Leksyon 42: Doktrina ug mga Pakigsaad 106–8

“Leksyon 42: Doktrina ug mga Pakigsaad 106–8,” Manwal sa Magtutudlo sa Doktrina ug mga Pakigsaad (2017)

“Leksyon 42,” Manwal sa Magtutudlo sa Doktrina ug mga Pakigsaad

Leksyon 42

Doktrina ug mga Pakigsaad 106–8

Pasiuna ug Timeline

Niadtong Nobyembre 25, 1834, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 106. Niini nga pagpadayag, ang Ginoo mitawag ni Warren A. Cowdery, magulang ni Oliver Cowdery ug usa ka bag-ong kinabig sa Simbahan, sa pagdumala sa nagtubo nga gidaghanon sa mga Santos sa Freedom, New York, ug sa naglibut nga dapit. Ang Ginoo misaad usab ni Warren og dako nga mga panalangin alang sa iyang matinud-anon nga serbisyo.

Nadawat ni Propeta Joseph Smith ang pagpadayag nga narekord diha sa Doktrina ug mga Pakigsaad 107 samtang ang bag-ong natawag nga mga miyembro sa Korum sa Napulog Duha ka mga Apostoles nangandam sa pagserbisyo og misyon sa silangan nga Estados Unidos. Kini nga pagpadayag narekord kaniadtong 1835, apan ang mga bahin niini nadawat kaniadtong 1831. Kini nga pagpadayag naglangkub og mga panudlo sa Ginoo kabahin sa pagkapari ug pagdumala sa Simbahan.

Sa Disyembre 26, 1835, si Lyman Sherman milihok sumala sa espiritwal nga panghunahuna sa pagpangayo ni Propeta Joseph Smith og direksyon kabahin sa iyang katungdanan. Agi og tubag, mihatag ang Ginoo og pagpadayag nga gi-rekord diha sa Doktrina ug mga Pakigsaad 108, diin ang Ginoo mipasaylo ni Lyman, misaad kaniya og mga panalangin sumala sa iyang pagkamatinud-anon, ug mihatag kaniya og tambag.

Hunyo 3–6, 1831Ang unang mga indibidwal gi-orden ngadto sa Halangdong Pagkapari diha sa usa ka komperensya sa Simbahan nga gihimo sa Kirtland, Ohio.

Nobyembre 11, 1831Usa ka bahin sa Doktrina ug mga Pakigsaad 107 nadawat.

Mayo–Hulyo 1834Nangulo si Propeta Joseph Smith sa Kampo sa Zion ngadto sa Missouri aron sa pagtabang sa gipanggukod nga mga Santos.

Nobyembre 25, 1834Ang Doktrina ug mga Pakigsaad 106 nadawat.

Pebrero 14, 1835Mga miyembro sa Korum sa Napulog Duha ka mga Apostoles gitawag.

Pebrero 28, 1835Si Lyman Sherman gitawag isip usa ka Presidente sa Kapitoan.

Pebrero 28–Marso 1, 1835Sobra sa singkwenta ka mga lalaki gitawag sa pagserbisyo isip mga Kapitoan.

Marso–sayo sa Mayo 1835Uban nga bahin sa Doktrina ug mga Pakigsaad 107 nadawat.

Disyembre 26, 1835Ang Doktrina ug mga Pakigsaad 108 nadawat.

Mga Sugyot alang sa Pagtudlo

Doktrina ug mga Pakigsaad 106:1–8

Nagtawag ang Ginoo ni Warren A. Cowdery isip usa ka tigdumalang opisyal sa Simbahan ug nagsaad kaniya og mga panalangin alang sa iyang serbisyo

Hangyoa ang mga estudyante sa paghunahuna og usa ka panahon nga sila midawat og calling o buluhaton nga ilang gibati nga sila dili kwalipikado.

Samtang tun-an sa mga estudyante ang Doktrina ug mga Pakigsaa 106, dapita sila sa pagpangita sa doktrina ug mga baruganan nga motabang kanila sa pagsabut sa unsa nga paagi sila makadawat og kasiguroan nga ang Ginoo motabang kanila sa pagtuman sa ilang mga calling ug mga buluhaton diha sa Simbahan.

Ipasabut nga si Warren Cowdery mao ang magulang nga lalaki ni Oliver Cowdery. Bisan og kini maingon nga si Warren nakadungog mahitungod sa Basahon ni Mormon sa panahon nga mga 1830, wala siya mipasakop sa Simbahan niana nga panahon. Kaniadtong Marso 1834, si Propeta Joseph Smith ug Parley P. Pratt mibisita sa Freedom, New York, ug mipuyo sa panimalay ni Warren Cowdery. Sa panahon sa ilang pagpuyo, si Joseph ug si Parley misangyaw ngadto sa mga tagilungsod sa Freedom, ug mga 30 ug 40 ka mga tawo wala madugay mipasakop sa Simbahan. Sa panahon tali sa Mayo ug Septiyembre sa 1834, si Warren Cowdery gibunyagan (tan-awa sa The Joseph Smith Papers, Documents, Volume 4: Abril 1834–Septiyembre 1835, ed. Matthew C. Godfrey ug uban [2016], 180). Sa tinglarag sa 1834, misulat si Warren ngadto sa iyang igsoon nga lalaki nga si Oliver ug mihangyo nga usa ka pangulo sa Simbahan nga pabalikon ngadto sa Freedom, New york, aron sa paglig-on sa mga miyembro sa Simbahan didto. Duha ka bulan wala madugay, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 106. (Tan-awa sa Lisa Olsen Tait, “Warren Cowdery,” sa Revelations in Context, ed. Matthew McBride ug James Goldberg [2016], 219–20, o history.lds.org.)

Dapita ang usa ka estudyante sa pagbasa og kusog sa Doktrina ug mga Pakigsaad 106:1–3. Hangyoa ang klase sa pagsunod, nga mangita sa unsay gitawag sa Ginoo ni Warren Cowdery nga buhaton.

Unsa ang gitawag sa Ginoo nga buhaton ni Warren Cowdery?
Sa unsa kaha nga mga paagi nga ang calling ni Warren ingon og makasanap?

Dapita ang usa ka estudyante sa pagbasa og kusog sa Doktrina ug mga Pakigsaad 106:6. Hangyoa ang klase sa pagsunod, nga mangita ngano nga ang Ginoo nahimuot ni Warren Cowdery.

Ngano nga ang Ginoo nahimuot ni Warren Cowdery?

Dapita ang usa ka estudyante sa pagbasa og kusog sa Doktrina ug mga Pakigsaad 106:7–8. Hangyoa ang katunga sa klase sa pagpangita alang sa unsay gisaad sa Ginoo ni Warren. Hangyoa ang lain nga katunga sa pagpangita alang sa unsay kinahanglan nga buhaton ni Warren aron madawat kadto nga mga panalangin. Hangyoa ang mga estudyante sa pagreport sa unsay ilang nakit-an.

Unsa nga baruganan ang atong maila gikan sa mga bersikulo 7–8 mahitungod sa unsay buhaton sa Ginoo alang kanato kon mapainubsanon kita nga mosunod sa Iyang kabubut-on? (Tabangi ang mga estudyante sa pag-ila sa mosunod nga baruganan: Kon kita mapainubsanon nga mosunod sa kabubut-on sa Ginoo, Siya malooy kanato, mobayaw kanato, ug mohatag kanato og grasya ug kasiguroan.)
Unsa kaha ang kahulugan sa modawat og “grasya og kasigurohan” gikan sa Ginoo (bersikulo 8)?
Sa unsa nga paagi kaha nga ang pagdawat sa grasya ug kasiguroan sa Ginoo nagtabang kanato kon kita nakadawat og calling o buluhaton nga gibati nato nga dili kwalipikado?

Dapita ang mga estudyante sa paghunahuna og usa ka panahon nga sila nakasinati sa kalooy, grasya, ug kasiguroan sa Ginoo samtang sila mapainubsanon nga naningkamot sa pagserbisyo Kaniya. Hangyoa ang pipila ka mga estudyante sa pagpakigbahin sa ilang mga kasinatian ngadto sa klase. Paghunahuna sa pagpakigbahin og usa sa imong mga kasinatian usab.

Dapita ang mga estudyante sa pagsulat og usa ka tumong mahitungod sa unsa ang ilang buhaton sa pagpaubos sa ilang mga kaugalingon diha sa atubangan sa Ginoo aron sila mas hingpit nga makadawat sa Iyang kalooy, grasya, ug kasiguroan.

Doktrina ug mga Pakigsaad 107:1–20

Ang Ginoo nagtudlo mahitungod sa Melchizedek ug Aaronic nga mga Pagkapari

Pahinumdumi ang mga estudyante nga gipahiuli sa Ginoo ang mga kamatuoran sa ebanghelyo latid ibabaw sa latid kay sa tanan sa usa ka higayon. Gisunod sa Ginoo kining sama nga sundanan samtang siya mipadayag sa han-ay sa pagkapari ug sa pagdumala sa Simbahan.

Ipasabut nga sa Pebrero 1835, hapit lima ka tuig human ang Simbahan natukod, ang Korum sa Napulog Duha ka mga Apostoles na-organisar. Usa sa unang mga katungdanan sa bag-ong natawag nga mga Apostoles mao ang paghimo og mga komperensya diha sa mga branch sa Simbahan sa silangang Estados Unidos. Sa panahon nga dili pa ang mga Apostoles mobiya sa Kirtland alang niini nga misyon kaniadtong Mayo 1835, gipresentar sa Propeta kanila ang impormasyon nga gi-rekord diha sa Doktrina ug mga Pakigsaad 107, diin naglakip og mga panudlo mahitungod sa pagkapari ug pagdumala sa Simbahan.

Dapita ang daghan nga mga estudyante nga magpuli-puli sa pagbasa og kusog gikan sa Doktrina ug mga Pakigsaad 107:1–6. Hangyoa ang klase sa pagsunod, nga mangita sa unsay gitudlo niini nga mga bersikulo mahitungod sa pagkapari.

Sumala sa bersikulo 2, ngano nga ang unang pagkapari gitawag og Melchizedek nga Pagkapari?
Unsa ang tawag sa Melchizedek nga Pagkapari sa wala pa ang panahon ni Melchizedek?
Sumala sa bersikulo 5, unsa ang kalabutan sa tanan nga lain nga “mga kagamhanan o mga buhatan diha sa simbahan” ngadto sa pagkapari? (Ipasabut nga ang dugang maoy usa ka butang nga gisumpay ngadto o bahin sa usa ka mas dako nga tibuok.)

Dapita ang daghan nga mga estudyante nga magpuli-puli sa pagbasa og kusog sa Doktrina ug mga Pakigsaad 107:7–12, 18–19. Hangyoa ang klase sa pagsunod, nga mangita sa unsay gitudlo sa Ginoo mahitungod sa Melchizedek nga Pagkapari.

Unsa ang gitudlo sa mga bersikulo 8–10 mahitungod sa awtoridad sa Melchizedek nga Pagkapari? Human matubag sa mga estudyante, isulat ang mosunod nga doktrina diha sa pisara: Ang Melchizedek nga Pagkapari naghupot sa katungod sa kapangulohan ug adunay gahum ug awtoridad ibabaw sa tanan nga mga katungdanan diha sa Simbahan sa pagdumala sa espiritwal nga mga butang.)

Ipasabut nga ang “[pag]tugyan sa espirituhanon nga mga butang” (bersikulo 8) naglakip sa pagpangalagad sa mga panalangin, mga ordinansa, ug mga pakigsaad.

Unsa nga doktrina ang atong makat-unan gikan sa bersikulo 18 mahitungod sa Melchizedek nga Pagkapari? (Tabangi ang mga estudyante sa pag-ila sa mosunod nga doktrina: Ang Melchizedek nga Pagkapari naghupot sa mga yawe sa tanang espiritwal nga mga panalangin sa Simbahan.)

Aron matabangan ang mga estudyante nga makasabut niini nga doktrina, dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith (1805–1844):

“Ang Melchizedek nga Pagkapari … mao ang agianan diin ang tanang kahibalo, doktrina, ang plano sa kaluwasan, ug sa tanang importante nga butang ipadayag gikan sa langit” (Mga Pagtulun-an sa mga Presidente sa Simbahan: Joseph Smith [2007), 127).

Sumala sa Doktrina ug mga Pakigsaad 107:19, unsa nga espiritwal nga mga panalangin ang madawat sa mga miyembro sa Simbahan tungod sa Melchizedek nga Pagkapari?

Dapita ang usa ka estudyante sa pagbasa og kusog sa Doktrina ug mga Pakigsaad 107:13–17, 20. Hangyoa ang klase sa pagsunod, nga mangita sa unsay gitudlo sa Ginoo mahitungod sa Aaronic nga Pagkapari. Hangyoa ang mga estudyante sa pagreport sa unsay ilang nakit-an.

Doktrina ug mga Pakigsaad 107:21–38

Ang Ginoo naglatid sa mga katungdanan ug mga responsibilidad sa tigdumalang mga korum sa Simbahan

Ipasabut nga isip kabahin sa pagpahiuli sa pagkapari ug sa pagdumala sa Simbahan, ang Ginoo naglatid hain nga korum ang maghimo og mga hukom alang sa tibuok Simbahan ug sa unsa nga paagi kinahanglan ilang himoon ang mga desisyon.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 107:21–26, 33–35. Hangyoa ang klase sa pagsunod, nga mangita kon unsay gitudlo sa Ginoo mahitungod sa mga korum nga gitawag sa pagpangulo sa tibuok Simbahan.

Unsa ang gitudlo sa Ginoo mahitungod sa mga korum nga gitawag sa pagpangulo sa tibuok Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 107:27–31. Hangyoa ang klase sa pagsunod, nga mangita kon sa unsa nga paagi kini nga mga korum kinahanglanan nga mohimo og mga hukom.

Sumala sa bersikulo 27, sa unsa nga paagi ang tigdumalang mga korum sa Simbahan mohimo og mga hukom?
Sumala sa bersikulo 31, unsa ang gisaad sa Ginoo nga mahitabo kon kini nga mga korum mihimo og mga hukom diha sa panaghiusa ug diha “sa tanang pagkamatarung” (bersikulo 30)? (Human matubag sa mga estudyante, isulat ang mosunod nga baruganan diha sa pisara: Tungod kay ang tigdumalang mga korum sa Simbahan naghimo og mga hukom diha sa panaghiusa ug pagkamatrung, ilang madawat ang kahibalo sa Ginoo.)
Sa unsang paagi nga ang pagkahibalo nga ang tigdumalang mga korum sa Simbahan nagdawat og kahibalo sa Ginoo pag-impluwensya sa inyong kaandam sa pagsunod kanila?

I-summarize ang Doktrina ug mga Pakigsaad 107:39–57 pinaagi sa pagpasabut nga ang Ginoo mipadayag nga ang patriyarkal nga kapunongan sa pagkapari gitukod sa mga panahon ni Adan (tan-awa sa bersikulo 41) ug “gihatag gikan sa amahan ngadto sa anak nga lalaki” (bersikulo 40). Tulo ka tuig sa wala pa mamatay si Adan, nakigkita siya sa mga tighupot sa pagkapari ingon man sa tanan niyang matarung nga kaliwatan sa Adan-Ondi-Ahman (tan-awa sa bersikulo 53). Gipanalanginan ni Adan ang iyang matinud-anon nga mga anak, ug ang Ginoo mipakita ngadto kanila (tan-awa sa mga bersikulo 53–54).

Ipasabut nga kita nagkat-on gikan sa Doktrina ug mga Pakigsaad 107:58–98 nga ang Ginoo misugo sa Napulog Duha ka mga Apostoles sa “pag-orden ug sa pagpahimutang diha sa kahusay sa tanang uban pa nga mga opisyal sa Simbahan” (bersikulo 58), ug Siya milatid sa mga katungdanan sa mga bishop ug mga korum nga presidente (tan-awa sa mga bersikulo 60–98).

Dapita ang usa ka estudyante sa pagbasa og kusog sa Doktrina ug mga Pakigsaad 107:99–100. Hangyoa ang klase sa pagsunod, nga mangita sa mensahe nga buot sa Ginoo nga makat-unan sa mga opisyal.

Pinasikad sa unsay gisugo sa Ginoo sa mga opisyal sa Simbahan, unsa ang kinahanglan gayud natong buhaton aron mahimong “takus nga mobarug” diha sa atubangan sa Ginoo (bersikulo 100)? (Tabangi ang mga estudyante sa pag-ila sa mosunod nga baruganan: Aron mahimong takus sa pagbarug diha sa atubangan sa Ginoo, kita kinahanglan gayud nga magkat-on sa atong katungdanan ug magbuhat sa tumang kakugi sa pagtuman niini.)
Unsa ang pipila ka mga paagi kita makapaningkamot sa pagkat-on sa atong katungdanan ug makugihon sa pagtuman niini?
Kanus-a kamo napanalanginan sa usa ka tawo kinsa makugihon sa pagtuman sa iyang calling?

Ipamatuod nga samtang kita nagkat-on sa atong katungdanan ug makugihon sa pagtuman niini, kita mahimong takus sa pagbarug diha sa atubangan sa Ginoo.

Doktrina ug mga Pakigsaad 108:1–8

Ang Ginoo nagpasaylo, nagsaad og mga panalangin, ug nagtambag ni Lyman Sherman

Aron matabangan ang mga estudyante nga makasabut sa kinatibuk-ang kahulugan sa Doktrina ug mga Pakigsaad 108, dapita ang usa ka estudyante sa pagbasa og kusog sa mosunod:

Sa Disyembre 26, 1835, usa ka tawo nga ginganlan og Lyman Sherman, kinsa usa ka higala ni Propeta Joseph Smith, miadto sa balay sa Propeta. Misulti si Lyman kaniya,“Ako giagni sa pagpahibalo diha kanimo sa akong mga pagbati ug mga tinguha ug gisaaran nga kinahanglan ako makabaton og pagpadayag nga magpahibalo sa akong katungdanan” (“Journal, 1835–1836,” 89, josephsmithpapers.org). Agi og tubag, ang Propeta nangutana sa Ginoo ug nadawat ang pagpadayag nga gi-rekord diha sa Doktrina ug mga Pakigsaad 108.

Dapita ang usa ka estudyante sa pagbasa og kusog sa Doktrina ug mga Pakigsaad 108:1–3. Hangyoa ang klase sa pagsunod, nga mangita sa mga panalangin nga nadawat ni Lyman Sherman tungod kay misunod siya sa pag-aghat nga makigkita sa Propeta.

Unsa nga mga panalangin ang nadawat ni Lyman tungod kay siya misunod sa pag-aghat nga makigkita sa Propeta?
Unsa nga tambag ang gihatag sa Ginoo ni Lyman?

I-summarize ang Doktrina ug mga Pakigsaad 108:4–6 pinaagi sa pagpasabut nga ang Ginoo misulti ni Lyman Sherman sa “paghulat nga mapailubon hangtud ang maligdong nga katiguman [paga] tawgon,” diha diin nga panahon ikaw i-orden uban sa mga elder ug ipadala aron sa pagsangyaw sa ebanghelyo (bersikulo 4).

Dapita ang usa ka estudyante sa pagbasa og kusog sa Doktrina ug mga Pakigsaad 108:7–8. Hangyoa ang klase sa pagsunod, nga mangita sa dugang nga mga panudlo sa Ginoo nga gihatag ngadto ni Lyman.

Sa unsang paagi ang Ginoo buot ni Lyman nga “molig-on sa [iyang] mga kaigsoonan” (bersikulo 7)? (Ipasabut nga dinhi niini nga bersikulo, ang pulong panagsultihanay nagpasabut ngadto sa matarung nga pamatasan o panlihok sa usa ka tawo ug ang pulong nga pagdasig nagpasabut og mga pagtudlo.)
Unsa nga baruganan ang atong makat-unan gikan sa bersikulo 7 mahitungod sa unsa ang gipaabut sa Ginoo kanato? (Tabangi ang mga estudyante sa pag-ila sa mosunod nga baruganan: Ang Ginoo nagpaabut kanato sa paglig-on sa uban diha sa atong tanan nga matarung nga pamatasan, mga pag-ampo, mga pagtudlo, ug mga lihok.)

Ipasabut nga ang atong matarung nga pamatasan ug mga lihok naglakip sa paagi nga kita makigsulti sa uban, lakip sa atong mga panagsultihanay nga mga gisulat ug gipadala pinaagi sa digital.

Sa unsa nga paagi kamo makalig-on niadtong naglibut kaninyo diha sa inyong matarung nga pamatasan, mga pulong, ug mga lihok?
Kanus-a kamo napalig-on pinaagi sa matarung nga pamatasan, mga pulong, o mga lihok sa uban? (Hunahunaa usab ang pagpakigbahin sa imong kaugalingon nga kasinatian.)

Dapita ang mga estudyante sa pagsulat og usa ka tumong kalabut sa unsa nga paagi sila molig-on sa uban diha sa tanan nilang matarung nga pamatasan, mga pulong, ug mga lihok.