Leksyon 16: Doktrina ug mga Pakigsaad 42

Leksyon 16

Doktrina ug mga Pakigsaad 42

Pasiuna ug Timeline

Gisugo sa Ginoo ang mga Santos nga nagpuyo sa New York sa pagbalhin ngadto sa Ohio ug gisaaran nga sila makadawat didto sa Iyang balaod (tan-awa sa D&P 37:3; 38:32). Niadtong Pebrero 9, 1831, taud-taud human miabut si Joseph Smith sa Kirtland, Ohio, 12 ka elder sa Simbahan nagpundok ug nag-ampo og dungan, ingon sa gisugo sa Ginoo kanila nga buhaton (tan-awa sa D&P 41:2–3). Samtang kini nga mga lider sa Simbahan nangayo sa direksyon sa Ginoo kalabut sa nagtubo nga Simbahan, nadawat ni Propeta Joseph Smith ang pagpadayag nga girekord diha sa Doktrina ug mga Pakigsaad 42:1–72. (Ang dugang nga mga detalye nga girekord diha sa bersikulo 73 gidugang sa kadugayan sa Propeta sa panahon nga ang Doktrina ug mga Pakigsaad gimantala.) Duha ka semana wala madugay, niadtong Pebrero 23, 1831, ang Propeta nangayo og dugang nga panudlo gikan sa Ginoo; ang dugang nga direksyon nga iyang nadawat girekord diha sa Doktrina ug mga Pakigsaad 42:74–93. Gitipon, kini nga mga pagpadayag nailhan isip “ang balaod sa Simbahan” (tan-awa sa D&P 42, ulohan sa seksyon). Niini nga pagpadayag, ang Ginoo mipaila sa espiritwal ug temporal nga mga balaod nga nagdirekta sa mga miyembro sa Simbahan sa pagtabang sa mga kabus, pagbayad sa nagkadaiyang mga gimbuhaton sa Simbahan, ug sa pag-abag sa ubang mga Santos kinsa moanha sa Ohio. Kini nga mga balaod naghatag usab og direksyon ngadto sa bag-o pa nga Simbahan ug mitabang kanila sa pag-estabilisar sa Zion.

Enero 2, 1831Ang mga Santos sa New York gisaaran nga ilang madawat ang balaod sa Ginoo sa dihang sila nagpundok ngadto sa Ohio (tan-awa sa D&P 38).

Sayo sa Pebrero 1831Miabut si Joseph ug Emma Smith sa Kirtland, Ohio.

Pebrero 4, 1831Si Edward Partridge nahimong unang bishop sa gipahiuli nga Simbahan (tan-awa sa D&P 41).

Pebrero 9 ug 23, 1831Ang Doktrina ug mga Pakigsaad 42 nadawat.

Mga Sugyot alang sa Pagtudlo

Doktrina ug mga Pakigsaad 42:1–29

Nagtawag ang Ginoo sa mga elder sa pagsangyaw sa ebanghelyo, pagtudlo kanila kabahin sa pagtudlo sa ebanghelyo, pagpadayag sa mga balaod ug mga sugo alang sa mga Santos

Isulat diha sa pisara ang mga pulong nga mga balaod ug mga Sugo diha sa pisara.

Sa lakbit hisguti isip usa ka klase kon ang mga young adult karon nagtan-aw niini nga mga pulong sa positibo nga paagi o sa negatibo, ug ngano.

Sa unsa nga paagi ang kadaghanan sa mga tawo motubag sa oportunidad nga modawat og dugang nga mga balaod ug mga sugo?

Pahinumdumi ang mga estudyante nga niadtong Disyembre 1830, misugo ang Ginoo sa mga Santos sa pagpundok ngadto sa Ohio (tan-awa sa D&P 37:3) ug nga sa Enero 1831, misaad Siya nga sila makadawat sa Iyang balaod didto (tan-awa sa D&P 38:32). Mitubag ang mga Santos ug naghinam-hinam nga madawat ang gisaad nga balaod ug mga sugo sa Ginoo. Samtang nagtuon ang mga estudyante sa Doktrina ug mga Pakigsaad 42 karon, awhaga sila sa pagpamalandong kon sa unsa nga paagi ang mga balaod ug mga sugo nga gihatag dinhi niini nga seksyon nahimong usa ka panalangin ngadto kanila kay sa usa ka pagpugong o palas-anon.

Ipasabut nga niadtong Pebrero 4, 1831, pipila ka adlaw human sa pag-abut ni Joseph Smith sa Kirtland, mipadayag ang Ginoo nga ang mga elder sa Simbahan kinahanglan nga magpundok sa Kirtland ug mag-ampo diha sa hugot nga pagtuo nga madawat ang Iyang balaod (tan-awa sa D&P 41:2–3). Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 42, ug dapita ang lain nga estudyante sa pagpbasa og kusog sa Doktrina ug mga Pakigsaad 42:1–3. Hangyoa ang klase sa pagsunod, nga mangita kon kanus-a ug ngano kini nga pagpadayag nadawat.

Kanus-a kini nga pagpadayag nadawat?
Sumala sa bersikulo 3, nganong kini nga pagpadayag nadawat?

I-summarize ang Doktrina ug mga Pakigsaad 42:4–10 pinaagi sa pagpasabut nga ang Ginoo misugo sa mga elder sa Simbahan sa pagtudlo sa ebanghelyo ug sa paglig-on sa Iyang Simbahan. Sa bersikulo 11, mipasabut ang Ginoo nga kadtong kinsa nagtudlo ug nangulo diha sa Simbahan kinahanglan gayud nga tinawag sa Dios ug gi-orden o gi-set apart pinaagi sa awtorisado nga mga lider.

Dapita ang usa ka estudyante sa pagbasa og kusog sa Doktrina ug mga Pakigsaad 42:12–14. Hangyoa ang klase sa pagsunod, nga mangita sa mga responsibilidad nga gihatag sa Ginoo ngadto niadtong kinsa nangulo ug nagtudlo diha sa Simbahan, lakip ang full-time nga mga misyonaryo.

Sumala niini nga mga bersikulo, unsa nga mga responsibilidad ang gihatag sa Ginoo ngadto niadtong gitawag nga mangulo o magtudlo diha sa Simbahan?

Pahinumdumi ang mga estudyante nga sa dihang si Joseph Smith miabut sa Kirtland sa Pebrero 1831, iyang nakita nga ang mga Santos “naningkamot sa pagbuhat sa kabubut-on sa Dios, kutob sa ilang nahibaloan niini, bisan tuod og katingad-ang mga hunahuna ug mini nga mga espiritu mihinay pagsulod diha kanila” (Manuscript History of the Church, vol. A-1, p. 93, josephsmithpapers.org).

Ngano kaha ang mga Santos sa Kirtland nanginahanglang masabtan nga ang mga magtutudlo ug mga lider kinahanglan nga magtudlo og mga baruganan sa ebanghelyo ingon nga makita diha sa mga kasulatan ug giniyahan sa Espiritu? Nganong importante kini sa atong panahon?
Unsa nga baruganan ang gitudlo diha sa bersikulo 14 mahitungod sa unsay kinahanglan gayud natong buhaton aron epektibo nga matudloan ang uban sa ebanghelyo? (Tabangi ang mga estudyante sa pag-ila og usa ka baruganan nga susama sa mosunod: Kon kita mag-ampo diha sa hugot nga pagtuo, makadawat kita sa Espiritu nga motabang kanato sa pagtudlo sa uban.)
Ngano kahang importante nga adunay impluwensya sa Espiritu samtang kita nagtudlo?

Ipasabut nga human giplano sa Ginoo ang mga baruganan sa pagtudlo sa ebanghelyo, gipadayag Niya ang mga balaod ug mga sugo alang sa tanan nga mga miyembro sa Simbahan. Dapita ang mga estudyante sa pagbasa og dali [scan] sa Doktrina ug mga Pakigsaad 42:18–27, nga mangita sa unsay gisugo sa Ginoo sa mga Santos nga buhaton. Ikonsiderar ang paghangyo sa mga estudyante sa pagpangita ug pagmarka sa hugpong sa mga pulong “dili kamo” matag higayon kini anaa niini nga mga bersikulo.

Unsay gisulti sa Ginoo nga mahimong mga sangputanan sa pagpalapas niini nga mga sugo?

Dapita ang usa ka estudyante sa pagbasa og kusog sa Doktrina ug mga Pakigsaad 42:28–29. Hangyoa ang klase sa pagsunod, nga mangita sa mga rason nga gihatag sa Ginoo sa mga Santos sa pagsunod niini nga mga sugo.

Unsa ang gisulti sa Ginoo nga mahitabo kon ang mga Santos molapas sa Iyang mga sugo ug modumili sa paghinulsol?
Sumala sa bersikulo 29, unsa ang gisulti sa Ginoo nga kinahanglan mao ang atong hinungdan sa pagsunod sa mga sugo? (Human motubag ang mga estudyante, isulat ang mosunod nga doktrina diha sa pisara: Atong ipakita ang atong gugma ngadto sa Ginoo pinaagi sa pag-alagad Kaniya ug sa pagsunod sa Iyang mga sugo.)
Sa unsang paagi nga ang pagsunod sa mga balaod ug mga sugo sa Dios nagpakita sa atong gugma alang Kaniya?
Sa unsang paagi nga ang pagsunod sa mga sugo mas nakapaduol kanimo ngadto sa Ginoo?

Dapita ang mga estudyante sa paghunahuna kon unsa ka maayo sila nagsunod karon sa mga sugo. Awhaga sila sa pagpili og usa ka sugo ug sa pagpasalig sa pagpakita sa ilang gugma alang sa Ginoo pinaagi sa pagpaninguha nga mas maayong mosunod niana nga sugo.

Doktrina ug mga Pakigsaad 42:30–55

Nagpadayag ang Ginoo og mga baruganan sa balaod sa pagpahinungod ug nagtambag sa mga Santos kalabut sa kamatayon ug pagpang-ayo

Ipasabut nga sa dihang miabut si Propeta Joseph Smith sa Kirtland pipila lamang ka adlaw sa wala pa ang pagpadayag nga gilangkub diha sa Doktrina ug mga Pakigsaad 42:1–72 nahatag, iyang nakita nga daghan sa mga Santos didto misulay sa pagsunod sa kinaiya sa unang Kristiyano nga nagbaton sa “tanang butang ingon nga katigayunan sa tanan” (Mga Buhat 4:32) aron nga unta “walay kabus taliwala kanila” (Moises 7:18). Kini nga mga Santos, kinsa nagpuyo sa umahan ni Isaac Morley, nagporma og alayon nga grupo nga gitawag nila og “ang Pamilya.” Gitudlo nila, kauban sa ubang mga butang, nga ang tanang personal nga katigayunan iya sa matag usa diha sa grupo. Samtang kini nga mga miyembro adunay maayo nga mga katuyoan, daghan sa ilang mga kinaiya supak ngadto sa mga baruganan sa kaugalingon nga kabubut-on, pagkamay-tulubagon, ug pribado nga pagpanag-iya sa kabtangan diha diin ang balaod sa Ginoo kalabut sa pagpahinungod gibase.

Dapita ang usa ka estudyante sa pagbasa og kusog sa Doktrina ug mga Pakigsaad 42:30. Hangyoa ang klase sa pagsunod, nga mangita sa mga panudlo sa Ginoo kalabut sa kabus.

Base sa unsay gisugo sa Ginoo sa mga Santos, unsay gisugo sa Ginoo sa matag usa kanato nga buhaton? (Human matubag sa mga estudyante, isulat ang mosunod nga kamatuoran diha sa pisara: Nagsugo kanato ang Ginoo sa pag-amuma sa kabus ug timawa.)
Sumala niini nga bersikulo, giunsa pagtudlo ang mga Santos sa pag-amuma sa kabus ug timawa?

Ipasabut nga ang Doktrina ug mga Pakigsaad 42 naglangkob og mga baruganan sa usa ka balaod nga gitawag og balaod sa pagpahinungod. Aron matabangan ang mga estudyante sa pagsabut unsa ang kahulugan sa pagpahinungod, ipakita ang mosunod nga pagpasabut gikan sa Giya ngadto sa mga Kasulatan ug ang mosunod nga pamahayag gikan ni Elder D. Todd Christofferson sa Korum sa Napulog Duha ka mga Apostoles. Dapita ang usa ka estudyante sa pagbasa niini og kusog.

“Ang [pagpahinungod nangahulugan] sa paghalad, sa pagbalaan, o sa paghimo nga matarung. Ang balaod sa pagpahinungod mao ang usa ka balaang baruganan diin ang mga lalaki ug mga babaye sa kabubut-on nagpahinungod sa ilang panahon, talagsaon nga mga kahibalo, ug kalibutanon nga katigayunan sa pagpahimutang ug pagtukod sa gingharian sa Dios” (Giya ngadto sa mga Kasulatan, “Pahinungod, Balaod sa Pagpahinungod,” scriptures.lds.org).

“Ang pagpahinungod mao ang paggahin o paghalad og usa ka butang ingon nga sagrado, gihalad alang sa balaang mga katuyoan” (D. Todd Christofferson, “Mga Hulagway sa Gipahinungod nga Kinabuhi,” Liahona, Nob. 2010, 16).

Naggamit niining duha ka mga pagpasabut, unsaon nimo sa pagpasabut sa kahulugan sa pagpahinungod sa inyong kaugalingon nga mga pulong?

Aron matabangan ang mga estudyante sa pagsabut kon unsa ka gusto sa Ginoo sa mga Santos nga mosugod sa pagbansay sa balaod sa pagpahinungod, isulat ang mosunod nga mga pulong diha sa pisara: tinugyanan, kabtangan, pagpahinungod, bishop, ug balay tipiganan. Dapita ang usa ka estudyante sa pagbasa og kusog sa Doktrina ug mga Pakigsaad 42:30–34. Hangyoa ang klase sa pagsunod, nga mangita niini nga mga pulong ug sa unsa nga paagi kini kalabut sa pagpuyo sa balaod sa pagpahinungod. Human sa igong panahon, hangyoa ang pipila ka mga estudyante sa pagpasabut kon sa unsa nga paagi ang Ginoo misugo sa unang mga Santos sa pagsugod sa pagpuyo sa balaod sa pagpahinungod sa sayong bahin sa Simbahan.

Kon gikinahanglan, ipasabut nga sa dihang ang balaod sa pagpahinungod gibansay, ang mga Santos mipahinungod sa ilang mga yuta ug mga butang ngadto sa Ginoo pinaagi sa paghatag niini ngadto sa bishop. Ang bishop dayon mihatag niini nga mga yuta ug mga butang ngadto sa mga miyembro sa Simbahan, sumala sa ilang mga kahimtang, gusto, ug mga kinahanglanon. Ang mga miyembro sa Simbahan naglihok isip mga tinugyanan alang sa Ginoo sa pag-amuma sa mga kabtangan ug sa paghatag alang sa ilang mga kaugalingon ug sa ilang mga pamilya. Misugo ang Ginoo nga bisan unsa ang nahibilin nga makuha gikan sa pagkatinugyanan sa usa ka miyembro kinahanglan nga ipahinungod ngadto sa bishop ug ibutang sa balay tipiganan sa “pagpangalagad ngadto sa kabus ug timawa” (D&P 42:34).

Dapita ang mga estudyante sa pagbasa og hilum sa Doktrina ug mga Pakigsaad 42:35–36 nga mangita alang sa unsay gamitan sa nahibilin agi og dugang sa pagpangalagad sa kabus ug timawa. Dapita ang mga estudyante sa pagreport unsay ilang nakit-an.

Ipasabut nga diha sa Doktrina ug mga Pakigsaad 42:37–42, mitudlo usab ang Ginoo sa mga Santos nga kinahanglan dili sila magmapagarbuhon, nga ang ilang mga saput mahimo nga yano, nga ang “tanan nga mga butang [kinahanglang] mahimo nga limpyo” (bersikulo 41), ug nga sila kinahanglan nga “dili magtinapulan” (bersikulo 42).

Pahibaloa ang mga estudyante nga ang baruganan sa pagpahinungod managsama alang sa tanang anak sa Dios sa pakigsaad sa tanang mga dispensasyon, bisan tuod ang piho nga mga paagi nga ang Dios nagtudlo sa Iyang mga katawhan sa pagbansay sa balaod sa pagpahinungod mahimong lahi sa lain nga mga panahon. Bisan tuod og ang Ginoo wala magkinahanglan kanato sa pagpahinungod sa tanan natong materyal nga mga butang karon, Siya nagkinahanglan kanato nga magpuyo sa baruganan sa pagpahinungod.

Unsa ang pipila ka mga paagi kita nagpuyo sa baruganan sa pagpahinungod karon?

Aron matabangan ang mga estudyante sa pagtubag niini nga pangutana, ipakita ang mosunod nga pamahayag ni Presidente Spencer W. Kimball (1895–1985), ug dapita ang usa ka estudyante sa pagbasa niini og kusog:

“Ang pagpahinungod mao ang paghatag sa tawo sa iyang panahon, mga talento, ug sa mga pamaagi sa pag-amuma alang niadtong anaa sa panginahanglan—sa espiritwal man o sa temporal—ug sa pagtukod sa gingharian sa Ginoo” (Spencer W. Kimball, “Welfare Services: The Gospel in Action,” Ensign, Nob. 1977, 78).

Sa unsang paagi imong nakita ang uban nga nagpuyo sa baruganan sa pagpahinungod sa atong panahon?
Sa unsa nga paagi nga ang ilang pagpahinungod mipanalangin niadtong anaa sa espiritwal o temporal nga panginahanglan?

I-summarize ang Doktrina ug mga Pakigsaad 42:43–52 pinaagi sa pagpasabut nga kini nga mga bersikulo naglangkub sa tambag sa Ginoo kalabut sa kamatayon ug pagpang-ayo.

Doktrina ug mga Pakigsaad 42:56–93

Naghatag ang Ginoo sa mga Santos og dugang nga mga balaod ug nagtudlo kanila kon unsaon sa pagtuman sa Iyang balaod

Ipasabut nga diha sa Doktrina ug mga Pakigsaad 42:56–69 ang Ginoo misaad sa pagpadayag og dugang nga kasulatan ug kahibalo ngadto niadtong kinsa mangayo.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 42:59–61, 66–68. Hangyoa ang klase sa pagsunod, nga mangita sa unsay gitudlo sa Manluluwas mahitungod sa pagpadayag ug sa mga kasulatan.

Sumala sa mga bersikulo 59–60, 66, unsa ang gisugo sa Ginoo sa mga Santos nga buhaton sa mga kasulatan nga ila nang nadawat?
Unsa nga mga baruganan kalabut sa pagpadayag ang gitudlo sa Ginoo diha sa mga bersikulo 61 ug 68? (Ang mga estudyante mahimong mogamit og lahi nga mga pulong, apan siguroha nga sila moila sa mosunod nga mga baruganan: Kon kita mangayo, ang Ginoo mohatag kanato og dugang nga pagpadayag ug kahibalo nga modala kanato og kalinaw, hingpit nga kalipay, ug kinabuhing dayon. Kon mangayo kita og kaalam, ang Ginoo mohatag niini ngari kanato. Isulat kini nga mga baruganan diha sa pisara.)
Ngano kaha nga ang Ginoo nagtudlo kanato sa pagpangayo alang sa Iyang paggiya?
Unsa nga mga kasinatian ang naggiya kanimo nga mahibalo nga kini nga mga baruganan tinuod? (Hangyoa ang pipila ka andam nga mga estudyante sa pagpakigbahin sa ilang mga kasinatian uban sa klase).

I-summarize ang Doktrina ug mga Pakigsaad 42:70–93 pinaagi sa pagpasabut nga ang Ginoo mihatag og panudlo kalabut sa temporal nga suporta sa mga lider sa Simbahan ug usab mitudlo sa mga lider sa Simbahan kon sa unsa nga paagi makig-atubang sa mga miyembro kinsa nakahimo og seryoso nga mga sala ug mitudlo sa mga Santos kon sa unsa nga paagi sulbaron ang personal nga mga kalapasan.

Tapusa pinaagi sa pagpakigbahin sa imong pagpamatuod mahitungod sa doktrina ug mga baruganan nga gitudlo niini nga seksyon.

Dugang nga Ideya sa Pagtudlo

Doktrina ug mga Pakigsaad 42:43–52. Ang Ginoo naghatag og mga panudlo kalabut sa kamatayon ug pagpang-ayo

Ipasabut nga diha sa Doktrina ug mga Pakigsaad 42:43–52, ang Ginoo mihatag og mga panudlo kalabut sa kamatayon ug pagpang-ayo. Bahina ang klase ngadto sa grupo nga tinagurha o tinagutlo. Hangyoa sila sa pagbasa sa Doktrina ug mga Pakigsaad 42:43–52 diha sa ilang mga grupo, nga mangita alang sa unsay gitudlo sa Ginoo mahitungod sa pagpang-ayo. Dapita sila sa pagsulat og pamahayag nga baruganan nga nagrepresentar sa balaod sa Ginoo alang sa pagpang-ayo sa masakiton. Human sa igong panahon, dapita ang usa ka miyembro gikan sa kada grupo sa pagreport kon unsa ang gisulat sa iyang grupo. (Ang mga estudyante mahimong mohatag og pipila ka hustong mga tubag, apan siguroha nga sila moila og usa ka baruganan susama sa mosunod: Kon kita adunay hugot nga pagtuo ni Jesukristo, kita mamaayo sumala sa Iyang kabubut-on.)

Nganong importante kini nga hinumduman nga ang pagpang-ayo nag-agad diha sa hugot nga pagtuo ug sa kabubut-on sa Ginoo?

Aron matabangan ang mga estudyante nga mas masabtan kini nga baruganan, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles.:

“Samtang atong gamiton ang dili madudahan nga gahum sa priesthood sa Dios ug samtang atong gihatagan og bili ang Iyang saad nga Siya maminaw ug motubag sa pag-ampo inubanan sa hugot nga pagtuo, hinumduman gayud nato kanunay nga ang hugot nga pagtuo ug ang gahum sa pagpang-ayo sa priesthood dili makahimo og resulta nga sukwahi sa Iyang kabubut-on kansang priesthood Iyaha. …

“… Bisan ang mga sulugoon sa Ginoo, nga naggamit sa Iyang balaanong gahum sa usa ka kahimtang diin adunay igo nga pagtuo nga pagaayohon, dili makahatag og panalangin sa priesthood nga makapaayo sa tawo kon kana nga pag-ayo dili mao ang kabubut-on sa Ginoo.” (Dallin H. Oaks, “Pag-ayo sa Masakiton,” Liahona, Mayo 2010, 50).