Leksyon 35

Doktrina ug mga Pakigsaad 89–92

Pasiuna ug Timeline

Human nasugdan ang Eskwelahan [Tulunghaan] sa mga Propeta sa sayo nga bahin niadtong 1833, si Propeta Joseph Smith nagpakisayud sa Ginoo bahin sa mga naghupot sa priesthood nga manabako atol sa ilang mga miting. Pagka Pebrero 27, 1833, agig tubag sa pangutana ni Joseph, ang Ginoo mihatag og pagpadayag nga narekord sa Doktrina ug mga Pakigsaad 89. Niini nga pagpadayag nga nailhan nga Pulong sa Kaalam mipasidaan ang Ginoo batok sa paggamit og makadaot nga mga substansya, miawhag sa paggamit sa maayong mga pagkaon, ug misaad og mga panalangin sa mga magmasulundon.

Pagka-Marso 8, 1833, ang Ginoo mihatag sa pinadayag nga narekord diha sa Doktrina ug mga Pakigsaad 90. Kini nga pagpadayag naglangkob og mga instruksyon ngadto sa Kapangulohan sa Halangdon nga Pagkapari ug “usa ka nagpadayon nga lakang sa pagpalambo sa Unang Kapangulohan” (D&P 90, ulohan sa seksyon).

Samtang nagtrabaho sa dinasig nga hubad sa Daang Tugon, ang Propeta nangutana sa Ginoo kon kinahanglan ba niyang ilakip ang Apokripa isip kabahin sa iyang hubad sa Biblia. Pagka-Marso 9, 1833, ang Ginoo mitubag sa pangutana ni Joseph Smith pinaagi sa pinadayag nga narekord sa Doktrina ug mga Pakigsaad 91 ug giingnan siya nga wala na kinahanglana nga hubaron pa niya ang Apokripa.

Pagka-Marso 15, 1833, ang Propeta nakadawat sa pagpadayag nga narekord sa Doktrina ug mga Pakigsaad 92, Frederick G. Williams nga mahimong aktibong sakop sa Nagkahiusang Kapunongan, nga gi-establisar aron sa pagdumala sa kaayohan ug sa kalihokan sa negosyo sa Simbahan.

Pebrero 2, 1833Nahuman ni Joseph Smith ang pagribyu sa iyang hubad sa Bag-ong Tugon.

Pebrero 27, 1833Ang Doktrina ug mga Pakigsaad 89 nadawat.

Marso 8, 1833Ang Doktrina ug mga Pakigsaad 90 nadawat.

Marso 9, 1833Ang Doktrina ug mga Pakigsaad 91 nadawat.

Marso 15, 1833Ang Doktrina ug mga Pakigsaad 92 nadawat.

Marso 18, 1833Si Sidney Rigdon ug Frederick G. Williams gi-orden nga mga Presidente (magtatambag) sa Kapangulohan sa Halangdong Pagkapari.

Mga Sugyot alang sa Pagtudlo

Doktrina ug mga Pakigsaad 89:1–21

Gipadayag sa Ginoo ang Pulong sa Kaalam

Isulat sa pisara Ang Pulong sa Kaalam.

• Nakasulay ba mo nga kinahanglan ninyong ipasabut sa usa ka tawo nganong dili mo moinom og alkohol, tsa, o kape o motabako? Unsay inyong gisulti? Giunsa man pagtubag sa tawo?

Aron matabangan ang mga estudyante sa pagsabut sa konteksto sa pagpadayag nga anaa sa Doktrina ug mga Pakigsaad 89ipsabut nga agig pagsunod sa sugo sa Ginoo nga iorganisar ang Tulunghaan sa mga Propeta (tan-awa sa D&P 88:127), si Propeta Joseph Smith ug ang ubang mga elder nag-abut sa taas nga kwarto sa tindahan ni Newel K. Tindahan sa Whitney sa Kirtland, Ohio. (Kon mahimo, pag-display og usa ka litrato sa kwarto.)

Dapita ang usa ka estudyante sa pagbasa og kusog sa mosunod nga parapo [paragraph]:

“Matag buntag human sa pamahaw, ang kalalakin-an mag-abut sa tulunghaan aron maminaw sa instruksyon gikan ni Joseph Smith. … Ang unang butang nga ilang buhaton, human makapanglingkod, mao ang ‘pagdagkot sa hunsoy [kwako] ug maghisgot og talagsaong mga butang ug dayon magpabulhot og aso,’ miingon si Brigham Young. Baga kaayo ang aso nga maglisud na gani ang mga tawo sa pagkakita kang Joseph taliwala sa aso. Kon wala nay aso ang hunsoy, ila dayong ‘ibutang ang inusap nga tabako sa usa ka daplin ug tingali sa matag kilid ug dayon magkatag na kini sa tibuok salog’ [wala mamantala nga diskurso ni Brigham Young, Disyembre 2, 1867]. Diha sa hugaw kaayong palibut, gisulayan ni Joseph Smith ang pagtudlo sa mga lalaki kon unsaon nila ug sa ilang mga kinabig sa pagkahimong balaan, ‘walay lama,’ ug mahimong takus sa presensya sa Dios” (Jed Woodworth, “The Word of Wisdom,” sa Revelations in Context, ed. Matthew McBride ug James Goldberg [2016], 183, o history.lds.org).

Dapita ang usa ka estudyante sa pagbasa og kusog sa mosunod nga pamahayag ni Presidente Brigham Young (1801–1877) kon unsay reaksyon sa Propeta bahin niini nga mga kahimtang:

“Daghang higayon nga ang Propeta mosulod sa kwarto aron sa paghatag og pagpanudlo sa klase iyang nakita ang iyang kaugalingon nga naputos sa bagang aso sa tabako. Kini, ug ang reklamo sa iyang asawa nga kinahanglan manlimpyo sa luod nga salog [gikan sa inusap nga tabako], nakahimo sa Propeta sa paghunahuna niining hitaboa, ug siya nangutana sa Ginoo kabahin sa batasan sa mga elder nga mao ang pagpanabako, ug ang padayag nga gitawag isip ang Pulong sa Kaalam mao ang tubag sa iyang pangutana” (Brigham Young, sa Mga Pagtulun-an sa mga Presidente sa Simbahan: Joseph Smith [2007], 316).

Dapita ang usa ka estudyante sa pagbasa og kusog sa Doktrina ug mga Pakigsaad 89:1–3. Hangyoa ang klase sa pagsunod, nga mangita sa mga pulong o hugpong sa mga pulong nga naghulagway sa katuyoan sa Ginoo sa paghatag niini nga pagpadayag.

• Sumala sa mga bersikulo 2–3, nganong gihatag man kini nga pagpadayag?

Ipasabut ang mga pulong nga “dili pinaagi sa sugo o pagpugos” diha sa besikulo 2, ug ipasabut nga ang Ginoo sa sinugdanan wala mohatag sa Pulong sa Kaalam isip usa ka sugo ngadto sa mga Santos. Sa kadugayan, human ang mga Santos sulod sa daghang katuigan nakapraktis na sa pagsunod sa mga baruganan sa Pulong sa Kaalam, ang mga propeta sa Ginoo nagsugod sa pagtudlo sa Pulong sa Kaalam nga karon gikonsiderar na nga usa ka sugo (tan-awa sa manwal sa estudyante komentaryo alang sa D&P 89:1–2).

Isulat sa pisara ang mosunod nga mga pulong: Usa ka Baruganan nga may Saad. Dapita ang mga estudyante sa pagpangita sa baruganan ug saad nga gipadayag sa Ginoo isip kabahin sa Pulong sa Kaalam samtang padayon silang magtuon sa Doktrina ug mga Pakigsaad 89.

Dapita ang usa ka estudyante sa pagbasa og kusog sa Doktrina ug mga Pakigsaad 89:4. Hangyoa ang klase sa pagsunod, nga mangita og laing rason sa paghatag sa Ginoo sa pagpadayag sa Pulong sa Kaalam.

• Unsa ang mga ehemplo sa “mga dautan ug mga laraw” sa kalibutan karon aron malikay kita sa pagsunod sa Pulong sa Kaalam?

Dapita ang mga estudyante sa pagbasa og hilum sa Doktrina ug mga Pakigsaad 89:5–9, nga mangita alang sa makadaot nga mga sangkap nga gipasidaan sa Ginoo nga dili ipagamit sa mga Santos.

• Unsa nga mga substansya ang gipasidaan sa Ginoo sa mga Santos nga dili gamiton? (Kon gikinahanglan, ipasabut nga ang Simbahan mitudlo nga ang termino nga “mainit nga mga ilimnon” nagpasabut sa tsaa ug kape [tan-awa sa mga nareport nga pagtulun-an ni Hyrum Smith diha sa “The Word of Wisdom,” Times and Seasons, Hunyo 1, 1842,” 800, josephsmithpapers.org].)

Ipasabut nga dili tanang makadaot nga substansya nga angayan natong likayan ginganlan diha sa pagpadayag. Ang mga lider sa Simbahan mipasidaan batok sa paggamit sa “bisan unsa nga ilimnon, drugas, kemikal, o makuyaw nga binuhatan nga gigamit aron mobati og ka-‘high’ o ubang artipisyal nga epekto nga mahimong makadaut sa inyong lawas o hunahuna. Pipila niini naglakip sa marijuana, isug nga mga drugas, giresita o wala giresita nga mga tambal nga giabusahan, ug mga kemikal sa balay” (Alang sa Kalig-on sa mga Kabatan-onan [2011], 26).

Dapita ang mga estudyante sa pagbasa og hilum sa Doktrina ug mga Pakigsaad 89:10–17, nga mangita sa mga pagkaon nga maoy giawhag sa Ginoo nga atong kaunon.

• Unsa nga mga pagkaon ang giawhag sa Ginoo kanato nga kaunon?

• Sumala sa bersikulo 11, unsa ang angay natong batunan nga taras kon mokaon kita niini nga mga pagkaon?

Pahinumdumi ang mga estudyante nga gihulagway sa Ginoo ang Pulong sa Kaalam isip “baruganan uban sa saad” (D&P 89:3). Isulat ang mosunod nga dili kompletong kapahayag [sentence] sa pisara: Kon kita mosunod sa Pulong sa Kaalam ug maningkamot sa pagtuman sa mga sugo, ang Ginoo mopanalangin kanato og …

Dapita ang usa ka estudyante sa pagbasa og kusog sa Doktrina ug mga Pakigsaad 89:18–21. Hangyoa ang klase sa pagsunod, nga mangita sa mga panalangin nga gisaad sa pagsunod sa Pulong sa Kaalam.

• Unsa nga mga panalangin ang gisaad sa Ginoo niadtong mosunod sa Pulong sa Kaalam?

Pahinumdumi ang mga estudyante nga ang saad sa kahimsog diha sa bersikulo 18 wala magpasabut nga ang Pulong sa Kaalam usa ka tambal alang sa dugay na o makapaluya nga mga sakit. Apan, makatabang kini sa mga tawo aron makabaton og labing maayong panglawas ug kalig-on nga mahimo sa ilang lawas.

• Sa unsang paagi ang pagsunod sa Pulong sa Kaalam makatabang kanato nga makaangkon og “kaalam ug maayo kaayo nga mga bahandi sa kahibalo” (bersikulo 19)? (Tabangi ang mga estudyante nga makasabut nga ang pagsunod sa Pulong sa Kaalam magtugot kanato nga matagamtam ang pakig-uban sa Espiritu Santo, kinsa mopakigbahin og kaalam ug kahibalo ngadto sa mga matinud-anon.)

Ipakita ang mosunod nga pamahayag ni Presidente Boyd K. Packer (1924–2015) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Akong nasayran … nga ang usa ka sukaranan nga katuyoan sa Pulong sa Kaalam may kalabutan sa pagpadayag. …

“Kon ang usa ka tawo nga ‘ubos sa impluwensya’ [sa makadaot nga substansya] maglisud sa pagpaminaw sa yano nga pakig-istorya, unsaon man nila sa pagtubag sa espirituhanong mga pag-aghat nga motandog sa ilang labing malumo nga mga pagbati?

“Sama ka bililhon sa Pulong sa Kaalam isip balaod sa kahimsog, mahimong mas bililhon kini kaninyo sa espirituhanong paagi kay sa pisikal nga paagi” (Boyd K. Packer, “Prayers and Answers,”Ensign, Nob. 1979, 20).

• Sa bersikulo 21, unsa nga sugilanon diha sa kasulatan ang gipasabut sa mga pulong nga “ang tiglaglag nga anghel mosaylo kanila, ingon sa mga anak sa Israel, ug dili mopatay kanila”? (Kini nga mga pulong nagpasabut sa mga anak sa Israel nga nakadawat sa balaang proteksyon atol sa unang Pagpalabay sa Ehipto [tan-awa sa Exodo 12:21–28].)

Ipasabut nga kini nga saad sa balaang proteksyon posibling mag-refer isip espiritwal ingon man usab sa pisikal nga kasiguroan.

• Basi sa unsay inyong nakat-unan gikan sa Doktrina ug mga Pakigsaad 89, unsaon nimo sa pagkompleto ang pamahayag nga naa sa pisara aron maporma ang usa ka baruganan mahitungod sa mga panalangin sa pagsunod sa pulong sa Kaalam? (Human makatubag ang mga estudyante, kompletuha ang kapahayag [sentence] nga naa sa pisara sama sa mosunod: Kon kita mosunod sa Pulong sa Kaalam ug maningkamot sa pagtuman sa mga sugo, ang Ginoo mopanalangin kanato og kahimsug, kaalam, kalig-on, ug proteksyon.)

• Kanus-a kamo o ang usa ka tawo nga inyong nailhan nakasinati niini nga mga panalangin? (Mahimo usab nga mopaambit ka og usa ka kasinatian.)

Ipasabut nga human si Joseph Smith mibasa niini nga pagpadayag ngadto sa mga elder sa Tulunghaan sa mga Propeta, gipanglabay nila ang ilang mga hunsoy [kwako] ngadto sa nagsiga nga kalayo, naghulagway nga ang pipila ka mga Santos andam nga motuman sa Pulong sa Kaalam bisan og ang mga lider sa Simbahan wala mopresentar niini isip usa ka sugo hangtud human sa daghang katuigan ang milabay. Awhaga ang mga estudyante sa pagsaad karon nga motuman sa Pulong sa Kaalam, aron madawat nila ang gisaad sa Ginoo nga mga panalangin sa kahimsug, kaalam, kalig-on, ug proteksyon.

Doktrina ug mga Pakigsaad 90:1–37

Gitudloan sa Ginoo ang Unang Kapangulohan bahin sa ilang mga katungdanan ug awtoridad

Sultihi ang mga estudyante nga mga kapin lang sa usa ka semana human ang Propeta nakadawat og pagpadayag mahitungod sa Pulong sa Kaalam, nadawat niya ang pagpadayag nga narekord sa Doktrina ug mga Pakigsaad 90. Aron matabangan ang mga estudyante nga mas makasabut sa konteksto niini nga pagpadayag, dapita ang usa ka estudyante sa pagbasa og kusog sa ulohan sa seksyon.

Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 90:1–6. Hangyoa ang klase sa pagsunod, nga mangita sa unsay gitudlo sa Ginoo mahitungod sa Unang Kapangulohan. Sa dili pa mobasa ang mga estudyante, dapita sila sa paghinumdom sa depinisyon sa pulong nga orakulo (mga bersikulo 4–5) diha sa bersikulo 4.

• Unsa ang gitudlo sa Ginoo mahitungod sa Unang Kapangulohan diha sa mga bersikulo 3 ug 6? (Pahinumdumi ang mga estudyante nga ang mga pulong nga “ang mga yawe sa gingharian” [bersikulo 2] nagpasabut sa gahum ug awtoridad sa pagdumala ug pagdirekta sa gingharian sa Dios dinhi sa yuta. Kon gikinahanglan, ipasabut nga gikan sa bersikulo 6 atong makat-unan nga ang Unang Kapangulohan naghupot sa mga yawe.)

• Sumala sa bersikulo 4, sa unsang paagi ang mga yawe sa gingharian may kalabutan sa mga pagpadayag nga gihatag sa Dios sa Simbahan? (Makadawat kita og mga pagpadayag gikan sa Dios pinaagi sa Iyang mga propeta, kinsa naghupot sa mga yawe sa gingharian.)

• Basi sa unsay gitudlo sa Ginoo diha sa bersikulo 5, unsay mahitabo kanato kon taphaw ra ang atong pagtagad sa mga pagpadayag nga gihatag sa Dios pinaagi niadtong nanaghupot sa mga yawe sa gingharian? (Kinahanglang mahibaloan sa mga estudyante ang baruganan nga susama sa mosunod: Kon taphaw lang ang atong pagtagad sa mga pagpadayag nga gihatag sa Dios pinaagi sa Iyang mga propeta, kita mahagba ug mapukan kon ang mga unos sa kinabuhi mokuso-kuso kanato.)

• Unsa ang ubang paagi nga ang katawhan taphaw ra og pagtagad sa mga pagpadayag nga gihatag sa Dios pinaagi sa Iyang mga propeta?

• Unsay atong mahimo aron masiguro nga dili nato mahatagan og taphaw nga pagtagad ang mga pulong sa mga propeta?

I-summarize ang Doktrina ug mga Pakigsaad 90:7–37 pinaagi sa pagpasabut nga misugo ang Ginoo sa Unang Kapangulohan nga iandam ang mga sakop sa Tulunghaan sa mga Propeta alang sa pagtudlo sa ebanghelyo ngadto sa tibuok kalibutan ug sa pagpahiluna sa ilang mga pamilya ug sa mga kalihokan sa Simbahan sa han-ay nga paagi. Mitambag usab ang Ginoo sa managlahing mga indibidwal sa paglakaw nga matarung ug pagserbisyo sa gingharian sa Ginoo.

Doktrina ug mga Pakigsaad 91:1–6

Ang Ginoo misugo ni Joseph Smith sa dili paghubad sa Apokripa

Kon aduna, pagpakita sa mga estudyante og magasin, newspaper, ug cellphone, ug pangutan-a sila kon giunsa nila sa pagkahibalo nga ang ilang nabasa o nabatian tinuod.

Samtang magtuon ang mga estudyante sa Doktrina ug mga Pakigsaad 91, dapita sila sa pagpangita og baruganan nga makatabang nila sa pag-ila sa kamatuoran kon unsay ilang nabasa ug nadungog.

Ipasabut nga pagka Marso 1833, gitrabaho na ni Joseph Smith ang dinasig nga hubad sa Daang Tugon. Ang Biblia nga iyang gigamit sa paghubad naglangkob sa Daang Tugon ug sa Bag-ong Tugon ingon man usab sa usa ka seksyon sa mga basahon nga gipahimutang tunga-tunga sa mga tugon [testamento] nga nailhan nga Apokripa. Ang Apokripa naglangkob sa “sagradong mga basahon sa katawhang Judeo nga orihinal nga wala malakip sa Hebreohanon nga Biblia apan giapil gihapon sa mga Biblia sa pipila ka Kristiyanong mga simbahan. Kini nga mga basahon sa kasagaran mga bililhon aron sa pagdugtong sa Daan ug sa Bag-ong mga Tugon“ (Giya ngadto sa mga Kasulatan, “Apokripa,” scriptures.lds.org). Samtang nagtrabaho si Propeta Joseph Smith sa paghubad sa Biblia, nangutana siya sa Ginoo kon kinahanglan pa ba niyang ihubad ang Apokripa.

Dapita ang mga estudyante sa hilum nga pagsik-sik sa Doktrina ug mga Pakigsaad 91:1–6, nga mangita sa mga instruksyon sa Ginoo kabahin sa Apokripa.

• Unsay gisulti sa Ginoo mahitungod sa Apokripa diha sa mga bersikulo 1–3?

• Sumala sa mga bersikulo 4–6, unsaon ni Joseph Smith sa pagkahibalo kon unsay tinuod diha sa Apokripa?

• Sa unsang paagi ang tambag diha sa mga bersikulo 4–6 makatabang nato nga mahibalo sa kamatuoran bahin sa unsay atong nabasa ug nadungog? (Human makatubag ang mga estudyante, isulat sa pisara ang mosunod nga baruganan: Ang Espiritu Santo makatabang nga atong maila ang kamatuoran kon unsay atong nabasa ug nadungog.)

Dapita ang mga estudyante sa paghunahuna mahitungod sa panahon dihang ang Espiritu Santo mipahibalo kanila nga ang ilang nabasa ug nadungog tinuod. Hangyoa ang pipila ka mga estudyante sa pagpakigbahin sa ilang mga kasinatian uban sa klase.

Doktrina ug mga Pakigsaad 92:1–2

Frederick G. Williams gitawag nga mopasakop sa Nagkahiusang Kapunongan

Ipasabut nga niadtong 1832 ang pipila ka lider sa Simbahan gitawag nga mahimong bahin sa Nagkahiusang Kapunongan, nga mailhan kaniadto nga Nagkahiusang Kompanya, nga giestablisar aron magdumala sa kaayohan ug sa mga kalihokan sa Simbahan. (Kini nga organisasyon lahi kay sa Nagkahiusang Kompanya nga giestablisar ni Presidente Brigham Young didto sa ubang mga komunidad sa Utah.) Niini nga pagpadayag, ang mga sakop sa Nagkahiusang Kapunongan gisugo sa pagdawat ni Frederick G. Williams isip usa ka miyembro.

Tapusa pinaagi sa pagpangutana sa mga estudyante kon unsa nga mga kamatuoran o mga panabut ang importante kanila niini nga leksyon, ug dapita sila sa pagpaambit og mga kasinatian ug mga pagpamatuod mahitungod niini nga mga kamatuoran. Awhaga sila sa paglihok kon unsay ilang nakat-unan.