Institute
Leksyon 7: Doktrina ug mga Pakigsaad 4; 11–12; 14–16

Leksyon 7

Doktrina ug mga Pakigsaad 4; 11–12; 14–16

Pasiuna ug Timeline

Sayo sa tuig 1829, mibisita si Joseph Smith Sr. sa iyang anak nga si Joseph sa Harmony, Pennsylvania. Samtang anaa didto, nagtinguha si Joseph Smith Sr. nga mahibalo unsay iyang mabuhat para makatabang sa buhat sa Ginoo. Nangutana ang propeta sa Ginoo ug nadawat ang pagpadayag nga narekord sa Doktrina ug mga Pakigsaad 4. Niini nga pagpadayag, gipakita sa Ginoo ang mga hiyas nga maghimong kwalipikado sa usa ka tawo aron makatabang sa Iyang buhat.

Niadtong Mayo 1829, ang magulang nga igsoon sa Propeta nga si Hyrum mibiyahe sa Harmony, Pennsylvania, sa pagbisita ni Joseph. Sa hangyo ni Hyrum, mihangyo ang Propeta sa Ginoo nga ipadayag ang Iyang kabubut-on bahin ni Hyrum. Sa pinadayag nga narekord sa Doktrina ug mga Pakigsaad 11, gisultihan sa Ginoo si Hyrum unsay angay niyang buhaton sa pagtabang nga maestablisar ang Zion.

Mibisita usab si Joseph Knight Sr. ni Propeta Joseph Smith niadtong Mayo 1829 ug mipadayag sa iyang tinguha nga motabang sa buhat sa Dios. Ang Doktrina ug mga Pakigsaad 12 naglangkob sa tambag sa Ginoo kaniya.

Human makabalhin si Joseph Smith ug Oliver Cowdery sa balay ni Peter Whitmer Sr. sa Fayette, New York, ug mipadayon sa paghubad sa Basahon ni Mormon, nakadawat ang Propeta og mga pagpadayag para sa tulo ka anak nga lalaki ni Peter Whitmer Sr: nga sila si David, John, ug Peter Whitmer Jr. (tan-awa sa D&P 14–16). Niini nga mga pagpadayag nga narekord sa Doktrina ug mga Pakigsaad 14–16, gipasabut og maayo sa Ginoo ang kaimportante nga masangyaw ang paghinulsol aron sa pagdala og mga kalag ngadto Kaniya.

Enero 1829Mibisita si Joseph Smith Sr. ni Joseph ug Emma sa Harmony, Pennsylvania.

Pebrero 1829Ang Doktrina ug mga Pakigsaad 4 nadawat.

Mayo 1829Nakadawat si Joseph ug Emma Smith og mga pagbisita gikan ni Hyrum Smith ug Joseph Knight Sr.

Mayo 1829Nadawat ang Doktrina ug mga Pakigsaad 11–12.

Mga Hunyo 1, 1829Namalhin si Joseph ug Oliver ngadto sa Fayette, New York, aron ipadayon ang paghubad sa Basahon ni Mormon.

Hunyo 1829Nadawat ang Doktrina ug mga Pakigsaad 14–16.

Ulahi nga bahin sa Hunyo 1829Nakita na sa Tulo ka Saksi ug sa Walo ka Saksi ang bulawang mga palid.

Mga Sugyot alang sa Pagtudlo

Doktrina ug mga Pakigsaad 4

Gipadayag sa Ginoo ngadto ni Joseph Smith Sr. unsay maghimong kwalipikado sa usa ka tawo aron makatabang sa Iyang buhat

Isulat sa pisara ang mosunod nga mga pangutana sa dili pa magklase:

Unsaon ninyo sa pagkahibalo kon unsay gusto sa Ginoo nga inyong buhaton aron makatabang Niya sa Iyang buhat?

Dapita ang mga estudyante sa pagpamalandong niini nga pangutana sa tibuok leksyon ug sa pagpangita sa mga doktrina ug mga baruganan nga makatabang nila sa pagkahibalo unsaon nga makatabang sila sa buhat sa Ginoo.

Ipasabut nga niadtong Enero 1829, si Joseph Smith Sr. mibiyahe gikan sa Palmyra, New York, ngadto sa Harmony, Pennsylvania, aron mobisita ni Joseph Smith ug sa iyang asawa nga si Emma. Samtang anaa didto, nangutana si Joseph Smith Sr. kon sa unsang paagi siya makatabang sa buhat sa Ginoo. Agig tubag, nadawat sa Propeta ang pagpadayag nga narekord sa Doktrina ug mga Pakigsaad 4.

Dapita ang usa ka estudyante sa pagbasa og kusog sa Doktrina ug mga Pakigsaad 4:1. Hangyoa ang klase sa pagsunod, nga mangita sa pulong nga gigamit sa Ginoo sa paghulagway sa Pagpahiuli sa ebanghelyo.

  • Unsa nga mga aspeto sa gipahiuli nga ebanghelyo ang makatingala kaninyo?

Dapita ang usa ka estudyante sa pagbasa og kusog sa mga bersikulo 2–4. Hangyoa ang klase sa pagsunod, nga mangita sa unsay gisulti sa Ginoo nga gikinahanglan aron makatabang sa Iyang buhat.

  • Unsa ang gikinahanglan aron makatabang sa buhat sa Ginoo?

  • Sumala sa bersikulo 2, unsa ang gisaad sa Ginoo nga ihatag niadtong moserbisyo Kaniya sa tibuok nilang kasingkasing, gahum, hunahuna, ug kusog? (Kinahanglang makita sa mga estudyante ang baruganan nga susama sa mosunod: Kon kita nag-alagad sa Dios uban sa tibuok natong kasingkasing, gahum, hunahuna, ug kusog, mahimo kitang magbarug nga walay mansa sa atubangan sa Dios sa katapusan nga adlaw. Mahimo nimong isugyot nga markahan sa mga estudyante kini nga baruganan sa bersikulo 2.)

  • Unsa kaha ang ipasabut sa pagserbisyo sa Dios sa tibuok natong kasingkasing, gahum, hunahuna, ug kusog? (Paghatag sa Ginoo sa kinatibuk-an natong pasalig ug paghimo sa ebanghelyo nga sentro sa atong kinabuhi.)

  • Unsa kaha ang ipasabut sa “magbarug nga walay mansa sa atubangan sa Dios” (bersikulo 2)?

Dapita ang mga estudyante sa pagbasa og hilum sa mga bersikulo 5–7, nga mangita sa mga hiyas nga makahimong takus sa usa ka tawo aron makatabang sa buhat sa Ginoo. Dapita ang pipila ka mga estudyante sa pagreport kon unsay ilang nakit-an. Samtang mo-report ang mga estudyante, ilista ang mga hiyas sa pisara.

  • Sa unsang paagi ang pagpalambo niini nga mga hiyas makatabang sa atong pag-abag sa buhat sa Ginoo?

Ipabasa og kusog sa usa ka estudyante ang bersikulo 7. Dapita ang klase sa pagsunod, nga mangita sa mga gisaad sa Ginoo niadtong mangayo ug manuktok.

  • Unsa ang gihimong mga saad sa Ginoo niadtong mangayo ug manuktok?

  • Sa unsang paagi kini nga mga saad may kalabutan sa atong pag-angkon sa mga hiyas nga gihulagway niini nga pagpadayag?

Awhaga ang mga estudyante sa pagkonsiderar kon asa nga hiyas ang mahimo nilang palamboon sa mas hingpit nga paagi. Dapita sila sa paghangyo sa Langitnong Amahan nga tabangan sila nga mapalambo ug mapalig-on kini nga mga hiyas.

Doktrina ug mga Pakigsaad 11

Gipadayag sa Ginoo ngadto ni Hyrum Smith unsay angay niyang buhaton aron makatabang sa buhat

Ipasabut nga niadtong Mayo 1829, ang magulang nga igsoon sa Propeta nga si Hyrum mibiyahe usab ngadto sa Harmony, Pennsylvania, sa pagbisita ni Joseph. Niadtong higayona, subsob na ang paghubad ni Joseph ug Oliver Cowdery sa Basahon ni Mormon. Sa hangyo ni Hyrum, mihangyo ang Propeta sa Ginoo nga ipadayag ang Iyang kabubut-on bahin sa iyang igsoon. Nakadawat dayon ang Propeta sa pagpadayag nga narekord sa Doktrina ug mga Pakigsaad 11.

Bahina ang klase ngadto sa tulo ka grupo, ug i-assign ang matag grupo og usa sa mosunod nga mga pakisayran sa kasulatan: Doktrina ug mga Pakigsaad 11:6–9; 11:10–14; ug 11:15–19. Isulat sa pisara ang mosunod nga mga pangutana (pagbilin og luna ubos sa matag pangutana para masulatan sa tubag sa mga estudyante):

Unsa man ang gitambag sa Ginoo nga buhaton ni Hyrum aron matabangan siya nga maandam sa pagserbisyo?

Unsa ang pihong mga panalangin ang gisaad sa Ginoo kang Hyrum kon patalinghugan niya ang Iyang tambag?

Dapita ang mga estudyante sa pagbasa og hilum sa gi-assign diha nila nga mga bersikulo, nga mangita sa mga tubag niini nga mga pangutana. Human sa igong panahon, dapita ang mga estudyante gikan sa matag grupo sa pagreport sa unsay ilang nakit-an. Irekord diha ubos sa matag pangutana ang ilang mga tubag.

  • Unsa ang namatikdan ninyo nga gibalik-balik nga tambag diha sa mga gipamulong sa Ginoo kang Hyrum?

Dapita ang usa ka estudyante sa pagbasa sa D&P 11:20–22. Hangyoa ang klase sa pagsunod, nga mangita kon unsa na usab ang gitambag sa Ginoo nga buhaton ni Hyrum.

  • Base sa tambag sa Ginoo kang Hyrum diha sa mga bersikulo 20–22, unsay angay natong buhaton aron makadawat sa Espiritu ug gahum aron matabangan ang uban sa pag-angkon og pagpamatuod sa katinuod sa ebanghelyo? (Kinahanglan nga makita sa mga estudyante ang usa ka baruganan nga susama sa mosunod: Kon tumanon nato ang mga sugo ug maangkon ang mga pulong sa Dios, madawat nato ang Iyang Espiritu ug ang gahum aron matabangan ang uban nga makaangkon og pagpamatuod sa katinuod sa Ebanghelyo. Mahimo nimong isulat sa pisara kini nga baruganan.)

  • Ngano kaha nga gihatagan man og importansya sa Ginoo ang pagtuman sa mga sugo dihang gitudloan si Hyrum kon sa unsang paagi makapangandam sa pagtabang sa Iyang buhat?

  • Unsa ang ubang paagi nga makaangkon kita sa pulong sa Dios?

  • Unsa ang relasyon tali sa pagtuon sa mga kasulatan ug sa pagkadawat sa Espiritu?

Dapita ang mga estudyante nga maghunahuna og panahon dihang nakaangkon sila sa pulong sa Dios ug napanalanginan sa Espiritu ug sa gahum sa pagtabang og tawo aron makaangkon og pagpamatuod sa katinuod sa ebanghelyo. Hangyoa ang pipila ka estudyante sa pagpaambit sa ilang mga kasinatian uban sa klase. Awhaga ang mga estudyante sa paghimo og tumong nga maglatid sa unsay ilang buhaton aron mas maangkon ang pulong sa Dios.

Doktrina ug mga Pakigsaad 12

Si Joseph Knight Sr. gitudloan unsay gikinahanglan aron makatabang sa buhat sa Ginoo

Ipasabut nga samtang naghubad sa Basahon ni Mormon, usahay walay kwarta si Joseph Smith o mga suplay nga gikinahanglan aron mapadayon ang buhat. Dapita ang mga estudyante sa pagbasa og hilum sa ulohan nga seksyon sa Doktrina ug mga Pakigsaad 12, nga mangita kon kinsa ang mitabang sa Propeta panahon sa iyang panginahanglan. Dapita ang usa ka estudyante sa pagreport kon unsay iyang nakit-an.

Ipasabut nga dihay panahon human mobisita si Hyrum ni Joseph Smith niadtong Mayo 1829, si Joseph Knight Sr. mibisita sa Propeta ug mahinamong masayud unsa pa ang iyang mahimo aron makatabang sa buhat.

I-summarize ang Doktrina ug mga Pakigsaad 12:1–5 pinaagi sa pagpasabut nga gisultihan sa Ginoo si Joseph Knight nga ang usa ka kahibulongan nga buhat hapit na moabut. Gisultihan usab siya sa Ginoo nga kadtong magmakugihon sa pagserbisyo sa Ginoo makadawat og kaluwasan.

Dapita ang usa ka estudyante sa pagbasa og kusog sa Doktrina ug mga Pakigsaad 12:6–9. Hangyoa ang klase sa pagsunod, nga mangita sa mga hiyas nga gikinahanglan gayud natong palamboon aron makatabang sa buhat sa Ginoo. Dapita ang mga estudyante sa pagreport unsay ilang nakit-an. (Makatabang ang pagpasabut nga ang pulong nga kasarangan nga anaa sa bersikulo 8 nagpasabut nga kalma o mapugnganon sa kaugalingon.)

  • Ngano kaha nga ang pagpalambo sa mga hiyas nga nalista diha sa bersikulo 8 gikinahangaln aron makatabang sa buhat sa Ginoo?

I-refer ang mga estudyante ngadto sa pangutana nga gisulat nimo sa pisara sa wala pa magklase, ug ipahunahuna sa mga estudyante kon unsay ilang mahimo aron mas makatabang sa buhat sa Ginoo. Dapita ang mga estudyante sa pagsunod sa bisan unsang mga pag-aghat nga ilang nadawat.

Doktrina ug mga Pakigsaad 14–16

Mipadayag ang Ginoo sa Iyang kabubut-on ngadto ni David Whitmer, John Whitmer ug Peter Whitmer Jr.

Hangyoa ang mga estudyante nga ilista nila sa papel kon unsa sa ilang hunahuna ang pinakamaayong makalingaw nga mga butang nga atong mahimo niining kinabuhia.

Samtang magtuon ang mga estudyante sa Doktrina ug mga Pakigsaad 14–16, dapita sila sa pagpangita sa mga kamatuoran nga makatabang nila sa pagkahibalo unsa ang gihunahuna sa Dios nga pinakamaayong makalingaw nga mga butang nga atong mahimo niining kinabuhia.

Dapita ang mga estudyante sa pagpakli ngadto sa Mga Mapa sa Kasaysayan sa Simbahan, nu. 3, “Ang New York, Pennsylvania, ug Ohio nga Dapit sa TBA.” Ipapangita nila ang Fayette, New York. Ipasabut nga tungod sa nagkagrabe nga pagpanglutos sa Harmony, Pennsylvania, misulat si Oliver Cowdery ngadto sa iyang higala nga si David Whitmer sa Fayette, New York, ug nangutana kon siya ug si Joseph mahimo bang mopuyo sa pamilyang Whitmer aron makompleto ang paghubad sa Basahon ni Mormon. Niadtong sayo sa Hunyo 1829, namalhin sila si Joseph Smith ug Oliver Cowdery ngadto sa balay ni Peter Whitmer Sr.

Dapita ang usa ka estudyante sa pagbasa og kusog sa ulohan nga seksyon sa Doktrina ug mga Pakigsaad 14. Hangyoa ang klase sa pagsunod, nga mangita kon unsay hinungdan nga gihatag ang pagpadayag nga anaa sa Doktrina ug mga Pakigsaad 14–16.

  • Unsa ang gikaproblemahan sa tulo ka managsoong Whitmer?

I-summarize ang Doktrina ug mga Pakigsaad 14:1–6 pinaagi sa pagpasabut nga gisultihan sa Ginoo si David Whitmer nga ang usa ka kahibulongan nga buhat hapit na moabut ug kadtong magkugi sa pagserbisyo sa Ginoo makadawat og kaluwasan.

Dapita ang mga estudyante sa pagbasa og hilum sa Doktrina ug mga Pakigsaad 14:7–11, nga mangita kon unsay gisugo sa Ginoo nga buhaton ni David Whitmer ug sa mga panalangin nga Iyang gisaad agi og balus.

  • Unsa ang gisugo sa Ginoo nga buhaton ni David? Unsa nga mga panalangin ang Iyang gisaad agi og balus?

  • Sumala sa bersikulo 7, ngano nga ang pagtuman sa mga sugo ug paglahutay sa katapusan importante man? (Kinahanglang makit-an sa mga estudyante ang usa ka baruganan nga susama sa mosunod: Kon motuman kita sa mga sugo sa Dios ug molahutay hangtud sa katapusan, makadawat kita og kinabuhing dayon. Mahimo nimong isugyot nga markahan sa mga estudyante ang mga pulong diha sa bersikulo 7 nga nagtudlo niini nga baruganan.)

  • Unsay buot ipasabut sa paglahutay sa katapusan?

  • Unsaon ninyo sa paghatag og depinisyon ang kinabuhing dayon? (Ang kinabuhing dayon dili lang kay pagka-imortal, nga nagpasabut sa pagkabuhi sa hangtud. Ang kinabuhing dayon mao ang pagkahimaya ug pagkahimong sama sa Dios.)

  • Ngano kaha nga ang kinabuhing dayon mao man “ang labing mahinungdanon nga mga gasa sa Dios”?

Dapita ang mga estudyante nga hunahunaon sa pribadong paagi kon asa sa mga sugo ang mas matuman nila nga maoy makatabang aron molambo ngadto sa kinabuhing dayon.

Dapita ang mga estudyante sa pagpakli ngadto sa Doktrina ug mga Pakigsaad 15-16, nga mangita sa mga pagkasusama tali niining duha ka mga pagpadayag. Dapita ang usa ka estudyante sa pagpasabut kon unsay iyang nabantayan.

Dapita ang usa ka estudyante sa pagbasa og kusog sa Doktrina ug mga Pakigsaad 15:1–5 (o 16:1–5). Hangyoa ang klase sa pagsunod, nga mangita kon unsay gisulti sa Ginoo kang John Whitmer (ug ni Peter Whitmer Jr.).

  • Unsay inyong nakat-unan mahitungod sa Ginoo gikan niini nga mga bersikulo? Unsay inyong nakat-unan mahitungod ni John (ug ni Peter Whitmer Jr.)?

Dapita ang usa ka estudyante sa pagbasa og kusog sa Doktrina ug mga Pakigsaad 15:6 (o sa 16:6). Hangyoa ang klase sa pagsunod, nga mangita kon unsay gisulti sa Ginoo nga mas dako og bili kanila.

  • Base sa unsay gisulti sa Ginoo kang John ug Peter Whitmer Jr., unsa ang usa sa pinakamaayo nga makalingawng mga butang nga atong mahimo? (Kinahanglang makita sa mga estudyante ang usa ka baruganan nga susama sa mosunod: Ang pagtabang nga madala ang mga kalag ngadto kang Jesukristo usa ka pinakamaayong makalingaw nga mga butang nga atong mahimo.)

  • Unsa ang buot ipasabut sa pagdala og mga kalag ngadto kang Jesukristo?

  • Unsa ang pipila ka paagi nga kita makatabang og dala sa atong kaugalingon ug sa uban paduol kang Jesukristo? Ngano nga ang pagdala og mga kalag ngadto kang Kristo usa man sa pinakamaayong makalingaw nga mga butang nga atong mahimo?

Tapusa ang leksyon pinaagi sa pagpamatuod sa mga kamatuoran nga nakita niini nga leksyon.

Iprinta