Si Propeta Joseph Smith nakadawat og pagpadayag nga narekord sa Doktrina ug mga Pakigsaad 88:1–126 niadtong Disyembre 27 ug 28, 1832. Mga usa ka semana human niana, pagka-Enero 3, 1833, gidiktar sa Propeta ang pagpadayag nga narekord diha sa Doktrina ug mga Pakigsaad 88:127–37 human ang mga high priest nga didto sa komperensya nag-ampo aron masayud sa kabubut-on sa Ginoo kalabut sa pag-establisar sa Zion. Ang Propeta mitawag sa pagpadayag isip “‘dahon sa oliba’ … nga gikutlo gikan sa Kahoy sa Paraiso” (D&P 88, sa ulohan nga seksyon) tingali tungod kay mensahe kini sa kalinaw uban ang potensyal aron moayo sa dili maayong mga pagbati sa pipila ka mga Santos sa Missouri ngadto sa mga lider sa Kirtland (tan-awa sa D&P 84:76). Upat ka dugang nga mga bersikulo (D&P 88:138–41) ang gidugang atol sa publikasyon sa 1835 nga edisyon sa Doktrina ug mga Pakigsaad.
Mao kini ang ikaduha sa duha ka leksyon nga hisgutan sa Doktrina ug mga Pakigsaad 88. Diha sa porsyon sa pagpadayag nga gihisgutan niini nga leksyon, ang Ginoo misugo sa mga elder sa Simbahan nga magtinudloay sila ug mangandam sa pagserbisyo isip mga misyonaryo. Gipadayag usab Niya ang mga timailhan sa Iyang Ikaduhang Pag-anhi, ang kinatibuk-ang han-ay diin ang tanang tawo mabanhaw, ug sa pipila ka mga panghitabo libut sa katapusang pakig-away batok kang Satanas dapit sa katapusan sa Milenyum. Dugang pa, misugo ang Ginoo sa mga Santos sa pagtukod og balay sa Dios sa Kirtland ug misugo sa mga elder sa pag-organisar og “tulunghaan [eskwelahan] sa mga propeta” (D&P 88:127) ubos sa pagdumala ni Joseph Smith. Kadtong moapil sa tulunghaan dungan nga magkat-on pinaagi sa pagtuon ug pinaagi sa pagtuo ug mopakita og gugma ug panaghigalaay sa usag usa.
Hunyo 1832–Enero 1833Mitumaw ang mga panagbangi tali sa mga lider sa Simbahan sa Missouri ug sa mga lider Simbahan sa Ohio.
Enero 5, 1833Frederick G. Williams gitawag pinaagi sa pagpadayag nga mopuli ni Jesse Gause isip magtatambag sa Kapangulohan sa Halangdon nga Pagkapari.
Gisugo sa Ginoo ang mga elder sa Simbahan sa pagpabilin ug pagpangandam alang sa ilang pangalagad
Hangyoa ang mga estudyante sa paghunahuna og butang nga ilang nahimo bag-o lang nga nagkinahanglan og preparasyon. Dapita ang pipila ka estudyante sa paghulagway unsay ilang gihimo ug kon giunsa nila kini sa pag-andam.
Sa unsang paagi ang inyong pagpangandam o kakulang sa pagpangandam miimpluwensya sa inyong kalampusan?
Ipasabut nga ang Ginoo gusto nga maandam kita alang sa mahangturon nga importante nga mga hitabo. Dapita ang mga estudyante sa pagpangita sa doktrina ug mga baruganan samtang tun-an nila ang nahibilin sa Doktrina ug mga Pakigsaad 88 nga makatabang nila sa pagsabut kon unsay gusto sa Ginoo nga ilang andamon ug kon nganong kinahanglan silang maandam.
Pahinumdumi ang mga estudyante nga atol sa komperensya sa mga high priest sa Kirland, Ohio, niadtong Disyembre 27–28, 1832, ang Ginoo mihatag kanila og pagpadayag nga naa sa Doktrina ug mga Pakigsaad 88:1–126. Kadtong mga nanambong nagtinguha nga mahibalo sa kabubut-on sa Ginoo bahin kanila ug sa pagtukod sa Zion.
Dapita ang usa ka estudyante sa pagbasa og kusog sa Doktrina ug mga Pakigsaad 88:70. Hangyoa ang klase sa pagpangita kon unsay gisugo sa Ginoo nga buhaton sa mga elder.
Unsa ang gisugo sa Ginoo nga buhaton sa mga elder?
Ipasabut nga kini nga sugo susama ra sa sugo nga gihatag sa Ginoo ngadto sa Iyang karaang mga Apostoles. Misugo ang Ginoo sa Iyang mga Apostoles sa pagsangyaw sa ebanghelyo ngadto sa tanang kanasuran, apan magpabilin sila sa Jerusalem hangtud nga matugahan sila sa gahum gikan sa kahitas-an (tan-awa sa Lucas 24:47–49). Ipasabut nga bisan og ang sugo sa pagpabilin sa Kirtland mag-limit sa misyonaryo nga buhat sulod sa mubo nga panahon, gipaniguro sa Ginoo ngadto sa mga elder nga ang buhat magpadayon.
Dapita ang usa ka estudyante sa pagbasa sa Doktrina ug mga Pakigsaad 88:72–73. Hangyoa ang klase sa pagsunod, nga mangita kon unsay gisulti sa Ginoo nga buhaton sa mga elder.
Unsa nga mga pulong dinhi sa mga bersikulo ang importante kaninyo? Ngano man?
Dapita ang mga estudyante sa pagbasa og hilum sa Doktrina ug mga Pakigsaad 88:74–76, nga mangita kon unsay gisugo sa Ginoo nga buhaton sa mga elder samtang nagpabilin sila sa Kirtland.
Unsa ang gisugo sa Ginoo nga buhaton sa mga elder samtang nagpabilin sila sa Kirtland?
Sumala sa bersikulo 75, nganong gisugo man sila sa Ginoo sa pagbuhat niining mga butanga? (Aron sila makatuman sa “mahinungdanon ug katapusan nga saad” nga Iyang gihimo kanila.)
Aron matabangan ang mga estudyante nga makasabut sa kahulugan niini nga “mahinungdanon og katapusan nga saad,” dapita ang usa ka estudyante sa pagbasa og kusog sa Doktrina ug mga Pakigsaad 88:67–68. Hangyoa ang klase sa pagsunod, nga mangita sa saad nga gihatag sa Ginoo sa mga Santos.
Unsa nga saad ang tumanon sa Ginoo kon ang mga Santos motuman sa sugo nga magpabilin sa Kirtland ug mangandam, mobalaan, molunsay, ug molimpyo sa ilang kaugalingon? (Ang saad nga makita nila ang Ginoo sa Iyang kaugalingon nga panahon ug paagi. Kini nga saad gisumpay ngadto sa sugo sa pagtukod sa Templo sa Kirtland, sa tawag nga maghimo og ligdong nga katiguman [tan-awa sa bersikulo 70], ug sa nag-unang saad sa Ginoo nga tugahan ang mga Santos og gahum gikan sa kahitas-an [tan-awa sa D&P 38:32; 95:8–9].)
Dapita ang usa ka estudyante sa pagbasa og kusog sa Doktrina ug mga Pakigsaad 88:77–79. Hangyoa ang klase sa pagsunod, nga mangita kon unsa pa ang gisugo sa Ginoo nga buhaton niini nga mga elder aron maandam ang ilang kaugalingon nga matugahan sa gahum.
Unsay gisugo sa Ginoo nga buhaton sa mga elder diha sa bersikulo 77?
Sumala sa bersikulo 78, unsa ang gisaad sa Ginoo nga mahitabo kon magkugi sila sa pagtudlo sa usag usa sa doktrina sa gingharian? (Ipasabut nga ang mga pulong nga “ang akong grasya mouban kaninyo” nagpasabut sa pagkadawat og balaang tabang o kalig-on.)
Base sa gisaad sa Ginoo diha sa bersikulo 78, unsa ang mahitabo kon magkugi kita sa pagtudlo sa usag usa sa doktrina sa gingharian? (Human makatubag ang mga estudyante, isulat sa pisara ang mosunod nga baruganan: Kon makugihon kitang motudlo sa usag usa sa doktrina sa gingharian, ang Ginoo motabang kanato nga mas hingpit natong masabtan ang Iyang mga doktrina.)
Sa unsang mga paagi ang pagtudlo sa ebanghelyo ngadto sa uban nakatabang kaninyo aron mas makasabut niini?
Dapita ang mga estudyante sa pagbasa og hilum sa Doktrina ug mga Pakigsaad 88:80, nga mangita kon nganong misugo ang Ginoo sa pagtudlo ug pagkat-on niining mga butanga. Dapita ang pipila ka mga estudyante sa pagreport unsay ilang nakit-an.
Sa unsang mga paagi ang makugihon nga pagtudlo sa usag usa sa doktrina sa gingharian makaandam kanato sa pagserbisyo sa Dios?
I-summarize ang Doktrina ug mga Pakigsaad 88:81–82 pinaagi sa pagpasabut nga ang Ginoo misulti sa mga elder nga sila Iyang gipadala “sa pagpamatuod ug pagpasidaan sa mga katawhan” ug nga ang tanan nga napasidan-an gilauman nga mopasidaan sa uban.
Dapita ang usa ka estudyante sa pagbasa og kusog sa Doktrina ug mga Pakigsaad 88:83–86. Hangyoa ang klase sa pagsunod, nga mangita sa dugang nga tambag nga gihatag sa Ginoo ngadto sa mga elder aron matabangan silang maandam sa pagsangyaw sa ebanghelyo ug kon nganong importante kaayo kini nga tambag.
Unsa nga tambag ang gihatag sa Ginoo ngadto sa mga elder? Ngano nga importante man kini?
Sumala sa bersikulo 84–85, unsa ang ikatabang sa pagpamatuod sa mga Santos alang sa pag-andam sa kalibutan?
Ang Ginoo mopadayag sa mga hitabo nga naglibut sa Iyang Ikaduhang Pag-anhi
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 88:87–91. Hangyoa ang klase sa pagsunod, nga mangita kon unsay gisulti sa Ginoo nga maoy magsunod sa mga pagpamatuod sa mga Santos.
Unsa nga matang sa mga pagpamatuod ang mosunod sa mga pagpamatuod sa mga Santos sa dili pa ang Ikaduhang Pag-anhi?
Dapita ang mga estudyante sa pagbasa og hilum sa Doktrina ug mga Pakigsaad 88:92, nga mangita sa unsay isulti sa mga anghel. Hangyoa sila sa pagreport kon unsay ilang nakit-an.
I-summarize ang Doktrina ug mga Pakigsaad 88:93–116 pinaagi sa pagpasabut nga sa panahon unya sa Ikaduhang Pag-anhi, ang gamhanan ug salawayon nga simbahan nga milutos sa mga Santos pagagapuson. Ang mga Santos nga nagpuyo sa kalibutan o mga namatay na pagadad-on aron makighimamat sa Manluluwas ug mosaka uban Kaniya. Ang mga patay mabanhaw sa han-ay nga paagi, sumala sa ilang pagkamatarung. Human sa ilang pagkabanhaw, ang mga matarung makadawat og himaya sa Ginoo ug sa ilang panulundon. Si Satanas gapuson atol sa Milenyum apan buhian dayon sulod sa mubo nga panahon. Si Miguel (Adan) ug ang iyang kasundaluhan mopildi ni Satanas ug sa iyang kasundaluhan, ug si Satanas wala nay gahum batok sa mga Santos.
Ang Ginoo misugo sa mga naghupot sa priesthood sa paglig-on sa pagtuo sa uban, magtinguha sa pagkat-on pinaagi sa pagtuo, pag-etablisar og balay sa Dios, ug pag-organisar og usa ka tulunghaan
Ipasabut nga human ang Ginoo mihulagway sa pipila ka hitabo nga naglibut sa Iyang Ikaduhang Pag-anhi, gisultihan Niya ang mga Santos unsay angay nilang buhaton aron maandam ang ilang kaugalingon ug ang uban alang niana nga mga hitabo.
Dapita ang usa ka estudyante sa pagbasa og kusog sa Doktrina ug mga Pakigsaad 88:117–18. Hangyoa ang klase sa pagpangita kon unsay gisulti sa Ginoo nga buhaton sa Iyang mga sulugoon aron maandam alang niini nga mga hitabo.
Unsay gisulti sa Ginoo nga buhaton sa Iyang mga sulugoon diha sa bersikulo 117?
Ipasabut ang mga pulong nga “ug sa ingon sa tanan nga walay hugot nga pagtuo” diha sa bersikulo 118.
Unsa ang gisulti sa Ginoo nga buhaton sa Iyang mga sulugoon aron molambo ang ilang pagtuo ug ang pagtuo sa uban sa bersikulo 118?
Unsa nga mga baruganan ang atong makat-unan gikan sa verse 118 mahitungod sa unsaon sa pagpalig-on ang atong pagtuo? (Human makatubag ang mga estudyante, isulat sa pisara ang mosunod nga baruganan: Samtang magmakugihon kita sa pagtudlo sa usag usa atong mapalambo ang kaugalingon natong pagtuo ug makatabang sa paglig-on sa pagtuo sa uban. Misugo kanato ang Ginoo sa pagpagpangita sa pagtulun-an pinaagi sa pagtuon ug pinaagi sa hugot nga pagtuo.)
Unsa kaha ang buot ipasabut sa pagkat-on “pinaagi sa pagtuon ug usab pinaagi sa hugot nga pagtuo” (bersikulo 118)?
Aron matabangan ang mga estudyante nga makasabut kon unsay ipasabut sa pagkat-on pinaagi sa hugot nga pagtuo, dapita ang mga estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles:
Imahe
Elder David A. Bednar
“Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. …
“… Ang pagkat-on pinaagi sa hugot nga pagtuo dili mabalhin gikan sa magtutudlo ngadto sa estudyante pinaagi sa pagtudlo, sa pagpakita, o sa pag-eksperimento, hinoon, ang usa ka estudyante kinahanglang mopakita og pagtuo ug molihok aron makaangkon og kahibalo alang sa iyang kaugalingon.(David A. Bednar, “Paningkamot sa Pagkat-on pinaagi sa Hugot nga Pagtuo,”Liahona, Sep. 2007, 64).
Sumala ni Elder Bednar, unsaon man nato sa pagkat-on pinaagi sa pagtuo?
Unsa ang pipila ka ehemplo gikan sa mga kasulatan bahin sa katawhan nga migamit sa ilang pagtuo ug milihok aron makaangkon og kahibalo?
Kanus-a milambo ang imong pagtuo isip resulta sa paglihok aron makaangkon og kahibalo?
Dapita ang mga estudyante sa pagpamalandong unsay ilang buhaton aron mas malihok nila og maayo unsay ilang nakat-unan. Awhaga sila sa pagsunod sa bisan unsang mga pag-aghat nga ilang nadawat gikan sa Espiritu Santo.
Dapita ang usa ka estudyante sa pagbasa og kusog sa Doktrina ug mga Pakigsaad 88:119–20. Hangyoa ang klase sa pagsunod, nga mangita kon unsay gisulti sa Ginoo nga buhaton sa mga Santos aron maandam alang sa Iyang Ikaduhang Pag-anhi ug makapalambo sa ilang pagtuo.
Unsa ang gisulti sa Ginoo nga buhaton sa mga Santos? (Human makatubag ang mga estudyante, ipasabut nga si Propeta Joseph Smith nakasabut nga ang bersikulo 119 usa ka sugo sa pagtukod og balay sa Dios diin ang mga Santos makahimo sa ilang ligdong nga katiguman ug matudloan gikan sa kahitas-an. Agig pagsanong niini nga bersikulo, ang mga Santos sa katapusan mitukod sa Templo sa Kirtland.)
Sumala sa bersikulo 120, unsa ang gihatag nga rason sa Ginoo alang sa mga Santos sa pagtukod sa balay sa Dios?
Dapita ang mga estudyante sa pagbasa sa Doktrina ug mga Pakigsaad 88:121-26 uban sa kapares ug sa pagpangita sa tambag nga gihatag sa Ginoo ngadto sa Iyang mga sulugoon alang sa pag-andam kanila nga matudloan sulod sa templo.
Sa unsang paagi ang pagsunod niini nga tambag makaandam sa mga miyembro aron matudloan sulod sa templo?
Sa unsang paagi ang pagsunod niini nga tambag makatabang ninyo aron matudloan atol sa atong mga miting sa Simbahan ug sa templo?
Ipasabut nga sa pagka Enero 3, 1833, usa ka semana human sa komperensya sa mga high priest, mihatag ang Ginoo og dugang nga instruksyon kon sa unsang paagi ang balay sa Dios magsilbi nga usa ka balay sa pagkat-on. I-summarize ang Doktrina ug mga Pakigsaad 88:127–41 pinaagi sa pagpasabut nga ang Ginoo misugo ni Propeta Joseph Smith sa pagtukod og Tulunghaan sa mga Propeta alang niadtong mga gitawag sa pagpangalagad. Kini nga eskwelahan [tulunghaan] gidesinyo aron maandam sila alang sa misyonaryo nga buhat ug sa umaabut nga pagserbisyo sa Simbahan. Kadtong anaa sa tulunghaan gitudloan sa pagtudlo ug pagkat-on sa doktrina sa gingharian ug sa pagtinguha og kaalam gikan sa pinakamaayong tinubdan nga anaa. Gipahimutang sa Ginoo ang han-ay sa Tulunghaan sa mga Propeta, lakip ang pamaagi sa pagtimbaya ug ang ordinansa sa paghugas sa mga tiil. Ang orihinal nga Eskwelahan [Tulunghaan] sa mga Propeta adto magkita sa tindahan ni Newel K. Tindahan ni Whitney.
Dapita ang mga estudyante sa pagpaambit og usa ka doktrina o baruganan gikan sa karon nga leksyon nga importante kanila ug sa pagpasabut kon ngano. Awhaga ang mga estudyante sa pagbuhat sa mga pag-aghat nga ilang nadawat.