Sa Dominggo, Agosto 7, 1831, nadawat ni Propeta Joseph Smith ang pinadayag nga narekord diha sa Doktrina ug mga Pakigsaad 59 samtang didto sa Distrito sa Jackson, Missouri. Dinhi niini nga pagpadayag ang Ginoo mihan-ay sa iyang mga gipaabut alang sa mga Santos kinsa bag-ohay nga miabut sa Zion, lakip ang hustong pagbalaan sa adlaw nga Igpapahulay. Gipanghimatuod usab sa Ginoo nga kadtong mosunod sa Iyang mga sugo makadawat og temporal ug espiritwal nga mga panalangin.
Pagkasunod adlaw si Joseph Smith ug pipila ka mga elder nangandam sa pagbiya sa Independence, Missouri, ug sa pagbalik ngadto sa Ohio. Sa pinadayag nga narekord diha sa Doktrina ug mga Pakigsaad 60, gisugo sa Ginoo ang mga elder sa pagsangyaw sa ebanghelyo samtang nagbiyahe sila. Sa ikatulong adlaw sa ilang panaw, ang grupo nakasinati og kakuyaw diha sa Suba sa Missouri. Sa misunod nga duha ka adlaw, Agosto 12 ug 13, ang Propeta nakadawat og duha ka pinadayag, nga narekord diha sa Doktrina ug mga Pakigsaad 61 ug 62. Naglakip kini og mga pulong sa panudlo, pahimangno, paghupay, ug pag-awhag.
Agosto 2–3, 1831Ang yuta sa Distrito sa Jackson, Missouri, gipahinungod alang sa pag-establisar sa Zion, ug ang usa ka dapit alang sa templo gipahinungod diha sa Independence, Missouri.
Agosto 4, 1831Usa ka komperensya sa Simbahan gipahigayon sa Distrito sa Jackson, Missouri.
Agosto 7, 1831Human nagkasakit samtang mibiyahe gikan sa Ohio ngadto sa Missouri uban sa mga Santos sa Colesville, si Polly Knight, ang asawa ni Joseph Knight Sr., namatay sa Distrito sa Jackson, Missouri.
Ang Ginoo mitudlo sa mga Santos kabahin sa adlaw nga Igpapahulay ug misaad og yutan-on ug mahangturong mga panalangin ngadto sa matinud-anon
Sa dili pa magklase, pagdrowing og duha ka kolum sa pisara, ug isulat ang Ang Kalibutan sa ibabaw sa unang kolum. Sa pagsugod sa klase, hangyoa ang mga estudyante sa pagsulat diha sa unang kolum og pipila ka mga pulong nga naghulagway sa kadautan sa kalibutan. Hangyoa ang mga estudyante sa pagpamalandong sa mosunod nga mga pangutana:
Unsaon nato sa paglikay nga mabuntog sa kadautan nga naglibut kanato?
Unsay atong mabuhat aron makabaton og kalinaw sa samok nga kalibutan?
Ipasabut nga samtang ang mga miyembro sa Simbahan nanimuyo sa Distrito sa Jackson, Missouri, sa ting-init sa 1831, nakasugat sila og bagis nga komunidad diin ang pagsugal, pagkapalahubog, kagubot, ug dili pagbalaan sa adlawng Igpapahulay komon kaayo. Niining lisud nga kahimtang, mitudlo ang Ginoo sa mga Santos kon unsaon sa pagpahimutang sa ilang mga kaugalingon diha sa ilang bag-ong pinuy-anan. Ang Iyang mga instruksyon narekord diha sa Doktrina ug mga Pakigsaad 59. Samtang tun-an sa mga estudyante kini nga pinadayag, dapita sila sa pagpangita og mga baruganan nga makatabang kanila sa paglikay nga mabuntog sa pagkadautan sa kalibutan ug mahibalo unsaon sa pagpangita og kalinaw.
Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 59, nga mangita og dugang nga konteksto sa kasaysayan alang niini nga pinadayag. Dapita ang usa ka estudyante sa pag-summarize sa unsay iyang nakit-an. Ipasabut nga si Polly Knight mibiyahe ngadto sa Missouri uban sa iyang bana, si Joseph Knight Sr., ug ang mga Santos sa Colesville. Samtang nagbiyahe seryuso siyang nasakit apan mibalibad nga mohunong sa pagbiyahe tungod kay “ang iyang bugtong, o iyang labing dakong tinguha, mao ang makatunob sa yuta sa Zion” (Scraps of Biography [1883], 70).
Dapita ang usa ka estudyante sa pagbasa og kusog sa Doktrina ug mga Pakigsaad 59:1–4. Hangyoa ang klase sa pagsunod, nga mangita sa saad nga gihatag sa Ginoo ngadto sa matinud-anon nga mga Santos sa Zion.
Unsa man ang gisaad sa Ginoo sa matinud-anon nga mga Santos sa Zion?
Nganong milakip man ang Ginoo og mga sugo niini nga lista sa mga gasa nga Iyang ihatag ngadto sa matinud-anon?
Hangyoa ang usa ka estudyante sa pagbasa og kusog sa Doktrina ug mga Pakigsaad 59:5. Awhaga ang klase sa pagsunod, nga mangita sa sugo nga gihatag og balik sa Ginoo ngadto sa mga Santos.
Unsaon ninyo sa pagpasabut sa kaugalingon ninyong mga pulong kon unsa ang gipasabut sa paghigugma sa Ginoo sa tibuok ninyong kasingkasing, gahum, hunahuna ug kusog?
Dapita ang mga estudyante sa pagbasa og hilum sa Doktrina ug mga Pakigsaad 59:6–8, nga mangita sa dugang nga mga sugo nga gihatag sa Ginoo ngadto sa mga Santos.
Sa unsang paagi kini nga mga sugo may kalabutan sa sugo sa paghigugma sa Ginoo uban sa atong tibuok nga kasingkasing, gahum, hunahuna, ug kusog?
Ipasabut nga niini nga pinadayag, gihatagan og gibug-aton sa Ginoo ang usa ka sugo nga makatabang sa mga Santos sa pagpakita ug sa pagpalawom sa ilang gugma sa Ginoo. Dapita ang usa ka estudyante sa pagbasa og kusog sa Doktrina ug mga Pakigsaad 59:9–10. Hangyoa ang klase sa pagsunod, nga mangita og dugang nga sugo nga gitudlo sa Ginoo. Hangyoa ang mga estudyante nga moreport sa ilang makit-an. Isulat ang Pagbalaan sa Adlawng Igpapahulay ibabaw sa laing kolum sa pisara.
Aron matabangan ang mga estudyante nga makasabut niini nga mga bersikulo, ipasabut nga ang termino nga “balay alampoanan” sa bersikulo 9 nagpasabut sa usa ka building nga gigamit alang sa mga miting sa Simbahan sa Igpapahulay ug nga ang “mga sakramento” dinhi nagpasabut sa mga buhat sa debosyon o mga ordinansa nga naghiusa kanato ngadto sa Dios.
Sumala sa bersikulo 9, sa unsang paagi kita mapanalanginan tungod sa pagbalaan sa adlawng Igpapahulay? (Human makatubag ang mga estudyante, isulat sa pisara ang mosunod nga baruganan: Samtang atong ibalaan ang adlawng Igpapahulay, labaw kita nga makaamping sa atong kaugalingon nga walay buling gikan sa kalibutan.)
Unsay gipasabut sa “labaw nga moamping sa [atong] mga kaugalingon nga walay buling gikan sa kalibutan”? (Maningkamot nga mahimong gawasnon gikan sa pagkakalibutanon, sala, ug pagkadili matarung.)
Hangyoa ang mga estudyante sa pagpamalandong nganong importante nga mas mahimong walay buling gikan sa kalibutan. Dapita ang pipila ka mga estudyante sa pagpakigbahin sa ilang mga hunahuna ngadto sa klase.
Dapita ang mga estudyante sa pagbasa og hilum sa Doktrina ug mga Pakigsaad 59:9–15 nga dunay ka-partner, nga mangita sa mga instruksyon nga gihatag sa Ginoo ngadto sa mga Santos kalabut sa Iyang balaan nga adlaw. Awhaga ang mga estudyante sa paggamit sa mga footnote aron mas makasabut niini nga mga bersikulo. Human sa igong panahon, dapita ang pipila ka estudyante sa pagpasabut sa pipila ka mga paagi nga mabalaan ang adlaw nga Igpapahulay base sa unsay ilang nakat-unan. (Mahimo nimong ipasabut nga ang mga pulong nga “mohatag og mga paghalad sa inyong mga pag-ampo” diha sa bersikulo 10 nagpasabut sa pagsimba o sa pagpakita og gugma ug pagkamaunungon.) Isulat sa pisara ang mga tubag sa mga estudyante ubos sa ulohan nga Pagbalaan sa Adlawng Igpapahulay.
Sa unsang paagi ang pagbalaan sa adlawng Igpapahulay niini nga mga paagi makatabang kanato nga mas mahimong walay buling gikan sa kalibutan?
Dapita ang mga estudyante sa pagpamalandong sa kasamtangan nilang ginabuhat aron sa pagbalaan sa adlawng Igpapahulay. Hangyoa sila sa pagsulat og tumong nga naghulagway sa unsay ilang buhaton aron mas masunod kini nga sugo.
I-summarize ang Doktrina ug mga Pakigsaad 59:16–19 pinaagi sa pagpasabut nga agig dugang sa espiritwal nga mga panalangin, ang Ginoo misaad og dagkong temporal nga mga panalangin alang niadtong nagbalaan sa adlawng Igpapahulay.
Dapita ang usa ka estudyante sa pagbasa og kusog sa Doktrina ug mga Pakigsaad 59:20–24. Hangyoa ang klase sa pagsunod, nga mangita kon unsay gibati sa Dios mahitungod sa paghatag niini nga mga panalangin.
Sumala sa bersikulo 20, unsa ang gibati sa Dios mahitungod sa pagpanalangin kanato?
Base sa bersikulo 21, sa unsang paagi kita makapasakit sa Dios? (Makapasakit kita sa Dios kon kita dili mokumpisal sa Iyang kamot diha sa tanan nga mga butang ug mosunod sa Iyang mga sugo. Dapita ang mga estudyante nga ikonsiderar ang pagmarka niini nga kamatuoran diha sa ilang mga kasulatan.)
Unsay gipasabut nga mokumpisal sa kamot sa Dios sa tanan nga mga butang?
Ipasabut nga ang atong pagkadili mapasalamaton ug pagkamasinupakon makapasakit, o makapasilo, sa Dios tungod kay ang ingon nga mga kinaiya ug mga lihok mopahilayo kanato gikan Kaniya ug sa Iyang mga panalangin.
Sumala sa bersikulo 23, unsay gisaad sa Ginoo niadtong mosunod sa Iyang mga sugo? (Dapita ang mga estudyante nga ikonsiderar ang pagmarka niini nga saad diha sa ilang mga kasulatan.)
Gimanduan sa Ginoo ang mga elder sa pagsangyaw sa ebanghelyo samtang nagbiyahe sila pabalik sa Ohio
Hangyoa ang mga estudyante sa pagbasa sa ulohan sa seksyon alang sa Doktrina ug mga Pakigsaad 60, nga mangita sa rason nga gihatag kini nga pinadayag. I-summarize kini nga seksyon pinaagi sa pagpasabut nga wala mahimuot ang Ginoo sa pipila sa mga elder tungod kay wala sila “mobuka sa ilang mga ba-ba” (bersikulo 2) ug mopaambit sa ebanghelyo samtang nagbiyahe padulong sa Missouri. Mimando ang Ginoo sa mga misyonaryo nga “[dili mag-usik sa ilang] panahon” (bersikulo 13) apan sa pagbalik ngadto sa Ohio ug sa pagsangyaw sa ebanghelyo samtang nagbiyahe sila. Ipasabut nga ang mga pulong nga “kini walay bali kanako” diha sa bersikulo 5 nagpasabut nga gamiton sa mga elder ang ilang kabubut-on ug mohukom kon mopalit ba o maghimo og mga sakayan alang sa ilang biyahe diha sa Suba sa Missouri.
Ang Ginoo mihatag og pasidaan ug direksyon kang Joseph Smith ug sa mga elder nga nagbiyahe padulong sa Ohio
Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 61, nga mangita kon unsay nahitabo samtang si Joseph Smith ug ang napulo ka mga elder mibiyahe pabalik sa Kirtland, Ohio. Hangyoa ang mga estudyante sa pag-report sa unsay ilang nadiskubrihan. Ipasabut nga adunay pipila ka mga panagsumpaki nga mitumaw tali sa pipila ka mga elder. Nasulbad nila ang ilang mga panagsumpaki sa gabii sa Agosto 11, 1831, ug pagkasunod buntag, si Joseph Smith nakadawat sa pinadayag nga narekord diha sa Doktrina ug mga Pakigsaad 61.
I-summarize ang Doktrina ug mga Pakigsaad 61 pinaagi sa pagpasabut nga ang Ginoo mitudlo nga Siya maloloy-on ug mapasayloon “niadto kinsa nagkumpisal sa ilang mga sala uban sa mapainubsanon nga mga kasingkasing” (bersikulo 2). Gisultihan Niya ang mga elder nga dili kinahanglan nga mobiyahe diha sa suba, tungod kay adunay mga tawo nga nagpuyo sa matag daplin sa suba nga kinahanglan nilang sangyawan sa ebanghelyo. Mitudlo ang Ginoo nga “daghan nga mga kalaglagan” ang mahitabo diha sa katubigan sa katapusang mga adlaw apan misaad nga ipreserbar ang kinabuhi sa matinud-anon nga mga elder (tan-awa sa D&P 61:5–6, 14–15).
Dapita ang mga estudyante sa pagbasa og hilum sa Doktrina ug mga Pakigsaad 61:22. Ipasabut nga ang Ginoo misulti pag-usab sa mga elder, “Kini dili igsapayan ngari kanako” (bersikulo 22) kalabut sa paagi sa ilang pagbiyahe. Mahimo nilang gamiton ang ilang kaugalingong paghukom basta lang matuman nila ang ilang misyon sa pagsangyaw sa ebanghelyo.
Gidayeg sa Ginoo ang pagkamatinud-anon sa usa ka pundok sa mga elder nga nagbiyahe ngadto sa Independence, Missouri
Ipakita ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder David A. Bednar
“Ang labing lisud nga mga paghukom nga atong himoon talagsa ra nga tali sa maayo o dautan o tali sa madanihon ug dili madanihon nga mga kapilian. Kasagaran, ang labing lisud nato nga mga pagpili mao ang tali sa maayo ug maayo” (David A. Bednar, “The Scriptures: A Reservoir of Living Water” [Brigham Young University fireside, Peb. 4, 2007], 6, speeches.byu.edu).
Unsa nga mga matang sa desisyon nga inyong nasinati nga naghulagway niini nga pagtulun-an ni Elder Bednar?
Ipasabut nga sa pinadayag nga narekord diha sa Doktrina ug mga Pakigsaad 62, ang Ginoo mitudlo og mga baruganan nga makagiya kanato samtang maghimo og mga desisyon. Ipasabut nga pagka-Agosto 13, 1831, si Joseph Smith ug ang grupo sa mga elder nga nagbiyahe padulong sa Ohio nakasugat og grupo sa mga elder nga nagbiyahe pa padulong sa Missouri. Ang Propeta nakadawat og pinadayag nga naghatag og instruksyon ngadto niini nga mga misyonaryo.
I-summarize ang Doktrina ug mga Pakigsaad 62:1–3 pinaagi sa pagpasabut nga ang Ginoo misulti sa mga elder nga nasayud Siya unsaon sa pagtabang ang Iyang katawhan sa ilang mga tintasyon ug midayeg kanila tungod sa mga pagpamatuod nga ilang gipaambit.
Dapita ang usa ka estudyante sa pagbasa og kusog sa Doktrina ug mga Pakigsaad 62:4–8. Hangyoa ang klase sa pagpangita sa unsay gitudlo sa Ginoo ngadto sa mga elder mahitungod sa mga desisyon nga kinahanglan nilang himoon.
Unsa nga mga desisyon ang importante ngadto sa Ginoo, ug unsa ang dili importante ngadto Kaniya?
Unsa nga kamatuoran ang atong makat-unan gikan sa bersikulo 8 aron sa pagtabang kanato kon maghimo og mga desisyon? (Kon maghimo og mga desisyon, gusto sa Ginoo nga atong gamiton ang atong paghukom ug ang direksyon sa Espiritu.)
Ngano kaha ang paggamit sa atong kaugalingong paghukom ug sa direksyon sa Espiritu importante kon maghimo og mga desisyon?
Kanus-a nakatabang kaninyo sa paghimo og desisyon ang paggamit sa maayong paghukom ug mga pag-aghat sa Espiritu?
Ipakita ang mosunod nga mensahe ni Elder Dallin H. Oaks sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Dallin H. Oaks
“Ang tinguha nga magiyahan sa Ginoo usa ka kalig-on, apan kinahanglan kining pagaubanan og pagsabut nga itugyan ra sa atong Langitnong Amahan ang daghang mga desisyon diha sa atong personal nga mga pagpili. Ang personal nga paghimo og desisyon maoy usa sa mga tinubdan sa paglambo nga gituyo nga atong masinati sa mortalidad. Ang mga tawo nga mosulay sa pagtugyan sa tanang paghimo og desisyon ngadto sa Ginoo ug mangamuyo og pinadayag alang sa matag pagpili sa dili madugay makakaplag og mga kahimtang diin mag-ampo sila alang sa giya apan dili makadawat niini. Sama pananglit, malagmit nga mahitabo kini niadtong daghan nga mga sirkumstansya diin ang mga pagpili dili kaayo importante o ang bisan hain nga kapilian madawat ra.
“Kinahanglang tun-an nato diha sa atong mga hunahuna ang mga butang, gamiton ang gahum sa pangatarungan nga gibutang sulod kanato sa atong Tiglalang. Dayon mag-ampo kita alang sa giya ug sundon kini kon ato kining madawat. Kon dili kita makadawat og giya, kinahanglan molihok kita sumala sa atong labing maayo nga paghukom” (Dallin H. Oaks, “Our Strengths Can Become Our Downfall,” Ensign, Okt. 1994, 13–14).
Sa unsang paagi ang mga pagtulun-an ni Elder Oaks makatabang kaninyo nga mas makasabut sa mga kamatuoran diha sa Doktrina ug mga Pakigsaad 62:4–8?
Tapusa pinaagi sa pagpamatuod sa kaimportante sa paggamit sa paghukom ug sa direksyon sa Espiritu kon maghimo og mga desisyon.