Niadtong Septyembre 1832, ang mga misyonaryo mibalik ngadto sa Kirtland, Ohio, gikan sa pagsangyaw sa ebanghelyo sa silangang bahin sa Estados Unidos ug mi-report sa ilang mga kalampusan ngadto ni Joseph Smith. Atol sa ilang panagtapok, ang Propeta nangutana sa Ginoo ug nakadawat sa pagpadayag nga narekord sa Doktrina ug mga Pakigsaad 84. Niini nga pagpadayag, ang Ginoo mipasabut kon sa unsa nga paagi nga ang priesthood miandam sa mga Santos sa pagsulod sa presensya sa Dios ug pagdawat sa tanan nga anaa Kaniya. Ang Ginoo mitudlo sa kaimportante sa pagpatalinghug sa Iyang mga pulong ug mibadlong sa mga Santos sa Lalawigan sa Jackson, Missouri, sa pagbaliwala sa Basahon ni Mormon ug sa Iyang mga sugo. Siya mimando usab sa mga Santos sa pagsangyaw sa ebanghelyo ngadto sa kalibutan ug mihatag og mga instruksyon sa pagbuhat sa ingon.
Ulahing bahin sa Hunyo 1832Si Joseph Smith mibalik sa Kirtland, Ohio, gikan sa Independence, Missouri.
Septyembre 12, 1832Sila si Joseph ug Emma Smith mibalhin gikan sa Hiram ngadto sa Kirtland, Ohio, aron mopuyo sa tindahan ni Newel K. Whitney.
Sayong bahin sa Oktubre 1832Sila si Joseph Smith ug Newel K. Whitney mibiyahe ngadto sa Boston, Massachusetts; Albany, New York; ug Siyudad sa New York aron sa pagsangyaw sa ebanghelyo ug sa pagpalit og mga igbabaligya sa tindahan sa Kirtland.
Ang Ginoo namahayag nga usa ka templo ang pagatukuron sa bag-ong Jerusalem ug mipasabut sa mga katuyoan sa priesthood
Dapita ang mga estudyante sa paghunahuna nga sila adunay usa ka higala nga nagtuo nga ang mga tawo mahimong espirituhanon ug masuod sa Dios bisan nga walay naorganisar nga relihiyon o mga ordinansa sa priesthood. Hangyoa ang mga estudyante sa pagpamalandong sa mosunod nga mga pangutana samtang sila maghunahuna unsaon nila sa pagtubag sa ilang higala:
Ngano nga kita kinahanglan nga mahimo ug magpabilin nga matinud-anong mga miyembro sa Ang Simbahan ni Jesukristo sa mga Santos sa Ulahing mga Adlaw?
Ngano nga kinahanglan kitang modawat sa mga ordinansa sa priesthood ug motuman sa may kalabutan nga mga pakigsaad aron mas mahiduol ngadto sa Dios?
Dapita ang mga estudyante samtang sila magtuon sa Doktrina ug mga Pakigsaad 84 nga mangita sa mga doktrina ug mga baruganan nga makatabang nila nga makasabut ngano nga kita kinahanglang mahimong aktibo nga mga miyembro sa Simbahan ug kinahanglan moapil sa mga ordinansa sa priesthood.
Ipasabut nga si Joseph Smith mibalhin gikan sa Hiram ngadto sa Kirtland, Ohio, niadtong Septyembre 12, 1832. Atol sa maong bulan, pipila ka elder mibalik gikan sa pagsangyaw didto sa silangang bahin sa Estados Unidos ug mibisita ni Joseph Smith aron mo-report sa ilang misyonaryo nga pagserbisyo. Niadtong Septyembre 22–23, samtang si Joseph Smith uban sa pipila ka mga elder, nangutana siya sa Ginoo ug nakadawat sa pagpadayag nga narekord sa Doktrina ug mga Pakigsaad 84.
Dapita ang usa ka estudyante sa pagbasa og kusog sa Doktrina ug mga Pakigsaad 84:1–2. Hangyoa ang klase sa pagsunod, nga mangita kon ngano nga ang Ginoo miestablisar sa Simbahan sa katapusang mga adlaw.
Ngano nga ang Ginoo miestablisar sa Simbahan sa katapusang mga adlaw?
Ipasabut nga ang mga pulong “pagpahiuli sa iyang mga katawhan” sa bersikulo 2 nagpasabut sa pagpundok sa Israel ug sa ilang pagbalik ngadto sa mga pakigsaad ug mga saad nga gihimo sa Ginoo uban sa karaang Israel.
Dapita ang usa ka estudyante sa pagbasa og kusog sa Doktrina ug mga Pakigsaad 84:3–6. Hangyoa ang klase sa pagsunod, nga mangita kon unsay gipaabut sa Ginoo nga buhaton sa nagpundok nga mga Santos. Dapita ang mga estudyante sa pag-report sa unsay ilang nakit-an.
Unsa ang gisaad sa Ginoo nga buhaton kon ang mga Santos motukod sa templo?
Itudlo ang mga pulong nga “mga anak ni Moises” sa bersikulo 6, ug ipasabut nga kini nga mga pulong nagpasabut niadtong kinsa naghupot sa Melchizedek Priesthood. Dapita ang usa ka estudyante sa pagbasa og kusog sa mosunod nga pamahayag:
“Kini nga [mga pulong] mao ang sinugdanan sa usa ka kapahayag [sentence] nga gipadayon sa [bersikulo] 31. Kanang tanang adunay kalabutan gidugang ngadto sa impormasyon, nga adunay pamahayag kabahin sa kaliwatan diin ang Priesthood miabut ngadto ni Moises ug Aaron, ug sa unsa nga paagi kini napahiuli sa atong panahon” (Hyrum M. Smith ug Janne M. Sjodahl, Doctrine and Covenants Commentary [1972], 498).
Aron matabangan ang mga estudyante nga makakita kon unsaon pagbasa ang kapahayag [sentence] kon walay gidugang nga pamahayag bahin sa kaliwatan nga anaa sa mga bersikulo 6–31, ikonsiderar ang pagdapit sa mga estudyante sa pagmarka sa unang bahin sa bersikulo 6 (“Ug ang mga anak ni Moises”) ug ang nahibilin sa kapahayag [sentence] sa bersikulo 31 (sugod sa mga pulong “ug usab sa mga anak nga lalaki ni Aaron, mohalad”). Ipasabut nga ang mga pulong “mga anak lalaki ni Aaron” nagpasabut niadtong kinsa naghupot sa Aaronic Priesthood. Dapita ang usa ka estudyante sa pagbasa og kusog sa kompleto nga kapahayag [sentence] gikan sa bersikulo 6 ug 31. Ipasabut nga kini nga kapahayag [sentence] makatabang nato nga makasabut nga ang pagpahiuli sa priesthood, nga gihisgutan sa gidugang nga mga bersikulo sa pamahayag, gikinahanglan alang sa pagpahigayon sa mga ordinansa sa templo.
I-summarize ang Doktrina ug mga Pakigsaad 84:6–16 pinaagi sa pagpasabut nga kini nga mga bersikulo naglakip sa linya sa awtoridad sa priesthood ni Moises nga masubay direkta ngadto ni Adan.
Dapita ang usa ka estudyante sa pagbasa og kusog sa Doktrina ug mga Pakigsaad 84:17–22. Hangyoa ang klase sa pagsunod, nga mangita kon unsay gipadayag sa Ginoo bahin sa priesthood.
Unsay gipadayag sa Ginoo mahitungod sa priesthood sa bersikulo 17?
Unsay gipasabut nga “kining labaw nga pagkapari,” o ang Melchizedek nga Pagkapari, naghupot “sa yawe sa mga misteryo sa gingharian, bisan ang yawe sa kahibalo sa Dios” (bersikulo 19)? (Kon gikinahanglan, ipasabut nga ang “mga misteryo” mao ang mga espirituhanon nga mga kamatuoran nga mahibaloan lamang pinaagi sa pagpadayag” [Giya ngadto sa mga Kasulatan, Misteryo sa Dios, Mga,” scriptures.lds.org].)
Human motubag ang mga estudyante, ipasabut nga si Joseph Smith mitudlo nga ang Melchizedek Priesthood “mao ang agianan diin ang tanang kahibalo, doktrina, ang plano sa kaluwasan, ug ang tanang importante nga butang ipadayag gikan sa langit” (Mga Pagtulun-an sa mga Presidente sa Simbahan: Joseph Smith [2007], 127).
Unsa nga doktrina ang atong makat-unan gikan sa bersikulo 20 mahitungod sa mga ordinansa sa Melchizedek Priesthood? (Tabangi ang mga estudyante sa pag-ila sa mosunod nga doktrina: Ang gahum sa pagka-diosnon makita sa mga ordinansa sa Melchizedek Priesthood.)
Ipasabut nga ang gahum sa pagka-diosnon mao ang gahum sa pagkamatarung, diin kita makaila sa Dios ug mahimong sama Kaniya (tan-awa sa Bruce R. McConkie, The Promised Messiah [1978], 589).
Sumala sa mga bersikulo 21–22, unsay mahitabo kon ang mga ordinansa ug ang awtoridad sa Melchizedek Priesthood wala diha?
Unsa nga mga ordinansa ang mapahigayon pinaagi sa awtoridad sa Melchizedek Priesthood?
Ipakita ang mosunod nga mga pamahayag gikan ni Elder D. Todd Christofferson ug ni Elder David A. Bednar sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog. Dapita ang klase sa pagpangita unsay ilang itudlo mahitungod sa gahum sa pagka-diosnon.
Imahe
Elder D. Todd Christofferson
“Ang atong pasalig sa pakigsaad ngadto Kaniya nagtugot sa atong Langitnong Amahan nga ang Iyang balaanong impluwensya, ‘ang gahum sa pagka-diosnon’ (D&P 84:20), modagayday sa atong mga kinabuhi. Mahimo Niya kini tungod kay Iya kanang mabuhat tungod kay pinaagi sa atong pag-apil sa mga ordinansa sa priesthood atong gigamit ang atong kabubut-on ug mipili nga modawat niin. …
“Sa tanang mga ordinansa, ilabi na gayud niadtong didto sa templo, kita gitugahan og gahum gikan sa kahitas-an. Kining ‘gahum sa pagkadiosnon’ moabut diha sa tawo ug pinaagi sa impluwensya sa Espiritu Santo” (D. Todd Christofferson, “Ang Gahum sa mga Pakigsaad,”Liahona, Mayo 2009, 22).
Imahe
Elder David A. Bednar
“Ang mga pakigsaad nga nadawat ug gitahud nga may integridad ug mga ordinansa nga gipahigayon pinaagi sa tukmang awtoridad sa priesthood gikinahanglan aron madawat ang tanang mga panalangin nga anaa pinaagi sa Pag-ula ni Jesukristo. Kay diha sa mga ordinansa sa priesthood, ang gahum sa pagkadiosnon gipakita ngadto sa katawhan diha sa mortalidad, lakip ang mga panalangin sa Pag-ula (tan-awa sa D&P 84:20–21)” (David A. Bednar, “Makadaug sa Ilang mga Alantuson uban sa Kasayon,”Liahona, Mayo 2014, 88).
Sumala ni Elder Christofferson, unsa ang gahum sa pagka-diosnon?
Unsay atong mahimo aron makabaton sa gahum sa pagka-diosnon diha sa atong kinabuhi?
Sumala ni Elder Bednar, unsa nga mga panalangin ang moabut sa atong kinabuhi kon kita modawat sa mga ordinansa sa Melchizedek Priesthood ug motahud sa atong mga pakigsaad?
Hangyoa ang mga estudyante sa pagpamalandong kon sa unsa nga paagi nga ang gahum sa pagka-diosnon napakita sa ilang kinabuhi sa dihang gidawat nila ang mga ordinansa sa Melchizedek Priesthood ug natuman ang ilang mga pakigsaad. Dapita ang pipila ka mga estudyante sa pagpakigbahin sa ilang mga hunahuna uban sa klase. (Pahinumdumi ang mga estudyante nga dili ipakigbahin ang bisan unsa nga hilabihan ka personal o sagrado). Ikonsiderar usab ang pagpakigbahin sa imong kaugalingong kasinatian.
Awhaga ang mga estudyante sa pagpaningkamot nga makadawat sa tanang mga ordinansa sa priesthood kutob sa ilang mahimo ug matinud-anong motuman sa ilang mga pakigsaad nga ang gahum sa pagka-diosnon makita sa ilang kinabuhi.
Dapita ang mga estudyante sa pagbasa og hilum sa Doktrina ug mga Pakigsaad 84:23–24, nga mangita kon giunsa sa Ginoo paghulagway sa pagkaimportante sa pagdawat sa mga ordinansa sa Melchizedek Priesthood.
Unsa ang gibuhat sa mga anak ni Israel nga nakapugong nga makabaton sa gahum sa pagka-diosnon sa ilang kinabuhi?
I-summarize ang mga bersikulo 25–32 pinaagi sa pagpasabut nga tungod kay ang mga anak ni Israel mipatig-a sa ilang kasingkasing, ang mga yawe sa Melchizedek Priesthood ug ang mga ordinansa niini gikuha gikan sa katawhan. Hinoon, ang Ginoo mitugot kanila nga magpabilin ang Aaronic Priesthood. Ang Ginoo mipasabut usab nga ang mga anak nga lalaki ni Moises ug ang mga anak nga lalaki ni Aaron, o kadtong kinsa naghupot sa priesthood, moserbisyo sa templo nga pagatukuron sa Zion (tan-awa sa D&P 84:31–32).
Isulat ang mga pulong Mga Pakigsaad ug Mga Saad isip mga ulohan diha sa pisara. Hangyoa ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 84:33–44. Hangyoa ang katunga sa klase sa pagpangita sa mga pakigsaad nga sudlan sa usa ka tawo isip kabahin sa panumpa ug pakigsaad sa priesthood. Hangyoa ang laing katunga sa pagpangita sa mga saad nga gihimo sa Ginoo niadtong kinsa matinud-anon niini nga panumpa ug pakigsaad. Dapita ang pipila ka mga estudyante sa pagsulat kon unsa ang ilang nakit-an diha sa pisara ubos sa tukma nga ulohan.
Unsaon ninyo sa pag-summarize niini nga mga pakigsaad ug mga saad isip usa ka baruganan? (Ang mga estudyante mahimong mogamit og lain-laing mga pulong, apan siguruha nga sila makaila og usa ka baruganan nga susama sa mosunod: Kon kadtong matinud-anong modawat sa priesthood mopalambo sa ilang mga calling, modawat sa Ginoo ug sa Iyang mga sulugoon, ug mopatalinghug sa mga pulong sa kinabuhing dayon, niana ang Dios mobalaan kanila ug mohatag kanila sa tanan nga anaa Kaniya. Isulat sa pisara kini nga baruganan.)
Aron matabangan ang mga estudyante nga makasabut unsay gipasabut sa pag-angkon sa priesthood, ipakita ang mosunod nga pamahayag ni Elder Paul B. Pieper sa Seventy ug dapita ang usa ka estudyante sa pagbasa niini og kusog:
Imahe
Elder Paul B. Pieper
“Ang hingpit nga mga panalangin sa priesthood madawat sa bana ug asawa nga mag-uban o dili gayud.
“Makapainteres nga diha sa panumpa ug pakigsaad sa priesthood, ang Ginoo migamit sa mga verb nga pag-angkon ug pagdawat. Siya wala mogamit sa verb nga orden. Diha sa templo nga ang mga lalaki ug babaye—mag-uban—moangkon ug modawat sa mga panalangin ug gahum sa Aaronic ug Melchizedek Priesthood” (Paul B. Pieper, “Gipadayag nga mga Reyalidad sa Pagka-mortal,” Liahona, Ene 2016, 46).
I-refer ang baruganan diha sa pisara.
Unsa ang gipasabut sa pagpalambo sa mga calling nga inyong nadawat pinaagi sa awtoridad sa priesthood?
Unsa kaha ang gipasabut sa pagdawat sa mga sulugoon sa Ginoo? Nganong dili nato madawat ang Ginoo kon dili modawat sa Iyang mga sulugoon?
Ang Ginoo mipasabut ngano nga ang kalibutan anaa sa kangitngit ug nagpasidaan sa mga Santos sa paghinulsol
Dapita ang mga estudyante sa pagbasa og hilum sa Doktrina ug mga Pakigsaad 84:45–48, nga mangita sa unsay nahitabo niadtong kinsa makugihong nagpatalinghug sa pulong sa Dios.
Unsay mahitabo niadtong kinsa makugihong nagpatalinghug sa pulong sa Dios?
Dapita ang usa ka estudyante sa pagbasa og kusog sa Doktrina ug mga Pakigsaad 84:49–53. Hangyoa ang klase sa pagpangita unsay gisulti sa Ginoo mahitungod niadtong kinsa dili mopatalinghug sa Iyang tingog.
Giunsa sa paghulagway sa Ginoo kadtong kinsa dili mopatalinghug sa Iyang tingog?
Dapita ang mga estudyante sa pagbasa og hilum sa Doktrina ug mga Pakigsaad 84:54–59, nga mangita kon unsa ka maayo nagpatalinghug ang mga Santos sa Zion sa pulong sa Dios.
Sumala sa bersikulo 57, unsa ang gibaliwala sa mga Santos?
Itudlo nga “ang kaniadto nga mga sugo” sa bersikulo 57 mahimong nagpasabut sa miaging mga pagpadayag sa Doktrina ug mga Pakigsaad ug sa mga pagtulun-an gikan sa Biblia.
Unsa nga baruganan ang atong mailhan gikan sa mga bersikulo 54–58 mahitungod sa mga sangputanan sa dili pagtuo sa pulong sa Dios o pagbaliwala niini? (Tabangi ang mga estudyante sa pag-ila sa mosunod nga baruganan: Kon kita dili motuo sa pulong sa Dios o mobaliwala niini, ang atong mga hunahuna mongitngit ug kita ubos sa pagkasinilutan.)
Itudlo nga ang mahimong ubos sa pagkasinilutan mao nga pagahukman sa Dios nga sad-an tungod sa pagdumili sa pagdawat ug pagsunod sa kahayag ug kahibalo nga Iyang gipakita (tan-awa sa Giya ngadto sa mga Kasulatan, “Gisilutan, Pagkasinilutan,” scriptures.lds.org; D&P 93:31–32).
Sa unsang paagi ang kawalay pagtuo o pagbaliwala sa pulong sa Dios makahimo sa hunahuna sa tawo nga mangitngit?
Ang Ginoo misugo sa mga Santos sa pagdala sa ebanghelyo ngadto sa tibuok kalibutan ug mihatag og instruksyon niadtong gitawag sa pagsangyaw
I-summarize ang Doktrina ug mga Pakigsaad 84:60–120 pinaagi sa pagpasabut nga ang Ginoo mimando sa mga Santos sa pagpahayag sa ebanghelyo ngadto sa tibuok kalibutan. Ang Ginoo misaad nga kon ang mga Santos “magmahal kanunay diha sa [ilang] mga hunahuna sa mga pulong sa [Dios],” Siya modasig kanila unsay isulti kon mopakigbahin sa ebanghelyo (D&P 84:85). Ang Ginoo misugo niadtong kinsa lig-on sa Espiritu sa paghatag og kaayohan ug paglig-on niadtong kinsa huyang ug mipasabut nga kon ang mga Santos motrabaho sa ilang lain-laing mga calling, malig-on nila ang Simbahan ug mohatag og kaayohan sa usag usa.
Tapusa pinaagi sa pagpakigbahin sa imong pagpamatuod sa mga kamatuoran nga gitudlo sa Doktrina ug mga Pakigsaad 84. Dapita ang mga estudyante sa paggamit unsay ilang nakat-unan.