Leksyon 43: Doktrina ug mga Pakigsaad 109–110

“Leksyon 43: Doktrina ug mga Pakigsaad 109–110,” Manwal sa Magtutudlo sa Doktrina ug mga Pakigsaad (2017)

“Leksyon 43,” Manwal sa Magtutudlo sa Doktrina ug mga Pakigsaad

Leksyon 43

Doktrina ug mga Pakigsaad 109–10

Pasiuna ug Timeline

Ang mga tukurang bato sa templo sa Kirtland giugbok sa Hulyo 23, 1833. Sulod sa sunod tulo ka tuig, ang mga miyembro sa Simbahan sa Kirtland, Ohio, mihimo og dagko nga mga sakripisyo sa pagtukod sa templo agi og pagkamasulundon ngadto sa sugo sa Ginoo (tan-awa sa D&P 88:119; 95:8–9). Samtang nangandam alang sa pagpahinungod sa Templo sa Kirtland, si Propeta Joseph Smith, giabagan ni Oliver Cowdery, misulat og usa ka pag-ampo, nga “gihatag ngadto kaniya pinaagi sa pagpadayag” (D&P 109, ulohan sa seksyon), diin iyang gihalad diha sa pagpahinungod nga serbisyo nga gihimo sa Dominggo, Marso 27, 1836. Kini nga pag-ampo gi-rekord diha sa Doktrina ug mga Pakigsaad 109 ug naglangkub og mga pangamuyo ngadto sa Ginoo nga “dawata ang pagpahinungod [niini nga templo] ngadto [Kaniya]” (D&P 109:78), sa pagpanalangin sa “tanan nga mga katawhan kinsa mosulod [niini]” (D&P 109:13), ug “hinumdumi ang tanan [Niyang] simbahan, … aron ang gingharian, diin [Siya mipa] barug nga walay mga kamot, mahimo nga dako nga bukid ug makapuno sa tibuok yuta” (D&P 109:72).

Sa Abril 3, 1836, mipakita si Jesukristo ngadto ni Propeta Joseph Smith ug Oliver Cowdery didto sa Templo sa Kirtland. Ang mga propeta Moises, Elias, ug Elijah mipakita usab ug mitugyan sa mga yawe sa pagkapari. Ang istorya niini nga mga pagpakita gi-rekord diha sa Doktrina ug mga Pakigsaad 110.

Sayo sa Hunyo 1833Ang mga miyembro sa Simbahan misugod sa pagtukod sa Templo sa Kirtland, Ohio.

Marso 27, 1836Gibasa ni Propeta Joseph Smith ang pahinungod nga pag-ampo alang sa Templo sa Kirtland, nga sa wala madugay gi-rekord diha sa Doktrina ug mga Pakigsaad 109.

Marso 30, 1836Mipakita ang Ginoong Jesukristo ngadto sa pipila niadtong nagpundok sa usa ka ligdong sa tigum sa asembleya diha sa Templo sa Kirtland.

Abril 3, 1836Nakita ug nadungog ni Joseph Smith ug Oliver Cowdery si Jesukristo ug nadawat ang mga yawe sa priesthood gikan ni Moises, Elias, ug ni Elijah didto sa Templo sa Kirtland, ingon nga gi-rekord diha sa Doktrina ug mga Pakigsaad 110.

Mga Sugyot alang sa Pagtudlo

Doktrina ug mga Pakigsaad 109:1–28

Mihangyo si Propeta Joseph Smith sa Ginoo sa pagdawat sa Templo sa Kirtland ug sa pagpanalangin niadtong kinsa mosimba diha niini

Pagpakita og pipila ka mga litrato sa templo.

Nganong magtukod kita og mga templo?

Pagdapit og mga estudyante sa pagpangita sa doktrina ug mga baruganan nga motubag niini nga pangutana samtang ilang tun-an ang Doktrina ug mga Pakigsaad 109–10 sa leksyon karon.

Imahe

Templo sa Kirtland

Pakit-a ang mga estudyante og litrato sa Templo sa Kirtland (tan-awa sa Libro sa mga Hulagway sa Ebanghelyo [2009], nu. 117; tan-awa usab sa lds.org/media-library). Dapita ang usa ka estudyante sa pagbasa og kusog sa mosunod nga parapo [paragraph]:

Ang pagtukod sa Templo sa Kirtland usa ka dako nga hagit alang sa mga Santos sa Kirtland, ingon nga sila diyutay ang gidaghanon ug kadaghanan kanila mga kabus. Sa pagka-Dominggo, Marso 27, 1836, mga 1,000 ka mga tawo nagpundok diha sa templo, nagbiya og gatusan ka mga tawo nga anaa pa sa gawas, kadaghanan kinsa misakripisyo aron sa pagtukod sa templo. Sa sugyot sa Propeta, “ang pipila niadto nga dili makasulod [sa templo] nagmiting sa duol nga eskwelahan samtang ang uban mipauli aron sa paghulat sa ikaduha nga pagpahinungod nga hitabo.” Ang pagpahinungod misugod sa usa ka pambukas nga pag-ampo ug himno, human diin namulong si Sidney Rigdon sulod sa duha ug tunga ka oras. Siya “dayon mihatag sa kang [Joseph Smith] nga ngalan ngadto sa kongregasyon” alang sa pagpaluyo isip “Propeta ug Manalagna” (The Joseph Smith Papers, Documents, Volume 5: Oktubre 1835–Enero 1838, ed. Brent M. Rogers ug uban [2017], 189). Human sa usa ka 20-minutos nga pahulay og kadiyot, namulong si Propeta Joseph Smith og kadali ngadto sa kongregasyon ug mitawag alang sa usa ka pagpaluyo nga pagboto sa mga pangulo sa Simbahan. Dayon gibasa og kusog sa Propeta ang pagpahinungod nga pag-ampo. Natapos ang miting nga ang kongregasyon naghatag sa Singgit nga Hosanna, diin ilang gihimo pinaagi sa pagsinggit og kusog sa makatulo ka higayon, “Hosanna, hosanna, hosanna ngadto sa Dios ug sa Kordero! Amen, amen, ug amen.” (Tan-awa sa Joseph Smith Papers, Journals, Volume 1: 1832–1839, ed. Dean C. Jessee ug uban [2008], 203–11.)

Ipasabut nga ang pagpahinungod nga pag-ampo sa Templo sa Kirtland makita diha sa Doktrina ug mga Pakigsaad 109. Nahimo kini nga usa ka sundanan alang sa tanang mosunod nga pagpahinungod nga mga pag-ampo.

Dapita ang pipila ka mga estudyante sa pagpuli-puli sa pagbasa og kusog sa Doktrina ug mga Pakigsaad 109:1–5. Hangyoa ang klase sa pagsunod, nga mangita sa mga rason nga gitukod sa mga Santos ang Templo sa Kirtland.

Sumala sa mga bersikulo 2 ug 5, ngano nga ang mga Santos mitukod sa Templo sa Kirtland?
Sumala sa bersikulo 4, unsa ang giampo ni Propeta Joseph Smith sa Ginoo nga pagabuhaton?

I-summarize ang Doktrina ug mga Pakigsaad 109:6–11 pinaagi sa pagpasabut nga diha sa usa ka bahin sa pagpahinungod nga pag-ampo, gibalik og sulti sa Propeta ang sugo sa Ginoo ngadto sa mga Santos sa pagtukod og templo (tan-awa sa D&P 88:117–20), ug nangamuyo siya alang sa mga panalangin nga gisaad sa Ginoo nga ihatag ngadto kanila kon mahuman ang templo.

Dapita ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 109:12–15. Hangyoa ang klase sa pagsunod, nga mangita sa mga panalangin nga giampo ni Propeta Joseph Smith. Hangyoa ang mga estudyante sa pagreport sa unsay ilang nakit-an.

Unsa nga baruganan ang atong maila gikan niini nga mga bersikulo mahitungod sa mga panalangin nga atong madawat samtang kita nagsimba sa Dios diha sa templo? (Human matubag sa mga estudyante, isulat ang mosunod nga baruganan diha sa pisara: Kadtong kinsa nagsimba sa Dios diha sa templo mobati sa Iyang gahum, mokat-on kaniya, modawat sa usa ka kahingpitan sa Espiritu Santo, ug makaandam sa pagbaton sa matag gikinahanglan nga butang.)

Ipasabut nga ang “modawat sa usa ka kahingpitan sa Espiritu Santo” (D&P 109:15) nagpasabut nga madawat “ang saad … sa kinabuhi nga dayon, gani ang himaya sa celestial nga gingharian” (D&P 88:4; tan-awa usab sa D. Todd Christofferson, “The Power of Covenants,” Ensign o Liahona, Mayo 2009, 23, mubo nga sulat 5).

Tan-awa ang pamahayag diha sa pisara, ug pangutana:

Sa unsa nga mga paagi kamo napanalanginan samtang nagsimba kamo sa Dios diha sa templo?

I-summarize ang Doktrina ug mga Pakigsaad 109:16–20 pinaagi sa pagpasabut nga si Propeta Joseph Smith nag-ampo nga dawaton sa Ginoo ang Templo sa Kirtland isip Iyang balay ug nga “walay mahugaw nga butang nga [maka] himo sa pagsulod ngadto [niini] (bersikulo 20).

Dapita ang usa ka estudyante sa pagbasa og kusog sa Doktrina ug mga Pakigsaad 109:21. Hangyoa ang klase sa pagsunod, nga mangita kon alang sa unsa ang giampo ni Propeta Joseph Smith.

Unsa ang giampo sa Propeta nga mahitabo kon ang mga katawhan sa Dios makalapas?

Ipasabut nga kon kita dili takus sa pagsulod sa templo tungod sa kalapasan, makahinulsol kita, mapasaylo, ug makadawat sa tanan nga ang Ginoo nagsaad ngadto niadtong kinsa sa katakus nagsimba Kaniya diha sa templo.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 109:22–28. Hangyoa ang klase sa pagsunod, nga mangita kon unsa ang gihangyo sa Propeta nga pagabuhaton sa Ginoo alang sa Iyang mga sulugoon.

Sumala sa mga bersikulo 22–24, unsa ang gihangyo sa Propeta nga pagabuhaton sa Ginoo alang sa Iyang mga sulugoon kinsa nagserbisyo isip mga misyonaryo?
Ngano kaha nga kini importante alang sa mga misyonaryo nga “sinangkapan uban … sa gahum” diha sa templo sa dili pa sila “molakaw” sa pagpakigbahin sa ebanghelyo (bersikulo 22)?
Sumala sa mga bersikulo 25-28, unsa ang gihangyo sa Propeta nga pagabuhaton sa Ginoo alang sa mga Santos?
Unsa nga baruganan ang atong maila gikan niini nga mga bersikulo mahitungod sa mga panalangin sa pagsimba sa Dios diha sa templo? (Human matubag sa mga estudyante, isulat ang mosunod nga baruganan diha sa pisara: Samtang kita nagsimba sa Dios diha sa templo, kita pagasangkapan uban sa Iyang gahum ug panalipod.)
Unsa kaha ang gipasabut sa sinangkapan uban sa gahum sa Dios?

Dapita ang usa ka estudyante sa pagbasa og kusog sa mosunod nga pamahayag ni Elder Joseph B. Wirthlin (1917–2008) sa Korum sa Napulog Duha ka mga Apostoles. Hangyoa ang klase sa pagpaminaw alang sa mga panalangin nga atong madawat samtang kita sinangkapan uban sa gahum sa Dios.

“Sa balay sa Ginoo, ang matinud-anong mga miyembro sa Simbahan mahimong tugahan ‘uban sa gahum gikan sa kahitas-an’ [D&P 95:8], gahum nga makapahimo kanato sa pagsugakod sa tintasyon, pagtahud sa mga pakigsaad, pagsunod sa mga sugo sa Ginoo, ug paghatag og kinasingkasing, walay kahadlok nga pagpamatuod sa ebanghelyo ngadto sa pamilya, mga higala, ug mga silingan” (Joseph B. Wirthlin, “Cultivating Divine Attributes,” Ensign, Nob. 1998, 27).

Sa unsa nga paagi nga ang “gahum gikan sa kahitas-an” (D&P 95:8) mahimo nga usa ka panalangin nganha kaninyo?

Ipakigbahin ang inyong pagpamatuod nga samtang kita nagsimba sa Dios diha sa templo, kita pagasangkapan uban sa Iyang gahum ug panalipod.

Doktrina ug mga Pakigsaad 109:29–80

Naghangyo si Propeta Joseph Smith sa Ginoo sa paghatag og kalooy diha sa mga Santos ug sa uban ug sa pagdawat sa templo

I-summarize ang Doktrina ug mga Pakigsaad 109:29–80 pinaagi sa pagpasabut nga si Propeta Joseph Smith nag-ampo nga kadtong “nagsabwag og bakak nga mga balita” mahitungod sa mga Santos “[paga]libugon” (bersikulo 29) ug nga ang mga miyembro sa Simbahan “makabarug … [ug] mobuhat sa buhat [sa Ginoo]” (bersikulo 33). Nag-ampo usab siya nga ang Ginoo mopuno sa templo “uban sa [Iyang] himaya” (bersikulo 37) ug mohatag sa Iyang mga sulugoon og pagpamatuod ug gahum nga ilang gikinahanglan sa pagsangyaw sa ebanghelyo (mga bersikulo 38–41). Agi og dugang, ang Propeta mihangyo nga “ang mga lumulupyo sa yuta” maandam sa pagdawat sa ebanghelyo (mga bersikulo 38–39).

Dapita ang usa ka estudyante sa pagbasa og kusog sa mosunod nga paghulagway kabahin sa unsa ang nahitabo human gipahinungod ni Propeta Joseph Smith ang templo.

Sa gabii human ang pagpahinungod, labaw sa tulo ka gatus ka mga tighupot sa pagkapari ang nagpundok diha sa templo. Usa ka dahunog sama sa hampak sa hangin mipuno sa gambalay, ug tanan kanila mibarug. Daghan ang nanagna, misulti og nagkalain-laing mga pinulongan, ug nakakita og mga panan-awon ug mga anghel. Pipila ka mga tawo sa duol nakakita og haligi sa kalayo ug mga anghel sa ibabaw sa templo ug nakadungog og langitnong nanganta (tan-awa sa Manuscript History of the Church, vol. B-1, addenda, note J, p. 3–4, josephsmithpapers.org). Sulod sa sunod unom ka bulan, ang mga Santos sa Kirtland nakasinati og daghang espiritwal nga mga pagpakita. Ang labing importante nga espiritwal nga pagpakita nahitabo usa ka semana human sa pagpahinungod sa templo, kaniadtong Abril 3, 1836.

Doktrina ug mga Pakigsaad 110:1–10

Ang Manluluwas mipakita uban ang himaya ug midawat sa Templo sa Kirtland isip Iyang balay

Ipasabut nga sa Abril 3, 1836, usa ka grupo sa mga miyembro sa Simbahan nagpundok diha sa templo alang sa usa ka sakrament miting. Human ang sakrament gipangalagad, si Propeta Joseph Smith ug si Oliver Cowdery misulod sa gipataas nga mga pulpito diha sa kasadpan nga tumoy sa templo ug gipaubos ang mga tabil nga miliyok sa mga pulpito. Ang Propeta ug si Oliver Cowdery miluhod sa sulod niining natago nga dapit ug nag-ampo.

Dapita ang mga estudyante sa pagbasa og hilum sa Doktrina ug mga Pakigsaad 110:1–3, nga mangita kon unsa ang nahitabo agi og tubag ngadto niini nga pag-ampo. Hangyoa ang mga estudyante sa pagreport sa unsay ilang nakit-an.

Ipakita ang mosunod nga mga hulagway:

Imahe

Manunubos nagpakita didto sa Templo sa Kirtland

Sa unsa nga paagi gihulagway sa Propeta ang Manunubos?

Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 110:4–8. Hangyoa ang klase sa pagsunod, nga mangita kon unsa ang gisulti sa Ginoo ni Propeta Joseph Smith ug ni Oliver Cowdery.

Sumala sa bersikulo 5, ngano nga si Joseph Smith ug si Oliver Cowdery gisultihan sa “pagmaya”?
Sumala sa mga bersikulo 6–8, ngano nga ang mga Santos adunay rason sa “pagmaya”?
Unsa nga baruganan ang atong maila gikan sa mga bersikulo 7–8 kalabut sa unsa ang mahitabo kon kita mosunod sa mga sugo sa Ginoo ug “dili maghugaw-hugaw sa [Iyang] balaan nga balay” (bersikulo 8)? (Tabangi ang mga estudyante sa pag-ila sa mosunod nga baruganan: Kon kita mosunod sa mga sugo sa Ginoo ug mopabilin sa Iyang balay nga putli, Siya mopakita sa Iyang Kaugalingon ngari kanato diha sa Iyang mga templo.)

Ipasabut nga ang Ginoo sa kinatibuk-an nagpakita sa Iyang Kaugalingon ngadto sa Iyang mga katawhan pinaagi sa gahum sa Espiritu Santo (tan-awa sa 3 Nephi 15:23). Hinoon, mahimo usab Siya nga mopakita sa Iyang Kaugalingon pinaagi nga “[mo]pakita ngadto sa [Iyang] mga sulugoon” (D&P 110:8).

Sa unsa nga paagi nga atong mapabilin ang balay sa Ginoo nga putli ug dili mahugaw-hugawan?
Ngano kaha nga kita kinahanglan gayud nga magmasulundon ug magputli sa atong mga kaugalingon aron ang Ginoo makapakita sa Iyang Kaugalingon ngari kanato diha sa templo?

Dapita ang usa ka estudyante sa pagbasa og kusog sa Doktrina ug mga Pakigsaad 110:9–10. Hangyoa ang klase sa pagsunod, nga mangita kon kinsa ang mapanalanginan tungod sa pagpahiuli sa mga panalangin sa templo. Hangyoa ang mga estudyante sa pagreport sa unsay ilang nakit-an.

Doktrina ug mga Pakigsaad 110:11–16

Sila ni Moises, Elias, ug Elijah mitugyan sa mga yawe sa pagkapari ngadto ni Joseph Smith ug ni Oliver Cowdery

Ipasabut nga human sa ilang panan-awon sa Manluluwas diha sa Templo sa Kirtland natapos, si Propeta Joseph Smith ug si Oliver Cowdery gibisitahan og uban nga langitnong mga mensahero. Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 110:11–16. Hangyoa ang klase sa pagsunod, nga mangita kon kinsa pa ang mipakita ngadto ni Joseph Smith ug ni Oliver Cowdery.

Kinsa pa ang mipakita ngadto ni Joseph Smith ug ni Oliver Cowdery didto sa Templo sa Kirtland?
Unsa ang gitugyan sa matag langitnong mensahero ngadto ni Joseph Smith ug ni Oliver Cowdery?

Tabangi ang mga estudyante sa pagsabut nga si Moises “mitugyan … sa mga yawe sa pagpundok sa Israel” (D&P 110:11), diin gigamit sa pagpalakaw sa misyonaryo nga buhat. Si Elias “mitugyan sa dispensasyon [kapaigoan] sa ebanghelyo ni Abraham” (D&P 110:12), o ang saad nga pinaagi sa kang Abraham nga “binhi … ang tanan nga mga banay sa yuta [paga]panalanginan, gani uban sa mga panalangin sa ebanghelyo, diin mao ang mga panalangin sa kaluwasan, gani sa kinabuhi nga dayon” (Abraham 2:11). Mitugyan si Elijah sa mga yawe sa gahum sa pagbugkos (tan-awa sa D&P 110:13–16), diin nagtugot sa takus nga mga magtiayon ug mga pamilya nga mahiusa sa pagbugkos sa kahangturan.

Nganong importante nga kining mga yawe sa pagkapari mapahiuli sa ulahing mga adlaw? (Human matubag sa mga estudyante, isulat ang mosunod nga doktrina diha sa pisara: Pinaagi sa mga yawe sa pagkapari, ang awtorisado nga mga suluguoon sa Ginoo nagdumala ug nagtuman sa buhat sa kaluwasan.)

Ipasabut nga ang mga yawe sa pagkapari nga gitugyan ngadto ni Propeta Joseph Smith ug ni Oliver Cowdery gihuptan ug gigamit karon sa matag miyembro sa Unang Kapangulohan ug sa Napulog Duha ka mga Apostoles ubos sa pagdumala sa Presidente sa Simbahan.

Napanalanginan ba kamo pinaagi sa mga yawe sa pagkapari ug sa mga gahum nga gitugyan nila ni Moises, Elias, ug Elijah ngadto ni Joseph Smith ug ni Oliver Cowdery didto sa Templo sa Kirtland?

Ribyuha ang doktrina ug mga baruganan nga nailhan sa leksyon karon, ug ipakigbahin ang inyong pagpamatuod kalabut niini nga mga kamatuoran. Kon itugot sa panahon, mahimo nimong ipasalida ang video nga “The Holy Temple” (5:09), diha diin ang mga miyembro sa Simbahan nagpamatuod sa mga panalangin sa templo. Kini nga video anaa sa LDS.org.

Awhaga ang mga estudyante sa paghimo og tumong sa pagtambong sa templo kutob nga itugot sa mga higayon aron sila makadawat sa gahum ug sa panalipod sa Dios.