Leksyon 5: Doktrina ug mga Pakigsaad 6; 8–9

Leksyon 5

Doktrina ug mga Pakigsaad 6; 8–9

Pasiuna ug Timeline

Kay walay regular nga tigsulat, ang paghubad sa Basahon ni Mormon nagpadayon sa dili regular nga paagi hangtud sa Marso 1829, dihang si Propeta Joseph Smith gisugo sa paghunong ug maghulat og tabang (tan-awa sa D&P 5:30–34). Agig pagtuman sa saad sa Ginoo nga “mosangkap sa mga paagi” (D&P 5:34), miabut si Oliver Cowdery sa balay sa Propeta sa Harmony, Pennsylvania, ug mitanyag sa iyang tabang. Gisugdan na usab ni Joseph Smith ang paghubad niadtong Abril 7, 1829, nga si Oliver Cowdery ang nagtabang isip tigsulat. Sa wala madugay nianang bulana, nakadawat ang Propeta og pagpadayag nga narekord sa Doktrina ug mga Pakigsaad 6. Niini nga pagpadayag, nadawat ni Oliver ang tambag mahitungod sa iyang tahas sa buluhaton sa Ginoo.

Samtang nagpadayon ang paghubad sa Basahon ni Mormon, nagtinguha si Oliver nga makaangon og oportunidad nga makahubad. Sa pagpadayag nga nadawat niadtong Abril 1829 ug narekord sa Doktrina ug mga Pakigsaad 8, gisaaran sa Ginoo si Oliver og gasa sa pagpadayag ug sa katakus sa paghubad sa karaang mga rekord.

Gisugdan ni Oliver ang pagsulay og hubad apan wala makapadayon. Sa hangyo ni Oliver, nangutana si Joseph Smith sa Ginoo ug nakadawat og pagpadayag nga narekord sa Doktrina ug mga Pakigsaad 9, diin mipasabut ang Ginoo nganong naglisud sa paghubad si Oliver ug gihatag usab ang mga baruganan kabahin sa pagpadayag.

Sa ulahing bahin sa tuig 1828Nasayran ni Oliver Cowdery ang mahitungod ni Joseph Smith samtang nagpuyo sa Manchester, New York.

Abril 1829Mibiyahe si Oliver Cowdery sa Harmony, Pennsylvania, aron makigkita ni Joseph Smith.

Abril 1829Ang paghubad sa Basahon ni Mormon uban sa hingpit nga paningkamot nagpadayon uban ni Oliver Cowdery nga maoy tigsulat.

Abril 1829Nadawat ang Doktrina ug mga Pakigsaad 6 ug 8.

Abril 1829Misulay si Oliver Cowdery sa paghubad.

Abril 1829Ang Doktrina ug mga Pakigsaad 9 nadawat.

Mga Sugyot alang sa Pagtudlo

Doktrina ug mga Pakigsaad 6:1–24

Gitudloan sa Ginoo si Oliver Cowdery kabahin sa iyang tahas sa buluhaton sa Dios

Dapita ang mga estudyante sa paghunahuna mahitungod sa mga sitwasyon nga ilang gisagubang karon o gipaabut nga sagubangon nga nagkinahanglan og giya sa Langitnong Amahan.

Nganong importante kaha ang pagkadawat og giya sa Langitnong Amahan niadto nga mga sitwasyon?

Isulat sa pisara ang mosunod nga mga pangutana:

Unsaon nato sa pag-ila ang giya sa Ginoo?

Unsay angay natong buhaton aron maandam ang atong kaugalingon sa pagdawat sa Iyang giya?

Samtang magtuon ang mga estudyante sa Doktrina ug mga Pakigsaad 6, 8, ug 9 karon, dapita sila sa pagpamalandong niini nga mga pangutana ug sa pagpangita sa mga doktrina ug mga baruganan nga makatabang sa pagtubag niini.

Ipasabut nga sa tingtugnaw sa tuig 1829, nag-ampo si Propeta Joseph Smith nga magpadala ang Ginoo og tawo nga makatabang niya sa buluhaton sa paghubad sigun sa gisaad (tan-awa sa Lucy Mack Smith, “Lucy Mack Smith, History, 1845,” 143–44, josephsmithpapers.org; tan-awa usab sa D&P 5:30, 34). Ang parte sa saad sa Ginoo natuman dihang miabut si Oliver Cowdery niadtong Abril 5, 1829. Gisugdan dayon ni Joseph ug Oliver ang buhat sa paghubad sa hingpit nga paningkamot, nga si Oliver ang tigsulat. Wala madugay human nasugdan nila ang paghubad, nakadawat og pagpadayag si Joseph nga narekord sa Doktrina ug mga Pakigsaad 6.

I-summarize ang Doktrina ug mga Pakigsaad 6:1–4 pinaagi sa pagpasabut nga gisultihan sa Ginoo si Joseph ug Oliver nga ang “usa ka mahinungdanon ug kahibulongan nga buhat hapit na moabut” (bersikulo 1) ug kadtong nagtinguha sa pagtabang tinawag sa Dios aron motabang.

Dapita ang usa ka estudyante sa pagbasa og kusog sa Doktrina ug mga Pakigsaad 6:5–9. Hangyoa ang klase sa pagsunod, nga mangita sa tambag ug mga saad nga gihatag sa Ginoo kang Oliver Cowdery.

Unsa nga tambag ug mga saad ang gihatag sa Ginoo kang Oliver? (Kon gikinahanglan, ipasabut ang gibalik-balik nga tambag sa Ginoo sa pagtuman sa mga sugo.)
Unsa nga mga pulong ug hinugpong nga pulong ang nagpakita nga andam ang Ginoo nga motubag sa atong mga pag-ampo ug sa paghatag og giya?

I-summarize ang Doktrina ug mga Pakigsaad 6:10–13 pinaagi sa pagpasabut nga gisultihan sa Ginoo si Oliver Cowdery nga siya dunay gasa sa pagpadayag.

Dapita ang mga estudyante sa pagbasa sa Doktrina ug mga Pakigsaad 6:14–17, 22–24. Hangyoa sila sa pagpangita sa doktrina ug mga baruganan nga gitudlo sa Ginoo kang Oliver bahin sa pagpadayag.

Unsa nga doktrina ug mga baruganan bahin sa pagkadawat og pagpadayag ang inyong nabantayan niini nga mga bersikulo?

Dapita ang klase sa pagpangita sa mga kamatuoran nga gitudlo niini nga mga bersikulo, mahimo nimong hangyoon ang usa ka estudyante sa paglista niini diha sa pisara. Pweding mangita ang estudyante og pipila ka kamatuoran, lakip ang mosunod: Kon magtinguha kita og tubag gikan sa Langitnong Amahan, Iya kitang tudloan pinaagi sa Espiritu. Kon mangutana kita sa Ginoo, lamdagan Niya ang atong hunahuna. Ang Ginoo nagsulti og kalinaw sa atong mga hunahuna isip usa ka saksi sa kamatuoran.

Hangyoa ang mga estudyante sa pagpamalandong og mga kasinatian dihang nakadawat sila og pagpadayag gikan sa Ginoo sa usa niini nga mga paagi. Dapita ang pipila ka mga estudyante sa pagpaambit sa ilang mga kasinatian diha sa klase. (Pahinumdumi ang mga estudyante nga dili ipaambit ang bisan unsa nga hilabihan ka personal o sagrado.)

Ipasabut ang mga pulong nga “hinumdumi ang gabii nga ikaw misangpit ngari kanako” diha sa bersikulo 22 ug ang “Ako misulti kanimo sa mga butang nga walay tawo nga nasayud” sa bersikulo 24. Ipasabut nga human nahatag kini nga pagpadayag, gisultihan ni Oliver ang Propeta mahitungod sa iyang kasinatian samtang kauban niya og puyo ang pamilya ni Joseph sa Palmyra, New York. Gisugilon ni Oliver nga, human masayud mahitungod sa mga palid, “nag-ampo siya sa Ginoo aron masayud kon kining mga butanga tinuod ba gayud, ug ang Ginoo mipakita kaniya nga kini tinuod, apan iyang gitago ang tibuok sitwasyon nga sekreto, ug wala mohisgot niini ngadto ni bisan kinsa; mao nga human kini nga pinadayag gihatag, nasayud siya nga ang buhat tinuod, kay walay buhi nga binuhat ang nasayud sa butang nga gihisgutan diha sa pinadayag, apan ang Dios ug siya mismo” (Manuscript History of the Church, vol. A-1, p. 15, josephsmithpapers.org).

Awhaga ang mga estudyante nga ipadayon ang pagpangita og kaugalingon nilang pagsaksi sa kamatuoran gikan sa Ginoo.

Doktrina ug mga Pakigsaad 6:25–37

Gitambagan si Joseph Smith ug si Oliver Cowdery sa Ginoo sa paghubad ug “ayaw pagduha-duha, ayaw kahadlok”

I-summarize ang Doktrina ug mga Pakigsaad 6:25–31 pinaagi sa pagpasabut nga gihatag sa Ginoo kang Joseph Smith ug Oliver Cowdery ang mga yawe sa pagdala sa kasulatan ngadto sa kahayag. Gisultihan sa Ginoo si Oliver nga kon maoy iyang tinguha, makaangkon siya og gasa sa paghubad ug sa pagbarug uban ni Joseph Smith isip ikaduha nga saksi sa Basahon ni Mormon. Ipasabut nga tingali si Joseph ug Oliver nagduha-duha pa niining panahona kon modawat ba kaha ang uban sa Basahon ni Mormon. Ipasabut nga misaad ang Ginoo kang Joseph ug Oliver nga panalanginan sila bisan og isalikway sa uban ang buhat.

Dapita ang pipila ka estudyante sa pagbasa og kusog sa Doktrina ug mga Pakigsaad 6:32–37. Hangyoa ang klase sa pagsunod, nga mangita kon giunsa pagdasig sa Ginoo si Joseph ug Oliver. (Basin makatabang ang pagpasabut nga ang mga pulong nga “yuta ug impyerno” [D&P 6:34] nagpasabut sa katawhan ug ni Satanas).

Unsa nga mga pulong o hugpong sa mga pulong dinhi sa mga bersikulo ang makahuluganon kaninyo ug makatabang ninyo aron mabuntog ang pagduha-duha ug kahadlok?

Doktrina ug mga Pakigsaad 8

Si Oliver Cowdery gitabangan sa Ginoo nga makasabut sa espiritu sa pagpadayag

Ipasabut nga sa wala madugay human madawat ni Joseph Smith ang pagpadayag nga narekord sa seksyon 6, gustong masayran ni Oliver Cowdery kon kanus-a siya makasugod sa paghubad. Nadawat ni Propeta Joseph Smith ang pagpadayag nga narekord sa Doktrina ug mga Pakigsaad 8 agig tubag sa hangyo ni Oliver.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 8:1–5. Hangyoa ang klase sa pagsunod, nga mangita sa mga baruganan nga gikinahanglan ni Oliver Cowdery para makasabut aron makahubad.

Unsa nga doktrina ang atong makat-unan gikan sa mga bersikulo 2–3 kon sa unsang paagi ang Ginoo makigsulti kanato? (Kinahanglang makita sa mga estudyante ang doktrina nga susama sa mosunod: Ang Ginoo mamulong sa atong mga hunahuna ug mga kasingkasing pinaagi sa gahum sa Espiritu Santo.)
Sa unsa nga mga paagi mamulong ang Ginoo sa atong hunahuna? Sa unsa nga mga paagi Siya mosulti sa atong kasingkasing?

Aron sa pagtabang sa mga estudyante nga mas masabtan kini nga baruganan, dapita ang usa ka estudyante sa pagbasa og kusog sa mosunod nga pagpasabut ni Elder Richard G. Scott (1928–2015) sa Korum sa Napulog Duha ka mga Apostoles:

“Ang usa ka impresyon sa hunahuna piho kaayo. Ang detalyadong mga pulong madungog o mabatyagan ug masulat nga daw gidikta ang mga instruksyon.

“Ang komunikasyon ngadto sa kasingkasing usa ka mas tibuok nga impresyon. Ang Ginoo sa kasagaran magsugod pinaagi sa paghatag og mga impresyon. Kon adunay pag-ila sa importansya niini ug kini gisunod, ang usa ka tawo makaangkon og dakong kapasidad sa pagdawat og mas detalyadong instruksyon sulod sa hunahuna. Ang usa ka impresyon sulod sa kasingkasing, kon sundon, malig-on pinaagi sa mas piho nga instruksyon sulod sa hunahuna” (“Helping Others to Be Spiritually Led” [pakigpulong alang sa CES religious educators, Ago. 11, 1998], 3–4).

Base sa kaugalingon ninyong mga kasinatian uban niini nga doktrina, ngano kaha nga gipili sa Ginoo ang pagpakigsulti kanato pinaagi sa atong hunahuna ug kasingkasing?

I-summarize ang Doktrina ug mga Pakigsaad 8:6–12 pinaagi sa pagpasabut nga gipanalanginan sa Ginoo si Oliver Cowdery og mga gasa nga makatabang kaniya sa pagtabang ni Propeta Joseph Smith sa iyang tahas sa pagpahiuli sa ebanghelyo.

Doktrina ug mga Pakigsaad 9

Ang Ginoo mipadayag og mga baruganan bahin sa pagpadayag

Ipasabut nga nagsugod si Oliver Cowdery sa paghubad, apan wala siya molampus ug mibalik sa pagka-tigsulat sa Propeta. Nangutana si Joseph Smith sa Ginoo ug nadawat ang pagpadayag nga nagpasabut nganong si Oliver dili makahubad.

I-summarize ang Doktrina ug mga Pakigsaad 9:1–6, 11 pinaagi sa pagpasabut nga ang kahadlok ni Oliver o kakulang sa pagtuo nagpugong kaniya nga makahubad. Gitambagan si Oliver sa Ginoo nga mag-pasensya ug gisaad kaniya ang oportunidad nga makahubad “sa ubang mga rekord” (bersikulo 2) sa moabut nga panahon.

Dapita ang usa ka estudyante sa pagbasa og kusog sa Doktrina ug mga Pakigsaad 9:7–10. Hangyoa ang klase sa pagsunod, nga mangita kon unsay gitudlo ni Oliver Cowdery mahitungod sa pagdawat og pagpadayag.

Unsa kaha ang ipasabut sa mga pulong nga “magtuon niini diha sa imong hunahuna” sa bersikulo 8? (Pagkonsiderar sa mga desisyon ug mga kapilian, pagtimbang-timbang sa mabinantayong paagi. Ipasabut nga kini nga instruksyon gikan sa Ginoo naghulagway nga ang paghubad sa Basahon ni Mormon wala mahimo nga walay pagpaningkamot sa tighubad apan nagkinahanglan og mental nga panglimbasug.)
Unsa nga doktrina ang gitudlo sa bersikulo 8 kon unsay gilauman sa Ginoo kanato kon tinguhaon nato ang Iyang direksyon ug giya? (Kinahanglang makita sa mga estudyante ang doktrina nga susama sa mosunod: Samtang maningkamot kita sa pagdawat ug pag-ila sa pagpadayag, nagkinahanglan usab ang Ginoo sa atong bahin sa pagpaningkamot.)
Kanus-a kamo mibati nga kana nga paningkamot sa inyong bahin mipatubo sa inyong abilidad sa pagdawat og pagpadayag gikan sa Ginoo?

Ipasabut nga dinhi niini nga bersikulo, wala lamang magtudlo ang Ginoo ni Oliver sa kaimportante sa kaugalingon niyang paningkamot nga makadawat og pagpadayag apan usab natudloan pa gyud siya kon sa unsang paagi makigsulti ang Ginoo kanato.

Unsa nga mga pulong dinhi sa bersikulo ang nakatabang nato sa pagsabut sa dugang nga mga paagi nga ang Ginoo makigsulti kanato pinaagi sa Espiritu?
Sa unsang paagi ang mga Instruksyon sa Ginoo kang Oliver dinhi sa mga bersikulo makatabang sa paghulagway sa doktrina nga ang pagpadayag moabut sa atong hunahuna ug kasingkasing?

Mahimo nimong iklaro nga ang mga pulong nga “mohimo sa imong dughan nga moinit” diha sa bersikulo 8 ug “kasamok sa hunahuna” diha sa bersikulo 9 nagpresentar og duha ka posible nga pamaagi nga ikapakita sa Espiritu kon ang usa ka butang eksakto ba o dili.

Aron matabangan ang mga estudyante sa pagsabut kon sa unsang paagi sa kasagaran motabang ang Ginoo kanato nga mobati nga ang usa ka butang eksakto ba o dili, dapita ang usa ka estudyante sa pagbasa og kusog sa pamahayag ni Elder Richard G. Scott:

“Kana nga [kasamok sa hunahuna], alang kanako, usa ka makahasol, bug-at nga pagbati. …

“… Ang pagbati og kalinaw mao ang kasagaran nga mapamatuorong saksi nga akong nasinati sa personal. …

“… Mobati kamo og kalinaw, kahupayan, ug kasiguroan nga momatuod nga ang inyong desisyon husto. O … inyong mamatngunan ang makalibug nga pagbati, kasamok sa hunahuna, nagpasabut nga ang inyong pagpili sayop” ( Richard G. Scott ,“Ang Paggamit sa Langitnon nga Gasa sa Pag-ampo,” Liahona, Mayo 2007, 10).

Mahimong uyunan nimo nga bisan magkugi kita sa pagpangayo og giya sa Dios, daw usahay walay tubag nga moabut. Ipaniguro og usab sa mga estudyante nga kon magpakabuhi kitang takus, makabaton kita og pagtuo nga tubagon kita sa Dios sa Iyang panahon.

I-summarize ang Doktrina ug mga Pakigsaad 9:12–14 pinaagi sa pagpasabut nga ang Ginoo wala mohukom ni Oliver Cowdery tungod kay pakyas siya sa iyang pagsulay og hubad. Misaad ang Ginoo nga siya ug si Joseph mouswag kon padayon silang magmatinud-anon sa buhat.

I-refer ang mga estudyante ngadto sa mga pangutana nga naa sa pisara nga imong gisulat sa pagsugod sa klase. Hangyoa nga isulat nila sa ilang personal nga notebook ang ilang mga tubag sa mga pangutana base sa unsay ilang nakat-unan karon. Dapita ang pipila ka estudyante nga ipaambit sa klase ang ilang mga tubag. Awhaga ang mga estudyante sa pagsunod sa bisan unsang pag-aghat nga ilang madawat kon unsay ilang mahimo aron mas madawat ug maila ang pagpadayag.