iakobwa te ara ae Iteraera, are natin Itaaka ao tibun Aberaam n te O Tetemanti (KB 32:28; 35:10). Te ara ae Iteraera e kona n taekinaki ibukin Iakobwa, kanoana, ke nakon te abanuea ake a bwainna kanoana n te tai teuana ni bongin te Nu Tetemanti (2Tamu. 1:24; 23:3). I mwin kairakia tibun Iteraera ni kainaomataki man te tautoronaki i Aikubita iroun Mote (Otin. 3–14), a tautaekanaki irouia taan moti n te maan ae riaon tenibubua te ririki. Ni moanaki iroun te Uea ae Tauro, Iteraera ae katiteuanaki e tautaekanaki irouia ueea ni karokoa maten Toromon, ngke a birinako tebwina baronga mai iroun Reoboam ni katea te botanaomata ae okoro. I mwiin are e bwenauaki uean Iteraera, baronga ake mai meang, are mwakorona ae abwabwaki riki, a kateimatoa te ara ae Iteraea, ao abanuea ake mai maiaki aranaki bwa Iuta. Te aba ae Kanaan e aranaki naba bwa Iteraera n te bong aei. N te anga teuana, Iteraea nanona bwa te tia kakoaua Kristo (Rom 10:1; 11:7; Kara. 6:16; Ebeto 2:12).
Ana baronga Iteraera ake tengaun ma uabaronga
Tibun Aberaam ae Iakobwa, are e bitaki arana nakon Iteraera, iai tengaun ma uoman natina mwaane. Kanoaia a ataaki bwa ana baronga Iteraera ake tengaun ma uoman ke tibun Iteraera. Aikai baronga ake tengaun ma uoman: Reuben, Timeon, Rewi, Iuta, Itakara, ao Teburun (natin Iakobwa ao Rea); Tan ao Nabetari (natin Iakobwa ao Birea); Kata ao Atera (natin Iakobwa ao Tirebwa); Iotebwa ao Beniamina (natin Iakobwa ao Rakera) (KB 29:32–30:24; 35:16–18).
Iakobwa e angania taan kairiri n tatabemania n te baronga te kakabwaia i mwain matena (KB 49:1–28). Ibukin rongorongona riki tara araia natin Iakobwa n tatabemania.
Reuben, ana moan nati te mwaane moan buun Iakobwa, ae Rea, e kabua kabwaiana ni karineana ni karimoa ao ana bwaibwai ae uoua tibwana ibukin waaki aika aki riai (KB 49:3–4). Karinean te karimoa ngkanne e a nakon Iotebwa are ana moan nati te mwaane buun Iakobwa are te kauoman, ae Rakera (1Rong. 5:1–2). Rewi, are ana baronga ae rineaki iroun te Uea bwa a na beku bwa Ana minita n te nakoanibonga, a aki karekea te bwaibwai ibukin aia wewete ae onoti bwa a na mwakuri ni ibuobuoki i buakoia baronga ni kabane. Aio e kariaia tibwan Iotebwa ake uoua bwa a na tibwaki irouia natin Iotebwa, Eberaim ao Manate (1Rong. 5:1; Iere. 31:9), ake a warekaki bwa ana baronga Iteraera aika kaokoro (ARIT, KB 48:5–6 [Abentekiti]).
Kaain ana baronga Iuta a na riki bwa taan tautaeka ni karokoa rokon te Mesia (KB 49:10; ARIT, KB 50:24). Ni boong aika kaitira te baronga ae Eberaim e na reke te tibwanga irouia ibukin uotakin rongorongon manga kaokan te euangkerio nakon te aonaba ao ikotakin Iteraera are maenako (TK 33:13–17). E na roko te tai are rinanon ana euangkerio Iesu Kristo, Eberaim e na karekea te nakoa ni kairiri ni katiteuanaia ana baronga Iteraera ni kabane (Itaia 11:12–13; R&B 133:26–34).
Kamaenakoan Iteraera
Te Uea e kamaenakoia ao e karawawataia ana baronga Iteraera ake tebwi ma uoua ibukin aki raoiroia ao aia kakaitara. E ngae n anne, te Uea e kabongana kamaenakoaia Ana botanaomata are E rineia i buakoia botanaomata n te aonaba ni kakabwaiaia botanaomata akekei.
Ikotakin Iteraera
Te bata are Iteraera e na ikotaki ni boong aika kaitira i mwain rokon Kristo (TOni. 1:10). Te Uea e ikotiia Ana botanaomata ae Iteraera ngkana a butimwaeia ao a kawakin Ana tua nako.
Ana baronga Iteraera ake tebwina ake a bua
Ana baronga Iteraera ake tebwina a kariki abanuean Iteraera ake i meang ao a uotaki nakon te tautoronaki i Aturia n 721 I.K. N te tai arei a nako nakon “aaba ake i meang” ao a bua nakon aia atatai ake tabeman. Ni boong aika kaitira a na manga oki.