Niadtong Nobyembre 1831, gihatag sa Ginoo ang kapin sa 60 ka sinulat nga mga pagpadayag pinaagi ni Propeta Joseph Smith alang sa kaayohan sa Simbahan ug sa indibidwal nga mga miyembro. Aron mas ma-access sa mga miyembro sa Simbahan kini nga mga pagpadayag, mihukom ang mga lider sa Simbahan nga imantala kini isip usa ka volume nga tawagon og Basahon sa mga Sugo. Niadtong Nobyembre 1, 1831, ang Propeta mipatawag og usa ka komperensya sa mga elder sa balay ni John ug Elsa (o Alice) Johnson sa Hiram, Ohio, diin atol niini ang usa ka komite sa mga elder nga gilangkuban nila ni Sidney Rigdon, Oliver Cowdery, ug William E. McLellin pakyas sa ila untang pagsulat og pasiuna alang sa Basahon sa mga Sugo. Human niini nga pagsulay, nakadawat si Joseph Smith pinaagi sa pagpadayag sa nailhan karon nga Doktrina ug mga Pakigsaad 1 (tan-awa sa The Joseph Smith Papers, Documents, Volume 2: Hulyo 1831–Enero 1833, ed. Matthew C. Godfrey ug uban pa [2013], 104). Mipahayag ang Ginoo, “Kini [pagpadayag] mao ang … akong pasiuna ngadto sa basahon sa akong mga sugo” (D&P 1:6). Gipahayag usab Niya nga ang tanang katawhan makadungog sa Iyang “tingog sa pagpasidaan” (bersikulo 4) ug kadtong magdumili sa pagpatalinghug sa Iyang tingog ug sa mga pulong sa Iyang mga sulugoon ipahimulag gikan sa Iyang katawhan. Mipamatuod ang Ginoo nga ang mga pagpadayag nga gihatag ngadto ni Propeta Joseph Smith tinuod ug misugo sa Iyang katawhan sa pagsiksik niini.
Septyembre 1831Si Joseph ug Emma Smith mibalhin gikan sa Kirtland ngadto sa Hiram, Ohio.
Nobyembre 1831Usa ka komperensya sa mga elder miuyon nga imantala ang 10,000 ka mga kopya sa Basahon sa mga Sugo.
Ang tingog sa pagpasidaan sa Ginoo alang sa tanang katawhan
Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka mga Apostoles:
Imahe
Elder Joseph B. Wirthlin
“Niadtong Disyembre 26, 2004, usa ka kusog nga linog miigo sa kabaybayunan sa Indonesia, nga maoy nakaingon sa mangilngig nga tsunami nga mipatay og labaw sa 200,000 ka mga tawo. Usa kadto ka makalilisang nga trahedya. Sa usa ka adlaw, minilyon ka mga kinabuhi ang nausab hangtud sa hangtud.
“Pero dihay usa ka grupo sa mga tawo kinsa, bisan og ang ilang baryo naguba, walay bisan usa nga namatay.
“Ngano man?
“Nakahibalo sila nga moabut ang tsunami.
“Ang mga tawo nga Moken nagpuyo sa baryo sa kabaybayunan sa mga isla sa Thailand ug Burma (Myanmar). Katilingban sa mga mananagat, ang ilang panginabuhian anaa sa dagat. Sulod sa gatusan ka tuig ug tingali liboan ka tuig, gitun-an sa ilang mga katigulangan ang kadagatan, ug gipasa nila ang ilang kahibalo gikan sa amahan ngadto sa anak.
“Usa ka pihong butang ang ilang gitudlo pag-ayo mao ang unsay buhaton kon ang dagat moatras. Sumala sa ilang mga tradisyon, kon kana mahitabo, ang ‘Laboon’—balud nga mokaon og mga tawo—mosunod dayon.
“Sa dihang nakita sa mga tigulang sa baryo ang makahahadlok nga timailhan, ilang gisinggitan ang tanan nga modagan ngadto sa mas taas nga lugar.
“Wala maminaw ang tanan.
“Usa ka gulangon nga mananagat miingon, “Walay usa sa mga bata ang mituo kanako.’ Gani, ang iyang kaugalingong anak nga babaye nihingalan kaniya nga bakakon. Pero ang gulangon nga mananagat wala mohunong hangtud ang tanan nakabiya sa baryo ug mitungas ngadto sa mas taas nga lugar” (Joseph B. Wirthlin, “Pagsunod sa mga Pagtulun-an sa Ginoo,”Liahona, Nob. 2005, 16).
Ngano kaha nga ang ubang mga tawo wala man maminaw o motuo sa mga pasidaan sa mas gulang nga katagibaryo?
Kon usa pa kamo niadtong katawhan nga sa sinugdanan wala motuo sa pasidaan, unsa kaha ang inyong bation bahin sa mga gulangon nga mga tawo human sa tsunami?
Ipasabut nga sama sa katawhan nga Moken, kita usab gipasidan-an mahitungod sa mga kalamidad nga moabut. Dapita ang mga estudyante sa pagpangita sa mga pasidaan sa Ginoo samtang tun-an nila ang Doktrina ug mga Pakigsaad 1 ug sa mga kamatuoran nga makatabang nila nga masayud unsaon sa pagpangandam niini nga mga hitabo.
Dapita ang usa ka estudyante sa pagbasa og kusog sa ulohan sa Doktrina ug mga Pakigsaad 1, ug hangyoa ang klase sa pagsunod, nga mangita kon kanus-a ug nganong gihatag sa Ginoo kini nga pagpadayag kang Joseph Smith. Mahimo nimong ipasabut nga ang paghugpong nga gihisgutan dinhi mao ang pinakaunang bersyon sa Doktrina ug mga Pakigsaad ug gitawag nga Basahon sa mga Sugo.
Ipasabut nga sa bersikulo 6, gipasabut sa Ginoo kini nga pagpadayag isip “akong pasiuna sa basahon sa mga sugo.” Sa unsang paagi nga ang pagkakita niini nga pagpadayag isip pasiuna nagtabang nga atong masabtan kini nga katuyoan?
Dapita ang usa ka estudyante sa pagbasa og kusog sa Doktrina ug mga Pakigsaad 1:1–4, ug hangyoa ang klase sa pagsunod, nga mangita kon si kinsa ang pasidan-an sa Ginoo.
Kang kinsa ipalanog sa Ginoo ang Iyang tingog sa pagpasidaan?
Unsa nga pasidaan ang gihatag sa Ginoo diha sa bersikulo 3?
Sumala sa bersikulo 4, sa unsang paagi ipadala sa Ginoo ang Iyang pasidaan sa tanang katawhan?
I-summarize ang Doktrina ug mga Pakigsaad 1:5–9 pinaagi sa pagpasabut nga niini nga mga bersikulo, namahayag ang Ginoo nga ang Iyang mga sulugoon nga nanagpang-adto sa pagsangyaw sa Iyang mga pulong dunay gahum ug awtoridad sa pagbugkos sa mga dautan “ngadto sa adlaw sa diha nga ang kasuko sa Dios mabu-bu ngadto sa dautan” (bersikulo 9). Ipasabut nga kini nga mga pulong nagpasabut sa Ikaduhang Pag-anhi ni Jesukristo.
Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 1:10–16, ug hangyoa ang klase sa pagsunod, nga mangita sa dugang nga mga pasidaan gikan sa Ginoo.
Ngano kaha nga ang bersikulo 10 makonsiderar man nga pasidaan?
Unsa nga mga pulong sa bersikulo 11 ang naghulagway nga ang Ginoo andam nga kita matugutan sa pagpili kon patalinghugan ba nato ang Iyang mga pasidaan?
Unsa nga baruganan ang atong makita gikan sa pasidaan sa Manluluwas sa bersikulo 14? (Gamit ang mga pulong sa mga estudyante, isulat sa pisara ang usa ka baruganan nga susama sa mosunod: Kon dili kita mopatalinghug sa tingog sa Ginoo ug sa mga pulong sa Iyang mga propeta ug mga apostoles, niana ipahimulag kita gikan sa katawhan sa Dios.) Ipasabut ang pagkahimulag gikan sa katawhan sa Dios mao ang pagkabulag gikan sa pagkamatarung ug gikan sa gahum sa Dios, proteksyon, impluwensya, ug mga panalangin, ug sa katapusan sa Iyang presensya.
Unsa nga mga pulong o hugpong sa mga pulong ang gigamit sa Ginoo sa mga bersikulo 15–16 sa paghulagway sa katawhan kinsa mipahimulag sa ilang kaugalingon gikan sa Ginoo? Sa unsang paagiha kaha kini nga mga pulong ug hinugpong nga mga pulong naghulagway sa atong kalibutan karon?
Unsa kaha ang buot ipasabut nga “ang matag tawo naglakaw diha sa iyang kaugalingon nga paagi … sama sa hulagway sa iyang kaugalingon nga dios” (bersikulo 16)?
Sa unsang paagi ang pagpakabuhi sa panahon nga daghan ang nagsunod sa kalibutan maghimong lisud aron makapatalinghug sa mga propeta ug mga apostoles?
Aron matabangan ang mga estudyante nga makasabut sa kaimportante ug kadinalian sa pagpatalinghug sa mga pulong sa mga propeta ug mga apostoles, dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:
Imahe
Presidente Henry B. Eyring
“Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o miingon nga ako walay labut, akong nahibaloan nga akong gibutang ang akong kaugalingon sa peligro. Sa matag higayon nga ako namati sa tambag sa mga propeta, mibati sa pagkumpirmar niini pinaagi sa pag-ampo, ug dayon gisunod kini, akong namatngunan nga ako nagpaingon sa kasiguroan” (Henry B. Eyring, “Finding Safety in Counsel,” Ensign, Mayo 1997, 25).
Unsa nga tambag o pasidaan ang bag-o lang gihatag sa mga propeta ug sa mga apostoles sa Ginoo? (Ikonsiderar ang pagpaambit og pipila ka pamahayag sa tambag og pasidaan gikan sa bag-o lang nga kinatibuk-ang komperensya.)
Hangyoa ang mga estudyante sa pagkonsiderar unsay ilang gihimo sa pagpatalinghug niana nga tambag ug unsa kahay ilang mahimo aron mas mapatalinghugan ang tambag ug mga pasidaan gikan sa mga propeta ug mga apostoles. Dapita sila sa pagsunod sa bisan unsang mga aghat nga ilang madawat.
Dapita ang usa ka estudyante sa pagbasa og kusog sa Doktrina ug mga Pakigsaad 1:17. Hangyoa ang klase sa pagsunod, nga mangita sa unsay gisulti sa Ginoo nga Iyang gihimo tungod sa kalamidad nga nahibaloan Niya nga moabut sa kalibutan. Sa dili pa mobasa ang mga estudyante, ipasabut nga ang pulong nga kalamidad diha sa bersikulo 17 nagpasabut sa mga kasakit, kasubo, ug kalisdanan nga moabut tungod sa kadautan sa kalibutan.
Sumala sa bersikulo 17, unsay gihimo sa Ginoo tungod kay nasayud Siya sa kalamidad nga moabut sa katapusang mga adlaw? (Ang mga estudyante tingali mogamit og lain-laing mga pulong, apan siguroa nga ilang makita ang mosunod nga kamatuoran: Tungod kay nahibalo ang Ginoo sa kalamidad nga moabut sa katapusang mga adlaw, gitawag niya si Joseph Smith isip Iyang propeta ug mihatag kaniya og pagpadayag ug mga sugo. Dapita ang mga estudyante sa pagkonsiderar nga markahan kini nga kamatuoran sa bersikulo 17.)
Sa unsang mga paagi ang pagkatawag ni Propeta Joseph Smith ug ang mga pagpadayag ug ang mga sugo nga iyang nadawat makatabang nga kita makabarug sa kalamidad sa katapusang mga adlaw?
Ang Ginoo mihatag ni Joseph Smith og gahum sa paghubad sa Basahon ni Mormon ug pag-establisar sa Iyang tinuod nga Simbahan
Dapita ang mga estudyante sa pag-scan sa Doktrina ug mga Pakigsaad 1:18–23, nga mangita sa mga epekto sa mga sugo ug mga pagpadayag nga anaa sa Doktrina ug mga Pakigsaad dinhi sa kalibutan.
Dapita ang usa ka estudyante sa pagbasa og kusog sa Doktrina ug mga Pakigsaad 1:24–28, ug hangyoa ang klase sa pagsunod, nga mangita sa dugang nga mga rason nganong gihatag sa Ginoo kini nga mga sugo ug mga pagpadayag.
Sumala niini nga mga bersikulo, unsa ang ubang paagi nga kita mapanalanginan pinaagi sa pagtuon sa mga pagpadayag nga naa sa Doktrina ug mga Pakigsaad?
Dapita ang usa ka estudyante sa pagbasa og kusog sa Doktrina ug mga Pakigsaad 1:29–30, ug hangyoa ang klase sa pagsunod, nga mangita kon unsa nga gahum sa pagbuhat ang gihatag sa Ginoo kang Joseph Smith ug sa uban. Dapita ang mga estudyante sa pagreport sa ilang nakit-an.
Giunsa sa paghulagway sa Ginoo ang Simbahan diha sa bersikulo 30? (Tabangi ang mga estudyante sa pagpangita sa mosunod nga doktrina: Ang Simbahan ni Jesukristo sa mga Santos sa Ulahing mga Adlaw mao lang tinuod ug buhi nga simbahan dinhi sa yuta. Awhaga ang mga estudyante sa pagmarka niini nga kamatuoran diha sa bersikulo 30.)
Unsa kaha ang buot ipasabut sa mga pulong nga “bugtong tinuod ug buhi nga simbahan”? (Kon gikinahanglan, mahimo nga i-refer nimo ang mga estudyante ngadto sa komentaryo sa manwal sa estudyante alang sa Doktrina ug mga Pakigsaad 1:30.)
Siguroa nga masabtan sa mga estudyante nga ang pagpahayag sa Ginoo bahin sa Iyang Simbahan wala magpasabut nga ang ubang simbahan walay pipila ka kamatuoran. Si Presidente Gordon B. Hinckley (1910–2008) mitudlo nga ang atong imbitasyon sa mga sakop sa ubang tinuohan mao ang “dad-a ang tanan nga anaa kaninyo nga maayo ug kamatuoran nga nadawat ninyo gikan sa bisan unsa nga tinubdan, ug ngari ug tan-awon nato kon unsay mahimong idugang nato niini” (“Ang Kahibulongang Tukuranan sa Atong Pagtuo,”Liahona, Nob. 2002, 81).
Aron matabangan ang mga estudyante nga mas makasabut sa pahayag sa Ginoo nga ang Iyang Simbahan “buhi” nga simbahan, pag-display og tanom ug dili buhi nga butang sama sa bato (o pagpakita og mga litrato niini nga mga item). Hangyoa ang mga estudyante sa paghulagway unsa ang anaa sa butang nga buhi, sama sa tanom, ikumpara sa butang nga dili buhi , sama sa bato. (Ang tanom mausab, motubo, nagkinahanglan og pag-alima ug kahayag, ug makapamunga.)
Giunsa niini pagkumparar ang sa unsang paagi Ang Simbahan ni Jesukristo sa mga Santos sa Ulahing mga Adlaw “buhi” nga simbahan? (Usa sa posible nga tubag mao nga ang Simbahan padayon nga mohangop sa nagkausab nga mga sirkumstansya sa kalibutan ug pagtubo sa panabut pinaagi sa padayon nga pagpadayag gikan sa Dios.)
Ngano kaha nga importanting masabtan nga samtang ang mahangturong mga kamatuoran ug mga doktrina dili mausab, ang Simbahan padayon sa paghangop ug pagtubo pinasubay sa gipadayag nga kabubut-on sa Ginoo?
Unsa nga mga kasinatian ang nakatabang ninyo aron mahibalo nga Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga Simbahan?
Ang mga pulong ug mga pagpadayag sa Ginoo nga anaa sa Doktrina ug mga Pakigsaad tinuod ug matuman
I-summarize ang mga bersikulo 34–36 pinaagi sa pagpasabut nga ang Ginoo mipahayag sa Iyang tinguha nga mapasidan-an ang tanang katawhan aron maandam alang sa Iyang Ikaduha nga Pag-anhi.
Dapita ang mga estudyante sa pagbasa og hilum sa Doktrina ug mga Pakigsaad 1:37–39, nga mangita sa mga kamatuoran nga gitudlo sa Ginoo sa pagtapos sa Iyang pasiuna sa Doktrina ug mga Pakigsaad. Mahimo nimong ipasabut nga ang pulong nga matinud-anon nga gigamit sa bersikulo 37 nagpasabut nga sigurado, kasaligan, o angayan.
Unsa nga mga kamatuoran ang atong makita niini nga mga bersikulo? (Bisan og ang mga estudyante makakita og pipila ka kamatuoran, isiguro nga makita nila ang mosunod: Naglaum ang Ginoo nga atong tun-an ang Doktrina ug mga Pakigsaad. Ang mga panagna ug mga panaad sa Ginoo tinuod ug ang tanan matuman. Ang mga pulong sa Ginoo tinuod Siya man ang namulong niini o ang Iya bang mga sulugoon.)
Dapita ang mga estudyante sa pagsulat og usa o duha ka sentence base sa leksyon karon nga mag-summarize nganong gibati nila nga importante nga magtuon sila sa Doktrina ug mga Pakigsaad. Dapita ang pipila ka estudyante sa pagpakigbahin sa unsay ilang gisulat. Human makapaambit ang mga estudyante, dapita sila nga ipadayon ang pagsiksik ug pagtuon sa Doktrina ug mga Pakigsaad.