Leksyon 53: Doktrina ug mga Pakigsaad 133

“Leksyon 53: Doktrina ug mga Pakigsaad 133,” Manwal sa Magtutudlo sa Doktrina ug mga Pakigsaad (2017)

“Leksyon 53,” Manwal sa Magtutudlo sa Doktrina ug mga Pakigsaad

Leksyon 53

Doktrina ug mga Pakigsaad 133

Pasiuna ug Timeline

Niadtong Nobyembre 3, 1831, pagkahuman sa duha ka adlaw nga komperensya nga naghisgot sa pagmantala sa Basahon sa mga Sugo, si Propeta Joseph Smith nakadawat og pagpadayag nga narekord sa Doktrina ug mga Pakigsaad 133. Kini nga pagpadayag miabut agig tubag sa mga pangutana sa pipila ka elder “kalabut sa pagsangyaw sa Ebanghelyo ngadto sa mga lumulupyo sa yuta, ug mahitungod sa pagpundok [sa Israel]” (D&P 133, ulohan sa seksyon). Sa pagpadayag, ang Ginoo misugo sa mga Santos sa pagtawag sa mga tawo sa yuta nga magpundok ngadto sa Zion ug mag-andam alang sa Iyang Ikaduhang Pag-anhi. Gipadayag usab Niya ang mga panghitabo nga may kalabutan sa Iyang Ikaduhang Pag-anhi ug sa milenyal nga paghari.

Nobyembre 1–2, 1831Sa komperensya sa Simbahan nga gihimo sa Hiram, Ohio, si Joseph Smith ug ang grupo sa mga elder nakahukom sa pagmantala sa mga pagpadayag nga nadawat niana nga punto sa usa ka volume nga pagatawgon og Basahon sa mga Sugo.

Nobyembre 1, 1831Si Joseph Smith nakadawat sa pagpadayag nga narekord sa Doktrina ug mga Pakigsaad 1, diin ang Ginoo miila niini nga “pasiuna” sa Basahon sa mga Sugo.

Nobyembre 2, 1831Si Joseph Smith nakadawat sa pagpadayag nga narekord sa Doktrina ug mga Pakigsaad 67, diin ang Ginoo mipamatuod sa katinuod sa Basahon sa mga Sugo.

Nobyembre 3, 1831Ang Doktrina ug mga Pakigsaad 133 nadawat.

Mga Sugyot alang sa Pagtudlo

Doktrina ug mga Pakigsaad 133:1–16

Ang Ginoo nagsugo sa Iyang katawhan sa pagpangandam sa Iyang Ikaduhang Pag-anhi

Dapita ang mga estudyante sa paghunahuna og usa ka higayon dihang nakaandam sila pag-ayo alang sa usa ka importante nga hitabo (sama sa usa ka interbyu sa trabaho o eksam sa eskwelahan). Hangyoa sila sa paghunahuna usab sa higayon nga wala sila kaayo makaandam alang sa importante nga hitabo.

Unsay inyong gibati sa dihang nakaandam kamo alang sa importante nga hitabo?
Unsay inyong gibati sa dihang wala kamo makaandam?
Unsa ang pipila ka umaabut nga mga panghitabo nga kinahanglan natong andamon isip mga miyembro sa Simbahan? (Isulat sa pisara ang mga tubag sa mga estudyante. Kon wala nila mahisguti kini, isulat sa pisara ang Ikaduhang Pag-anhi ni Jesukristo.)

Dapita ang mga estudyante sa pagpangita og doktrina ug mga baruganan samtang sila magtuon sa Doktrina ug mga Pakigsaad 133 karon nga makatabang kanila nga makahibalo unsaon nga maandam nila ang ilang mga kaugalingon ug ang uban alang sa Ikaduhang Pag-anhi ni Jesukristo ug ngano nga sila kinahanglang mangandam alang niini nga panghitabo.

Ipasabut nga atol sa duha ka adlaw nga komperensya nga gihimo niadtong Nobyembre 1–2, 1831, sa Hiram, Ohio, si Propeta Joseph Smith ug ang ubang mga lider sa Simbahan naghisgot sa pagpamantala sa mga pagpadayag nga nadawat sa Propeta sa usa ka basahon nga pagaulohan og Basahon sa mga Sugo. Atol niini nga komperensya, nakadawat ang Propeta sa pagpadayag nga narekord diha sa Doktrina ug mga Pakigsaad 1. Ang Ginoo mitawag niini nga pagpadayag nga Iyang “pasiuna” sa Basahon sa mga Sugo (tan-awa sa D&P 1:6). Niadtong Nobyembre 3, 1831, human sa komperensya sa Simbahan, ang Propeta nakadawat sa pagpadayag nga narekord sa Doktrina ug mga Pakigsaad 133, nga sa wala madugay gitawag nga “appendix” ngadto sa Basahon sa mga Sugo. Kini nga pagpadayag, nga naglakip sa mga pagtulun-an mahitungod sa Ikaduhang Pag-anhi ni Jesukristo, miabut agig tubag sa mga pangutana nga gipangutana sa mga elder kabahin sa misyonaryo nga buhat ug sa pagpundok sa Israel (tan-awa sa D&P 133, ulohan sa sekyon).

Dapita ang usa ka estudyante sa pagbasa og kusog sa Doktrina ug mga Pakigsaad 133:1–4. Dapita ang klase sa pagsunod, nga mangita kon unsay gipadayag sa Ginoo mahitungod sa Iyang Ikaduhang Pag-anhi.

Sumala sa bersikulo 2, unsay mahitabo sa Ikaduhang Pag-anhi ni Jesukristo ngadto sa “tanan nga mga nasud nga nakalimot sa Dios” ug sa “tanan nga dili makadiosnon diha [sa mga Santos]”?
Sumala sa bersikulo 3, unsay buhaton sa Ginoo sa panahon sa Iyang Ikaduhang Pag-anhi?
Unsa kaha ang gipasabut nga ang Ginoo “mopakita sa iyang balaan nga bukton diha sa mga mata sa tanan nga mga nasud”? (Posibling nagpasabut kini sa gahum ug himaya nga ipakita sa Ikaduhang Pag-anhi ni Jesukristo. Posibling nagpasabut usab kini sa buhat sa Ginoo sa ulahing adlaw sa pagpundok sa Israel agig pagpangandam alang sa Iyang Ikaduhang Pag-anhi [tan-awa sa 1 Nephi 22:11–12].)
Base sa mga pagtulun-an sa Ginoo sa bersikulo 4, unsa nga baruganan ang atong makita mahitungod sa pagpangandam alang sa Ikaduhang Pag-anhi ni Jesukristo? (Human makatubag ang mga estudyante, isulat ang mosunod nga baruganan diha sa pisara: Ang pagbalaan sa atong kaugalingon ug ang pagpundok uban sa mga Santos makatabang nato alang sa Ikaduhang Pag-anhi ni Jesukristo.)
Unsa ang gipasabut sa pagbalaan sa atong kaugalingon? (Kon gikinahanglan, ipasabut nga ang pagbalaan nagpasabut sa paglain gikan sa kalibutan, sa paghimo nga balaan, o sa pagpahinungod.)
Ipares-pares ang klase. Dapita ang mga estudyante sa pagbasa sa Doktrina ug mga Pakigsaad 133:5–7 sa ilang kapares, nga mangita unsay ipabuhat sa Ginoo sa mga Santos aron sila mahimong balaan. Human sa igo nga panahon, dapita ang pipila ka estudyante sa pagreport sa unsay ilang nakit-an.
Unsa kaha ang gipasabut sa “gawas kamo gikan sa Babelonia” (bersikulo 5)? (Kon gikinahanglan, ipasabut nga sa mga kasulatan, ang Babelonia sa kasagaran nagsimbolo sa pagkakalibutanon ug pagkadautan.)

I-summarize ang Doktrina ug mga Pakigsaad 133:8–15 pinaagi sa pagpasabut nga ang Ginoo misugo sa mga lider sa Simbahan sa pagpadala sa mga elder ngadto sa tanan nga mga nasud, magtawag sa tanang mga lumulupyo nga magpundok ngadto sa Zion, mag-andam sa ilang kaugalingon alang sa Ikaduhang Pag-anhi sa Ginoo, ug mobiya sa “espirituhanon nga Babelonia” ug “ayaw siya palingi-a” (mga bersikulo 14–15).

Dapita ang mga estudyante sa pagbasa og hilum sa Doktrina ug mga Pakigsaad 133:16, nga mangita sa mensahe sa Ginoo ngadto sa tanang katawhan. Dapita ang usa ka estudyante sa pagreport sa unsay iyang nakit-an.

Sa unsa nga paagi nga ang sugo sa Ginoo sa paghinulsol may kalabutan sa pagpangandam alang sa Iyang Ikaduhang Pag-anhi?

Dapita ang mga estudyante sa paghunahuna unsay ilang kinahanglan nga hinulsulan aron sila “maka … gawas gikan sa Babelonia” (D&P 133:7), makabalaan sa ilang kaugalingon, ug mangandam alang sa Ikaduhang Pag-anhi ni Jesukristo. Awhaga sila sa pagsunod sa bisan unsang mga pag-aghat nga ilang madawat.

Doktrina ug mga Pakigsaad 133:17–35

Ang Manluluwas mihulagway sa pipila ka hitabo nga mag-una sa Iyang Ikaduhang Pag-anhi ug paghari sa milenyum

I-summarize ang Doktrina ug mga Pakigsaad 133:17–35 pinaagi sa pagpasabut nga ang Ginoo mihulagway sa pipila ka panghitabo nga may kalabutan sa Iyang Ikaduhang Pag-anhi ug sa paghari sa milenyum, lakip sa Iyang pagpakita sa Bukid sa Oliba sa Jerusalem, kausaban sa yuta, ug sa pagpundok sa nawala nga mga tribo sa Israel.

Doktrina ug mga Pakigsaad 133:36–56

Ang Ginoo mipadayag nga ang gipahiuli nga ebanghelyo isangyaw ngadto sa tibuok kalibutan ug mihulagway sa Iyang Ikaduhang Pag-anhi

Dapita ang usa ka estudyante sa pagbasa og kusog sa Doktrina ug mga Pakigsaad 133:36. Hangyoa ang klase sa pagsunod, nga mangita kon unsay gibuhat sa Ginoo aron “mahibaloan” ang mga panghitabo sa Iyang Ikaduhang Pag-anhi sa “mga lumulupyo sa yuta.”

Unsa ang nabuhat sa Ginoo sa pagpahibalo sa mga lumulupyo sa yuta mahitungod sa Iyang Ikaduhang Pag-anhi? (Human makatubag ang mga estudyante, ipasabut nga ang “akong anghel” niini nga bersikulo mahimong nagpasabut ni anghel Moroni ingon man usab ngadto sa laing mga anghel kinsa mitabang sa Pagpahiuli sa ebanghelyo.)

I-summarize ang Doktrina ug mga Pakigsaad 133:37–43 pinaagi sa pagpasabut nga ang Ginoo miingon nga ang gipahiuli nga ebanghelyo isangyaw ngadto sa tanan nga mga nasud ug ang Iyang mga sulugoon mosulti sa mga katawhan sa kalibutan nga “kahadloki ang Dios … ug simbaha siya” (mga bersikulo 38–39). Agig tubag sa mga pag-ampo sa Iyang mga sulugoon, ang Ginoo moanhi pag-usab sama “sa nagdilaab nga kalayo” (bersikulo 41) aron limpyohan ang yuta gikan sa pagkadautan.

Dapita ang usa ka estudyante sa pagbasa og kusog sa Doktrina ug mga Pakigsaad 133:44–45. Hangyoa ang klase sa pagsunod, nga mangita kon unsay mahitabo sa matarung kon magpakita na ang Ginoo.

Sumala sa bersikulo 44, kinsa ang pakigkitaan sa Ginoo sa Iyang pagbalik?
Unsa nga baruganan ang atong makita gikan sa saad sa Ginoo sa bersikulo 45? (Human makatubag ang mga estudyante, isulat sa pisara ang mosunod nga baruganan: Ang Ginoo nag-andam og dagkong mga panalangin alang niadtong mohulat Kaniya.)
Unsa kaha ang gipasabut sa maghulat sa Ginoo? (Aron magpabilin nga matinud-anon ug maglaum, paabuta ug saligi ang Iyang mga saad.)

I-display ang mosunod nga pamahayag ni Elder Jeffery R. Holland Korum sa Napulog Duha ka mga Apostoles. Bahina ang klase ngadto sa gagmay nga mga grupo sa duha o tulo, ug dapita ang mga estudyante sa pagbasa sa pamahayag sa ilang mga grupo ug pahisguti ang mga pangutana nga nagsunod sa pamahayag. (Mahimo nimong iapud-apod ang pamahayag ug ang mga pangutana isip usa ka handout.)

“Kinahanglan nga magbantay kita sa mga timailhan [sa Ikaduhang Pag-anhi sa Ginoo] ug mobasa sa kahulugan sa mga panahon, kinahanglan kitang magpuyo nga matinud-anon kutob sa atong mahimo, ug kinahanglan ipakigbahin nato ang ebanghelyo ngadto sa tanan aron ang mga panalangin ug ang panalipod maangkon sa tanan. Apan kita dili ug kinahanglan nga dili angay mahadlok tungod lang kay kana nga hitabo ug mga panghitabo nga naglibut niini mahitabo gayud sa umaabut. Dili kita makahunong sa pagpakabuhi. Sa pagkatinuod, kinahanglan nga magpuyo kita og kinabuhi nga mas hingpit kay sa atong napuy-an kaniadto. Human sa tanan, mao kini ang dispensasyon sa kahingpitan sa mga panahon. …

“Ang Dios naglaum nga kamo adunay igong pagtuo ug determinasyon ug igong pagsalig diha Kaniya sa pagpadayon, magpabilin nga magpakabuhi, magpabilin nga magmaya. Sa pagkatinuod, naglaum Siya kaninyo nga dili lang yano nga moatubang sa umaabut (kana morag dili maayo ug palabay lang nga paminawon); naglaum Siya kaninyo nga mohangup ug moimpluwensya sa umaabut—sa paghigugma niini ug sa pagmaya diha niini ug mahimuot sa inyong mga oportunidad.

“Ang Dios matinguhaon nga naghulat og kahigayunan sa pagtubag sa inyong mga pag-ampo ug sa pagtuman sa inyong mga damgo, sama gayud sa kanunay Niyang naandang buhaton. Apan dili Siya makahimo kon kamo dili mag-ampo, ug Siya dili makatuman kon kamo dili mangandoy. Sa laktud, Siya walay mahimo kon kamo dili motuo” (Jeffrey R. Holland, “Terror, Triumph, and a Wedding Feast” [Brigham Young University fireside, Sept. 12, 2004], 2–3, speeches.byu.edu).

Unsa ang gitudlo ni Elder Holland nga makatabang kaninyo nga maghulat sa Ginoo uban sa pagtuo ug paglaum?
Unsaon nato “paghangup ug pag-impluwensya sa umaabut”?

Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 133:46–51. Hangyoa ang klase sa pagsunod, nga mangita kon unsay isul-ob sa Manluluwas sa Iyang Ikaduhang Pag-anhi.

Unsay kalahian bahin sa hitsura sa Manluluwas sa panahon sa Iyang Ikaduhang Pag-anhi?
Unsa ang girepresentahan sa pula nga kolor sa “sinina” o saput sa Ginoo (mga bersikulo 46, 48)? (Kon gikinahanglan, ipasabut nga nagrepresentar kini sa dugo sa dautan, kinsa pagalaglagon sa Ikaduhang Pag-anhi sa Ginoo [tan-awa sa mga bersikulo 50–51]. Posibling nagrepresentar kini “sa pag-antus sa Manluluwas didto sa Getsemani, sa dihang ang Iyang maulaong dugo gipugâ gikan sa Iyang lawas sama sa dugâ nga gipugâ gikan sa mga ubas didto sa pug-anan” [Manwal sa Estudyante sa Bag-ong Tugon (Church Educational System manual, 2014), 563].)
Base niini nga mga bersikulo, unsa ang masinati sa mga dautan sa Ikaduhang Pag-anhi ni Jesukristo?

Dapita ang mga estudyante sa pagbasa og hilum sa Doktrina ug mga Pakigsaad 133:52–53, nga mangita sa kasinatian sa mga matarung sa Ikaduhang Pag-anhi sa Ginoo.

Sa unsa nga paagi nga ang kasinatian sa mga matarung magkalahi gikan sa mga dautan sa Ikaduhang Pag-anhi sa Ginoo?
Unsa ang gitudlo niini nga mga bersikulo mahitungod sa kalooy sa Ginoo?

I-summarize ang Doktrina ug mga Pakigsaad 133:54–56 pinaagi sa pagpasabut nga ang matarung kinsa namatay sa wala pa mabanhaw ang Manluluwas maanaa sa Iyang presensya kon moanhi na Siya pag-usab. Dugang pa, ang matarung kinsa namatay human sa Pagkabanhaw sa Manluluwas pagabanhawon sa Iyang Ikaduhang Pag-anhi ug pagadad-on usab diha sa Iyang presensya.

Doktrina ug mga Pakigsaad 133:57–74

Ang ebanghelyo gisangyaw aron sa pag-andam sa kalibutan alang sa Ikaduhang Pag-anhi ni Jesukristo

Dapita ang mga estudyante sa pagbasa nga magpares sa Doktrina ug mga Pakigsaad 133:57–62. Hangyoa sila sa pagpangita kon nganong “ang Ginoo nagpadala sa kahingpitan sa iyang ebanghelyo” (bersikulo 57). Human sa igo nga panahon, dapita ang pipila ka estudyante sa pagreport sa unsay ilang nakit-an.

Kon gikinahanglan, ipasabut nga ang mga pulong “mogiok sa mga nasud” sa bersikulo 59nagpasabut sa paglain sa matarung gikan sa dautan. (Pahinumdom: Sa 2013 nga Iningles nga edisyon sa Doktrina ug mga Pakigsaad, ang pulong nga paggiok dinhi niini nga bersikulo giusab ngadto sa paglubô sa pagpakita sa pulong sa orihinal nga pagpadayag.)

Itudlo sa mga estudyante kini nga baruganan nga nakita dapit sa sinugdanan sa leksyon: Ang pagbalaan sa inyong kaugalingon ug ang pagpundok uban sa mga Santos makatabang nato alang sa Ikaduhang Pag-anhi ni Jesukristo.

Sumala sa bersikulo 62, unsa ang dugang nga baruganan ang atong makita kabahin kon unsay mahitabo kon atong balaanon ang atong kaugalingon? (Human makatubag ang mga estudyante, isulat ang mosunod nga baruganan diha sa pisara: Kadtong kinsa maghinulsol ug mopabalaan sa ilang kaugalingon makadawat og kinabuhing dayon.)
Unsay ipasabut sa “mahatagan og kinabuhing dayon”? (“Aron magpuyo hangtud sa kahangturan ingon nga mga banay sa atubangan sa Dios” [Giya ngadto sa mga Kasulatan, “Kinabuhi nga Dayon,” scriptures.lds.org].)

I-summarize ang Doktrina ug mga Pakigsaad 133:63–74 pinaagi sa pagpasabut nga ang Ginoo mihulagway unsay mahitabo niadtong kinsa mosalikway Kaniya ug sa Iyang mga sulugoon ug kinsa magdumili sa paghinulsol ug mag-andam alang sa Iyang Ikaduhang Pag-anhi. Ang pipila niini nga mga sangputanan naglakip sa “pagapuohon gikan sa taliwala sa mga katawhan sa [Ginoo]” (bersikulo 63) ug “gitugyan ngadto sa kangitngit” (bersikulo 72).

Pagpamatuod sa mga doktrina ug mga baruganan nga gitudlo sa leksyon karon. Dapita ang mga estudyante sa pagtino unsay ilang buhaton aron mas makapangandam og maayo sa ilang kaugalingon alang sa Ikaduhang Pag-anhi sa Manluluwas.