“Leksyon 56: Opisyal nga Pahayag 2,” Manwal sa Magtutudlo sa Doktrina ug mga Pakigsaad (2017)
“Leksyon 56,” Manwal sa Magtutudlo sa Doktrina ug mga Pakigsaad
Leksyon 56
Opisyal nga Pahayag 2
Pasiuna ug Timeline
Sa pagkatap sa misyonaryo nga buhat sa tibuok yuta atol sa ika-20 nga siglo, ang mga lider sa Simbahan nag-ampo og giya mahitungod sa mga restriksyon sa pag-orden sa priesthood ug sa mga ordinansa sa templo alang sa mga itom nga miyembro sa Simbahan nga African ang gagikan. Niadtong Hunyo 1, 1978, ang Ginoo mipadayag kang Presidente Spencer W. Kimball, sa iyang mga magtatambag sa Unang Kapangulohan, ug sa mga sakop sa Korum sa Napulog Duha ka mga Apostoles nga kini nga mga restriksyon kinahanglan pagakuhaon. Niadtong Hunyo 8, 1978, ang Unang Kapangulohan mipahibalo niini nga pagpadayag sa usa ka sulat ngadto sa mga lider sa Simbahan. Kini nga sulat narekord sa Opisyal nga Pahayag 2.
-
Disyembre 30, 1973Si Spencer W. Kimball giorden isip Presidente sa Simbahan.
-
Hunyo 1, 1978Si Presidente Kimball, ang iyang mga magtatambag sa Unang Kapangulohan, ug ang mga sakop sa Korum sa Napulog Duha ka mga Apostoles nakadawat og pagpadayag nga maghatag sa priesthood ug mga panalangin sa templo ngadto sa tanang takus nga mga miyembro sa Simbahan.
-
Hunyo 8, 1978Ang Unang Kapangulohan miisyu og usa ka sulat nga nagpahibalo sa pagpadayag.
-
Septyembre 30, 1978Ang pagpadayag nga nadawat niadtong Hunyo 1 gipresentar ngadto sa mga miyembro sa Simbahan atol sa kinatibuk-ang komperensya ug hiniusang gipaluyohan isip “ang pulong ug kabubut-on sa Ginoo” (Opisyal nga Pahayag 2).
-
Nobyembre—Disyembre 1978Ang mga misyonaryo miabut sa Ghana ug Nigeria aron sa pag-establisar sa Simbahan sa Habagatang Africa.
Mga Sugyot alang sa Pagtudlo
Opisyal nga Pahayag 2
Ang Ginoo mipadayag nga ang priesthood ug mga panalangin sa templo mahimong ihatag sa tanang takus nga mga miyembro sa Simbahan
Aron matabangan ang mga estudyante nga makasabut sa makasaysayanong konteksto sa Opisyal nga Pahayag 2, ipasabut nga “gikan sa tunga-tunga sa 1800 hangtud sa 1978[,] ang Simbahan wala mo-orden og mga lalaki nga itom gikan sa kaliwat sa taga-Africa ngadto sa pagkapari o motugot sa itom nga mga lalaki ug babaye sa pag-apil sa mga ordinansa sa templo sa pagtuga o pagbugkos” (“Race and the Priesthood,” Gospel Topics, topics.lds.org).
Dapita ang mga estudyante sa pagkonsiderar sa unsa nga paagi sila motubag kon sila hangyoon sa pagpasabut ngano nga kini nga mga restriksyon gihimo.
Dapita ang usa ka estudyante sa pagbasa og kusog sa pasiuna sa Opisyal nga Pahayag 2 nga makita sa 2013 nga edisyon sa Doktrina ug mga Pakigsaad. Hangyoa ang klase sa pagsunod, nga mangita kon unsay gitudlo niini nga parapo [paragraph] mahitungod sa “tinubdan” o sinugdanan, niini nga mga restriksyon.
-
Unsa ang gitudlo sa pasiuna sa Opisyal nga Pahayag 2 kanato mahitungod sa tinubdan sa mga restriksyon sa priesthood ug sa mga panalangin sa templo?
Itudlo nga samtang ang pipila nagsugyot og mga rason alang sa mga restriksyon sa priesthood ug templo, kini nga mga pagpasabut personal nga mga opinyon ug mahimong dili tukma. I-display ang mosunod nga pamahayag, ug dapita ang usa ka estudyante sa pagbasa niini og kusog:
“Ang pipila ka mga pagpasabut kabahin [sa restriksyon sa priesthood] gihimo nga wala ang direkta nga pagpadayag ug ang mga pakisayran niini nga mga pagpasabut usahay gihisgutan sa mga gimantala. Kining nangaging personal nga mga pamahayag wala magrepresentar sa doktrina sa Simbahan” (“Race and the Church: All Are Alike Unto God,” Peb. 29, 2012, mormonnewsroom.org; tan-awa usab sa “Race and the Priesthood,” Gospel Topics, topics.lds.org).
Ipasabut nga ang Opisyal nga Pahayag 2 adunay sulat nga gipetsahan og Hunyo 8, 1978, ngadto sa mga lider sa Simbahan sa tibuok kalibutan nga nagpahibalo sa pagpadayag nga nadawat ni Presidente Spencer W. Kimball. Dapita ang usa ka estudyante sa pagbasa og kusog sa unang parapo [paragraph] sa sulat (sugod sa mga pulong “Minahal kong mga Kaigsoonan”). Dapita ang klase sa pagsunod, nga mangita kon unsay gisulti sa mga lider sa Simbahan nga ilang “nasaksihan” sa tibuok yuta.
-
Unsa ang nasaksihan sa mga lider sa Simbahan?
Ipasabut nga niadtong mga 1960 ug sa sayong bahin sa mga 1970, liboan sa mga tawo nga kaliwat sa Afrikano nakahibalo sa katinuod sa ebanghelyo ug nagtinguha nga magpabunyag. Ang mga indibidwal sa mga nasud sama sa Nigeria ug Ghana nanghangyo nga magpadala og mga misyonaryo ngadto sa Africa. Sulod sa mga katuigan ang mga lider sa Simbahan mainampoong mikonsiderar sa ilang mga hangyo apan wala mobati nga sakto na ang panahon. Kon wala ang priesthood, ang lokal nga mga miyembro dili makahimo sa pagdumala sa mga kongregasyon o pagpahigayon sa importante nga mga ordinansa. Sa Brazil, ang nagkadaghan nga itom nga mga miyembro matinud-anong nagserbisyo sa Simbahan. Daghan usab ang mihatag og amot sa pagtukod sa São Paulo Brazil Temple bisan og sila wala tuguti nga mosulod sa templo tungod sa restriksyon.
-
Unsa nga tinguha ang nakadasig sa mga lider sa Simbahan samtang nasaksihan nila ang pagkatap sa buhat sa Ginoo?
Dapita ang usa ka estudyante sa pagbasa og kusog sa ikaduhang parapo [paragraph] sa sulat nga narekord sa Opisyal nga Pahayag 2 (magsugod sa “Nakahibalo sa mga saad”). Hangyoa ang klase sa pagsunod, nga mangita sa unsay laing nakatampo sa tinguha sa mga lider sa Simbahan sa paghatag sa tanang mga panalangin sa ebanghelyo ngadto sa matag takus nga miyembro sa Simbahan.
-
Unsa pa ang nakatampo niini nga tinguha?
-
Giunsa sa mga lider sa Simbahan paghimo niini nga tinguha?
-
Unsa nga baruganan ang atong mailhan gikan niini nga parapo [paragraph] mahitungod kon unsay buhaton sa mga propeta samtang ilang gigiyahan ang Simbahan? (Human makatubag ang mga estudyante, isulat ang mosunod nga baruganan sa pisara: Ang mga propeta nagtinguha og balaan nga giya aron makahibalo sa kabubut-on sa Ginoo mahitungod sa Simbahan.)
Pahinumdumi ang mga estudyante bahin sa sitwasyon nga imong gipresentar sa pagsugod sa leksyon.
-
Kon maghisgot sa mga desisyon ug mga pagtulun-an sa Unang Kapangulohan ug sa Korum sa Napulog Duha ka mga Apostoles, ngano nga makatabang ang paghinumdom nga ang mga propeta nagtinguha og balaan nga giya aron makahibalo sa kabubut-on sa Ginoo kabahin sa Simbahan?
Itudlo nga niadtong 1978, si Presidente Kimball nabalaka pag-ayo kabahin sa mga restriksyon sa priesthood ug templo, ug sa kanunay namalandong ug nag-ampo diha sa templo mahitungod sa isyu. Kanunay usab siyang nagpakitambag sa ubang mga General Authority ug midapit kanila sa pagpadayag sa ilang mga pagbati sa hilisgutan. (Tan-awa sa Bruce R. McConkie, “The New Revelation on Priesthood,” diha sa Priesthood 1981], 127).
Dapita ang usa ka estudyante sa pagbasa og kusog sa mosunod nga istorya ni Presidente Kimball:
“Nasayud ako nga adunay usa ka butang sa among atubangan nga importante kaayo sa kadaghanan sa mga anak sa Dios. Nasayud ako nga madawat lamang nato ang mga pagpadayag sa Ginoo pinaagi sa pagpakatakus ug pagkaandam alang niini ug andam nga modawat niini ug pagpahimutang niini sa hustong pagkahimutang. Kada adlaw nag-inusara akong moadto ug uban sa dakong kabalaan ug kaligdong didto sa ibabaw nga mga kwarto sa templo sa [Salt Lake], ug didto akong gihalad ang akong kalag ug gihalad ang akong mga paningkamot sa pagpadayon sa programa. Buot ako nga mobuhat unsa ang iyang buot ipabuhat. Nakigsulti ako kaniya kalabut niini ug miingon, ‘Ginoo, buot lamang ako nga mobuhat unsa ang husto. … Buot lamang kami sa mga butang nga pagbuot nimo, ug buot kami niini kon imong pagbuot ug dili hangtud nga ikaw magbuot’” (Mga Pagtulun-an sa mga Presidente sa Simbahan: Spencer W. Kimball [2006], 296–297).
-
Unsay inyong namatikdan mahitungod sa mga paningkamot ni Presidente Kimball sa pagtinguha sa giya sa Ginoo?
-
Sa unsa nga paagi nga ang ehemplo ni Presidente Kimball makatabang nato samtang magtinguha kita sa giya sa Ginoo?
Ipasabut nga niadtong Hunyo 1, 1978, ang mga sakop sa Unang Kapangulohan ug Korum sa Napulog Duha ka mga Apostoles nagmiting sa Salt Lake Temple. Miadto sila sa templo nga nagpuasa. Si Presidente Kimball mihisgot sa ilang nangaging mga gihisgutan mahitungod sa paghatag sa priesthood ug mga panalangin sa templo ngadto sa tanang takus nga mga sakop sa Simbahan. Iyang gihangyo ang matag tawo nga diha nga mopaambit sa iyang mga hunahuna kabahin niini. Si Presidente Kimball dayon misugyot nga maghiusa sila sa pag-ampo.
Dapita ang usa ka estudyante sa pagbasa og kusog sa ikatulo ug ikaupat nga parapo [paragraph] sa sulat nga narekord diha sa Opisyal nga Pahayag 2 (magsugod sa “Siya nakadungog sa atong mga pag-ampo”). Hangyoa ang klase sa pagsunod, nga mangita kon giunsa pagtubag sa Ginoo ang mainampoong pangamuyo niining mga lider sa Simbahan.
-
Unsa ang gikumpirmar sa Ginoo ngadto ni Presidente Kimball ug sa ubang mga lider sa Simbahan pinaagi sa pagpadayag?
-
Unsa nga doktrina ang atong mailhan gikan niini nga mga parapo [paragraph] kabahin kon sa unsa nga paagi gidumala ug gigiyahan ang Simbahan? (Human makatubag ang mga estudyante, isulat ang mosunod nga doktrina diha sa pisara: Ang Ginoo mogiya sa Iyang Simbahan pinaagi sa pagpadayag ngadto sa Iyang mga propeta.)
Aron matabangan pa og dugang ang mga estudyante nga makasabut niini nga kamatuoran, hangyoa ang usa ka estudyante sa pagbasa og kusog sa mosunod nga gisugilon ni Presidente Gordon B. Hinckley (1910–2008) ug ni Elder Bruce R. McConkie (1915–1985) sa Korum sa Napulog Duha ka mga Apostoles, kinsa mihulagway sa ilang kasinatian sa dihang ang pinadayag nadawat pagka-Hunyo 1, 1978:
“Adunay tinahud ug nabalaan nga palibut diha sa kwarto. Alang kanako, mabati nga daw adunay agianan nga naabli tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. Ang Espiritu sa Dios anaa didto. Ug pinaagi sa gahum sa Espiritu Santo dihay miabut niana nga propeta nga usa ka kasiguroan nga ang butang nga iyang giampo husto, nga ang panahon miabut na, ug nga karon ang talagsaon nga mga panalangin sa priesthood kinahanglang ihatag sa takus nga mga lalaki bisan asa sa walay pagsapayan sa kaliwatan.
“Ang matag usa nianang nag-alirong nga mga lalaki, pinaagi sa gahum sa Espiritu Santo, nasayud sa samang butang. …
“Walay tingog nga among nadungog sa among pisikal nga dunggan. Apan ang tingog sa Espiritu naghunghong uban ang kasiguroan sa among hunahuna ug sa among mga kalag. …
“… Mibiya kami sa miting nga kalma ug may balaang pagtahud ug malipayon. Walay usa kanamo nga anaa niana nga okasyon nga mao lang gihapon human niana. Ni ang Simbahan pareha lang gihapon” (Gordon B. Hinckley, “Priesthood Restoration,” Ensign, Okt. 1988, 70).
“Niining okasyona, tungod sa pagkamakanunayon ug sa hugot nga pagtuo, ug tungod kay ang oras ug ang panahon miabut na, ang Ginoo … mibu-bu sa Espiritu Santo diha sa Unang Kapangulohan ug sa Napulog Duha sa milagruso ug katingalahang paagi, labaw pa sa bisan unsang butang nga nasinati sukad ni bisan kinsa nga mitambong. Ang pagpadayag miabut ngadto sa Presidente sa Simbahan; miabut usab kini ngadto sa matag indibidwal nga nanambong. … Ang resulta mao nga si Presidente Kimball nasayud, ug ang matag usa kanamo nasayud, independente ni bisan kinsa nga laing tawo, pinaagi sa direkta ug personal nga pagpadayag ngari kanamo, nga ang panahon miabut na sa paghatag sa ebanghelyo ug sa tanang mga panalangin niini ug sa tanang mga obligasyon niini, lakip ang priesthood ug sa mga panalangin sa balay sa Ginoo, ngadto sa matag nasud, kultura, ug kaliwat” (Bruce R. McConkie, “Ang Tanan Managsama ngadto sa Dios” (Brigham Young University devotional, Ago. 18, 1978, 4, speeches.byu.edu).
-
Base sa istorya ni Elder McConkie, ngano nga miabut ang pagpadayag? (Mahimo nimong hatagan og gibug-aton nga ang pagpadayag miabut isip resulta sa makanunayon sa pagtuo ug tungod kay ang oras miabut na.)
-
Unsa kaha ang kaimportante sa matag indibidwal nga sakop sa Unang Kapangulohan ug sa korum sa Napulog Duha ka mga Apostoles nga makadawat sa samang nagkumpirma nga pagpadayag gikan sa Ginoo?
Gamita ang duha ka kamatuoran nga gisulat diha sa pisara: “Ang mga propeta nagtinguha og balaan nga giya aron makahibalo sa kabubut-on sa Ginoo mahitungod sa Simbahan” ug “Ang Ginoo naggiya sa Iyang Simbahan pinaagi sa pagpadayag ngadto sa Iyang mga propeta.”
-
Sa unsa nga paagi kini nga mga kamatuoran makatabang nato nga makabaton og pagtuo sa pagsunod sa tambag niana nga mga propeta gikan sa Ginoo?
Hangyoa ang mga estudyante sa paghunahuna og mga panahon sa ilang kinabuhi sa dihang gibati nila o nasayud nga ang Ginoo naggiya sa Iyang Simbahan pinaagi sa pagpadayag ngadto sa Iyang mga propeta. Dapita ang pipila ka mga estudyante sa pagpakigbahin sa ilang mga kasinatian diha sa klase. Ikonsiderar ang pagpakigbahin usab sa imong kaugalingong kasinatian.
Ipamatuod nga ang Ginoo mopadayag sa Iyang kabubut-on ngadto sa Iyang mga propeta, ug awhaga ang mga estudyante sa pagsunod sa tambag ug pagpangulo sa mga propeta sa Ginoo.
Ipasabut nga ang sulat nga nagpahibalo sa Hunyo 1, 1978, nga pagpadayag giisyu niadtong Hunyo 8, 1978. Pipila ka bulan ang milabay, si Presidente N. Eldon Tanner sa Unang Kapangulohan mipresentar sa pagpadayag ngadto sa mga miyembro sa Simbahan sa tunga sa tuig nga kinatibuk-ang komperensya alang sa pagpaluyo nga boto.
Dapita ang usa ka estudyante sa pagbasa og kusog sa ikaduhang parapo [paragraph] sa Opisyal nga Pahayag 2 (sugod sa “Sa sayo sa Hunyo niini nga tuig”). Hangyoa ang klase sa pagsunod, nga mangita kon unsay gihangyo ni Presidente Kimball kang Presidente Tanner nga isulti sa mga miyembro sa Simbahan mahitungod sa pagpadayag. Hangyoa ang mga estudyante sa pagreport sa unsay ilang nakit-an.
-
Ngano kaha nga importante alang sa mga miyembro sa Simbahan nga makahibalo nga ang Unang Kapangulohan ug ang Korum sa Napulog Duha ka mga Apostoles nagkahiusa sa pag-aprobar sa pagpadayag?
Ipasabut nga ang mga miyembro sa Simbahan nga nanambong sa kinatibuk-ang komperensya nagkahiusa sa pagdawat sa pagpadayag “isip ang pulong ug kabubut-on sa Ginoo” (Opisyal nga Pahayag 2). Isip resulta sa pagpadayag kini nagtapos sa mga restriksyon sa priesthood ug sa templo, ang mga misyonaryo karon nagsangyaw sa ebanghelyo sa hapit tanan nga nasud sa Africa, mga templo natukod na niana nga kontinente, ug gatusan sa liboan ka katawhan sa kaliwat sa Afrikano nakadawat sa mga ordinansa sa ebanghelyo alang sa ilang kaugalingon ug sa ilang nangamatay nga mga katigulangan.
Tapusa ang leksyon pinaagi sa pagdapit og pipila ka mga estudyante sa pagpakigbahin sa ilang mga pagpamatuod sa moderno nga mga propeta ug mga kamatuoran nga nakita dinhi sa leksyon.