Leksyon 9
Doktrina ug mga Pakigsaad 20–22
Pasiuna ug Timeline
Sa usa ka pagpadayag ngadto ni Propeta Joseph Smith, ang Ginoo misugo nga ang Iyang Simbahan iorganisar sa Abril 6, 1830. Bisan tuod kini nga pagpadayag, karon nailhan isip ang Doktrina ug mga Pakigsaad 20, narekord pila ka adlaw human sa pag-organisar sa Simbahan, mga bahin niini napadayag ingon ka sayo sa Hunyo 1829. Kini nga pagpadayag nagtataw sa importansya sa Basahon ni Mormon, nag-outline sa mga responsibilidad sa mga katungdanan sa priesthood, ug naghatag og mga panudlo alang sa mga ordinansa sa bunyag ug sa sakrament.
Sa adlaw nga ang Simbahan naorganisar, si Propeta Joseph Smith nakadawat og pagpadayag nga girekord diha sa Doktrina ug mga Pakigsaad 21. Diha niini, gitudlo si Joseph sa Ginoo isip usa ka propeta, manalagna, ug lider sa gipahiuli nga Simbahan ug nag-awhag sa Simbahan sa pagpamati sa mga pulong sa Propeta. Wala madugay human naorganisar ang Simbahan, pipila ka mga tawo nangutana kon kadtong kinsa gibunyagan kaniadto sa ubang mga simbahan gikinahanglan bang magpabunyag og usab aron mahimong mga miyembro sa gipahiuli nga Simbahan. Nangutana si Joseph ug nadawat ang pagpadayag nga anaa sa Doktrina ug mga Pakigsaad 22, diin ang Ginoo mitudlo nga ang bunyag kinahanglan gayud nga ipahigayon pinaagi niadtong adunay husto nga awtoridad.
-
Katapusan sa Marso, 1830Ang pag-imprinta sa Basahon ni Mormon nakompleto na.
-
Abril 6, 1830Ang Simbahan giorganisar ni Joseph Smith sa Fayette, New York.
-
Abril 6, 1830Ang Doktrina ug mga Pakigsaad 21 nadawat.
-
Human sa Abril 6, 1830AngDoktrina ug mga Pakigsaad 20 natapos ug narekord (bisan og may mga bahin nga nadawat sa nag-unang mga buwan).
-
Abril 16, 1830Ang Doktrina ug mga Pakigsaad 22 nadawat.
-
Hunyo 9, 1830Ang unang komperensya sa Simbahan gihimo didto sa Fayette, New York.
Mga Sugyot alang sa Pagtudlo
Doktrina ug mga Pakigsaad 20:1–36
Ang mga panghitabo sa Pagpahiuli gisaysay ug ang mga kamatuoran nga gitudlo diha sa Basahon ni Mormon gi-summarize
Dapita ang mga estudyante sa paghunahuna nga usa ka higala kinsa less active sa Simbahan nag-ingon, “Dili kinahanglan nga ikaw mag-aktibo diha sa Simbahan nga mahimong usa ka maayong tawo o mas maduol ngadto sa Ginoo.”
-
Ngano kaha nga ang pipila ka mga tawo mobati niini nga paagi?
-
Unsaon ninyo pagtubag ang inyong higala?
Samtang ang mga estudyante magtuon karon sa Doktrina ug mga Pakigsaad 20 dapita sila sa pagpangita og mga kamatuoran nga motabang kanila sa pagsabut sa panginahanglan ug mga panalangin sa aktibong pag-apil diha sa Ang Simbahan ni Jesukristo sa mga Santos sa Ulahing mga Adlaw.
Ipasabut nga ingon ka sayo sa 1828, nadawat ni Propeta Joseph Smith ang mga pagpadayag nga naghisgot sa pagtukod og usa ka simbahan (tan-awa sa D&P 10:53). Mga pagpangandam alang niini nagsugod sa Hunyo 1829, sa dihang gitudloan sa Ginoo si Oliver Cowdery sa pagtabang paglig-on sa Iyang Simbahan pinasikad sa mga pagtulun-an diha sa Basahon ni Mormon (tan-awa sa D&P 18:3–4).
Dapita ang mga estudyante sa pagbasa og hilum sa ulohan sa seksyon sa Doktrina ug mga Pakigsaad 20 ug sa mga bersikulo 1–2, mangita alang sa unsay gipadayag sa Ginoo mahitungod sa organisasyon sa Simbahan ni Jesukristo sa ulahing mga adlaw.
-
Unsa nga mga kamatuoran ang atong makat-unan gikan sa ulohan sa seksyon ug niini nga mga bersikulo mahitungod sa organisasyon sa Simbahan ni Jesukristo? (Bisan og ang mga estudyante moila og daghang mga kamatuoran, siguroha nga ilang maila nga gi-organisar ni Joseph Smith ang Simbahan ni Jesukristo sumala sa kabubut-on sa Dios.)
-
Nganong importante kini nganha kanimo nga makahibalo nga Ang Simbahan ni Jesukristo sa mga Santos sa Ulahing mga Adlaw gi-organisar ubos sa direksyon sa Ginoo?
Dapita ang usa ka estudyante sa pagbasa og kusog sa mosunod nga istorya kabahin niini nga panghitabo:
“Niadtong Abril 6, 1830, napulog usa ka adlaw lamang human mamantala nga ibaligya ang Basahon ni Mormon, usa ka grupo sa mga 60 ka mga tawo nagpundok diha sa balay nga troso ni Peter Whitmer Sr. didto sa Fayette, New York. Didto pormal nga gi-organisar ni Joseph Smith ang Simbahan, nga sa kaulahian ginganlan pinaagi sa pagpadayag nga Ang Simbahan ni Jesukristo sa mga Santos sa Ulahing mga Adlaw (tan-awa sa D&P 115:4). Usa kini ka malipayong okasyon, inubanan sa tumang pagbu-bu sa Espiritu. Gipangalagad ang sakramento, mga tumutuo gibunyagan, ang gasa sa Espiritu Santo gitugyan, ug ang mga lalaki gi-orden ngadto sa priesthood” (Mga Pagtulun-an sa mga Presidente sa Simbahan: Joseph Smith [2007], 10).
Sultihi ang mga estudyante nga niadtong Marso 26, 1830, pipila lamang ka mga adlaw sa wala pa ma-organisar ang Simbahan, ang unang mga kopya sa Basahon ni Mormon anaa na. Ipasabut nga ang Doktrina ug mga Pakigsaad 20:5–36 nag-istorya sa pagtungha sa Basahon ni Mormon ug nagpatataw sa pipila ka mga sukaranan nga mga doktrina nga gitudlo sulod sa mga pahina niini. Ipabasa og hilum sa katunga sa klase ang Doktrina ug mga Pakigsaad 20:5–16 mangita og doktrinal nga mga kamatuoran mahitungod sa Basahon ni Mormon. Dapita ang laing katunga sa klase sa pagbasa og hilum sa Doktrina ug mga Pakigsaad 20:17–25 mangita sa pipila ka sukaranang doktrina ug mga baruganan nga gitudlo diha sa sulod sa Basahon ni Mormon. Aron matabangan ang mga estudyante sa pagsabut sa bersikulo 17, kinahanglan nimong ipasabut nga ang hugpong sa mga pulong “mga butang” nagpasabut sa doktrina ug mga baruganan nga atong nahibaloan pinaagi sa Basahon ni Mormon.
Dapita ang mga estudyante sa pagpakigbahin sa doktrina ug mga baruganan nga ilang nailhan sa mga bersikulo nga gi-assign diha kanila. Mahimo nga mailhan sa mga estudyante ang mga kamatuoran sama sa mosunod: ang Basahon ni Mormon ebidensya nga gipahiuli sa Dios ang ebanghelyo sa atong panahon (mga bersikulo 11–15). Kon atong dawaton ang Basahon ni Mormon diha sa hugot nga pagtuo ug pagkamatarung, kita makadawat og kinabuhi nga dayon (bersikulo 14). Kon kita motuo ni Jesukristo, magpabunyag diha sa Iyang ngalan, ug molahutay ngadto sa katapusan, kita maluwas (bersikulo 25).
-
Base sa mga kamatuoran nga atong nailhan, ngano kaha ang Ginoo naghulat hangtud ang paghubad ug pagmantala sa Basahon ni Mormon nakompleto sa wala pa ma-organisar pag-usab ang Iyang Simbahan sa yuta?
Doktrina ug mga Pakigsaad 20:37–84
Nagtudlo ang Ginoo sa Simbahan kalabut sa mga katungdanan sa priesthood, bunyag, ug sa sakrament
Ipasabut nga isip kabahin sa mga panudlo mahitungod sa organisasyon sa Simbahan, ang Ginoo nag-outline sa mga kwalipikasyon nga gikinahanglan alang sa pagbunyag ngadto sa Simbahan. Dapita ang usa ka estudyante sa pagbasa og kusog sa Doktrina ug mga Pakigsaad 20:37. Hangyoa ang klase sa pagsunod ug sa pagtimaan og hugpong sa mga pulong nga naghulagway sa mga gikinahanglan sa Ginoo alang sa bunyag. (Mahimo nimong isulat diha sa pisara ang mga hugpong sa mga pulong nga nadiskubrehan sa mga estudyante.)
-
Hain niining mga hugpong sa mga pulong ang labing makahuluganon kanimo ug ngano?
I-summarize ang Doktrina ug mga Pakigsaad 20:38–67 pinaagi sa pagpasabut nga kini nga mga bersikulo nag-outline sa mga buluhaton sa mga anciano [elder], mga pari, mga magtutudlo, ug mga deakono. Sa bersikulo 65, atong nakat-unan nga walay tawo nga i-orden ngadto sa bisan unsa nga katungdanan sa priesthood nga walay pagpaluyo nga pagboto sa mga miyembro sa Simbahan (tan-awa usab ang D&P 26:2).
Dapita ang usa ka estudyante sa pagbasa og kusog sa Doktrina ug mga Pakigsaad 20:68–70. Hangyoa ang klase sa pagsunod, nga mangita sa mga buluhaton sa mga miyembro sa Simbahan. Aron matabangan ang mga estudyante sa pagsabut niini nga mga bersikulo, mahimong kinahanglan nimong ipasabut nga ang panagsultihanay diha sa bersikulo 69 nagpasabut sa pamatasan o lihok.
-
Sa unsa nga paagi nga ang usa ka tawo “mopakita … pinaagi sa matarung nga kinabuhi ug panultihon” (D&P 20:69) nga siya takus sa pagdawat sa Espiritu Santo ug sa pag-ambit sa sakrament?
I-summarize ang Doktrina ug mga Pakigsaad 20:71–74 pinaagi sa pagpahibalo sa mga estudyante nga kini nga mga bersikulo nagpasabut nga ang mga indibidwal dili pagabunyagan sa dili pa moabut sa panuigon sa pagkamay tulubagon ug makahimo sa paghinulsol. Usab, ang bunyag kinahanglan gayud nga pagahimoon pinaagi sa pagpaunlod ug ipahigayon sa usa ka tawo nga naghupot sa priesthood.
Pahibaloa ang mga estudyante nga human matudloi ang mga miyembro kalabut sa bunyag, ang Ginoo nagsugo nga ang mga Santos magtigum sa kanunay. Dapita ang mga estudyante sa pagbasa og hilum sa Doktrina ug mga Pakigsaad 20:75 mangita kon ngano nga ang mga miyembro sa Simbahan kinahanglan nga magtigum kanunay. Dapita ang mga estudyante sa pagreport unsay ilang nadiskubrihan.
Isulat ang mosunod nga mga pamahayag nga dili kompleto diha sa pisara:
Kon kita nag-ambit sa sakrament, kita nagsaksi …
Samtang kita matinud-anong naghupot sa mga saad nga gihimo atol sa sakrament, ang Ginoo nagsaad …
Dapita ang mga estudyante sa pagbasa og hilum sa Doktrina ug mga Pakigsaad 20:76–79 mangita kon unsaon nila pagkompleto kining duha ka mga pahayag sa baruganan. Human sa igong panahon, hangyoa ang mga estudyante sa pagpakigbahin sa mga baruganan nga ilang nailhan. Bisan tuod mahimo silang mogamit og ubang mga pulong, kinahanglan nga ilhon sa mga estudyante ang mosunod nga mga baruganan: Kon kita moambit a sakrament, kita mosaksi nga kita andam sa pagdala diha kanato sa ngalan ni Jesukristo, ug sa kanunay mohinumdom Kaniya, ug maghupot sa Iyang mga sugo. Samtang kita sa matinud-anong paagi naghupot sa mga saad nga gihimo atol sa sakrament, ang Ginoo nagsaad nga kita sa kanunay makabaton sa Iyang Espiritu uban kanato.
-
Unsa nga mga pagkasusama ang imong nakita atol sa sakrament ug sa pakigsaad sa bunyag (tan-awa sa bersikulo 37)?
-
Nganong importante ang kanunay nga pagbaton sa Espiritu uban kanimo?
Dapita ang mga estudyante sa pagpamalandong kon unsa ka maayo silang naghupot sa mga pakigsaad nga ilang gibag-o pinaagi sa pag-ambit sa sakrament. Awhaga sila sa paghimo og bisan unsa nga mga kausaban nga gikinahanglan sa paghupot niadto nga mga pakigsaad sa mas matinud-anong paagi. Pasaligi sila nga samtang naghimo sila niadto nga mga kausaban makabaton sila sa Espiritu uban kanila.
Doktrina ug mga Pakigsaad 21
Ang mga miyembro sa Simbahan kinahanglang mopatalinghug sa mga pulong ni Joseph Smith
Dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:
“Pinalangga nga mga kabatan-onang mga lalaki ug mga babaye sa Simbahan, kita nalambigit og gubat tali sa mga gahum sa kahayag ug sa kangitngit. …
“Ug niini nga kalibutan, ang kangitngit dili gayud layo” (Robert D. Hales, “Out of Darkness into His Marvelous Light,” Ensign, Mayo 2002, 70, 71).
Dapita ang mga estudyante sa pagpangita og usa ka baruganan diha sa Doktrina ug mga Pakigsaad 21 nga motabang kanila nga mahibalo kon unsaon pagdaug ang gubat batok sa kangitngit. Aron matabangan ang mga estudyante sa pagsabut sa konteksto niini nga pagpadayag, hangyoa ang mga estudyante sa pagbasa og kusog sa ulohan sa seksyon alang sa Doktrina ug mga Pakigsaad 21.
I-summarize ang Doktrina ug mga Pakigsaad 21:1–3 pinaagi sa pagpasabut nga ang Ginoo nagsugo nga usa ka rekord pagatipigan kabahin sa kasaysayan sa Simbahan. Gitudlo usab Niya ang calling ni Joseph Smith isip manalagna, tighubad, propeta, apostol, ug elder sa Simbahan.
Dapita ang usa ka estudyante sa pagbasa og kusog sa Doktrina ug mga Pakigsaad 21:4–6. Hangyoa ang klase sa pagsunod, mangita kon unsay gipabuhat sa Ginoo sa mga miyembro sa Simbahan.
-
Sumala sa bersikulo 5, sa unsa nga paagi gusto sa Ginoo nga isipon nato ang mga pulong sa propeta? (Kinahanglang makaila ang mga estudyante og kamatuoran nga susama sa mosunod: Ang Ginoo nagsugo kanato sa pagdawat sa mga pulong sa propeta ingon og kini gikan sa Iyang kaugalingong ba-ba.)
-
Base niini nga mga bersikulo, unsa ang atong mabuhat nga mapanalipdan batok sa “mga gahum sa kangitngit” (bersikulo 6)? (Human sa tubag sa mga estudyante, isulat ang mosunod nga baruganan diha sa pisara: Samtang kita nagpatalinghug sa mga pulong sa propeta diha sa pagpailub ug hugot nga pagtuo, kita paganalipdan batok sa mga gahum sa kangitngit.)
-
Sa unsa nga paagi nga ang pagpatalinghug sa mga pulong sa propeta “mopatibulaag sa mga gahum sa kangitngit” (D&P 21:6)?
-
Ngano kaha nga usahay nagkinahanglan og pagpailub ug hugot nga pagtuo sa pagdawat ug sa pagpatalinghug sa mga pulong sa propeta?
I-display ang mosunod nga pamahayag ni Presidente Harold B. Lee (1899–1973), ug dapita ang usa ka estudyante sa pagbasa niini og kusog:
“Ang bugtong kasiguroan nga anaa kanato isip mga miyembro niini nga simbahan mao ang … pagpaminaw sa mga pulong ug mga sugo nga ang Ginoo mohatag pinaagi sa Iyang propeta. … Maanaay pipila ka mga butang nga nagkinahanglan og pagpailub ug hugot nga pagtuo. Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini supak sa inyong politikanhong mga panghunahuna. Mahimo nga kini supak sa inyong sosyal nga mga panghunahuna. Mahimo kining mosamok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao ‘ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan’ (D&P 21:6)” (Mga Pagtulun-an sa mga Presidente sa Simbahan: Harold B. Lee [2000], 101).
-
Sa unsang paagi ikaw napanalanginan tungod sa pagpatalinghug sa mga pulong sa buhi nga mga propeta? (Ikonsiderar ang pagpakigbahin sa imo mismo nga kasinatian.)
Dapita ang mga estudyante sa pagpamalandong sa bag-ong mga pagtulun-an sa mga propeta sa Dios. Awhaga sila sa paghimo og usa ka pasalig sa pagsunod niadto nga mga pagtulun-an diha sa tanang pagpailub ug hugot nga pagtuo.
Doktrina ug mga Pakigsaad 22
Ang bunyag kinahanglan gayud nga ipahigayon niadtong adunay tukmang awtoridad
Ipasabut nga human sa pag-organisar sa Simbahan niadtong Abril 1830, daghan ang nagtinguha nga mahimong mga miyembro sa gipahiuli nga Simbahan sa Ginoo. Hinoon, ang pipila kinsa nabunyagan na sa ubang mga simbahan gustong mopasakop nga dili magpabunyag og usab. Human mangutana sa Ginoo, nadawat ni Joseph Smith ang pagpadayag nga girekord diha sa Doktrina ug mga Pakigsaad 22, diin gitudlo nga ang bunyag kinahanglan gayud nga ipahigayon pinaagi niadtong may tukma nga awtoridad.
Taposa pinaagi sa pagpakigbahin sa imong pagpamatuod kabahin sa pagpahiuli sa Simbahan sa Ginoo dinhi sa yuta ug sa buhing mga propeta kinsa nagdumala sa Iyang buhat.