Leksyon 17: Doktrina ug mga Pakigsaad 43–45

Leksyon 17

Doktrina ug mga Pakigsaad 43–45

Pasiuna ug Timeline

Sa pag-abut ni Joseph Smith sa Kirtland, Ohio, niadtong Pebrero 1831, iyang nakita ang ubang mga kinabig nga nailad sa nanghinobrang relihiyusong kadasig ug bakak nga mga pagpadayag. Ang pipila nangangkon nga nakadawat og mga pagpadayag, lakip ang usa ka babaye nga nailhan nga si Mrs. Hubble, kinsa mitawag sa iyang kaugalingon nga usa ka propeta. Tungod kay nalingla niya ang pipila sa mga Santos, nag-ampo si Propeta Joseph Smith mahitungod niini ug nakadawat sa pinadayag nga narekord sa Doktrina ug mga Pakigsaad 43. Niini nga seksyon, ang Ginoo mihatag og mga kamatuoran nga mipahinumdom sa mga Santos sa sundanan sa Dios sa paghatag og pagpadayag ngadto sa Simbahan.

Ang Ginoo aduna nay gitawag nga mga anciano [elder] sa Simbahan aron sa pagpahayag sa ebanghelyo (tan-awa sa D&P 42:4–8). Wala madugay human mahatag kana nga sugo, ang Ginoo mihatag og pagpadayag, nga karon narekord diha sa Doktrina ug mga Pakigsaad 44, nga nagsugo sa mga elder nga mangandam alang sa usa ka komperensya. Misaad ang Ginoo kanila nga kon mopakita sila og hugot nga pagtuo diha Kaniya, ilang madawat ang Iyang Espiritu ug mabuntog ang ilang mga kaaway.

Samtang milambo ang Simbahan sa Kirtland, ang kalagot ngadto sa Simbahan misamot. Ang mga kritiko miataki sa Simbahan diha sa mga pamantalaan ug mihimo og uban pang mga lihok sa pagbatok sa mga Santos. Niadtong Marso 1831, sa panahon niini nga oposisyon, nadawat ni Joseph Smith ang pinadayag nga narekord diha sa Doktrina ug mga Pakigsaad 45. Niini nga pagpadayag, ang Ginoo mihulagway sa ulahing mga adlaw, sa Ikaduhang Pag-anhi ni Jesukristo, ug sa Bag-ong Jerusalem, o siyudad sa Zion.

Nobyembre 1830–Pebrero 1831Pipila ka mga kinabig sa Kirtland, Ohio, nangangkon nga nakadawat og mga sulat o mga sinulat gikan sa langit.

Sayong bahin sa 1831Ang sayop nga mga report mahitungod sa mga Santos ug sa ilang mga tinuohan mitumaw sa mga pamantalaan sa Ohio sama sa Painesville Telegraph.

Pebrero 1831Si Mrs. Hubble, usa ka bag-ong kinabig sa Ohio, nangangkon nga usa ka propeta.

Pebrero 1831Ang Doktrina ug mga Pakigsaad 43 nadawat.

Pebrero 1831Ang Doktrina ug mga Pakigsaad 44 nadawat.

Marso 7, 1831Ang Doktrina ug mga Pakigsaad 45 nadawat.

Sayong bahin sa Hunyo 1831Usa ka komperensya sa Simbahan ang gipahigayon sa Kirtland, Ohio.

Mga Sugyot alang sa Pagtudlo

Doktrina ug mga Pakigsaad 43–44

Ang Ginoo mideklarar kon kinsa ang mahimong modawat og pagpadayag alang sa Simbahan ug misugo sa Iyang mga sulugoon sa pagpundok

Basaha og kusog ang mosunod nga sitwasyon ngadto sa klase:

Nakadungog mo mahitungod sa usa ka tawo kinsa nangangkon nga mituo nga usa ka propeta si Joseph Smith ug nga tinuod ang Basahon ni Mormon apan nangangkon usab nga ang propeta karon dili makadawat og pagpadayag. Kini nga tawo nangangkon usab nga makadawat siya og pagpadayag alang sa Simbahan.

Unsaon ninyo pagtubag ang mga pangangkon niining tawhana?

Dapita ang mga estudyante sa pagpangita og usa ka kamatuoran samtang magtuon sila sa Doktrina ug mga Pakigsaad 43 nga makatabang nila sa pagtubag sa mga pangangkon niining tawhana.

Ipasabut nga sa pag-abut ni Joseph Smith sa Kirtland, Ohio, niadtong Pebrero 1831, iyang nakita nga daghang mga kinabig ang nailad sa bakak nga espiritwal nga mga pagpakita ug pagpadayag. Sa samang bulan nga miabut ang Propeta sa Kirtland, usa ka babaye nga nailhan nga si Mrs. Hubble miabut sa Kirtland, nangangkon nga usa ka propeta. Nangangkon siya nga mituo sa Basahon ni Mormon ug modawat og pagpadayag alang sa Simbahan. Tungod kay ang bakak nga mga pagpadayag ni Mrs. Hubble ug sa uban nakalingla sa ubang mga Santos, nag-ampo si Propeta Joseph Smith mahitungod niini ug nakadawat sa pagpadayag gikan sa Ginoo nga karon narekord isip Doktrina ug mga Pakigsaad 43.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 43:1–7. Hangyoa ang klase sa pagsunod, nga mangita sa tubag sa Ginoo sa pangutana sa Propeta. Dapita ang mga estudyante sa pagreport kon unsa ang ilang makit-an.

Unsa nga doktrina ang gitudlo sa mga bersikulo 2–4 kon unsaon sa Ginoo sa pagpadayag og kamatuoran alang sa tibuok Simbahan? (Human makatubag ang mga estudyante, isulat sa pisara ang mosunod nga doktrina: Ang propeta lamang ang makadawat og pagpadayag alang sa tibuok Simbahan.)

Pahinumdumi ang mga estudyante nga mga lima ka bulan sa wala pa kini, ang Ginoo mitudlo niini nga doktrina ngadto sa mga Santos sa New York sa dihang si Hiram Page nangangkon nga nakadawat og mga pagpadayag alang sa Simbahan (tan-awa sa D&P 28:2). Hinoon, daghan sa mga Santos sa Kirtland ang wala mahibalo niini nga doktrina tungod kay pipila ra niadto nga mga Santos nga gikan sa New York ang miabut sa Kirtland niining panahona, ug ang mga pinadayag nga nadawat ni Joseph Smith kalabut niini nga hilisgutan wala pa mamantala. Dugang pa, kadaghanan sa mga Santos sa Kirtland bag-o nga mga kinabig gikan sa managlahi nga relihiyusong background ug naghupot og lain-laing mga ideya kon kinsa ang makadawat og pagpadayag alang sa simbahan.

Nganong importante man alang sa mga Santos sa Kirtland nga makasabut sa doktrina nga bugtong ang propeta lang ang makadawat og pagpadayag alang sa tibuok Simbahan?
Nganong importante man nga atong masabtan kini nga doktrina karon?
Sumala sa bersikulo 7, unsa nga sundanan ang gihatag sa Ginoo aron sa pagtabang kanato nga makalikay nga malingla niadtong dili awtorisado nga motudlo diha sa Simbahan?

Ipasabut nga ang Ginoo mitudlo dayon sa mga Santos kon unsaon nila sa pagkat-on gikan sa mga pinadayag nga gitudlo pinaagi sa Iyang propeta. Dapita ang usa ka estudyante sa pagbasa og kusog sa Doktrina ug mga Pakigsaad 43:8. Hangyoa ang klase sa pagsunod, nga mangita sa mga instruksyon sa Ginoo.

Unsa ang gisugo sa Ginoo nga buhaton sa mga Santos kon magpundok sila?
Unsa ang ipasabut sa paghatag og kaayohan sa usag usa? (Ang paghatag og kaayohan nagpasabut sa paglig-on sa espirituhanon nga paagi.)
Unsa ang gisulti sa Ginoo nga atong makat-unan samtang magpundok kita aron sa pagtudlo ug paglig-on sa usag usa? (Human makatubag ang mga estudyante, isulat sa pisara ang mosunod nga baruganan: Samtang magtudlo ug maglig-on kita sa usag usa diha sa atong mga miting sa Simbahan, makakat-on kita unsaon sa paglihok sumala sa mga sugo sa Dios.)

Dapita ang mga estudyante sa pagbasa og hilum sa Doktrina ug mga Pakigsaad 43:9, nga mangita kon unsay kinahanglan natong buhaton human kita makakat-on unsaon sa paglihok.

Unsa ang gisulti sa Ginoo nga buhaton sa mga Santos human sila nakakat-on sa Iyang mga balaod ug mga sugo ug unsaon kini sa pagsunod?
Unsa kaha ang gipasabut sa paghiusa sa atong kaugalingon sa pagbuhat sa tanan nga pagkabalaan sa atubangan sa Ginoo? (Mopasalig o makigsaad nga magpakabuhi sumala sa unsay atong nakat-unan.)

Dapita ang mga estudyante sa pagpamalandong kon sa unsang paagi sila napanalanginan samtang nagkat-on ug misunod sila sa mga sugo sa Ginoo. Dapita ang pipila ka mga estudyante sa pagpakigbahin sa ilang mga kasinatian. Awhaga ang mga estudyante sa paghimo og mas dakong paningkamot sa pagtudlo ug paglig-on sa usag usa sa ilang mga miting sa Simbahan, ug dapita sila nga mopasalig sa pagbuhat sa ilang nakat-unan isip resulta.

I-summarize ang Doktrina ug mga Pakigsaad 43:11–35 ug seksyon 44 pinaagi sa pagpasabut nga kini nga mga bersikulo naglangkob og mga instruksyon sa Ginoo sa pagtabang sa mga Santos sa pagkat-on sa ebanghelyo, paghinulsol, ug pag-andam sa ilang mga kaugalingon ug sa uban alang sa Ikaduhang Pag-anhi ni Jesukristo.

Doktrina ug mga Pakigsaad 45:1–14

Gihatagan og gibug-aton ni Jesukristo ang Iyang tahas isip Tiglalang, Manlalaban, ug ang Kahayag ug Kinabuhi sa Kalibutan

Hangyoa ang mga estudyante sa paghanduraw nga nagkinahanglan sila og opinyon sa laing tawo mahitungod sa usa ka importanting butang.

Unsa nga mga kalidad sa usa ka tawo ang makapahimo ninyo nga ganahang maminaw sa iyang tambag?

Ipasabut nga ang pinadayag nga narekord diha sa Doktrina ug mga Pakigsaad 45 miabut sa panahon nga ang mga Santos sa Ulahing mga Adlaw ug ang uban nakadungog ug nakabasa og nagkasumpaki nga mga mensahe mahitungod sa Simbahan. Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 45. Hangyoa ang klase sa pagtimaan sa mga kahimtang nga giatubang sa mga Santos.

Hangyoa ang mga estudyante sa pagpangita sa unang pulong niini nga pinadayag.

Unsay gipasabut sa pagpatalinghug? (Maminaw og maayo ug mosunod.)

Ipasabut nga sa Doktrina ug mga Pakigsaad 45:1–14, ang Ginoo balik-balik nga mitudlo sa mga Santos sa pagpatalinghug Kaniya ug mipahinumdom kanila sa Iyang gahum, kalooy, ug kaalam. Pinaagi sa pagpasabut og maayo sa Iyang mga hiyas, ang Ginoo mitabang sa mga Santos nga makasabut nganong kinahanglan sila nga mopatalinghug Kaniya. Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 45:1–5, nga mangita niini nga mga kinaiya.

Hain sa mga kinaiya sa Ginoo niini nga mga bersikulo ang labing mahinungdanon kaninyo? Ngano man?
Sa unsang paagi kini nga mga hiyas nagpakita nganong kinahanglang mosalig ug mopatalinghug kita sa Ginoo?
Unsa nga doktrina mahitungod sa Iyang kaugalingon ang gitudlo sa Ginoo diha sa bersikulo 3–5? (Si Jesukristo mao ang atong Manlalaban diha sa Amahan.)

Ipasabut nga ang usa ka manlalaban mao ang “tawo nga mohangyo alang sa kawsa sa laing tawo” (Giya ngadto sa mga Kasulatan, “Manlalaban”).

Ngano nga nagkinahanglan man kita og manlalaban ngadto sa Langitnong Amahan? (Kon gikinahanglan, ipasabut nga kitang tanan nakasala. Sumala sa kaangayan sa Dios, walay mahugaw nga butang nga makasulod sa Iyang presensya. Busa, nagkinahanglan kita og manlalaban nga mohangyo alang sa atong kawsa sa atubangan sa Amahan ug motabang kanato nga mapahiuli ngadto Kaniya.)
Sumala sa mga bersikulo 4–5, unsay nakapahimo ni Jesukristo nga takus nga mohangyo alang niadtong nagtuo Kaniya? (Kon gikinahanglan, ipasabut nga ang Manluluwas makahimo sa paghangyo nga mapalingkawas kita gikan sa mahangturon nga mga sangputanan sa atong mga sala dili tungod kay kita walay mga kasaypanan, apan tungod kay nag-antus Siya aron mabayaran ang silot sa atong mga sala.)

Dapita ang mga estudyante sa pagbasa og hilum sa Doktrina ug mga Pakigsaad 45:6–14, nga mangita og dugang nga mga rason nganong kinahanglang mopatalinghug sa Manluluwas ang mga Santos. Dapita ang pipila ka mga estudyante sa pagreport unsay ilang nakit-an.

Doktrina ug mga Pakigsaad 45:15–59

Gipadayag sa Manluluwas ang mga timailhan ug mga katingalahan nga mag-una sa Iyang Ikaduhang Pag-anhi

Dapita ang usa ka estudyante sa pagbasa og kusog sa Doktrina ug mga Pakigsaad 45:15. Hangyoa ang klase sa pagpangita og laing rason nga gihatag sa Ginoo nganong kinahanglang mopatalinghug ang mga Santos Kaniya.

Ipasabut nga sa Doktrina ug mga Pakigsaad 45:16–59, gisulti og balik sa Ginoo ang pipila sa Iyang gitudlo ngadto sa Iyang mga disipulo didto sa Bukid sa Oliba sa dihang nangutana sila Kaniya kabahin sa pagkalaglag sa Jerusalem ug sa Iyang Ikaduhang Pag-anhi (tan-awa sa Mateo 24:3–46; tan-awa usab sa Joseph Smith—Mateo 1:4–55). Sa mga bersikulo 16–24 gipanagna sa Ginoo ang mga panghitabo nga mahitabo dili madugay human sa Iyang kamatayon ug Pagkabanhaw, lakip ang kalaglagan sa Jerusalem ug ang pagkatibulaag sa mga Judeo ngadto sa tanang kanasuran. Sa mga bersikulo 25–46 gipanagna sa Ginoo ang mga panghitabo nga matuman sa dispensasyon sa dili pa ang Iyang Ikaduhang Pag-anhi.

Isulat ang mosunod nga mga pulong ug kauban nga mga pakisayran sa kasulatan diha sa pisara: Mga timailhan nga mag-una sa Ikaduhang Pag-anhi: D&P 45:25–27; D&P 45:28–31, 33; D&P 45:40–43. I-assign ang mga estudyante sa pagbasa og pinakaminos usa sa mga pakisayran sa kasulatan nga gilista diha sa pisara, nga mangita sa mga timailhan sa Ikaduhang Pag-anhi. Human sa igong panahon, hangyoa ang pipila ka mga estudyante sa pagreport sa unsay ilang nakit-an. Isulat diha sa pisara ang mga tubag sa mga estudyante.

Dapita ang usa ka estudyante sa pagbasa og kusog sa Doktrina ug mga Pakigsaad 45:34, ug hangyoa ang mga estudyante sa pagpangita kon unsay reaksyon sa mga disipulo ngadto sa gitudlo sa Ginoo kanila mahitungod sa mga timailhan sa Iyang Ikaduhang Pag-anhi.

Sa unsang mga paagi nga makasabut ka sa reaksyon sa mga disipulo?

Dapita ang usa ka estudyante sa pagbasa og kusog sa Doktrina ug mga Pakigsaad 45:35–38. Hangyoa ang mga estudyante sa pagpangita kon unsay gisulti sa Ginoo aron mahupay ang Iyang mga disipulo mahitungod sa Iyang Ikaduhang Pag-anhi.

Unsa nga kahupayan ang gitanyag ni Jesus sa Iyang mga disipulo kabahin sa Iyang Ikaduhang Pag-anhi?

Dapita ang mga estudyante sa pagbasa og hilum sa Doktrina ug mga Pakigsaad 45:32, 39, nga mangita kon unsay mabuhat sa mga sumusunod ni Jesukristo aron mangandam sa Iyang pag-anhi.

Unsa nga baruganan ang atong makat-unan niini nga mga bersikulo mahitungod sa unsay atong buhaton aron maandam sa Ikaduhang Pag-anhi sa Ginoo? (Human makatubag ang mga estudyante, isulat ang mosunod nga baruganan sa pisara: Kon magbarug kita sa balaan nga mga dapit ug magbantay sa mga timailhan, maandam kita alang sa Ikaduhang Pag-anhi sa Ginoo.)
Unsaon nato sa “[pag]barug sa balaan nga mga dapit”?

Isulat ang mosunod nga mga pulong ug kauban nga mga pakisayran sa kasulatan diha sa pisara: Mga timailhan ug mga katingalahan nga mag-uban sa Ikaduhang Pag-anhi sa Manluluwas: D&P 45:47–59. Ipasabut nga sa Doktrina ug mga Pakigsaad 45:47–59, mipadayag ang Ginoo og mga timailhan ug mga katingalahan nga mag-uban sa Iyang Ikaduhang Pag-anhi. Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 45:47–55. Hangyoa ang klase sa pagsunod, nga mangita kon unsay mahitabo sa dihang moanhi pag-usab ang Manluluwas. Hangyoa ang mga estudyante sa pagreport kon unsay ilang makit-an. Ilista sa pisara ang ilang mga tubag.

Ngano kaha nga ang mga nasud sa yuta magbangutan sa Ikaduhang Pag-anhi sa Ginoo (tan-awa sa D&P 45:49–50)?
Kinsa kaha ang gipasabut sa mga pulong nga “sila nga nagbiay-biay” (D&P 45:49)?

Dapita ang usa ka estudyante sa pagbasa og kusog sa Doktrina ug mga Pakigsaad 45:56–59. Hangyoa ang klase sa pagpangita sa sambingay nga giingon sa Manluluwas nga matuman sa Iyang pag-anhi pag-usab.

Unsa nga sambingay ang gisulti sa Ginoo nga matuman sa dihang moabut Siya uban sa himaya?

Hangyoa ang usa ka estudyante sa pag-summarize sa sambingay sa napulo ka mga birhen (tan-awa sa Mateo 25:1–13). Aron sa pagtabang sa mga estudyante nga mas makasabut niini nga sambingay, dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Ang lintunganay niining mao nga sambingay makahahadlok. Ang napulo ka mga dalagang birhen tataw nga nagrepresentar sa mga miyembro sa Simbahan ni Kristo, kay ang tanan giimbitar man sa kumbira sa kasal ug ang tanan nahibalo sa unsay gikinahanglan aron makasulod inig abut sa pamanhunon. Pero katunga lamang ang andam sa dihang miabut siya” (Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 8).

Sumala sa bersikulo 57, unsay kinahanglan natong buhaton aron mahimong sama sa maalamon nga mga birhen ug maandam alang sa pag-anhi sa Ginoo? (Human makatubag ang mga estudyante, isulat ang mosunod nga kamatuoran sa pisara: Kon dawaton nato ang kamatuoran ug dawaton ang Balaang Espiritu nga maoy atong giya, maandam kita alang sa Ikaduhang Pag-anhi sa Manluluwas.)
Sa unsang mga paagi nga atong madawat ang kamatuoran?
Unsay gipasabut nga dawaton ang Balaang Espiritu isip atong giya?

Dapita ang mga estudyante sa pagpaambit sa unsay ilang nabuhat aron sa pagdapit sa pakig-uban sa Espiritu Santo diha sa ilang kinabuhi ug sa pagsanong sa Iyang giya.

Dapita ang mga estudyante sa paggamit sa mga baruganan nga gisulat diha sa pisara sa paghimo og tumong nga makatabang kanila nga mas maandam sa Ikaduhang Pag-anhi sa Manluluwas.

Sumala sa mga bersikulo 58–59, unsay mahitabo niadtong nangandam alang sa Ikaduhang Pag-anhi sa Manluluwas pinaagi sa pagdawat sa kamatuoran ug sa pagdawat sa Balaang Espiritu nga mahimo nilang giya?

Doktrina ug mga Pakigsaad 45:60–75

Ang Ginoo naghulagway sa Zion, o sa Bag-ong Jerusalem

I-summarize ang Doktrina ug mga Pakigsaad 45:60–75 pinaagi sa pagpasabut nga ang Ginoo misugo ni Joseph Smith sa pagsugod sa iyang paghubad sa Bag-ong Tugon, mipasidaan sa mga Santos sa pagpundok ngadto sa kasadpan nga mga nasud, ug mihulagway sa Zion, o sa Bag-ong Jerusalem.

Dapita ang usa ka estudyante sa pagbasa og kusog sa Doktrina ug mga Pakigsaad 45:66–71. Hangyoa ang klase sa pagsunod, nga mangita kon giunsa paghulagway sa Ginoo ang Zion.

Base sa paghulagway sa Ginoo, nganong gustuhon man ninyong mahimong kabahin sa Zion?

Tapusa pinaagi sa pagdapit og pipila ka mga estudyante sa pagpaambit kon unsa nga mga kamatuoran niini nga leksyon ang labing makahuluganon kanila ug ngano. Awhaga ang mga estudyante sa paggamit niini nga mga kamatuoran diha sa ilang kinabuhi.