Leksyon 44: Doktrina ug mga Pakigsaad 111–14

“Leksyon 44: Doktrina ug mga Pakigsaad 111–14,” Manwal sa Magtutudlo sa Doktrina ug mga Pakigsaad (2017)

“Leksyon 44,” Manwal sa Magtutudlo sa Doktrina ug mga Pakigsaad

Leksyon 44

Doktrina ug mga Pakigsaad 111–14

Pasiuna ug Timeline

Sa ting-init sa 1836, si Propeta Joseph Smith ug ang ubang mga pangulo sa Simbahan mibiyahe ngadto sa Salem, Massachusetts, aron sa pagpangita alang sa mga paagi sa pagtabang sa pagbayad sa mga utang sa Simbahan. Sa Agosto 6, 1836, samtang kini nga mga kaigsoonan didto sa Salem, mihatag ang Ginoo sa Propeta og pagpadayag nga gi-rekord diha sa Doktrina ug mga Pakigsaad 111. Diha niini mipasalig Siya sa Propeta nga adunay “daghang bahandi sa [Salem] … alang sa kaayohan sa Zion” (D&P 111:2) ug namulong sa mga atubangunon mahitungod sa mga utang sa Simbahan ug sa kaugmaon sa Zion.

Kaniadtong 1837, si Thomas B. Marsh, Presidente sa Korum sa Napulog Duha ka mga Apostoles, nabalaka mahitungod sa rebelyon ug panagbingkil diha sa mga miyembro niana nga korum sa Kirtland, Ohio. Siya usab adunay mga pangutana mahitungod sa misyonaryo nga buhat. Nangayo siya og tambag gikan ni Propeta Joseph Smith, ug sa Hulyo 23, 1837, mihatag ang Ginoo sa pagpadayag nga gi-rekord diha sa Doktrina ug mga Pakigsaad 112, diha diin Siya mitudlo ni Thomas B. Marsh kalabut sa buluhaton sa Korum sa Napulog Duha ka mga Apostoles ug sa calling ni Thomas isip ang presidente niini.

Kaniadtong Marso 1838, human mibalhin ngadto sa Far West, Missouri, gikan sa Kirtland, Ohio, midiktar si Propeta Joseph Smith og dinasig nga mga tubag sa mga pangutana mahitungod sa pipila ka mga tudling sa Isaias. Kini nga mga pangutana ug mga tubag gi-rekord diha sa Doktrina ug mga Pakigsaad 113 ug nagklaro sa mga panagna ni Isaias mahitungod sa ulahing mga adlaw nga Pagpahiuli ug sa katubsanan sa Zion.

Sa Abril 11, 1838, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 114. Niini nga pagpadayag, gisugo sa Ginoo si David W. Patten sa pagpangandam alang sa umaabut nga misyon ug mipahimangno sa masinupakon nga mga pangulo sa Simbahan nga lain ang “ibutang sa ilang dapit,” o calling, kon sila dili magmatinud-anon (D&P 114:2).

Agosto 5, 1836Si Propeta Joseph Smith ug ang iyang mga kauban miabut sa Salem, Massachusetts.

Agosto 6, 1836Ang Doktrina ug mga Pakigsaad 111 nadawat.

Tingpamulak ug ting-init sa 1837Nagkalain-laing mga miyembro ug mga pangulo sa Simbahan sa Kirtland, Ohio namulong batok ni Propeta Joseph Smith.

Ting-init sa 1837Mga Apostoles nga sila ni Thomas B. Marsh, David W. Patten, ug William Smith mibiyahe gikan sa Far West, Missouri, ngadto sa Kirtland, Ohio, aron sa pagsulbad sa rebelyon ug panagbingkil diha sa Napulog Duha ka mga Apostoles.

Hulyo 23, 1837Ang Doktrina ug mga Pakigsaad 112 nadawat.

Enero 12, 1838Si Propeta Joseph Smith ug si Sidney Rigdon milayas sa Kirtland, Ohio, ug misugod sa pagbiyahe ngadto sa Far West, Missouri, sa pag-eskapo sa kapintas sa panon sa mga manggugubot.

Marso 1838Ang Doktrina ug mga Pakigsaad 113 nadawat.

Abril 11, 1838Ang Doktrina ug mga Pakigsaad 114 nadawat.

Oktubre 25, 1838Unom ka bulan human ang Ginoo namulong kaniya sa pagpadayag nga gi-rekord diha sa Doktrina ug mga Pakigsaad 114, si Elder David W. Patten gipusil nga namatay atol sa panag-away didto sa Suba sa Crooked.

Mga Sugyot alang sa Pagtudlo

Doktrina ug mga Pakigsaad 111:1–11

Mipasalig pag-usab ang Ginoo ni Propeta Joseph Smith ug sa uban nga mga pangulo sa Simbahan kalabut sa ilang panaw ngadto sa Salem, sa mga utang sa Simbahan ug sa kaugmaon sa Zion

Sa wala pa ang klase, isulat ang mosunod nga pangutana diha sa pisara: Unsa ang hinungdan sa kaugtas o kabalaka?

Dapita ang pipila ka mga estudyante sa pagpakigbahin sa ilang mga hunahuna ngadto sa klase kon komportable sila sa paghimo sa mao.

Dapita ang usa ka estudyante sa pagbasa og kusog sa mosunod nga makasaysayanong summary:

Kaniadtong 1836, nagsinati ang Simbahan og malisud nga mga hagit pinansyal. Ang pagtukod sa Templo sa Kirtland nagbutang sa Simbahan diha sa dako kaayo nga utang, ug ang pagkanawad-an og mga negosyo, yuta, ug mga panimalay isip resulta sa pagpanggukod didto sa Missouri mipugong sa Simbahan gikan sa pagbayad sa mga utang niini. Sa ulahing bahin sa Hulyo 1836, si Propeta Joseph Smith, Oliver Cowdery, Sidney Rigdon, ug Hyrum Smith mibiyahe ngadto sa Salem, Massachusetts, miabut sa Agosto 5. Bisan og walay makahatag og asoy sa kasinatian sa pagkuyog nga makahulagway sa piho nga katuyoan niini nga panaw, sumala sa usa ka kaulahiang asoy, usa ka miyembro sa Simbahan nga ginganlan og Brother Burgess misulti kaniadto sa mga pangulo sa Simbahan sa Kirtland, Ohio nga nakahibalo siya og usa ka balay sa Salem, Massachusetts, diin diha may gitago nga dakong kantidad sa walay nag-angkon nga salapi. Sumala niining sama nga asoy, si Joseph Smith ug ang iyang mga kauban nangita sa salapi didto sa Salem, apan si Brother Burgess wala makatultol sa balay nga may salapi. (Tan-awa sa The Joseph Smith Papers, Documents, Volume 5: Oktubre 1835–Enero 1838, ed. Brent M. Rogers ug uban [2017], 274–75.)

Unsa kaha ang inyong bation human sa pagbiyahe ngadto sa Salem sa panghinaut nga makaplagan ang salapi aron sa pagtabang og bayad sa utang sa Simbahan ug wala makaplagi unsa ang inyong gidahum?
Unsa kaha ang inyong buhaton human wala makaplagi ang salapi?

Ipasabut nga sa Agosto 6, 1836, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 111.

Dapita ang usa ka estudyante sa pagbasa og kusog sa Doktrina ug mga Pakigsaad 111:1–2. Hangyoa ang klase sa pagsunod, nga mangita sa unsay gisulti sa Ginoo ngadto niini nga mga pangulo sa Simbahan.

Unsa ang gisulti sa Ginoo ngadto niini nga mga pangulo sa Simbahan? (Mahimo nimong ipasabut nga ang usa ka binuang maoy usa ka sayop o kasaypanan sa paghukom.)
Unsa ang gisulti sa Ginoo nga nakahupay niini nga mga pangulo?
Unsa nga baruganan ang atong maila gikan niini nga mga bersikulo mahitungod sa unsa ang mahitabo kon kita sa kinasingkasing maningkamot sa pagtuman sa kabubut-on sa Ginoo? (Human matubag sa mga estudyante, isulat ang mosunod nga baruganan diha sa pisara: Bisan pa sa atong mga kasaypanan sa paghukom, ang Ginoo makahatag og kaayohan gikan sa atong kinasingkasing nga mga kahago sa pagtuman sa Iyang kabubut-on.)

I-summarize ang Doktrina ug mga Pakigsaad 111:3–4 pinaagi sa pagpasabut nga ang Ginoo mitudlo ni Propeta Joseph Smith ug sa iyang mga kauban nga makighigala sa mga tawo sa Salem sumala sa paggiya sa Espiritu (bersikulo 3) ug nga “diha sa tukma nga higayon” ang “bahandi” sa Salem himoon nga maanaa “alang sa kaayohan sa Zion” (mga bersikulo 2, 4).

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 111:5–11. Hangyoa ang klase sa pagsunod, nga mangita sa panudlo sa Ginoo ngadto ni Joseph Smith ug sa iyang mga kauban.

Unsa ang gisulti sa Ginoo ngadto ni Joseph Smith ug sa iyang mga kauban diha sa mga bersikulo 5–6?
Unsa ang gitudlo sa Ginoo ngadto kanila nga buhaton diha sa bersikulo 7?
Sumala sa bersikulo 8, unsaon niini nga mga kaigsoonan sa pagkahibalo kon asa “magpabilin,” o magpuyo, sulod sa ilang pagbisita sa Salem?
Unsa nga tambag ug saad gihatag sa Ginoo niini nga mga tawo diha sa bersikulo 11?

Ipasabut nga kita wala mahibalo sa tanan nga mga paagi ang Ginoo mituman o motuman pa sa Iyang mga saad kabahin sa “mga bahandi” sa Salem. Hinoon, mga lima ka tuig human niini nga pagpadayag nadawat, ang Unang Kapangulohan mipadala ni Elder Erastus Snow sa usa ka misyon ngadto sa Salem, diin mitukod siya og usa ka branch sa 110 ka mga kinabig. Daghang matinud-anon nga mga miyembro sa Salem Branch nga sa kadugayan mibiyahe og kasadpan uban sa mga Santos, ug nahimo sila nga dakong kaayohan sa Simbahan.

Doktrina ug mga Pakigsaad 112:1–34

Nagtudlo ang Ginoo ni Thomas B. Marsh kabahin sa Korum sa Napulog Duha ka mga Apostoles ug sa iyang tahas isip ang presidente niini

Ipasabut nga kaniadtong 1837, pipila sa mga miyembro sa Simbahan sa Kirtland nahimong puno sa garbo ug masukulon nga mga tawo, lakip sa daghan nga mga miyembro sa Korum sa Napulog Duha ka mga Apostoles. Kaniadtong Hulyo 1837, si Thomas B. Marsh, Presidente sa Korum sa Napulog Duha ka mga Apostoles, ug kaubang mga Apostoles nga sila ni David W. Patten ug William Smith mibiyahe gikan sa Far West, Missouri, ngadto sa Kirtland, Ohio aron sa pagsulbad sa walay panaghiusa diha sa Korum. Mitawag si Presidente Marsh og miting sa konseho nga pagahimoon uban sa tibuok Korum sa Napulog Duha ka mga Apostoles sa Hulyo 24, 1837, apan sa dihang miabut siya sa Kirtland, iyang nahibaloan nga duha ka mga miyembro sa Korum nakabiya na alang sa misyon ngadto sa England. Nasilo si Presidente Marsh nga wala siya konsultaha kalabut niini nga mga misyon. Sa Hulyo 23, 1837, nangayo og tambag si Presidente Marsh gikan ni Propeta Joseph Smith, ug ang resulta nadawat sa Propeta ang pagpadayag nga gi-rekord diha sa Doktrina ug mga Pakigsaad 112.

Dapita ang usa ka estudyante sa pagbasa og kusog sa Doktrina ug mga Pakigsaad 112:1–3. Hangyoa ang klase sa pagsunod, nga mangita sa unsa ang gisulti sa Ginoo ngadto ni Thomas B. Marsh.

Unsa nga maayong mga buhat ang gisulti sa Ginoo nga nahimo ni Thomas B. Marsh?
Sumala sa bersikulo 2, unsa nga mga kabalaka ang gipahayag sa Ginoo kalabut ni Thomas B. Marsh?

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 112:4–10. Hangyoa ang klase sa pagsunod, nga mangita sa tambag sa Ginoo ngadto ni Presidente Marsh ug ang mga panalangin nga Iyang gisaad kaniya kon siya mosunod niana nga tambag.

Unsa nga tambag ang gihatag sa Ginoo ngadto ni Thomas B. Marsh?
Unsa nga mga panalangin ang gisaad sa Ginoo kon siya mosunod niana nga tambag?
Unsa nga baruganan ang atong maila gikan sa bersikulo 10? (Tabangi ang mga estudyante nga makahimo sa pag-ila sa mosunod nga baruganan: Kon kita magmapainubsanon, ang Ginoo mogiya kanato ug mohatag kanato og mga tubag sa atong mga pag-ampo.)
Unsa ang atong mahimo sa pagtabang sa atong kaugalingon nga magmapainubsanon?
Ngano nga ang pagkamapainubsanon nagtabang kanato nga makadawat sa paggiya sa Ginoo?
Kanus-a ninyo nabati nga ang Ginoo naggiya kaninyo ug nagtubag sa inyong mga pag-ampo samtang nagmapainubsanon kamo sa inyong kaugalingon?

Awhaga ang mga estudyante sa pagpaninguha nga magmapainubsanon aron sila makadawat sa paggiya sa Ginoo ug sa mga tubag sa ilang mga pag-ampo.

Dapita ang mga estudyante sa pagbasa og hilum sa Doktrina ug mga Pakigsaad 112:11–13, nga mangita kon unsay gisulti sa Ginoo ni Thomas B. Marsh nga buhaton alang sa mga miyembro sa iyang korum kinsa adunay gisugakon nga kalisud. Hangyoa ang mga estudyante sa pagreport sa unsay ilang nakit-an.

I-summarize ang Doktrina ug mga Pakigsaad 112:14–34 pinaagi sa pagpasabut nga ang Ginoo misulti sa Korum sa Napulog Duha ka mga Apostoles sa dili pagrebelde batok ni Propeta Joseph Smith. Misulti usab ang Ginoo kanila sa “pagpaubos sa ilang mga kaugalingon” (bersikulo 22) ug nga “limpyohi ang [ilang] mga kasingkasing diha sa atubangan [Kaniya]” (bersikulo 28).

Ipasabut nga tungod niini nga pagpadayag ug sa mga kahago ni Presidente Marsh, ang pipila sa mga miyembro sa Korum sa Napulog Duha ka mga Apostoles mihinulsol ug miserbisyo sa matinud-anon nga paagi diha sa Simbahan. Bisan pa niana, pipila sa mga Apostoles, ingon man sa dungganan nga mga pangulo sa Simbahan, mipili sa dili maghinulsol ug sa kadugayan mibiya sa Simbahan.

Doktrina ug mga Pakigsaad 113:1–10

Nagtubag ang Ginoo og mga pangutana mahitungod sa pipila ka mga tudling sa Isaias

Ipasabut nga kaniadtong 1837 ang panag-away didto sa Kirtland, Ohio, midako ngadto sa higayon nga pipila sa mibiya sa kamatuoran gani nagplano sa pagpatay ni Propeta Joseph Smith. Sa Enero 12, 1838, misulti ang Ginoo ni Joseph Smith ug ni Sidney Rigdon sa pagbiya sa Kirtland uban sa ilang mga pamilya. Gibuhat nila ang mao ug miabut uban sa ilang mga pamilya sa Far West, Missouri, sa Marso 14, 1838. Human sa pag-abut sa Far West, gi-rekord sa Propeta ang mga tubag sa Ginoo ngadto sa daghang mga pangutana mahitungod sa mga tudling diha sa Isaias. I-summarize ang Doktrina ug mga Pakigsaad 113 pinaagi sa pagpasabut nga kini nga seksyon naglangkub og mga pangutana ug mga tubag kalabut sa pipila ka mga bersikulo diha sa Isaias 11 ug 52.

Doktrina ug mga Pakigsaad 114

Ang Ginoo nagsugo ni David W. Patten sa pagpangandam alang sa usa ka misyon ug nagpahimangno sa mga miyembro sa Simbahan kinsa naglimud Kaniya

Ipasabut nga sa Abril 11, 1838, nadawat ni Propeta Joseph Smith ang pagpadayag kabahin ni Apostol David W. Patten.

Dapita ang usa ka estudyante sa pagbasa og kusog sa mosunod nga parapo [paragraph]:

Gitawag si David W. Patten isip usa ka miyembro sa Korum sa Napulog Duha ka mga Apostoles kaniadtong 1835. Siya walay kahadlok sa iyang pagdepensa sa Simbahan ug ni Propeta Joseph Smith. Samtang nagdepensa sa mga Santos batok sa panon sa mga manggugubot didto sa Missouri, nailhan si David W. Patten isip “Kapitan nga Walay Kahadlok.” (Tan-awa sa Lycurgus A. Wilson, Life of David W. Patten: The First Apostolic Martyr 1900], 5, 14–15, 32, 41, 52, 62.)

Dapita ang usa ka estudyante sa pagbasa og kusog sa Doktrina ug mga Pakigsaad 114:1. Hangyoa ang klase sa pagsunod, nga mangita sa mga panudlo sa Ginoo ngadto ni David W. Patten.

Unsa ang gisugo sa Ginoo nga buhaton ni Elder Patten?
Unsa ka dugay kinahanglan si Elder Patten mangandam alang sa iyang misyon?

Pahibaloa ang mga estudyante nga human si Elder Patten nahibalo sa pagpadayag nga gi-rekord diha sa Doktrina ug mga Pakigsaad 114, misugod siya sa pag-andam sa iyang kaugalingon aron sa pagtuman sa iyang misyon. Apan, mga unom ka bulan wala madugay napatay si Elder Patten diha sa away sa Suba sa Crooked samtang nagsulay sa pagluwas sa mga kinabuhi sa tulo ka mga Santos sa Ulahing mga Adlaw kinsa gihuptang bihag sa lokal nga mga sundalo.

Sa unsa kaha nga paagi nga ang sugo sa pagpangandam alang sa usa ka misyon nahimong panalangin alang ni Elder Patten, bisan og wala siya miserbisyo sa misyon nga iyang gidahum nga serbisyohan?
Unsa nga mga baruganan ang atong maila gikan sa ehemplo ni Elder Patten? (Tabangi ang mga estudyante sa pag-ila sa mosunod nga baruganan: Kon kita mosunod sa tambag sa Ginoo, maandam kita sa paghimo sa buhat nga Siya nagtawag kanato sa pagbuhat.)
Kanus-a kamo misunod sa tambag sa Ginoo ug nakita nga nakaandam kini kaninyo alang sa usa ka butang nga wala ninyo damha?

I-summarize ang Doktrina ug mga Pakigsaad 114:2 pinaagi sa pagpasabut nga ang Ginoo mipahimangno niadtong kinsa mibiya sa kamatuoran nga ang ilang mga calling kuhaon ug ihatag ngadto sa uban.

Ipasabut nga sa hapit na mamatay si Elder David W. Patten, namulong siya mahitungod sa pipila sa iyang isigka mga Santos, lakip ang mga miyembro sa Korum sa Napulog Duha ka mga Apostoles, kinsa wala magmatinud-anon. Mituaw siya, “O nga sila unta anaa sa akong sitwasyon! Kay ako nagtuo nga akong gihuptan ang pagtuo, akong natapos ang akong buluhaton, sukad karon adunay ginatagana alang kanako nga korona, nga ang Ginoo, ang matarung nga Maghuhukom, mohatag kanako.” Ngadto sa iyang asawa, miingon siya, “Bisan unsa pa ang imong buhaton, Intawon ayaw ilimud ang pagtuo” (gikutlo ni Heber C. Kimball, sa Wilson, Life of David W. Patten, 69).

Pakigbahin sa imong pagpamatuod sa mga kamatuoran nga naila niini nga leksyon, ug dapita ang mga estudyante sa paggamit niini nga mga kamatuoran.