Leksyon 45: Doktrina ug mga Pakigsaad 115–20

“Leksyon 45: Doktrina ug mga Pakigsaad 115–20,” Manwal sa Magtutudlo sa Doktrina ug mga Pakigsaad (2017)

“Leksyon 45,” Manwal sa Magtutudlo sa Doktrina ug mga Pakigsaad

Leksyon 45

Doktrina ug mga Pakigsaad 115–20

Pasiuna ug Timeline

Sa Abril 26, 1838, wala madugay human sa pagbalhin ngadto sa Far West nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 115. Diha niini gipadayag sa Ginoo ang ngalan sa Simbahan, mitambag sa mga miyembro sa Simbahan sa “[pag]tindog ug pakita” (D&P 115:5), ug mitudlo sa mga Santos sa pagtukod og templo sa Far West.

Sa Mayo 19, 1838 samtang nagsuhid sa yuta amihanan sa Far West, nadawat ni Propeta Joseph Smith ang pagpadayag nga gi-rekord diha sa Doktrina ug mga Pakigsaad 116. Diha niini giila sa Ginoo ang Spring Hill, Missouri, isip ang Adan-ondi-Ahman.

Sa Hulyo 8, 1838, sa Far West, nadawat sa Propeta ang mga pagpadayag nga gi-rekord diha sa Doktrina ug mga Pakigsaad 117–20. Sa pagpadayag nga gi-rekord diha sa Doktrina ug mga Pakigsaad 117, gisugo sa Ginoo si Newel K. Whitney ug William Marks nga “mohusay sa madali sa ilang mga patigayon” sa Kirtland, Ohio, ug mobalhin ngadto sa Far West (D&P 117:1). Gitawag usab si Oliver Granger sa paghusay sa pinansyal nga mga kalihokan sa Unang Kapangulohan diha sa Kirtland. Sa pagpadayag nga gi-rekord diha sa Doktrina ug mga Pakigsaad 118, mitudlo ang Ginoo ni Propeta Joseph Smith sa paghulip sa mga bakante diha sa Korum sa Napulog Duha ka mga Apostoles ug misugo sa mga miyembro sa Korum sa Napulog Duha ka mga Apostoles sa pagserbisyo og mga misyon sa langyaw nga mga dapit. Sa mga pagpadayag nga gi-rekord diha sa Doktrina ug mga Pakigsaad 119–20, ang Ginoo mipatunong sa importanting pinansyal nga mga kalisud pinaagi sa paghatag og mga panudlo kalabut sa balaod sa ikapulo ug sa pag-apud-apod sa mga pundo sa ikapulo.

Ting-init sa 1836Ang mga miyembro sa Simbahan mipalit og yuta ug misugod sa pagpahiluna sa usa ka dapit amihanan sa Missouri nga ilang gitawag og Far West.

Disyembre 1836Gibuhat sa balay balaoran sa estado sa Missouri ang Distrito sa Caldwell alang lamang sa mga kapanimuyoan sa mga miyembro sa Simbahan.

Marso 14, 1838Si Joseph Smith ug ang iyang pamilya miabut sa Far West, Missouri.

Abril 26, 1838Ang Doktrina ug mga Pakigsaad 115 nadawat.

Tunga-tunga sa Mayo 1838Nangulo si Joseph Smith og panaw ngadto sa mga dapit amihanan sa Far West, Missouri, aron sa pagpangita og dugang nga kapanimuyoan nga mga luna alang sa mga Santos.

Mayo 19, 1838Ang Doktrina ug mga Pakigsaad 116 nadawat.

Hulyo 8, 1838Ang Doktrina ug mga Pakigsaad 117–20 nadawat.

Abril 26, 1839Pito ka mga miyembro sa Korum sa Napulog Duha ka mga Apostoles mituman sa panagna pinaagi sa pag-ugbok sa ulohan nga tukurang bato sa Templo sa Far West.

Tinglarag sa 1839Mga miyembro sa Korum sa Napulog Duha ka mga Apostoles mibiya aron sa pagmisyon ngadto sa Great Britain.

Mga Sugyot alang sa Pagtudlo

Doktrina ug mga Pakigsaad 115–16

Nagsugo ang Ginoo sa mga miyembro sa Simbahan sa pagtukod og templo sa Far West, Missouri, ug nagpadayag sa nahimutangan sa Adan-ondi-Ahman

Hangyoa ang mga estudyante sa paghunahuna og higayon nga naabtan sila og unos. Dapita ang pipila ka mga estudyante sa pagpakigbahin sa ilang mga kasinatian.

Sa unsa nga paagi nga ang mga pagsulay ug mga tintasyon mapahisama ngadto sa usa ka unos?

Awhaga ang mga estudyante sa pagpangita og doktrina ug mga baruganan samtang ilang tun-an ang Doktrina ug mga Pakigsaad 115 nga makatabang kanila sa pagpangita og kadangpan gikan sa daghang mga unos sa mortalidad.

Aron matabangan ang mga estudyante sa pagsabut sa kinatibuk-ang kahulugan sa Doktrina ug mga Pakigsaad 115, dapita ang usa ka estudyante sa pagbasa og kusog sa mosunod nga parapo [paragraph]. (Mahimo usab nga ikaw mopakita sa nag-uban nga mapa nga nagpakita sa mga Distrito sa Jackson, Clay, ug Caldwell.)

Human ang mga miyembro sa Simbahan giabug gikan sa Distrito sa Jackson, Missouri, sa 1833, daghan ang namuyo sa Distrito sa Clay, Missouri samtang naningkamot sa pagkuha og balik sa ilang mga yuta. Sa diha nga napakyas kini nga pagsulay ug ang mga lumulupyo sa Distrito sa Clay mihangyo sa mga Santos sa pagbiya sa ilang distrito kaniadtong 1836, ang mga pangulo sa Simbahan misugod sa pagpuyo og balik sa amihanang Missouri, diin ilang gitukod ang usa ka kapanimuyoan nga ginganlan og Far West. Sa dihang mibisita si Propeta Joseph Smith sa Far West kaniadtong Nobyembre 1837, ang mga pangulo sa Simbahan mihukom sa pagpadako sa Far West ug sa pagtukod og templo, nag-agad sila sa pagdawat og dugang nga mga panudlo gikan sa Ginoo. Ang Propeta mibalhin ngadto sa Far West kaniadtong Marso 1838, ug sa Abril 26, 1838, nadawat niya ang pagpadayag nga gi-rekord diha sa Doktrina ug mga Pakigsaad 115. (Tan-awa sa Alexander L. Baugh, “From High Hopes to Despair: The Missouri Period, 1831–39,” Ensign, Hulyo 2001, 48; The Joseph Smith Papers, Documents, Volume 6: Pebrero 1838–Agosto 1839, ed. Mark Ashurst-McGee ug uban [2017], 112–13.)

I-summarize ang Doktrina ug mga Pakigsaad 115:1–3 pinaagi sa pagpasabut nga ang Ginoo mipatunong niini nga pagpadayag ngadto sa tigdumalang mga opisyal ug mga miyembro sa Simbahan.

Ipasabut nga sa wala pa kini nga pagpadayag, ang Simbahan gitawag sa nagkalain-laing mga ngalan, sama sa ang Simbahan ni Kristo o ang Simbahan sa mga Santos sa Ulahing mga Adlaw. Dapita ang usa ka estudyante sa pagbasa og kusog sa Doktrina ug mga Pakigsaad 115:4. Hangyoa ang klase sa pagsunod, nga mangita sa ngalan nga gitudlo sa Ginoo alang sa Iyang Simbahan.

Unsa nga ngalan ang gihatag sa Ginoo sa Iyang Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 115:5. Hangyoa ang klase sa pagsunod, nga mangita kon unsay gisugo sa Ginoo sa mga miyembro sa Simbahan nga buhaton.

Unsa ang gilauman sa Ginoo sa mga miyembro sa Simbahan?
Unsa kaha ang gipasabut sa “tindog ug pakita”?
Unsa nga baruganan ang atong maila gikan sa bersikulo 5 mahitungod sa unsa ang mahitabo kon kita “[mo]tindog ug [mo]pakita”? (Tabangi ang mga estudyante sa pag-ila sa baruganan nga susama sa mosunod: Kon kita motindog ug mopakita, ang atong kahayag mahimong sumbanan alang sa tanan nga mga nasud.)
Unsa kaha ang gipasabut sa “mahimong sumbanan alang sa tanan nga mga nasud” (bersikulo 5)? (Tabangi ang mga estudyante sa pagsabut nga ang atong mga ehemplo isip mga miyembro sa Simbahan kinsa naghimo ug naghupot sa mga pakigsaad makadasig sa uban ug makatabang kanila sa pagpaduol ngadto sa Ginoo.)

Dapita ang mga estudyante sa paghunahuna mahitungod sa usa ka tawo nga ilang kaila kansang ehemplo nagdasig sa uban ug nagtabang kanila nga mas magpaduol ngadto sa Ginoo. Hangyoa ang usa o duha ka mga estudyante sa pagpasabut kon sa unsa nga paagi nga ang tawo nga ilang kaila usa ka kahayag ngadto sa uban.

Dapita ang usa ka estudyante sa pagbasa og kusog sa Doktrina ug mga Pakigsaad 115:6. Hangyoa ang klase sa pagsunod, nga mangita sa panalangin nga gisaad niadtong kinsa nagpundok ngadto sa mga stake sa Zion.

Unsa ang gisaad niadtong kinsa nagpundok ngadto sa mga stake sa Zion? (Human matubag sa mga estudyante, isulat diha sa pisara ang mosunod nga baruganan: Samtang kita nagpundok ngadto sa mga stake sa Zion, makabaton kita og panalipod ug dangpanan gikan sa unos.)
Unsa ang pipila ka mga “unos” nga ang mga young adult nagsinati karon?
Sa unsang paagi nga ang pagpundok uban sa mga Santos mitabang kaninyo sa pagkaplag og kadangpan gikan niini nga mga unos?

Dapita ang usa ka estudyante sa pagbasa og kusog sa mosunod nga parapo [paragraph]:

Ingon nga gi-rekord diha sa Doktrina ug mga Pakigsaad 115:7–19, misugo ang Ginoo sa mga Santos sa pagtukod og templo didto sa Far West “sumala sa sumbanan” nga ipakita sa Ginoo sa Unang Kapangulohan (mga bersikulo 14–16). Misugo usab ang Ginoo kanila nga “tukuron” ang kapanimuyoan sa Far West “sa madali” ug sa pagpangita og “lain nga mga dapit … diha sa mga rehiyon sa palibut” diin ang mga Santos makatukod sa mga stake sa Zion (mga bersikulo 17–18). Agi og pagsunod niini nga panudlo, si Propeta Joseph Smith ug uban nga mga pangulo sa Simbahan misuhid sa mga dapit nga naglibut sa Far West, ug atol sa usa niadto nga mga pagpanaw nadawat sa Propeta ang pagpadayag nga gi-rekord diha sa Doktrina ug mga Pakigsaad 116.

Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 116 ug sa Doktrina ug mga Pakigsaad 116:1. Hangyoa ang klase sa pagsunod, nga mangita sa dapit nga gisuhid ni Propeta Joseph Smith.

Unsa ang gipadayag sa Ginoo mahitungod sa Spring Hill Missouri?

Ipasabut nga tulo ka tuig sa wala pa ang iyang kamatayon, gipundok ni Adan ang iyang matarung nga kaliwatan didto sa Adan-ondi-Ahman ug gipanalanginan sila, “ug ang Ginoo mipakita ngadto kanila” (tan-awa sa D&P 107:53–56). Sa wala pa ang Milenyum, laing importante nga miting ang mahitabo didto sa Adan-ondi-Ahman, ang panahon nga ang Manluluwas ug si Adan ug ang ubang mga propeta magpundok uban sa matarung nga mga miyembro sa Simbahan (tan-awa sa D&P 27:5–14; Daniel 7:13–14, 22).

Doktrina ug mga Pakigsaad 117

Nagsugo ang Ginoo ni William Marks ug Newel K. Whitney sa pagbiya sa Kirtland, Ohio, ug nagsugo ni Oliver Granger sa paghusay sa mga buluhaton sa patigayon sa Unang Kapangulohan

Ipasabut nga human si Propeta Joseph Smith mibiya sa Kirtland, Ohio, kaniadtong Enero 1838, gitudlo si William Marks sa pagdumala sa Simbahan sa Kirtland ug sa paghusay sa mga utang ni Joseph Smith ug ni Sidney Rigdon didto. Si Bishop Newel K. Whitney ang tig-atiman sa mga negosyo ug mga kabtangan sa Simbahan sa Kirtland. Kining duha ka mga lalaki gikinahanglan nga mohusay sa mga kalihokan sa Simbahan sa Kirtland ug dayon sa dali mobalhin kuyog sa uban nga mga Santos ngadto sa Missouri. Apan, sa pagka-Hulyo 1838, ang duha ka lalaki mipabilin sa Kirtland. (Tan-awa sa The Joseph Smith Papers, Documents, Volume 6: Pebrero 1838–Agosto 1839, 191.)

Dapita ang mga estudyante sa pagbasa og hilum sa Doktrina ug mga Pakigsaad 117:1–3 nga mangita kon unsay gisulti sa Ginoo ni William Marks ug ni Newel K. Whitney.

Unsa ang gisulti sa Ginoo niining duha ka lalaki?

Dapita ang usa ka estudyante sa pagbasa og kusog sa Doktrina ug mga Pakigsaad 117:4–9. Hangyoa ang klase sa pagsunod, nga mangita kon nganong kini nga mga lalaki mipabilin sa Kirtland.

Sumala sa mga bersikulo 4–5, nganong kini nga mga lalaki mipabilin sa Kirtland? (Kon gikinahanglan, ipasabut nga sila hilabihan ka nabalaka mahitungod sa mga kabtangan nga ilang gipanag-iya diha sa Kirtland.)
Unsa ang gisulti sa Ginoo kanila mahitungod sa “kabtangan” diha sa mga bersikulo 5–8? (Ipasabut nga ang hugpong sa mga pulong “ang mga patag sa Olaha Shinehah” nagpasabut ngadto sa yuta nga nagpalibut sa Adan-ondi-Ahman.)
Unsa kaha ang hugpong sa mga pulong “mangibug …sa gamay nga butang, ug ibaliwala ang labaw nga mahinungdanon nga mga butang” diha sa bersikulo 8 nagpasabut?
Pinasikad sa unsay gisulti sa Ginoo ngadto niini nga mga lalaki, unsa ang atong “maibugon nga mga tinguha” (bersikulo 4) makahimo kanato sa pagbuhat? (Human matubag sa mga estudyante, isulat ang mosunod nga baruganan diha sa pisara: Ang atong maibugon nga mga tinguha makahimo kanato nga ibaliwala ang labaw nga mahinungdanon nga mga butang.)
Unsa ang pipila ka mga ehemplo sa “maibugon nga mga tinguha” (bersikulo 4) nga makahimo kanato nga “ibaliwala ang labaw nga mahinungdanon nga mga butang” (bersikulo 8)?

I-summarize ang Doktrina ug mga Pakigsaad 117:10–11 pinaagi sa pagpasabut nga ang Ginoo nagpahimangno ni William Marks nga “magmatinud-anon ibabaw sa pipila ka mga butang” aron siya mahimo nga “usa ka tigmando ibabaw sa daghan” (bersikulo 10). Misulti usab ang Ginoo ni Brother Marks nga siya magpadayon sa pagserbisyo isip usa ka pangulo sa Simbahan sa panahon nga siya moabut sa Far West. Dayon ang Ginoo mipanton ni Newel K. Whitney tungod sa “pagkadautan sa iyang espiritu”ug mitudlo kaniya nga “mahimo nga usa ka bishop … dili sa ngalan apan sa buhat” diha sa Adan-ondi-Ahman (bersikulo 11).

Sultihi ang mga estudyante nga si Oliver Granger gitawag sa pagpabalik ngadto sa Kirtland isip usa ka pinansyal nga tinugyanan alang sa Unang Kapangulohan (mga bersikulo 12–14) aron nga si Brother Marks ug si Bishop Whitney “mohusay sa madali sa ilang mga patigayon” (bersikulo 1).

Dapita ang usa ka estudyante sa pagbasa og kusog sa Doktrina ug mga Pakigsaad 117:12–15. Hangyoa ang klase sa pagsunod, nga mangita kon unsay gisulti sa Ginoo mahitungod ni Oliver Granger. Dapita ang mga estudyante sa pagreport unsa ang ilang nakit-an.

Unsa kaha ang hugpong sa mga pulong ang “iyang pagsakripisyo mahimo nga labaw pa ka sagrado ngari kanako kay sa iyang paglambo” diha sa bersikulo 13 nagpasabut?

Doktrina ug mga Pakigsaad 118

Nagtawag usab ang Ginoo og upat ka bag-ong mga Apostoles ug nagtawag og mga miyembro sa Korum sa Napulog Duha ka mga Apostoles sa pagserbisyo og misyon sa langyaw nga mga dapit

Ipasabut nga atol sa ting-init sa 1838, samtang giandam ni Propeta Joseph Smith ang mga miyembro sa Korum sa Napulog Duha ka mga Apostoles sa pagserbisyo og mga misyon sa ubang mga nasud ug gitrabaho ang paghulip sa mga bakante diha sa Korum, nag-ampo siya nga ang Ginoo mopadayag sa Iyang kabubut-on kabahin sa Napulog Duha. Agi og tubag sa iyang pag-ampo, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 118, diha diin ang Ginoo mitawag og upat ka bag-ong Apostoles ug mitudlo og mga miyembro sa korum kabahin sa ilang mga misyon sa gawas sa nasud.

Doktrina ug mga Pakigsaad 119–120

Nagpadayag ang Ginoo sa balaod sa ikapulo ug nagtukod og usa ka konseho sa pagdumala sa mga pundo sa ikapulo

Ipasabut nga sa pagka-Hulyo 1838, nag-antus gihapon ang Simbahan ubos sa dako kaayo nga utang, apan ang mga miyembro sa Simbahan gisugo sa paglig-on sa Far West ug sa pagtukod og lain nga templo nga dili mosulod og dugang nga pangutang (tan-awa sa D&P 115:8–13). Nakigkita ang Propeta sa mga pangulo sa Simbahan sa Hulyo 8, 1838, aron sa paghisgot unsa ang kinahanglan nilang pagabuhaton.

Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 119 nga mangita kon unsay gibuhat sa Propeta nga nag-aghat niini nga pagpadayag. Hangyoa ang mga estudyante sa pagreport sa unsay ilang nakit-an.

Dapita ang usa ka estudyante sa pagbasa og kusog sa Doktrina ug mga Pakigsaad 119:1–4. Hangyoa ang klase sa pagsunod, nga mangita kon unsay tubag sa Ginoo ngadto sa pag-ampo sa Propeta.

Unsa ang gisugo sa Ginoo nga buhaton sa mga miyembro sa Simbahan ingon nga gi-rekord diha sa mga bersikulo1–2?
Unsa ang gisugo sa Ginoo nga buhaton sa mga miyembro human nila ihatag ang ilang “kapin nga kabtangan” (bersikulo 1) ngadto sa bishop?
Ipasabut ang hugpong sa mga pulong “kini mao ang balaod ngadto kanila hangtud sa kahangturan” diha sa bersikulo 4.
Unsa ang gipasabot sa “mao ang balaod … hangtud sa kahangturan”?
Unsa ang gihatag sa Ginoo kanato nga “mao ang balaod”? (Tabangi ang mga estudyante sa pag-ila sa mosunod nga doktrina: Gimandoan kita sa Ginoo sa pagbayad og ikanapulo sa tanan natong abut ngadto Kaniya isip ikapulo.)

Ipasabut nga giklaro sa Ginoo ang atong pagsabut sa “mao ang balaod” sa ikapulo sa atong panahon. Kaniadtong 1970, ang Unang Kapangulohan mitudlo nga ang hugpong sa mga pulong “ilang tanan nga mga tubo sa matag tuig” (bersikulo 4) nagpasabut sa atong kinitaan (tan-awa sa First Presidency letter, Mar. 19, 1970). Ang mga miyembro wala na kinahanglana sa paghatag sa ilang “tanan nga kapin nga kabtangan” isip ikapulo apan ikanapulo sa ilang kinitaan.

Dapita ang mga estudyante sa pagbasa og hilum sa Doktrina ug mga Pakigsaad 119:5–6 nga mangita kon unsay gisulti sa Ginoo nga mahitabo kon ang mga Santos dili mosunod niini nga balaod. Hangyoa ang mga estudyante sa pagreport sa unsay ilang nakit-an.

Sa unsa nga paagi ang pagbayad sa ikapulo magbalaan kanato?
Sa unsang paagi kamo napanalanginan sa Ginoo tungod sa matinud-anon nga pagbayad sa ikapulo?

Dapita ang mga estudyante nga mopasalig og bayad sa matinud-anon nga paagi sa ilang ikapulo aron sila makadawat sa mga panalangin sa Ginoo.

Sultihi ang mga estudyante nga diha sa Doktrina ug mga Pakigsaad 120, ang Ginoo mitukod og konseho aron sa pagdumala sa mga pundo sa ikapulo.

Hunahunaa ang pagribyu ug sa pagpamatuod kabahin sa doktrina ug mga baruganan nga naila niini nga leksyon. Dapita ang mga estudyante sa paggamit niini nga mga kamatuoran diha sa ilang mga kinabuhi.