Doktrina ug mga Pakigsaad 23–25

Pasiuna ug Timeline

Sulod sa mga adlaw human maorganisar ang Simbahan niadtong Abril 6, 1830, lima ka tawo miduol ni Propeta Joseph Smith nagtinguha nga mahibalo sa ilang mga buluhaton kalabut ngadto sa gipahiuli nga Simbahan. Usa ka gipersonal nga tubag gihatag ngadto sa matag usa kanila pinaagi sa nagsunod-sunod nga lima ka mga pagpadayag nga sa kaulahian gitipon ngadto sa Doktrina ug mga Pakigsaad 23.

Niadtong Hunyo ug Hulyo 1830, ang pagpanggukod mitungha dapit sa Colesville, New York, batok ni Propeta Joseph Smith ug sa ubang mga miyembro sa Simbahan. Atol niining malisud nga panahon, gilig-on sa Ginoo ang Propeta ug si Oliver Cowdery pinaagi sa paghatag kanila og pagpadayag nga girekord diha sa Doktrina ug mga Pakigsaad 24, pinaagi diin sila gitudloan sa pagpailub diha sa mga kasakit ug sa pagpadayon sa pagtudlo sa ebanghelyo.

Si Emma Smith, ang asawa sa Propeta, gibunyagan sa Hunyo 28, 1830. Ang pagpanggukod mipugos sa pag-uswag sa iyang kumpirmasyon hangtud hapit duha ka bulan sa kadugayon, sa Agosto. Niadtong Hulyo 1830, gihatag sa Ginoo ang pagpadayag diha sa Doktrina ug mga Pakigsaad 25 ngadto ni Emma. Dinhi niini nga pagpadayag, gisultihan sa Ginoo nga siya usa ka pinili nga babaye ug mihatag kaniya ug mga panudlo kalabut sa iyang pamilya ug mga responsibilidad sa Simbahan.

Abril 6, 1830Ang gipahiuli nga Simbahan giorganisar.

Sayo sa Abril 1830Ang Doktrina ug mga Pakigsaad 23 nadawat.

Hunyo 9, 1830Ang unang komperensya sa Simbahan gihimo sa panimalay ni Peter Whitmer Sr.

Hunyo 28, 1830Gibunyagan si Emma Smith.

Hunyo 28–Hulyo 2, 1830Gidakop si Joseph Smith ug gibuhian sa pagkasamokan nga tawo sa South Bainbridge, New York, ug pag-usab sa Colesville, New York.

Hulyo 1830Ang Doktrina ug mga Pakigsaad 24 nadawat.

Hulyo 1830Ang Doktrina ug mga Pakigsaad 25 nadawat.

Agosto 1830Gikumpirmahan si Emma Smith isip usa ka miyembro sa Simbahan.

Mga Sugyot alang sa Pagtudlo

Doktrina ug mga Pakigsaad 23

Agi og tubag sa ilang mga tinguha sa pag-alagad, nagpadayag ang Ginoo sa Iyang kabubut-on ngadto sa lima ka mga tawo

Hangyoa ang mga estudyante sa paghunahuna og panahon sa dihang nakadawat sila og pipila ka gikinahanglan kaayo nga mga pulong sa pagdasig o direksyon sa ilang mga kinabuhi. Mahimo nimong hangyoon ang pipila ka mga estudyante sa pagpakigbahin sa ilang mga kasinatian diha sa klase.

Ipasabut nga niadtong Abril 1830, human dayon sa pag-organisar sa Simbahan, lima ka mga indibidwal miduol kang Joseph Smith nangayo og direksyon gikan sa Ginoo. Agi og tubag sa ilang pangutana, mihatag ang Ginoo sa matag tawo og piho nga mga panudlo.

Dapita ang mga estudyante sa pagtan-aw sa ulohan sa seksyon alang sa Doktrina ug mga Pakigsaad 23 ug sa pagpangita sa mga ngalan sa lima ka mga tawo.

Isulat ang mosunod nga mga pakisayran sa kasulatan diha sa pisara: D&P 23:1–2; D&P 23:3; D&P 23:4; D&P 23:5; D&P 23:6–7. I-assign ang matag estudyante og usa o daghan pa niini nga mga pakisayran, ug dapita sila sa pagbasa og hilum sa ilang gi-assign nga (mga) bersikulo, mangita sa tambag nga gihatag sa Ginoo sa matag tawo. Human sa igong panahon, hangyoa ang mga estudyante sa pagreport sa unsay ilang nakit-an.

Sa unsa nga mga paagi nga ang tambag sa Ginoo ngadto sa matag tawo susama? Sa unsang paagi nga kini lahi?
Unsa nga baruganan ang atong makat-unan gikan niini nga mga istorya mahitungod sa unsay mahitabo samtang kita makugihong magtinguha sa pag-alagad sa Ginoo? (Mahimong moila ang mga estudyante og usa ka baruganan susama sa mosunod: Samtang kita nagtinguha sa pag-alagad sa Ginoo, makadawat kita og personal nga paggiya gikan Kaniya.)

Doktrina ug mga Pakigsaad 24

Si Joseph Smith ug Oliver Cowdery nakadawat og direksyon alang sa ilang mga calling

Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 24 ug hangyoa ang klase sa pagpangita alang sa unsay nahitabo sa mga bulan human ang Simbahan naorganisar.

Isip usa ka ehemplo sa pagpanggukod nga nasinati sa mga Santos, ipakita ang mosunod nga makasaysayanong impormasyon, og dapita ang usa ka estudyante sa pagbasa niini og kusog:

Sa hinapos sa Hunyo 1830, si Joseph Smith ug ang uban mibiyahe ngadto sa Colesville, New York, aron sa pagbunyag ni Emma Smith ug sa daghang ubang mga tumutuo. Ang mga bunyag giplano alang sa Dominggo, Hunyo 27, apan sa pagsulay sa pagpugong sa mga bunyag, giguba sa pipila ka mga lumulupyo sa Colesville ang dam nga gihimo sa mga Santos. Sa pagka-Lunes sa buntag, ang mga Santos nagtagbo ug gidali pagtukod og usab ang dam, ug si Emma Smith ug ang 12 ka kauban gibunyagan. Sa wala pa mahuman ang miting, hapit 50 ka mga tawo nga manggugubot nagpundok ug gihulga nga pasakitan ang mga Santos. Wala madugay sa pagka-gabii niana, nagtagbo ang mga Santos sa pagkumpirma sa bag-ong gibunyagan nga mga miyembro, apan sa wala pa mahitabo ang mga pagkumpirma gidakop si Joseph sa bakak nga mga pasangil sa pagkasamokan nga tawo. Sa dihang si Joseph gibuhian niini nga mga pasangil, diha-diha dayon gidakop siya sa samang pasangil pinaagi sa usa ka pulis gikan sa kasilinganang distrito. Human siya gibuhian sa ikaduhang higayon, mibiyahe si Joseph ug si Emma ngadto sa ilang panimalay sa Harmony, Pennsylvania, alang sa kaluwasan gikan sa kuyaw. Wala madugay, mibalik si Joseph ug si Oliver Cowdery ngadto sa Colesville aron sa pagkumpirma sa bag-ong gibunyagan nga mga kinabig. Sa wala pa kini nila mahimo, usa ka pundok sa manggugubot nagtapok, ug si Joseph ug Oliver Cowdery napugos na usab sa pagpangita og kahilwasan didto sa Harmony. Bag-ohay human sa ilang pag-abut sa panimalay sa Hulyo 1830, nadawat ni Joseph Smith ang pagpadayag nga girekord diha sa Doktrina ug mga Pakigsaad 24.

Dapita ang usa ka estudyante sa pagbasa og kusog sa Doktrina ug mga Pakigsaad 24:1–2 ug hangyoa ang klase sa pagpangita alang sa unsay gisulti sa Ginoo ngadto sa Propeta samtang nangita siya og kaluwasan gikan sa pagpanggukod.

Unsa kaha nga mga pulong o hugpong sa mga pulong ang nakahupay sa Propeta?

Dapita ang usa ka estudyante sa pagbasa og kusog sa Doktrina ug mga Pakigsaad 24:3–6 ug hangyoa ang klase sa pagpangita alang sa unsay gisulti sa Ginoo ni Joseph Smith nga buhaton atol niining malisud nga panahon.

Unsa sa imong hunahuna ang gipasabut sa hugpong sa mga pulong “ipalambo ang imong katungdanan” (bersikulo 3)?
Ngano kaha ang panudlo sa Ginoo sa pag-adto og dali ngadto sa mga Santos sa New York malisud alang kang Joseph?
Unsa ang gisaad sa Ginoo nga mahitabo kon si Joseph moadto ngadto sa mga Santos sa New York ug dawaton nila ang iyang mga pulong?

Bahina ang klase ngadto sa duha ka grupo. Dapita ang usa ka grupo sa pagbasa og hilum sa Doktrina ug mga Pakigsaad 24:7–9 mangita alang sa unsay gisulti sa Ginoo nga mahitabo kon si Joseph Smith matinud-anong mobuhat sa iyang calling. Dapita ang lain nga grupo sa pagbasa og hilum sa Doktrina ug mga Pakigsaad 24:10–12 mangita alang sa unsay gisulti sa Ginoo nga mahitabo kon si Oliver Cowdery matinud-anong mohimo sa iyang calling. Human sa igong panahon, ipangutana ang mosunod:

Unsa ang gisaad sa Ginoo ni Joseph Smith kon siya matinud-anong moatiman sa iyang calling?
Unsa ang gisaad sa Ginoo ni Oliver Cowdery kon siya matinud-anong moatiman sa iyang calling?
Base sa unsay gisaad sa Ginoo ni Joseph Smith ug Oliver Cowdery, unsa ang buhaton sa Ginoo alang kanato kon kita matinud-anong mobuhat unsa ang iyang gisugo kanato? (Tabangi ang mga estudyante sa pag-ila sa mosunod nga baruganan: Kon matinud-anon kitang mobuhat unsay gisugo sa Ginoo kanato, niana Siya mag-uban kanato ug maglig-on kanato.)
Sa unsa nga mga paagi kaha kini nga baruganan nagtabang ni Joseph Smith ug Oliver Cowdery atol niining malisud nga panahon?

Sa pagtabang sa mga estudyante nga mobati sa kamatuoran ug importansya niini nga baruganan, dapita sila sa paghunahuna og usa ka panahon nga gilig-on sila sa Ginoo tungod kay matinud-anon nilang gibuhat ang unsay Iyang gipabuhat. Dapita ang pipila ka mga estudyante sa pagpakigbahin sa ilang mga kasinatian diha sa klase.

I-summarize ang Doktrina ug mga Pakigsaad 24:13–19 pinaagi sa pagpasabut nga ang Ginoo misugo ni Joseph ug Oliver kalabut sa mga milagro nga sila makahimo sa panahon sa ilang pangalagad ug unsa ang ilang kinahanglan nga buhaton kon ang mga tawo mosupak kanila. Ang Ginoo misugo usab nga ang Simbahan kinahanglan nga mohatag og temporal nga tabang ngadto sa Propeta aron siya makahatag sa tanan niyang panahon ug kusog ngadto sa buhat sa Ginoo.

Doktrina ug mga Pakigsaad 25

Naghatag ang Ginoo ni Emma og personal nga tambag ug panudlo

Ipasabut nga niadtong Hulyo 1830, samtang nangita og kaluwasan gikan sa kuyaw didto sa Harmony, Pennsylvania, nadawat sa Propeta ang pagpadayag nga girekord diha sa Doktrina ug mga Pakigsaad 25. Kini nga pagpadayag gipatumong ngadto sa asawa ni Joseph, nga si Emma Smith. Mahimo nimong pahinumduman ang mga estudyante nga si Emma nabunyagan niadtong Hunyo 1830, apan tungod sa mga hulga sa manggugubot ug ang pagdakop sa iyang bana siya wala pa makumpirmahi.

Dapita ang usa ka estudyante sa pagbasa og kusog sa Doktrina ug mga Pakigsaad 25:1–4. Hangyoa ang klase sa pagpangita sa mga pulong ug hugpong sa mga pulong nga nakapahupay ni Emma Smith atol niining malisud nga panahon.

Unsa nga pulong ang gigamit sa Ginoo sa paghulagway ni Emma?
Unsa sa inyong hunahuna ang gipasabut sa mahimong pinili? (“Ang pinili mao kadtong kinsa nahigugma sa Dios sa tibuok nilang kasingkasing ug nagpuyo og mga kinabuhi nga makapahimuot Kaniya” [Giya ngadto sa mga Kasulatan, “Pinili,” scriptures.lds.org].)
Sa unsa nga paagi nga ang mahibalo nga siya usa ka pinili nga babaye nagtabang ni Emma Smith atol niadtong mga kalisud?
Unsa nga tambag ang gihatag sa Ginoo ngadto ni Emma?

Dapita ang pipila ka mga estudyante sa pagpuli-puli og basa og kusog gikan sa Doktrina ug mga Pakigsaad 25:5–10, ug hangyoa ang klase sa pagpangita alang sa unsay gitawag sa Ginoo nga buhaton ni Emma Smith.

Unsa ang gitawag sa Ginoo nga buhaton ni Emma Smith?

Ipasabut nga ang pulong orden (tan-awa sa bersikulo 7) kanunay nga gigamit sa unang Simbahan sa pagpasabut og pag-orden ug pag-set apart. Busa ang mga lalaki ug mga babaye kasagaran giingon nga “gi-orden” ngadto sa mga calling, samtang karon atong gigamit ang pulong “gi-set apart” (tan-awa sa Joseph Fielding Smith, Church History and Modern Revelation [1947], 1:126). Pahibaloa ang mga estudyante nga sa dihang ang Relief Society giorganisar niadtong 1842, gitawag si Emma Smith nga nahimong unang presidente sa organisasyon. Niana nga okasyon, gibasa ni Propeta Joseph Smith ang pagpadayag nga girekord diha sa Doktrina ug mga Pakigsaad 25 ug miingon nga ang pagpadayag “natuman pinaagi sa Pagpili kang Sister Emma ngadto sa Kapangulohan sa Society, siya ingon nga gi-orden kaniadto sa pagpasabut sa mga Kasulatan” ug sa pag-awhag sa Simbahan (“Journal, Disyembre 1841–Disyembre 1842,” 91, josephsmithpapers.org).

Base sa unsay gisulti sa Ginoo nga buhaton ni Emma diha sa bersikulo 10, unsa ang gipaabut sa Ginoo kanato nga buhaton? (Ang Ginoo nagpaabut kanato nga mosalikway sa mga butang niini nga kalibutan ug mangita nianang diin mahangturon.)
Unsa nga kalibutanong mga butang nga sa inyong hunahuna si Emma tingali naguol atol niini nga panahon sa iyang kinabuhi?

Aron matabangan ang mga estudyante sa pagsabut niini nga kamatuoran, isulat ang mosunod nga mga ulohan diha sa pisara: Mga Butang sa Kalibutan nga Isalikway ug Mahangturong mga Butang nga Pangitaon. Hangyoa ang mga estudyante sa pagsugyot og daghang mga butang nga malista ubos sa kada ulohan. Isulat diha sa pisara ang tubag sa mga estudyante ubos sa tukma nga ulohan.

Ngano sa inyong hunahuna ang pagsalikway sa mga butang niini nga kalibutan makatabang kanato sa pagpangita nianang mahangturon?

Dapita ang mga estudyante sa paghunahuna og panahon sa dihang ilang gisalikway ang kalibutanong mga butang ug nangita alang sa mahangturong mga butang. Dapita ang pipila ka mga estudyante sa pagpakigbahin sa ilang mga kasinatian diha sa klase. (Pahinumdumi ang mga estudyante sa dili pagpaambit og mga kasinatian nga personal o pribado kaayo.)

Dapita ang mga estudyante sa pagpamalandong og mga paagi sa pagsalikway og mga butang sa kalibutan ug sa pagpangita sa mga butang nga mahangturon og bili. Dapita sila nga mohimo og tumong sa paglihok sa bisan unsa nga mga pag-aghat nga ilang madawat.

Dapita ang usa ka estudyante sa pagbasa og kusog sa Doktrina ug mga Pakigsaad 25:11–12 ug hangyoa ang klase sa pagpangita alang sa unsa pay gisugo sa Ginoo ni Emma nga buhaton.

Unsa ang gisugo sa Ginoo nga buhaton ni Emma?
Unsa nga baruganan ang atong makat-unan mahitungod sa pagsimba sa Ginoo pinaagi sa musika gikan niini nga mga bersikulo? (Ang mga estudyante mahimong mogamit og lahi nga mga pulong, apan siguroha nga ilang mailhan ang usa ka baruganan nga susama sa mosunod: Samtang atong gisimba ang Ginoo pinaagi sa matarung nga musika, mopanalangin Siya kanato.)
Sa unsa nga mga paagi ang “awit sa kasingkasing” (bersikulo 12) mapahisama ngadto sa pag-ampo?
Sa unsa nga paagi kaha ang usa ka awit sa kasingkasing lahi gikan sa pagkanta lamang og usa ka himno?
Unsa nga mga panalangin ang miabut sa inyong kinabuhi gikan sa pagsimba sa Ginoo pinaagi sa matarung nga musika?

Dapita ang usa ka estudyante sa pagbasa og kusog sa pamahayag ni Elder Dallin H. Oaks sa Korum sa Napulog Duha ka mga Apostoles:

“Ang sagradong musika adunay talagsaong kapasidad sa pagpakigsulti sa atong mga pagbati sa gugma alang sa Ginoo. Kini nga matang sa komunikasyon usa ka katingalahang tabang sa atong pagsimba. Daghang adunay kalisud sa pagpahayag sa masimbahong mga pagbati sa mga pulong, apan ang tanan makauban sa pagpakigsulti sa mao nga mga pagbati pinaagi sa dinasig nga mga pulong sa atong mga himno” (Dallin H. Oaks, “Worship through Music,” Ensign, Nob. 1994, 10).

Dapita ang mga estudyante sa pagpili og usa o duha ka himno gikan sa hymnbook nga ilang gibati nga nagtabang kanila sa pagpakigsulti sa ilang mga pagbati sa gugma ug pagsimba alang sa Ginoo. Kon motugot ang panahon, mahimong kantahon ninyo ang usa o duha niini nga himno isip usa ka klase. Awhaga ang mga estudyante sa pag-apil sa pagkanta sa mga himno diha sa Simbahan ug sa ubang mga dapit isip usa ka paagi sa pagsimba sa Ginoo.

I-summarize ang Doktrina ug mga Pakigsaad 25:13–16 pinaagi sa pagpasabut nga ang Ginoo misulti ni Emma Smith sa pag-unong ngadto sa iyang mga pakigsaad ug sa pagpadayon diha sa pagkamaaghup. Misaad usab Siya nga kon siya mosunod sa mga sugo madawat niya ang usa ka korona sa pagkamatarung.

Tapusa ang klase pinaagi sa pagpakigbahin sa imong pagpamatuod kon sa unsa nga paagi ang mga kamatuoran nga nailhan dinhi niini nga leksyon makahatag kanato og direksyon ug pag-awhag.