Leksyon 26

Doktrina ug mga Pakigsaad 71–75

Pasiuna ug Timeline

Sa tinglarag sa 1831, ang kanhi mga miyembro sa Simbahan nga si Ezra Booth ug Symonds Ryder misulay sa pagdaut sa Simbahan ug sa mga lider niini ug sa pagpugong sa mga tawo sa pag-apil sa Simbahan. Gibuhat nila kini pinaagi sa pagpamulong batok sa Simbahan diha sa publiko nga mga miting ug aktibong pagmantala og mga pagpanaway batok sa mga Mormon diha sa lokal nga mga pamantalaan, nga miresulta sa pagkaylap sa oposisyon. Pagka-Disyembre 1, 1831, si Propeta Joseph Smith midiktar sa pinadayag nga narekord diha sa Doktrina ug mga Pakigsaad 71. Diha niini, ang Ginoo misugo ni Joseph Smith ug Sidney Rigdon sa pagpanalipod sa Simbahan ug sa pagkorihir sa bakak nga mga impormasyon pinaagi sa pagsangyaw sa ebanghelyo gikan sa mga kasulatan sumala sa paggiya sa Espiritu.

Ang paspas nga pagtubo sa Simbahan sa Kirtland, Ohio, inubanan sa pagbalhin ni Bishop Edward Partridge ngadto sa Missouri, nanginahanglan sa pagtawag og bag-ong bishop aron moserbisyo sa Ohio. Pagka-Disyembre 4, 1831, nadawat ni Joseph Smith ang tulo ka pinadayag nga karon gihiusa diha sa Doktrina ug mga Pakigsaad 72. Niini nga mga pinadayag, gitawag sa Ginoo si Newel K. Whitney aron moserbisyo isip bishop sa Ohio ug gilatid ang iyang mga responsibilidad.

Human sa usa ka bulan nga pagsangyaw sa ebanghelyo aron makorihian ang bakak nga mga impormasyon nga gipakatap ni Ezra Booth ug Symonds Ryder, mibalik si Joseph Smith ug Sidney Rigdon ngadto sa Hiram, Ohio. Pagka-Enero 10, 1832, nadawat ni Joseph Smith ang pinadayag nga narekord diha sa Doktrina ug mga Pakigsaad 73, diin ang Ginoo misugo ni Joseph ug Sydney sa pagpadayon sa ilang paghubad sa Biblia.

Ang pinadayag nga narekord diha sa Doktrina ug mga Pakigsaad 74 nadawat niadtong 1830 sa wala pa mobalhin si Joseph Smith sa Ohio. Naglangkob kini sa pagpasabut sa Ginoo sa 1 Mga Taga-Corinto 7:14.

Sa usa ka komperensya sa Simbahan nga gipahigayon pagka-Enero 25, 1832, nadawat ni Joseph Smith ang duha ka pinadayag nga narekord diha sa Doktrina ug mga Pakigsaad 75. Niini nga mga pinadayag, gitudloan sa Ginoo ang mga elder kalabut sa ilang misyonaryo nga mga katungdanan ug gihatagan sila og mga kompanyon sa misyon.

1830Ang Doktrina ug mga Pakigsaad 74 nadawat.

Oktubre 1831Ang Ohio Star nga pamantalaan misugod sa pagmantala og siyam ka mga sulat gikan sa miapostasiya nga si Ezra Booth nga nanaway sa Simbahan ug sa mga lider niini.

Nobyembre 1, 1831Usa ka komperensya sa Simbahan mihimo og opisyal nga desisyon sa pagmantala sa mga pinadayag ni Joseph Smith isip ang Basahon sa mga Sugo.

Disyembre 1, 1831Ang Doktrina ug mga Pakigsaad 71 nadawat.

Disyembre 4, 1831Ang Doktrina ug mga Pakigsaad 72 nadawat.

Enero 10, 1832Ang Doktrina ug mga Pakigsaad 73 nadawat.

Enero 25, 1832Ang Doktrina ug mga Pakigsaad 75 nadawat.

Mga Sugyot alang sa Pagtudlo

Doktrina ug mga Pakigsaad 71

Misugo ang Ginoo kang Joseph Smith ug Sidney Rigdon sa pagtubag sa mga kritiko sa Simbahan

Hangyoa ang mga estudyante sa paghunahuna sa dihang ang ilang mga gituohan gisupak o gisaway. Pagdapit og pipila ka mga estudyante sa pagpakigbahin sa ilang mga kasinatian diha sa klase.

• Unsay lisud kon ang atong mga gituohan gisupak o gisaway?

Dapita ang mga estudyante sa pagpangita og usa ka baruganan samtang magtuon sila sa Doktrina ug mga Pakigsaad 71 nga makatabang nila nga masayud unsaon sa pagtubag kon ang uban mosaway sa Simbahan ug sa mga pagtulun-an niini.

Aron matabangan ang mga estudyante nga makasabut sa konteksto sa Doktrina ug mga Pakigsaad 71, hangyoa ang usa ka estudyante sa pagbasa og kusog sa mosunod nga paragraph:

Sugod sa Oktubre 1831, usa ka pamantalaan nga gitawag og Ohio Star mimantala og siyam ka mga sulat nga nanaway sa Simbahan ug sa mga lider niini. Kini nga mga sulat gihimo ni Ezra Booth, usa ka kanhi tigsangyaw kinsa mipasakop sa Simbahan human makabasa sa Basahon ni Mormon ug makasaksi ni Propeta Joseph Smith nga milagrusong miayo sa girayuma nga bukton ni Alice (o Elsa) Johnson. Mibiyahe siya ngadto sa Missouri isip misyonaryo apan nasagmuyo sa dihang dili siya makahimo og mga milagro aron sa pagkumbinsir sa uban sa kamatuoran. Human miuli gikan sa Missouri, misugod siya sa pagpanaway sa Propeta. Sa iyang mga sulat, giakusahan ni Ezra Booth si Joseph Smith nga usa ka impostor, nangangkon nga ang iyang mga pinadayag usa lang ka pagpanglansis aron makakuha og kwarta gikan sa mga tawo. Si Symonds Ryder, laing nasuko nga miyembro, nanaway usab ni Joseph Smith diha sa publiko sa paningkamot nga makapugong sa mga tawo nga magpasakop sa Simbahan. Ang mga pagpanghulhog nga gibuhat ni Ezra Booth ug Symonds Ryder miresulta sa pipila ka mga tawo nga maglagot sa Simbahan ug sa mga lider niini.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 71:1–3, 7–11. Hangyoa ang klase sa pagsunod, nga mangita kon unsay gitambag sa Ginoo nga buhaton ni Joseph Smith ug Sidney Rigdon.

• Unsa ang gitudlo sa Ginoo nga buhaton ni Joseph Smith ug Sidney Rigdon aron mapakalma ang negatibo nga mga pagbati ngadto sa Simbahan?

• Unsa nga baruganan ang atong makat-unan gikan sa bersikulo 1 mahitungod sa mahimo natong buhaton kon ang mga tawo manaway sa Simbahan ug sa mga lider niini? (Ang mga estudyante kinahanglang mahibalo og baruganan nga susama sa mosunod: Kon ang uban mosaway sa Simbahan, mahimo kitang motubag pinaagi sa pagpaambit og mga kamatuoran gikan sa mga kasulatan ug sa pagsunod sa giya sa Espiritu.)

• Ngano kaha nga importanting tubagon ang mga pagpanaway sa Simbahan pinaagi sa pagpaambit og mga kamatuoran gikan sa mga kasulatan ug sa pagsunod sa giya sa Espiritu?

Pagpamatuod nga ang pagsunod sa giya sa Espiritu makatabang kanato sa pagtubag sa pagpanaway samtang molikay sa panagbingkil, nga makapawagtang sa Espiritu ug sa kasagaran mopagahi sa mga pagbati sa uban.

Ipakita ang mosunod nga pamahayag ni Elder Robert D. Hales (1932–2017) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Samtang kita motubag sa uban, matag sitwasyon managlahi. “Maayo na lang, ang Ginoo nasayud sa mga kasingkasing sa mga tig-akusar kanato ug unsaon nato sila sa pagtubag sa maayong paagi. Samtang ang tinuod nga disipulo mangayo og giya sa Espiritu, makadawat sila og inspirasyon gikan sa matag panag-abut. Ug sa matag panag-abut, ang tinuod nga mga disipulo motubag sa mga paagi nga modapit sa Espiritu sa Ginoo” (Robert D. Hales, “Kristohanong Kaisug: Ang Bugti sa Pagkadisipulo,” Liahona, Nob. 2008, 73).

Dapita ang mga estudyante sa paghunahuna og higayon sa dihang sila, o tawo nga ilang kaila, misalig sa mga kasulatan ug sa giya sa Espiritu Santo sa pagtubag sa mga pagpanaway sa Simbahan ug sa mga pagtulun-an niini. Hangyoa ang pipila ka mga estudyante sa pagpakigbahin sa ilang mga kasinatian uban sa klase.

Awhaga ang mga estudyante sa pagtinguha sa giya sa Espiritu ug sa pagpaambit og mga kamatuoran gikan sa mga kasulatan kon motubag niadtong nanaway sa Simbahan ug sa mga pagtulun-an niini.

Tabangi ang mga estudyante sa pagtubag og lisud nga mga pangutana

Ang mga estudyante pangutan-on og lisud nga mga pangutana mahitungod sa Simbahan sa tibuok nilang kinabuhi. Ang paghatag sa mga estudyante og husto nga impormasyon ug pagtabang kanila nga makakita og kasaligan nga mga tinubdan makatabang nila sa paghunahuna ug sa pagpasabut sa matinud-anong pagi sa lisud nga mga hilisgutan. Ang pagtugot sa mga estudyante nga maghisgot ug magpraktis sa pagtubag og lisud nga mga pangutana sa usa ka palibut nga puno sa pagtuo makalig-on sa ilang pagsalig sa pakig-istorya sa uban mahitungod sa ebanghelyo.

Doktrina ug mga Pakigsaad 72

Ang Ginoo mitawag ni Newel K. Whitney isip bishop sa Ohio ug mipasabut sa mga katungdanan sa usa ka bishop

Ipasabut nga pagka-Disyembre 3, 1831, mibiyahe si Joseph Smith ug Sidney Rigdon gikan sa Hiram, Ohio, padulong sa Kirtland aron motuman sa sugo sa Ginoo sa pagsangyaw sa ebanghelyo aron sa pagkorihir sa bakak nga mga impormasyon kabahin sa Simbahan. Samtang didto sa Kirtland, ang Propeta nakigkita sa pipila ka mga elder ug mga miyembro sa Simbahan kinsa gustong masayud sa ilang mga katungdanan. Ang Propeta nakadawat og tulo ka mga pinadayag (mga bersikulo 1–8, 9–23, ug 24–26), nga narekord karon diha sa Doktrina ug mga Pakigsaad 72. Tungod kay mitawag ang Ginoo kang Bishop Partridge sa pagbalhin ngadto sa Missouri, ang mga Santos sa Ohio wala nay bishop. I-summarize ang Doktrina ug mga Pakigsaad 72:1–2 pinaagi sa pagpasabut nga ang Ginoo mideklarar sa panginahanglan nga motawag og bag-ong bishop sa Kirtland.

Dapita ang mga estudyante sa pagbasa og hilum sa Doktrina ug mga Pakigsaad 72:3–5, nga mangita kon nganong nagkinahanglan og bishop ang mga Santos sa Ohio.

• Sumala niini nga mga bersikulo, nganong nagkinahanglan og bishop ang mga Santos sa Ohio?

• Unsa kaha ang gipasabut sa mga pulong nga “paghatag og asoy sa iyang pagkatinugyanan, karon ug sa kahangturan” diha sa bersikulo 3?

Pahinumdumi ang mga estudyante nga sa unang mga adlaw sa Simbahan, ang pagkatinugyanan nagpasabut sa kwarta, yuta, o mga responsibilidad nga gihatag ngadto sa mga Santos nga nagsunod sa balaod sa pagpahinungod. Ang Dios nagkinahanglan niini nga mga Santos nga mohatag og husay, o report, kalabut sa gisangun kanila nga pagkatinugyanan. Samtang wala kita hatagi og mga pagkatinugyanan ubos sa balaod sa pagpahinungod diha sa Simbahan karon, ang Ginoo mihatag kanato og espiritwal ug temporal nga mga responsibilidad.

• Unsa nga kamatuoran ang atong mahibaloan gikan sa Doktrina ug mga Pakigsaad 72:3 mahitungod sa mga responsibilidad nga gihatag sa Ginoo kanato sa mortalidad? (Ang mga estudyante kinahanglang mahibalo og kamatuoran sama sa mosunod: Patubagon kita sa Ginoo sa mga responsibilidad nga Iyang gihatag kanato.)

• Sa unsang paagi ang paghinumdom nga sa katapusan manubag kita ngadto sa Ginoo makaimpluwensya sa atong pagtan-aw sa atong mga responsibilidad ug mga calling?

Dapita ang usa ka estudyante sa pagbasa og kusog sa Doktrina ug mga Pakigsaad 72:7–8. Hangyoa ang klase sa pagsunod, nga mangita kon si kinsa ang gitawag nga moserbisyo isip bishop sa Ohio. Dapita ang mga estudyante sa pagreport kon unsa ang ilang makit-an.

Ipasabut nga sigun sa narekord sa Doktrina ug mga Pakigsaad 72:9–26, gilatid sa Ginoo ang mga responsibilidad ni Newel K. Whitney isip bishop ug mihatag og mga instruksyon alang niadtong mga Santos nga nagpundok ngadto sa Zion.

Doktrina ug mga Pakigsaad 73

Misugo ang Ginoo ni Joseph Smith ug Sidney Rigdon sa pagpadayon sa paghubad sa Biblia

Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 73. I-summarize kini nga seksyon pinaagi sa pagpasabut nga ang Ginoo misugo sa mga elder sa pagpadayon sa pagsangyaw sa ebanghelyo sa dapit sa Kirtland hangtud sa sunod nga komperensya sa Simbahan. Gisugo usab Niya si Joseph Smith ug Sidney Rigdon nga mopadayon sa paghubad sa Biblia ug sa pagpadayon hangtud mahuman.

Doktrina ug mga Pakigsaad 74

Gipasabut sa Ginoo ang kahulugan sa 1 Mga Taga-Corinto 7:14

Ipasabut nga ang seksyon 74 wala magsunod sa kronolohikanhong paagi. Nahitabo kini tungod kay ang mga editor sa nangaging mga edisyon sa Doktrina ug mga Pakigsaad nagtuo nga ang pinadayag nga narekord niini nga seksyon gihatag niadtong 1832. Hinoon, ang ebidensya nagpakita nga nadawat kini didto sa New York niadtong 1830 sa wala pa mobalhin ang Propeta ngadto sa Ohio. I-summarize kini nga seksyon pinaagi sa pagpasabut nga usa kini ka pagpasabut sa 1 Mga Taga-Corinto 7:14, usa ka tudling nga gigamit sa panahon ni Joseph Smith aron sa pagpangatarungan sa bunyag sa mga masuso.

Dapita ang mga estudyante sa pagbasa og hilum sa Doktrina ug mga Pakigsaad 74:7, nga mangita og kamatuoran nga gitudlo sa Ginoo mahitungod sa gagmay nga mga bata. Hangyoa ang mga estudyante sa pag-report kon unsay ilang makit-an.

Doktrina ug mga Pakigsaad 75

Ang Ginoo nagtawag ug nagtudlo og mga missionary companionship

Isulat sa pisara ang mosunod nga mga pulong, ug hangyoa ang mga estudyante sa pagkonsiderar unsa nga mga pulong ang naghulagway sa ilang mga pagbati mahitungod sa pagpaambit sa ebanghelyo ngadto sa uban: madasigon, dili komportable, bakikaw, naghinam-hinam, mahadlukon, nagduha-duha, ug andam.

• Unsa nga mga hinungdan ang makaimpluwensya kon unsay atong bation kabahin sa pagpaambit sa ebanghelyo ngadto sa uban?

Hangyoa ang mga estudyante sa pagpangita og mga baruganan samtang magtuon sila sa Doktrina ug mga Pakigsaad 75 nga makaawhag kanila sa ilang mga paningkamot sa pagpaambit sa ebanghelyo.

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 75. Hangyoa ang klase sa pagsunod, nga mangita sa rason nga gihatag sa Ginoo ang duha ka mga pinadayag nga anaa niini nga seksyon (mga bersikulo 1–12 ug 13–36). Ipasabut nga niini nga mga pinadayag gitudloan sa Ginoo ang mga elder kalabut sa ilang misyonaryo nga mga katungdanan ug gihatagan sila og mga kauban sa misyon.

Mga buluhaton sa gagmay nga grupo

Sa panahon sa mga buluhaton sa gagmay nga grupo, ang mga estudyante mahimong malinga gikan sa katuyoan sa kalihokan, mag-istorya sa personal nga mga butang, o mahimong dili seryuso sa ilang mga paningkamot sa pagkat-on. Samtang magpabilin ka nga aktibong nalambigit pinaagi sa pagbalhin-balhin og grupo ug sa pag-monitor sa mga kalihokan sa pagkat-on, makatabang ka sa mga estudyante nga makatutok sa tahas ug makakat-on og maayo gikan sa buluhaton.

Bahina ang mga estudyante ngadto sa grupo nga tinagutlo. I-assign ang matag estudyante sa kada grupo sa usa sa mosunod nga mga pakisayran: Doktrina ug mga Pakigsaad 75:2–5; Doktrina ug mga Pakigsaad 75:6–11, 27; Doktrina ug mga Pakigsaad 75:13–14. Ipakita ang mosunod nga mga pangutana, ug hangyoa ang mga estudyante sa pagbasa og hilum sa gi-assign kanila nga mga tudling, nga mangita sa mga tubag sa mosunod nga mga pangutana:

1. Ngadto kang kinsa ang Ginoo nakigsulti?

2. Unsa nga tambag ang gihatag sa Ginoo niini nga mga misyonaryo nga makatabang kanato nga epektibong makapaambit sa ebanghelyo?

3. Unsa nga mga panalangin ang gisaad sa Ginoo kanila kon matinud-anon silang moproklamar sa ebanghelyo?

Human sa igong panahon, dapita ang mga estudyante sa pagpaambit sa ilang mga tubag diha sa ilang mga grupo. Pangutan-a ang klase:

• Base sa unsay inyong gihisgutan diha sa inyong mga grupo, unsa nga mga baruganan ang atong makat-unan gikan sa mga saad sa Ginoo ngadto niadtong matinud-anong moproklamar sa ebanghelyo? (Ang mga estudyante kinahanglang mahibalo og mga baruganan nga susama sa mosunod: Kon matinud-anon kita sa pagpahayag sa ebanghelyo, ang Ginoo mopanalangin kanato uban sa dungog, himaya, ug kinabuhing dayon. Samtang magmatinud-anon kita sa pagproklamar sa ebanghelyo, ang Ginoo magauban kanato.)

• Sa unsang paagi kaha ang pagpasabut niini nga mga baruganan makaawhag kanato samtang moproklamar kita sa ebanghelyo?

• Base sa bersikulo 11 ug 27, unsa ang pipila ka paagi nga ang Ginoo magauban kanato samtang mainampoon kitang magtinguha sa pagpaambit sa ebanghelyo ngadto sa uban?

Ipakita ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles, ug pagdapit og usa ka estudyante sa pagbasa niini og kusog. Hangyoa ang mga estudyante sa pagpaminaw kon sa unsang paagi ang Ginoo magauban kanato samtang makugihon ug mainampoon kitang magtinguha sa pagpahayag sa ebanghelyo:

“Mosaad ko ninyo, samtang mag-ampo kamo kinsay pakigsultihan, ang mga ngalan ug dagway mosulod sa inyong hunahuna. Ang mga pulong nga inyong gikinahanglan ihatag diha dayon [tan-awa sa D&P 84:85; 100:6]. Mga oportunidad maabli diha kaninyo. Ang pagtuo mobuntog sa pagduhaduha, ang Ginoo manalangin kaninyo og kaugalingong mga milagro” (Neil L. Andersen, “Usa Kini ka Milagro,” Liahona, Mayo 2013, 79).

• Kanus-a kamo mibati nga ang Ginoo nag-uban kaninyo sa inyong mga paningkamot sa pagpaambit sa ebanghelyo ngadto sa uban? (Mahimong ikonsiderar usab nimo ang pagpaambit og kaugalingon nimong kasinatian.)

Tapusa pinaagi sa pag-awhag sa mga estudyante nga mainampoong mokonsiderar kinsa ang mahimo nilang paambitan sa ebanghelyo.

Dugang nga Ideya sa Pagtudlo

Doktrina ug mga Pakigsaad 72:8. Gitawag sa Ginoo si Newel K. Whitney isip bishop

Human mabasa ang Doktrina ug mga Pakigsaad 72:8, ikonsiderar ang pagpaambit sa mosunod nga pamahayag ni Elder Orson F. Whitney (1855–1931) sa Korum sa Napulog Duha ka mga Apostoles, kinsa misaysay kon unsay gibati sa iyang apohan nga si Newel K. Whitney sa dihang gitawag isip bishop:

“Ang paghunahuna nga modawat niining importanting responsibilidad (ang katungdanan sa bishop) daw sobra ra sa iyang maagwanta. … Siya … wala mosalig sa iyang abilidad, ug gikonsiderar ang iyang kaugalingon nga dili makatuman sa dako ug balaang pagsalig. Sa iyang kalibog mihangyo siya sa Propeta:

“‘Dili ako makahunahuna sa akong kaugalingon nga usa ka Bishop, Brother Joseph, apan kon moingon ka nga kabubut-on kini sa Ginoo, akong sulayan.’

“‘Dili kinahanglan nga motuo ka lamang sa akong pulong;’ mitubag ang Propeta, nga mabination, ‘Lakaw ug pangutan-a ang Amahan sa imong kaugalingon.’

“Si Newel … determinado nga mobuhat sumala sa gitambag [sa Propeta]. … Ang iyang mapainubsanon, kinasingkasing nga pag-ampo gitubag. Diha sa kahilum sa kagabhion ug kamingaw sa iyang lawak, nakadungog siya og tingog gikan sa langit: ‘Ang imong kalig-on ania kanako.’ Ang mga pulong diyutay ug yano, apan dako kaayo kini og kahulugan kaniya. Ang iyang mga pagduda nawagtang sama sa yamog sa wala pa ang kaadlawon. Diha-diha dayon miadto siya sa Propeta, misulti [kaniya] nga nakasabut siya, ug andam sa pagdawat sa katungdanan nga siya gitawag” (Orson F. Whitney, “The Aaronic Priesthood,” The Contributor, Ene. 1885, 126).

Ipasabut nga si Newel K. Whitney matinud-anong miserbisyo isip bishop hangtud sa iyang kamatayon niadtong 1850.

• Sa unsang paagi ang kasinatian ni Bishop Whitney makatabang kanato kon mobati kita nga dili makasarang sa pagserbisyo sa usa ka calling o pagtuman og usa ka buluhaton sa Simbahan?

Pagpamatuod nga ang Ginoo mopanalangin kanato sa tanan natong mga calling. Ipasabut nga si Presidente Thomas S. Monson mitudlo: “Kon kita anaa sa buluhaton sa Ginoo, may katungod kita sa panabang sa Ginoo. Hinumdumi, kon kinsa ang tawagon sa Ginoo, ang Ginoo mopasarang” (“Duty Calls,” Ensign, Mayo 1996, 44).