Pasiuna sa Manwal sa Magtutudlo sa Doktrina ug mga Pakigsaad (Religion 324–325)

Ang Atong Katuyoan

Ang Tumong sa Seminaries and Institutes of Religion namahayag:

“Ang atong katuyoan mao ang pagtabang sa kabatan-onan ug sa mga young adult nga makasabut ug mosalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug moandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], 1).

Aron makab-ut ang atong tumong, motudlo kita sa mga estudyante sa doktrina ug mga baruganan sa ebanghelyo nga makita diha sa mga kasulatan ug sa mga pulong sa mga propeta. Ang doktrina ug mga baruganan gitudlo sa paagi nga mogiya ngadto sa pagsabut ug pagkalig-on. Kita motabang sa mga estudyante nga sila makatuman sa ilang tahas sa proseso sa pagkat-on ug moandam kanila sa pagtudlo sa ebanghelyo ngadto sa uban.

Aron sa pagtuman niini nga mga tumong, ikaw ug ang mga estudyante nga imong gitudloan giawhag sa paglakip sa mosunod nga Mga Sukaranan sa Pagtudlo ug Pagkat-on sa Ebanghelyo samtang dungan kamo nga magtuon sa mga kasulatan:

• Motudlo ug magkat-on pinaagi sa Espiritu.

• Mougmad og kahimtang sa pagkat-on nga may gugma, pagtahud, ug katuyoan.

• Magtuon sa mga kasulatan matag adlaw, ug magbasa sa teksto sa kurso.

• Mosabut sa konteksto ug sulod sa mga kasulatan ug sa mga pulong sa mga propeta.

• Moila, mosabut, ug mobati sa kamatuoran ug importansya, ug mogamit sa doktrina ug mga baruganan sa ebanghelyo.

• Mopasabut, mopaambit, ug mopamatuod sa doktrina ug mga baruganan sa ebanghelyo.

• Motuon og maayo sa importanting mga tudling ug Sukaranang mga Doktrina.

Ang mga sugyot sa pagtudlo niini nga manwal nagpresentar og mga paagi sa pagkab-ot niining mga resulta sa imong pagtudlo. (Timan-i nga ang Mga Sukaranan sa Pagtudlo ug Pagkat-on sa Ebanghelyo kinahanglan nga tan-awon isip mga resulta imbis nga mga pamaagi sa pagtudlo.) “Kon maimplementar sa maalamong paagi ug mahiuyon sa usag usa, kini nga mga sukaranan makatampo ngadto sa abilidad sa mga estudyante nga makasabut sa mga kasulatan ug sa doktrina ug mga baruganan nga anaa niini. Makaawhag usab kini sa mga estudyante nga mahimong aktibo sa ilang tahas sa pagkat-on sa ebanghelyo ug makapalambo sa abilidad sa mga estudyante sa pagsunod sa ebanghelyo ug sa pagtudlo niini ngadto sa uban” (Gospel Teaching and Learning, 10).

Pagpangandam sa Leksyon

Ang Ginoo mimando niadtong kinsa gitawag sa pagtudlo sa Iyang ebanghelyo nga “magtudlo sa mga baruganan sa akong ebanghelyo” (D&P 42:12). Siya midugang sa pagsugo nga kini nga mga kamatuoran kinahanglang itudlo ingon nga “gimandoan pinaagi sa Espiritu,” nga “ihatag … pinaagi sa pag-ampo diha sa hugot nga pagtuo” (D&P 42:13–14). Samtang nag-andam ka sa matag leksyon, magmainampuon sa pagtinguha sa giya sa Espiritu aron sa pagtabang kanimo nga makasabut sa mga kasulatan ug sa doktrina ug mga baruganan nga anaa niini. Sa samang paagi, sunda ang mga pag-aghat sa Espiritu samtang nagplano ka unsaon sa pagtabang sa imong mga estudyante nga makasabut sa mga kasulatan, matudloan pinaagi sa Espiritu Santo, ug mobati og tinguha sa paggamit sa unsay ilang nakat-unan.

Niini nga kurso, ang Doktrina ug mga Pakigsaad mao ang nag-una nimong teksto sa imong pagpangandam ug pagtudlo. Magmainampuon sa pagtuon sa mga seksyon o mga bersikulo nga imong itudlo. Tinguhaa nga makasabut sa konteksto kalabut sa kasaysayan ug sa sulod sa scripture block. Samtang mapamilyar ka sa konteksto ug sulod sa matag scripture block, hibaloi ang doktrina ug mga baruganan nga gitudlo niini, ug desisyuni kon hain niini nga mga kamatuoran ang labing importante nga masabtan ug magamit sa imong mga estudyante. Kon matino na nimo kon unsay imong tutukan, ideterminar unsa nga mga paagi, mga istratehiya, ug mga kalihokan ang makatabang kaayo sa imong mga estudyante sa pagkat-on ug paggamit sa sagradong mga kamatuoran nga anaa diha sa mga kasulatan.

Kini nga manwal ug ang katukma nga Manwal sa Estudyante sa Doktrina ug mga Pakigsaad gidesinyo aron makatabang kanimo niini nga proseso. Ribyuha og maayo ang materyal sa leksyon nga motukma sa scripture block nga imong itudlo. Kini nga materyal makatabang kanimo nga makasabut sa konteksto ug sulod sa matag scripture block ug makatabang kanimo sa pag-ila sa pipila sa doktrina ug mga baruganan nga anaa niini. Ang mga sugyot sa pagtudlo nga anaa niini nga manwal makatabang usab kanimo ug sa imong mga estudyante nga malakip ang daghan sa Mga Sukaranan sa Pagtudlo ug Pagkat-on sa Ebanghelyo ngadto sa matag leksyon. Mahimo kang mopili nga gamiton ang tanan o pipila sa mga sugyot alang sa usa ka scripture block, o mahimo nimong ipahiangay ang gisugyot nga mga ideya sumala sa direksyon sa Espiritu ug sa mga panginahanglan ug mga kahimtang sa mga estudyante nga imong tudloan. Kon mopahiangay sa mga sugyot sa pagtudlo o mopuli niini og kaugalingon nimong mga ideya, siguroa nga makonsiderar hain nga sukaranang resulta ang tuyo nga ipahinabo sa usa ka partikular nga sugyot sa pagtudlo, ug pagpili og alternatibong ideya sa pagtudlo nga makatabang sa pagpahinabo sa samang resulta.

Importante nga imong tabangan ang mga estudyante sa pagtuon sa tibuok scripture block sa matag leksyon. Ang pagbuhat niini makatabang sa mga estudyante nga masabtan ang hingpit nga mensahe nga tuyo sa Ginoo nga mahatag, pinaagi sa Iyang propeta. Hinoon, samtang magplano ka sa imong leksyon, mahimong madiskubrihan nimo nga wala kay igong panahon sa usa ka klasehan aron magamit ang tanang mga sugyot sa pagtudlo diha sa manwal. Tinguhaa ang giya sa Espiritu ug mainampuong ikonsiderar ang mga panginahanglan sa imong mga estudyante samtang imong ideterminar kon unsa nga bahin sa scripture block ang hatagan og gibug-aton aron matabangan ang mga estudyante nga mobati sa kamatuoran ug kaimportante sa mga kamatuoran sa ebanghelyo ug gamiton kini diha sa ilang kinabuhi. Kon kulang ang oras, mahimo nimong ipahiangay ang ubang bahin sa leksyon pinaagi sa daklit nga pag-summarize og usa ka grupo sa mga bersikulo o pinaagi sa paggiya sa mga estudyante nga daling mailhan ang usa ka baruganan o doktrina sa dili pa mopadayon sa sunod nga grupo sa mga bersikulo.

Kon mokonsiderar unsaon sa pagpahiangay sa mga materyal sa leksyon, siguroa nga masunod kini nga tambag gikan ni Elder Dallin H. Oaks sa Korum sa Napulog Duha ka mga Apostoles:

“Si Presidente Packer kanunayng nagtudlo, sa akong pandungog, nga hangupon nato og una, dayon atong ipahiangay. Kon hingpit kita nga pamilyar sa gitakda nga leksyon nga atong ihatag, nan makasunod kita sa Espiritu aron sa pagpahiangay niini” (“A Panel Discussion with Elder Dallin H. Oaks” [Seminaries and Institutes of Religion satellite broadcast, Ago. 7, 2012], LDS.org).

Panahon sa imong pagpangandam sa leksyon, mahimo nimong gamiton ang Notes ug Journal tools diha sa LDS.org o diha sa Gospel Library nga app alang sa mobile nga mga device. Makagamit ka niini nga mga himan sa pagmarka sa mga kasulatan, mga pakigpulong sa komperensya, mga artikulo sa mga magasin sa Simbahan, ug mga leksyon. Makahimo ka usab sa pagdugang ug pag-save og mga notes aron magamit atol sa imong mga leksyon. Aron mas makat-on pa kon unsaon sa paggamit niini nga mga himan, tan-awa sa Notes and Journal Help nga page sa LDS.org.

Giunsa Pag-organisar Kini nga Manwal

Ang Religion 324–325 gidesinyo isip duha ka semester nga kurso. Ang Religion 324 naggiya sa mga estudyante sa pagtuon sa Doktrina ug mga Pakigsaad 1–76. Ang Religion 325 naglangkob sa Doktrina ug mga Pakigsaad 77–138 ug sa Opisyal nga Pahayag 1 ug 2. Kini nga manwal sa magtutudlo naglakip og 56 ka leksyon, 28 alang sa matag semester sa Doktrina ug mga Pakigsaad. Ang matag leksyon gidesinyo nga itudlo sulod sa 50 ka minuto nga sesyon sa klase. Kon ang imong klase mag-abut kaduha matag semana, motudlo ka og usa ka leksyon matag sesyon sa klase. Kon ang imong klase mag-abut kausa lang sa matag semana sulod sa 90 hangtud sa 100 ka minuto, girekomendar nga motudlo ka og duha ka leksyon alang sa matag sesyon sa klase.

Ang mga leksyon niini nga manwal gilangkuban sa mosunod nga mga parte:

Pasiuna

Ang matag leksyon magsugod sa usa ka mubo nga pasiuna sa seksyon o mga seksyon sa Doktrina ug mga Pakigsaad nga pagatun-an niana nga leksyon. Ang pasiuna naghatag og usa ka summary sa konteksto kalabut sa kasaysayan ug sa sulod sa matag seksyon. Kini nga mga pasiuna, nga makita usab sa manwal sa estudyante, mohatag kanimo ug sa imong mga estudyante og sukaranan nga kinatibuk-ang pagpasabut sa mga tudling sa kasulatan nga gitun-an sa matag leksyon.

Timeline [Iskedyul]

Ang matag pasiuna giubanan og timeline. Kini nga timeline makatabang kanimo sa pagsabut sa konteksto sa matag seksyon sa Doktrina ug mga Pakigsaad pinaagi sa pagpakita kon kanus-a kini nadawat kumpara sa ubang mga panghitabo sa kasaysayan sa Simbahan.

Mga Sugyot alang sa Pagtudlo

Ang kinadak-ang bahin [main body] sa matag leksyon naglangkob og giya ug mga ideya kon unsaon nimo sa pagtudlo ang piho nga tudling sa kasulatan, lakip ang mga pangutana, mga kinutlo, mga diagram, mga kalihokan, ug impormasyon sa kasaysayan. Kini nga mga ideya nagpakita kon unsaon sa paglakip sa mga Sukaranan sa Pagtudlo ug Pagkat-on sa Ebanghelyo diha sa imong pagtudlo aron matabangan ang mga estudyante nga mapalawuman ang ilang pagkakabig ngadto sa Ginoo ug sa Iyang ebanghelyo.

Grupo sa mga Bersikulo ug Summary base sa Konteksto

Ang matag leksyon niini nga manwal nakatutok sa usa ka scripture block imbis sa usa ra ka partikular nga konsepto, doktrina, o baruganan. Kini nga han-ay makatabang kanimo ug sa imong mga estudyante sa pagtuon sa mga kasulatan sa pasunod nga paagi ug sa pagkonsiderar sa konteksto sa doktrina ug mga baruganan kon natural kini nga motumaw gikan sa teksto sa kasulatan. Ang scripture block alang sa matag leksyon sa kasagaran gibahin ngadto sa ginagmay nga mga segment, o mga grupo sa bersikulo, nga nagsunod og piho nga hugpong sa mga ideya o nakatutok sa usa ka piho nga hilisgutan. Ang matag usa niini nga mga segment magsugod sa usa ka pakisayran sa kasulatan nga naglista sa mga bersikulo nga gilakip niana nga segment, pagasundan sa summary sumala sa konteksto sa mga panghitabo o mga pagtulun-an nga gihisgutan niana nga grupo sa mga bersikulo.

Doktrina ug mga Baruganan

Diha sa sulod sa matag leksyon, makita nimo ang mahinungdanong doktrina ug mga baruganan nga gipaklaro pinaagi sa pagpabaga sa letra. Kini nga doktrina ug mga baruganan gitino diha sa kurikulum tungod kay (1) nagpakita kini sa importanting mensahe sa scripture block, (2) piho kining magamit ngadto sa mga panginahanglan ug mga kahimtang sa mga estudyante, o (3) mahinungdanon kini nga mga kamatuoran nga makatabang sa mga estudyante aron mapalawuman ang ilang relasyon ngadto sa Ginoo. Si Presidente Henry B. Eyring sa Unang Kapangulohan mitambag: “Samtang mag-andam kamo sa usa ka leksyon, pangita diha niini og makapakabig nga mga baruganan. … Ang makapakabig nga baruganan mao kanang moresulta ngadto sa pagkamasulundon sa kabubut-on sa Dios” (“Converting Principles” [gabii uban ang usa ka general authority, Peb. 2, 1996], 1). Hibaloi nga kini nga manwal wala mosulay sa pag-ila sa tanang doktrina ug mga baruganan nga mahimong makita diha sa Doktrina ug mga Pakigsaad.

Ang mga sugyot sa pagtudlo niini nga manwal naghatag sa mga esudyante og daghang oportunidad sa pag-ila sa doktrina ug mga baruganan diha sa mga kasulatan. Ang mga leksyon mahimong mosugyot usab og mga okasyon diin ikaw isip magtutudlo mopili sa pag-ila og usa ka doktrina o baruganan. Samtang ang mga estudyante moila og mga kamatuoran nga ilang nadiskubrihan, pag-amping nga dili mosugyot nga sayop ang mga tubag sa mga estudyante tungod lang kay ang mga pulong nga ilang gigamit sa pagpahayag niini lahi kay sa gigamit sa manwal o tungod kay sila miila og usa ka kamatuoran nga wala mahisguti diha sa kurikulum. Hinoon, kon ang pamahayag sa usa ka estudyante mahimo pa nga mas masakto o dili sakto sumala sa doktrina, ikonsiderar og maayo kon unsaon nimo nga maklaro o makorihian sa malumo nga paagi ang iyang pagsabut samtang imentinar ang palibut nga dunay gugma ug pagsalig.

Mga Tabang sa Pagtudlo

Ang mga tabang sa pagtudlo gilakip uban sa mga sugyot sa pagtudlo diha sa tanang mga leskyon. Kini nga mga tabang sa pagtudlo nagpasabut sa Mga Sukaranan sa Pagtudlo ug Pagkat-on sa Ebanghelyo ug naghatag og giya sa epektibong paggamit sa nagkalain-laing mga pamaagi, mga kahanas, ug mga istratehiya sa pagtudlo. Samtang masabtan nimo ang mga baruganan nga anaa sa mga tabang sa pagtudlo, pangita og mga paagi nga kanunay kini nga magamit sa imong pagtudlo.

Dugang nga mga Ideya sa Pagtudlo

Ang dugang nga mga ideya sa pagtudlo makita diha sa katapusan sa ubang mga leksyon. Naghatag kini og mga sugyot sa pagtudlo sa doktrina ug mga baruganan nga mahimong wala ipaila o ipasabut og maayo diha sa kinadak-ang bahin sa leksyon. Sa pipila ka mga sitwasyon, nagtanyag kini og alternatibo nga paagi sa pagtudlo sa usa ka scripture block. Kinahanglang dili ka mobati nga obligado nga mogamit niining mga ideya sa pagtudlo. Kinahanglang mohimo ka og desisyon kon mogamit ba niini nga mga sugyot base sa oras nga gitagal, sa mga panginahanglan sa imong mga estudyante, ug sa giya sa Espiritu.

Ang 2013 nga Edisyon sa mga Kasulatan

Ang impormasyon niini nga manwal gibase sa 2013 nga edisyon sa mga kasulatan nga gimantala sa Ang Simbahan ni Jesukristo sa mga Santos sa Ulahing mga Adlaw. Ang 2013 nga edisyon sa mga kasulatan naglakip sa giusab nga mga ulohan sa seksyon alang sa ubang mga seksyon sa Doktrina ug mga Pakigsaad. Ang mga kausaban sa mga ulohan sa seksyon, lakip ang pagpahiangay sa pipila ka mga petsa ug mga dapit, gihimo aron mapakita ang bag-ong mga pagsiksik ug mga nakaplagan sa kasaysayan ug sa paghatag og dugang o mas klaro nga konteksto sa mga kasulatan.

Ang teksto sa 2013 nga edisyon sa mga kasulatan anaa sa online sa scriptures.lds.org ug sa Gospel Library nga app alang sa digital nga mga device.

Ang pipila sa imong mga estudyante tingali naggamit sa miagi (1981) nga edisyon sa mga kasulatan. Kadaghanan sa mga kausaban diha sa 2013 nga edisyon ginagmay ra ug dili makaapekto sa pagtuon sa mga estudyante sa Doktrina ug mga Pakigsaad. Hinoon, hibaloi nga ang mga petsa, dapit, ug uban pang impormasyon diha sa mga ulohan sa seksyon mahimong magkalahi depende sa edisyon sa mga kasulatan nga gigamit sa mga estudyante. Niini nga mga sitwasyon, mas maayo nga itudlo ang 2013 nga mga kausaban pinaagi sa paghangyo sa usa ka estudyante kinsa adunay bag-ong edisyon nga mobasa niini o pinaagi sa pagtudlo sa mga estudyante ngadto sa 2013 nga edisyon sa Gospel Library app.

Mga Gilauman sa mga Estudyante alang sa mga Kredito sa Gradwasyon

Aron makadawat og kredito padulong sa paggradwar sa institute, ang mga estudyante kinahanglang mobasa sa teksto sa kasulatan alang sa kurso (Doktrina ug mga Pakigsaad 1–76 alang sa Relihiyon 324, ug Doktrina ug mga Pakigsaad 77–138 ug Opisyal nga Pahayag 1 ug 2 alang sa Relihiyon 325) ug kinahanglang makakab-ot usab sa mga kinahanglanon sa pagtambong [attendance] ug makapakita og kahibalo sa materyal sa kurso pinaagi sa pagkompleto sa learning assessment.

Unsaon Nako sa Pagpahiangay sa mga Leksyon alang Niadtong may mga Kakulangan?

Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. Ipahiangay ang mga kalihokan ug mga ekspektasyon aron matabangan sila nga molampus. Pangita og mga paagi sa pagtabang nila nga mobati nga gihigugma, gidawat, ug nahilakip. Pag-ugmad og relasyon sa pagsalig.

Alang sa dugang nga mga ideya ug mga kapanguhaan, konsultaha ang Disability Resources nga page sa disabilities.lds.org ug ang seksyon sa manwal sa polisiya sa Seminaries and Institutes of Religion nga giulohan og “Gipahiangay nga mga Klase ug mga Programa alang sa mga Estudyante nga dunay mga Kakulangan [Adapted Classes and Programs for Students with Disabilities].”