Leksyon 47

Doktrina ug mga Pakigsaad 121:11–46

Pasiuna ug Timeline

Sa Oktubre 31, 1838, ang tagilungsod nga tropa sa mga sundalo [militia] sa estado sa Missouri midala ni Propeta Joseph Smith ug sa ubang mga lider sa Simbahan nga binilanggo sa Far West, Missouri. Kini nga mga lalaki sa kadugayan gibilanggo sa Bilanggoan sa Liberty sa Distrito sa Clay, Missouri, ug hilabihan ang pag-antus sulod sa upat ka bulan nga pagkabilanggo. Samtang diha sa Bilanggoan sa Liberty, midiktar ang Propeta og usa ka sulat ngadto sa mga miyembro sa Simbahan sa Marso 20, 1839, ug ang ikaduha nga sulat human sa mga duha ka adlaw, diha diin iyang gihulagway ang mga paghukom nga pagaantuson sa dautan ingon man ang mga panalangin nga gisaad ngadto niadto “kinsa milahutay nga maisugon” (D&P 121:29). Mitudlo usab si Propeta Joseph Smith og mga baruganan mahitungod sa awtoridad ug gahum sa pagkapari. Mga bahin niini nga mga sulat gi-rekord diha sa Doktrina ug mga Pakigsaad 121:11–46.

Agosto–Oktubre 1838Ang walay pagsinabtanay ug tensyon tali sa mga miyembro sa Simbahan ug sa ubang mga taga Missouri misangput ngadto sa away nga naggamit og armas.

Oktubre 27, 1838Mihatag og awtoridad si Gobernador Lilburn W. Boggs sa pagpatay o sa paghingilin sa tanang mga Santos sa Ulahing mga Adlaw gikan sa estado sa Missouri.

Oktubre 30 1838Ang anti-Mormon nga mga vigilante miatake sa mga miyembro sa Simbahan didto sa kapanimuyoan sa Hawn Mill, nahimutang sa 19.31 ka kilometro silangan sa Far West, Missouri nagpatay og 17 ka mga lalaki ug mga batang lalaki ug ubang 13 ka samaran.

Oktubre 31, 1838Si Propeta Joseph Smith ug uban gidala nga binilanggo sa tagilungsod nga tropa sa mga sundalo sa estado sa Missouri didto sa Far West, Missouri.

Disyembre 1, 1838Gibilanggo si Propeta Joseph Smith ug ang iyang mga kauban didto sa Bilanggoan sa Liberty sa Distrito sa Clay, Missouri.

Marso 20–22, 1839Midiktar og mga sulat si Propeta Joseph Smith gikan sa Bilanggoan sa Liberty, mga bahin diin gi-rekord diha sa Doktrina ug mga Pakigsaad 121–23.

Abril 6, 1839Si Propeta Joseph Smith ug ang iyang mga kauban gidala gikan sa Bilanggoan sa Liberty ngadto sa Gallantin, Missouri, aron sa pagtambong og husay sa korte. Sa Abril 16, 1839, gitugutan sila makaikyas, ug nakig-uban sila sa mga Santos sa Illinois.

Mga Sugyot alang sa Pagtudlo

Doktrina ug mga Pakigsaad 121:11–25

Gihulagway sa Ginoo ang mga paghukom nga moabut niadtong kinsa mobatok sa Iyang buhat

Dapita ang mga estudyante sa paghunahuna mahitungod sa usa ka miyembro sa Simbahan nga ilang nailhan kinsa nakasinati og mahinungdanon nga mga kalisud ug bisan niana nagpili sa pagpabilin nga matinud-anon.

• Ngano kaha kini nga tawo nagpili sa pagpabilin nga matinud-anon bisan sa mga panahon sa kalisdanan?

Dapita ang mga estudyante sa pagpangita og mga doktrina ug mga baruganan samtang nagtuon sila sa Doktrina ug mga Pakigsaad 121 nga makatabang kanila sa pagpabilin nga matinud-anon sa mga panahon sa kalisdanan.

Pahinumdumi ang mga estudyante nga si Propeta Joseph Smith ug ang ubang daghan nga mga pangulo sa Simbahan milahutay og hilabihan nga mga kasakitan samtang sila gibilanggo diha sa Bilanggoan sa Liberty gikan sa Disyembre 1, 1838, ngadto sa Abril 6, 1839. Atol niadto nga panahon, ang mga miyembro sa Simbahan sa Missouri nag-antus usab sa hilabihan. Human si Gobernador Lilburn W. Boggs mimando sa paghingilin sa tanan nga mga Mormon gikan sa estado sa Missouri kaniadtong Oktubre 1838, ang mga miyembro sa Simbahan napugos sa pagbiya sa ilang mga panimalay ug sa daghan nilang mga butang ug nagpadulong tabok sa Suba sa Missisippi atol sa hilabihan ka pait nga tingtugnaw. Kadaghanan niini nga mga Santos misangko diha sa gagmay nga mga komunidad sa Illinois, diin sila nakigbisog sa pagpangita og igo nga pagkaon ug kapasilongan. Kaniadtong Marso 1839, samtang diha pa sa bilanggoan, ang Propeta misulat ngadto sa mga miyembro sa Simbahan og duha ka sulat nga milakip sa iyang mga pag-ampo kalabut sa ilang mga kasakitan ug sa tubag nga iyang nadawat niadto nga mga pag-ampo, uban sa iyang tambag ngadto sa “mga Santos nga nag-antus” (D&P 121:6). Mga bahin niini nga mga sulat gi-rekord diha sa Doktrina ug mga Pakigsaad 121:11–46.

Dapita ang usa ka estudyante sa pagbasa og kusog sa Doktrina ug mga Pakigsaad 121:1–3. Hangyoa ang klase sa pagsunod, nga mangita sa mga pangutana nga gipangutana ni Propeta Joseph Smith sa Ginoo.

• Unsaon ninyo sa pag-summarize ang unsay gipangutana sa Propeta sa Ginoo?

Ipasabut nga ingon nga gi-rekord diha sa Doktrina ug mga Pakigsaad 121:7–25, ang Ginoo mitanyag og kahupayan ug gibalik nga pasalig agi og tubag ngadto sa mga pangutana sa Propeta. Gihulagway usab sa Ginoo kon unsa ang mahitabo niadtong kinsa nagdaug-daug sa mga Santos. Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 121:16–20, 23–25. Hangyoa ang klase sa pagsunod, nga mangita sa unsay gisulti sa Ginoo nga mahitabo niadtong kinsa nagdaug-daug sa mga Santos.

• Unsa ang gisulti sa Ginoo nga mahitabo niadtong kinsa nagdaug-daug sa mga Santos?

Doktrina ug mga Pakigsaad 121:26–33

Nagtudlo si Propeta Joseph Smith nga ang Ginoo mopadayag og mahangturon nga mga kamatuoran pinaagi sa Espiritu

Ipasabut nga pipila lamang ka mga bahin sa Marso 1839 nga mga sulat ni Propeta Joseph Smith ang gilakip diha sa Doktrina ug mga Pakigsaad 121–23. Sa usa ka seksyon sa iyang Marso 20, 1839, nga sulat nga wala gi-rekord diha sa Doktrina ug mga Pakigsaad 121–23 apan dayon nag-una sa saad nga gi-rekord diha sa Doktrina ug mga Pakigsaad 121:26, ang Propeta mitambag sa mga Santos sa pagpabilin nga matinud-anon diha sa kalisdanan ug magpadayon diha sa hugot nga pag-ampo (tan-awa sa The Joseph Smith Papers, Documents, Volume 6: Pebrero 1838–Agosto 1839, ed. Mark Ashurst-McGee ug uban [2017], 369). Pinaagi sa pagsunod niini nga tambag, ang mga Santos makasarang alang sa gisaad nga panalangin nga gi-rekord diha sa bersikulo 26.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 121:26–32. Hangyoa ang klase sa pagsunod, nga mangita sa unsay gisaad ngadto sa matinud-anon nga mga miyembro.

• Sumala sa bersikulo 26, unsa ang gisaad ngadto sa matinud-anon nga mga miyembro sa Simbahan?

• Pinasikad diha sa unsay gisaad sa mga Santos, unsa nga doktrina atong maila kalabut sa unsaon sa Ginoo sa pagpadayag sa kamatuoran ngari kanato? (Human matubag sa mga estudyante, isulat ang mosunod nga doktrina diha sa pisara: Ang Ginoo nagpadayag og kamatuoran pinaagi sa Espiritu Santo.)

• Sumala sa mga bersikulo 27–32, unsa ang mapadayag ngadto sa “tanan kinsa milahutay nga maisugon alang sa ebanghelyo ni Jesukristo” (bersikulo 29)? (Human matubag sa mga estudyante, isulat ang mosunod nga baruganan diha sa pisara: Ang tanan nga mga kamatuoran ipadayag ngadto niadtong kinsa milahutay nga maisugon alang sa ebanghelyo ni Jesukristo.)

• Sa unsang paagi kaha kini nga baruganan nagtabang sa mga Santos sa pagpabilin nga matinud-anon sa panahon sa ilang mga kasakitan?

Dapita ang mga estudyante sa pagbasa og hilum sa Doktrina ug mga Pakigsaad 121:33 nga mangita sa pagkasusama nga gigamit sa paghatag og gibug-aton nga walay usa ka tawo ang makahunong sa Ginoo sa “pagbu-bu sa kahibalo gikan sa langit diha sa…mga Santos.”

• Unsa nga pagkasusama ang gigamit sa paghatag og gibug-aton nga walay usa ka tawo ang makahunong sa Ginoo sa “pagbu-bu sa kahibalo gikan sa langit diha sa… mga Santos”?

Ipamatuod nga ang Ginoo mopadayag og kamatuoran pinaagi sa Espiritu Santo ug nga kon kita molahutay nga maisugon, ang Ginoo mopadayag sa tanan nga mga butang ngari kanato.

Doktrina ug mga Pakigsaad 121:34–46

Nagtudlo si Propeta Joseph Smith nga ang katungod sa priesthood dili mabulag gikan sa mga gahum sa langit

Ipakita ang mosunod nga pahayag ni Presidente Russell M. Nelson sa Unang Kapangulohan, ug dapita ang usa ka estudyante sa pagbasa niini og kusog:

“Bag-ohay lang, si Wendy ug ako diha sa usa ka miting diin ang tigtugtog sa organo nakaporma na ug andam sa pagtugtog sa pangbukas nga himno. Ang iyang mga mata diha sa musika, ang iyang mga tudlo diha sa mga key. Gisugdan niya pagtuplok ang mga key, apan walay tingog. Mihunghong ako ni Wendy, ‘Wala man nay kuryente.’ Naghunahuna ako nga adunay mipugong sa pagsulod sa kuryente ngadto niana nga organo.

“Busa, mga kaigsoonan, sa samang paagi, nahadlok ako nga adunay daghan kaayo nga mga lalaki nga gihatagan og awtoridad sa pagkapari apan nagkulang sa gahum sa pagkapari” (Russell M. Nelson, “Ang Bugti sa Gahum sa Pagkapari” Liahona, Mayo 2016, 67).

• Unsaon ninyo sa paghulagway ang kalainan tali sa awtoridad sa pagkapari ug sa gahum sa pagkapari?

• Unsa kaha ang hinungdan nga ang tighupot sa pagkapari “nagkulang sa gahum sa pagkapari”?

Ipasabut nga ingon nga gi-rekord diha sa Doktrina ug mga Pakigsaad 121:34–46, si Propeta Joseph Smith mitudlo sa mga tighupot sa pagkapari unsaon nga makasarang alang sa gahum sa pagkapari. Tungod kay ang tanan nga mga miyembro sa Simbahan, lalaki ug babaye, makadawat og awtoridad ug gahum sa pagkapari samtang matarung sila nga nagserbisyo diha sa gingharian, kini nga mga bersikulo naglangkob og mga baruganan nga maggamit ngadto sa tanan nga mga miyembro sa Simbahan.

Dapita ang usa ka estudyante sa pagbasa og kusog sa Doktrina ug mga Pakigsaad 121:34–36. Hangyoa ang klase sa pagsunod, nga mangita sa unsay gitudlo sa Propeta mahitungod sa gahum sa pagkapari.

Pagsulat diha sa pisara

Ang epektibo nga paggamit sa pisara atol sa leksyon makaandam sa mga estudyante sa pagkat-on, makadapit og makahuluganon nga pag-apil, ug makatabang sa mga estudyante sa pagsabut sa kinatibuk-an nga kahulugan ug sa sulod ingon man makapalawom sa ilang pagsabut sa nailhan nga mga kamatuoran. Diha sa pisara, mahimo ka nga maka-outline sa dagkong mga punto o baruganan sa leksyon, maka-diagram sa usa ka doktrina, maka-drowing sa mga mapa, makahimo og mga flow chart, makapakita o makadrowing og mga litrato sa mga sitwasyon ug sa mga tawo nga gihulagway diha sa mga kasulatan, ug makabuhat og daghang uban pang mga kalihokan nga makadugang sa pagkat-on.

I-drowing diha sa pisara ang mosunod nga walay ngalan nga diagram. Dapita ang mga estudyante sa pagdrowing sa sama nga diagram diha sa usa ka palid nga papel ug butangi kini og ngalan pinasikad sa unsa ang ilang nakat-unan gikan sa Doktrina ug mga Pakigsaad 121:34–36. Human sa igo nga panahon, dapita ang usa o daghan pa nga mga estudyante sa paggamit unsa ang ilang gisulat diha sa mga papel sa pagngalan sa diagram diha sa pisara ug sa pagpasabut ngano nga ilang gibutangan kini og ngalan niana nga paagi. (Ang mga estudyante malagmit mohatag og daghan nga mga paagi sa pagpakita og mga ideya nga makaplagan diha niini nga mga bersikulo.)

Kon kinahanglan, hunahunaa ang pagdugang ngadto sa diagram diha sa pisara nga magpakita sa impormasyon nga gihulagway diha sa mosunod nga kompleto nga diagram.

• Unsa kaha ang gipasabut sa hugpong sa mga pulong “adunay daghan nga gitawag, apan pila lamang ang gipili” diha sa bersikulo 34?

Kon gikinahanglan, ipasabut nga niini nga kinatibuk-ang kahulugan ang ingon nga “gitawag” piho nga nagpasabut ngadto sa pagdawat sa awtoridad sa pagkapari ug nga “gipili,” ang usa ka tighupot sa pagkapari kinahanglan gayud nga takus aron makapahigayon “sa mga gahum sa langit” [bersikulo 36] aron sa pagtabang sa uban nga madawat ang mga panalangin sa pagkapari. Hinoon, ingon nga “gitawag” ug “gipili” mahimo usab nga gamiton sa mas malukpanon nga paagi ngadto sa tanan nga mga miyembro sa Simbahan kinsa mga “gitawag ngadto sa buhat” (D&P 4:3)—dili lamang ngadto niadtong kinsa naghupot sa pagkapari. (Alang sa dugang nga impormasyon, tan-awa ang komentaryo sa manwal sa estudyante alang sa Doktrina ug mga Pakigsaad 121:34–35.)

• Unsa kaha nga mga pagpili ang magpugong sa usa ka tawo gikan sa pagka“gipili”?

• Ngano nga kadto kansang “mga kasingkasing gipahimutang diha sa mga butang niini nga kalibutan” ug kinsa “naninguha sa pasidungog sa mga tawo” (bersikulo 35) dili makasarang nga mapili?

• Unsa nga doktrina ang atong maila gikan sa bersikulo 36? (Human matubag sa mga estudyante, isulat ang mosunod nga mga pamahayag sa doktrina ibabaw sa drowing diha sa pisara: Ang mga katungod sa pagkapari dili mabulag gikan sa mga gahum sa langit. Ang mga gahum sa langit madumala lamang diha sa mga baruganan sa pagkamatarung.)

Ipasabut nga ang hugpong sa mga pulong “ang katungod sa pagkapari” (bersikulo 36) nagpasabut ngadto sa mga pribilehiyo, mga gasa, ug mga panalangin nga moabut pinaagi sa mga yawe ug mga ordinansa sa pagkapari, nga anaa ngadto sa tanan nga takus nga mga miyembro sa Simbahan, lalaki o babaye.

Aron sa pagtabang sa mga estudyante nga mas makasabut kon sa una nga paagi sila makasarang sa pagdawat “sa mga gahum sa langit” (bersikulo 36), i-drowing ang mosunod nga tsart diha sa pisara, o ihatag kini ngadto sa mga estudyante isip usa ka handout.

Mga paagi nga kita dili makadawat sa mga katungod sa pagkapari ug sa mga gahum sa langit (D&P 121:37–40).	Mga paagi nga kita makadawat sa mga katungod sa pagkapari ug sa mga gahum sa langit (D&P 121:41–45).

Dapita ang mga estudyante sa pagsiksik og hilum sa Doktrina ug mga Pakigsaad 121:37–40 nga mangita sa mga kinaiya ug mga lihok nga makahimo kanato sa pagwagtang sa agianan ngadto sa mga gahum sa langit. Human sa igong panahon, hangyoa sila sa pag-report unsay ilang nakit-an. I-rekord ang ilang mga tubag diha sa wala nga kolum sa tsart. Hangyoa ang mga estudyante sa pagpasabut sa kahulugan sa matag hugpong sa mga pulong nga imong gilista. (Kon kinahanglan, ipasabut nga “ang pagtabon sa atong mga sala” [bersikulo 37] naglakip sa paglikay sa paghinulsol pinaagi sa pagpamasangil sa uban, ug sa dili matinuoran naglimud nga nagbuhat kita og bisan unsa nga sayop. “Sa pagtagbaw sa atong garbo, sa atong walay kapuslanan nga pangandoy” [bersikulo 37] naglakip sa pagpaningkamot og kalibutanong kahimtang ibabaw sa uban ug pagbutang sa atong kabubut-on ug mga tinguha og una kaysa Ginoo. “Sa paggamit sa gahum o kamandoan o pagpugos … bisan unsa nga matang sa pagkadili matarung” [bersikulo 37] naglakip sa pagpaninguha sa pagpugong o pag-impluwensya sa uban pinaagi sa pagsaway, paghadlok, o pwersa.)

Ipakita ang nahibilin sa pamahayag ni Presidente Russell M. Nelson nga gipakita sa miagi, ug hangyoa ang usa ka estudyante sa pagbasa niini og kusog. Dapita ang klase sa pagpangita alang sa dugang nga mga pagpili nga nagpugong sa mga gahum sa langit.

“Nahadlok ko nga daghan kaayong mga lalaki nga gihatagan og awtoridad sa pagkapari apan nagkulang sa gahum sa pagkapari tungod kay ang gahum napugngan sa mga sala sama sa katapulan, pagkadili matinuoron, garbo, imoralidad, o kabalaka sa mga butang sa kalibutan.

“Nahadlok ko nga daghan kaayong naghupot sa priesthood nga gamay ra o walay gibuhat aron mapalambo ang ilang abilidad nga magamit ang mga gahum sa langit. Nabalaka ko sa tanan nga dili putli og hunahuna, pagbati, o aksyon, o kinsa nga modaut sa ilang asawa o mga anak, sa ingon moputol sa gahum sa pagkapari” (Russell M. Nelson, “Ang Bugti sa Gahum sa Pagkapari,” Liahona, Mayo 2016, 67–68).

• Pinasikad sa pamahayag ni Presidente Nelson, unsa ang atong madugang ngadto sa lista diha sa pisara?

Pares-paresa ang klase. Dapita ang matag pares sa pagbasa sa Doktrina ug mga Pakigsaad 121:41–45 og dungan, nga mangita sa mga baruganan sa pagkamatarung nga makasarang kanato alang sa mga katungod sa pagkapari ug sa mga gahum sa langit. Human sa igong panahon, hangyoa sila sa pag-report unsay ilang nakit-an. I-rekord ang ilang mga tubag diha sa tuo nga kolum sa tsart. Hangyoa ang mga estudyante sa pagpasabut sa kahulugan sa matag hugpong sa mga pulong nga imong gilista. (Kon gikinahanglan, ipasabut nga ang hugpong sa mga pulong “tiunay nga paghigugma” [bersikulo 41] nagpasabut sa paghigugma sa mga tawo sa kinasingkasing ug sa tinud-anay. Ang hugpong sa mga pulong “pagpanton sa tukma nga panahon uban ang tuman nga kahigpit kon gidasig sa Espiritu Santo” [bersikulo 43] nagpasabut sa pagkorihir og dali sa usa ka tawo, sa walay langan, ug uban sa kaklaro kon gidasig sa pagbuhat sa mao pinaagi sa Espiritu Santo.)

Dapita ang mga estudyante sa paghunahuna og ehemplo gikan sa kinabuhi sa Manluluwas sa diha nga Siya mipakita og usa o labaw pa niini nga mga baruganan sa pagkamatarung. Hangyoa ang pipila ka mga estudyante sa pagpakigbahin sa ehemplo nga ilang gihunahuna ngadto sa klase.

Dapita ang usa ka estudyante sa pagbasa og kusog sa Doktrina ug mga Pakigsaad 121:45–46. Hangyoa ang klase sa pagsunod, nga mangita sa mga panalangin nga gisaad sa Ginoo niadtong kinsa nagpuyo pinaagi sa mga baruganan sa pagkamatarung. Hangyoa ang mga estudyante sa pagreport sa unsay ilang nakit-an.

• Hain niini nga mga panalangin ang piho nga bililhon kaninyo karon dayon sa inyong kinabuhi? Ngano?

• Sa unsang paagi kini nga mga panalangin may kalabutan ngadto sa pag-angkon og kahimayaan?

Ipamatuod nga samtang kita naninguha sa pagpuyo subay sa mga baruganan sa pagkamatarung, kita makapahimulos sa mga katungod sa pagkapari ug makadapit sa mga gahum sa langit ngari sa atong kinabuhi ug sa mga kinabuhi sa uban. Dapita ang mga estudyante sa paghunahuna kon unsa ka maayo sila nakasarang alang sa mga gahum sa langit. Awhaga sila sa pagpili og usa ka item gikan sa wala nga bahin sa tsart nga ilang paningkamutan sa paghunong og buhat ug usa ka item gikan sa tuo nga bahin sa tsart nga ilang paningkamutan sa pagbuhat og labaw ka maayo.