Leksyon 15

Doktrina ug mga Pakigsaad 37–38; 41

Pasiuna ug Timeline

Sa hinapos sa Disyembre 1830, si Propeta Joseph Smith mipadayon sa pagtrabaho sa iyang dinasig nga hubad sa Biblia. Atol niini nga panahon, nadawat ni Joseph Smith ang pagpadayag nga girekord diha sa Doktrina ug mga Pakigsaad 37. Niini nga pagpadayag, misugo ang Ginoo sa Propeta sa paghunong una sa paghubad sa Biblia ug sa pagsangyaw sa ebanghelyo ug sa paglig-on sa Simbahan. Misugo usab siya sa mga Santos sa pagpundok ngadto sa Ohio.

Diha sa usa ka komperensya sa Simbahan nga gihimo niadtong Enero 2, 1831, mipahibalo si Joseph Smith sa sugo sa Ginoo alang sa mga Santos nga papundokon ngadto sa Ohio. Daghang mga Santos nagtinguha nga mahibalo pa mahitungod sa sugo, busa nangutana ang Propeta atol sa komperensya. Nadawat ni Joseph Smith ang pagpadayag nga girekord diha sa Doktrina ug mga Pakigsaad 38 atubangan sa kongregasyon. Niini nga pagpadayag, gipadayag sa Ginoo ang Iyang mga katarungan sa pagsugo sa mga Santos nga magpundok sa Ohio ug gipasabut ang gisaad nga panalangin sa pagbuhat sa mao.

Kadaghanan sa mga Santos midawat sa sugo ug misugod sa pagpangandam aron mobalhin ngadto sa Ohio. Duol sa katapusan sa Enero 1831, si Propeta Joseph, ang iyang asawa, si Emma, ug uban pa mibiyahe pinaagi sa balsa sa yelo gikan sa New York ngadto sa Ohio ug miabut sa Kirtland sa sayo nga bahin sa Pebrero. Sa Pebrero 4, nadawat ni Joseph ang pagpadayag nga girekord diha sa Doktrina ug mga Pakigsaad 41, diin ang Ginoo mitudlo sa Propeta ug sa ubang mga lider sa Simbahan sa pag-ampo nga madawat ang Iyang balaod. Agi og dugang, gitawag sa Ginoo si Edward Partridge isip ang unang bishop sa Simbahan.

Disyembre 1830Misugod si Sidney Rigdon isip usa ka tigsulat alang ni Joseph Smith sa panahon sa dinasig nga pag-usab sa Biblia.

Disyembre 1830Samtang naghubad sa Biblia, nadawat ni Joseph Smith ang bahin sa karaang rekord ni Enoch (Moises 7).

Disyembre 1830Ang Doktrina ug mga Pakigsaad 37 nadawat.

Enero 2, 1831Atol sa ikatulong komperensya sa Simbahan gi-anunsyo ni Joseph Smith nga ang mga Santos kinahanglang magpundok ngadto sa Ohio.

Enero 2, 1831Ang Doktrina ug mga Pakigsaad 38 nadawat.

Enero–Pebrero 1831Mibalhin si Joseph ug si Emma Smith ngadto sa Kirtland, Ohio, ug miabut sayo sa Pebrero.

Pebrero 4, 1831Ang Doktrina ug mga Pakigsaad 41 nadawat.

Mga Sugyot alang sa Pagtudlo

Doktrina ug mga Pakigsaad 37

Ang Ginoo misugo sa Iyang Simbahan nga magpundok ngadto sa Ohio

Dapita ang mga estudyante sa pagkonsiderar og pipila ka mga sugo nga sa ilang hunahuna sayon nga sundon. Dayon pangutan-a sila sa pagkonsiderar og mga sugo nga sa ilang pagtuo lisud sundon.

Dapita ang mga estudyante sa pagpangita sa mga kamatuoran samtang sila nagtuon sa Doktrina ug mga Pakigsaad 37–38 nga motabang kanila sa pagpangita sa kalig-on sa pagsunod sa mga sugo sa Dios bisan og ang pagbuhat sa mao tingali malisud.

Ipasabut nga human makahimamat sa Propeta sayo sa Disyembre 1830, mipabilin si Sidney Rigdon sa Fayette ug, ubos sa direksyon sa Ginoo, nahimong sinaligan sa sekreto ug tigsulat ni Joseph Smith samtang mitrabaho si Joseph sa paghubad sa Biblia. Wala madugay niana nga bulan, gihatag sa Ginoo ni Joseph Smith ang pagpadayag nga gilangkub diha sa Doktrina ug mga Pakigsaad 37.

Dapita ang usa ka estudyante sa pagbasa og kusog sa Doktrina ug mga Pakigsaad 37:1–4 ug hangyoa ang klase sa pagpangita kon unsa ang gitudlo sa Ginoo ni Joseph Smith nga ipabuhat.

• Unsay gisugo kang Joseph nga ipabuhat?

• Ngano kahang gisugo sa Ginoo si Joseph ilabi na sa paglig-on sa mga Santos sa Colesville? (Kon gikinahanglan, pahinumdumi ang mga estudyante nga ang mga Santos sa Colesville nahimong nagsagubang sa nagtubo nga pagpanggukod.)

• Unsa nga sugo ang gihatag sa Ginoo sa mga Santos diha sa bersikulo 3?

• Sa unsa kaha unta nga paagi motubag ang mga Santos sa sugo sa Ginoo sa pagbalhin ngadto sa gibana-bana nga 480 ka kilometro nga wala masayud sa eksakto kon ngano?

Doktrina ug mga Pakigsaad 38:1–22

Nagpahayag ang Ginoo sa Iyang pagkasayud sa tanan ug nagpasalig sa mga Santos nga Siya anaa sa ilang taliwala

Ipasabut nga niadtong Enero 2, 1831, wala madugay human nadawat ni Joseph Smith ang pagpadayag nga girekord diha sa Doktrina ug mga Pakigsaad 37, nag-abut ang mga Santos didto sa Fayette, New York, alang sa ikatulong komperensya sa Simbahan. Niini nga komperensya, ang mga miyembro ug mga lider sa Simbahan naghisgot sa sugo sa Ginoo nga magpundok ngadto sa Ohio. Daghang mga miyembro sa Simbahan ang mipahayag sa ilang kabalaka mahitungod sa sugo atol sa komperensya.

• Unsa kaha nga mga kabalaka ang anaa niining pipila ka mga Santos?

Ipasabut nga tungod kay kadtong anaa sa komperensya nabalaka ug nagtinguha nga mahibalo mahitungod sa sugo nga magpundok ngadto sa Ohio, nangutana si Joseph Smith sa Ginoo. Diha atubangan sa mga Santos, nadawat ni Joseph Smith ang pagpadayag nga girekord diha sa Doktrina ug mga Pakigsaad 38.

Dapita ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 38:1–7. Hangyoa ang klase sa pagsunod ug sa pagpangita alang sa unsay gisulti sa Ginoo sa mga Santos nga tingali nakapalig-on sa ilang pagtuo ug pagsalig diha Kaniya ug sa Iyang sugo nga magpundok ngadto sa Ohio. Dapita ang mga estudyante sa pagreport unsay ilang nakit-an.

• Unsa ang gipadayag sa Ginoo mahitungod sa Iyang Kaugalingon Mismo diha sa mga bersikulo 2 ug 7 nga makatabang sa paglig-on sa atong pagsalig ug hugot nga pagtuo diha Kaniya? (Human matubag sa mga estudyante, isulat ang mosunod diha sa pisara: Tungod kay si Jesukristo nahibalo sa tanang mga butang ug nakakita sa tanang mga butang, makabaton kita og hugot nga pagtuo ug pagsalig diha Kaniya.)

• Sa unsa nga paagi kaha kini nga doktrina nagtabang sa mga Santos sa pagtubag sa malisud nga sugo sa pagbalhin?

• Sa unsa nga paagi kini nga doktrina nagtabang kanato kon ang Ginoo nagkinahanglan og usa ka butang nga malisud gikan kanato?

Ipasabut ang hugpong sa mga pulong “Ako mao gihapon ang mikuha sa Zion ni Enoch ngari sa akong kaugalingon nga sabakan” diha sa bersikulo 4, ug ipasabut nga sa wala pa madawat kini nga pagpadayag, si Joseph Smith nagtrabaho sa dinasig nga hubad sa Biblia ug girekord sa unsa karon Moises 6–7 diha sa Perlas nga Labing Bililhon. Kini nga mga kapitulo nag-istorya bahin sa usa ka propeta nga ginganlan og Enoch ug sa iyang katawhan. Tungod sa ilang pagkamatarung ug panaghiusa, gitawag sa Ginoo kini nga katawhan og Zion. Samtang giandam sa Ginoo ang mga Santos sa pag-estabilisar sa Zion, gitudloan Niya sila kalabut ni Enoch ug sa mga katawhan sa karaan. Kini nga baruganan sa panaghiusa, pagkamatarung, ug sa pag-amuma sa kabus, nga nakat-unan sa mga santos gikan sa istorya sa mga katawhan ni Enoch diha sa Moises 7, gibalik sa Ginoo diha sa seksyon 38 isip ang mga baruganan diha diin ang Zion sa ulahing mga adlaw pagatukuron.

Ihulagway ang lisud nga mga pulong ug hugpong sa mga pulong

Samtang nagtuon ang mga estudyante sa mga kasulatan, mahimong makasugat sila og mga pulong nga dili pamilyar o lisud masabtan. Makatabang ka sa mga estudyante pinaagi sa pagtudlo kanila kon unsaon paggamit ang mga diksyunaryo, mga manwal sa estudyante, mga footnote, ug mga tabang sa pagtuon sa kasulatan sa pagpatinaw sa malisud nga mga pulong o mga hugpong sa mga pulong ug sa ingon mas masabtan ang sulod sa mga kasulatan.

• Ngano kaha ang Ginoo naggamit sa ehemplo ni Enoch ug sa iyang mga katawhan sa pagtabang sa mga Santos sa New York sa pagbaton og hugot nga pagtuo ug pagsalig diha Kaniya?

Ipasabut nga diha sa Doktrina ug mga Pakigsaad 38:8–12 ang Ginoo mipahimatngon sa mga Santos mahitungod sa gahum sa kangitngit dinhi sa kalibutan. Dayon mihatag Siya og piho nga pasidaan kabahin sa kuyaw nga giatubang sa mga Santos sa New York. Dapita ang usa ka estudyante sa pagbasa og kusog sa Doktrina ug mga Pakigsaad 38:13–16. Dapita ang klase sa pagsunod, nga mangita alang sa unsay gisulti sa Manluluwas mahitungod sa kakuyaw nga anaa sa mga Santos.

• Sumala sa bersikulo 13, unsay gisulti sa Ginoo sa mga Santos mahitungod sa tuyo sa ilang mga kaaway?

• Sa unsa nga paagi nga ang pasidaan sa Ginoo diha sa bersikulo 13 nagpakita kon ngano nga kita makabaton og hugot nga pagtuo ug pagsalig diha Kaniya?

• Sumala sa bersikulo 16, ngano nga ang Ginoo naghatag sa mga Santos og sugo nga mobalhin ngadto sa Ohio?

Pagpamatuod nga tungod kay Siya nahibalo sa tanang mga butang ang Ginoo makapasidaan kanato sa mga kuyaw ug makahatag og mga sugo alang sa atong kaluwasan.

Ipasabut nga diha sa Doktrina ug mga Pakigsaad 38:17–22, misulti ang Ginoo sa mga Santos nga Siya milalang sa yuta ug nagtinguha Siya sa pagpanalangin ug pagpauswag sa Iyang mga katawhan.

• Sa unsa nga paagi kini nga mga saad gikan sa Ginoo nagtabang sa pagpagaan sa kabalaka sa mga Santos kabahin sa pagbiya sa ilang mga panimalay ug mga umahan aron sa pagbalhin ngadto sa Ohio?

Doktrina ug mga Pakigsaad 38:23–42

Gisugo sa Ginoo ang mga Santos nga maghiusa ug nagpasabut nganong Siya mitawag kanila nga magpundok sa Ohio

Ipasabut nga agi og dugang sa pagsulti sa mga Santos mahitungod sa mga tuyo sa ilang mga kaaway, gitudloan usab sila sa Ginoo kon unsa ang Iyang gikinahanglan kanila isip Iyang mga katawhan. Dapita ang mga estudyante sa pagbasa og hilum sa Doktrina ug mga Pakigsaad 38:24–27 nga mangita sa unsay gikinahanglan sa Ginoo sa mga Santos.

• Ngano kaha ang Ginoo nagsugo kanato sa pagtagad, o sa paghatag og bili, sa uban nga mga tawo sama sa atong pagtagad sa atong mga kaugalingon?

• Unsa nga baruganan ang atong makat-unan gikan sa sambingay ug sa pagpasabut sa Ginoo diha sa mga bersikulo 26–27? (Human matubag sa mga estudyante, isulat ang mosunod nga baruganan diha sa pisara: Kon kita dili mahimong usa, dili kita mahimo nga mga katawhan sa Ginoo.)

Aron matabangan ang mga estudyante sa pagsabut kon unsa ang kahulugan nga “mahimong usa,” hangyoa sila sa pagbasa og hilum sa paghulagway sa Ginoo sa mga katawhan sa Zion diha sa Moises 7:18.

• Sumala niini nga bersikulo, unsay kahulugan sa mahimong usa?

• Sa unsang paagi kaha kini nga baruganan nagtabang sa mga Santos sa ilang pagbalhin ngadto sa Ohio?

• Unsa nga mga panalangin ang imong nakita sa imong pamilya o diha sa Simbahan gikan sa pagpuyo niini nga baruganan?

Dapita ang mga estudyante sa pagbasa og hilum sa Doktrina ug mga Pakigsaad 38:28–33 nga mangita sa mga katarungan kon nganong gisugo sa Ginoo ang mga Santos sa pagpundok ngadto sa Ohio.

• Sumala niini nga mga bersikulo, unsa ang pipila ka mga katarungan kon nganong ang Ginoo misugo sa mga Santos nga magpundok ngadto sa Ohio?

• Unsa nga mga kamatuoran ang atong makat-unan gikan niini nga mga bersikulo mahitungod kon ngano ang Ginoo nagpundok sa Iyang mga katawhan? (Siguroha nga ang mga estudyante makaila og usa ka kamatuoran susama sa mosunod: Ang Ginoo nagpundok sa Iyang mga katawhan aron sa pagpanalipod kanila ug paglig-on kanila sa espiritwal nga paagi.)

Ipasabut nga sa pila ka mga panahon, ang Ginoo nagsugo sa Iyang mga katawhan nga pisikal nga magpundok ngadto sa usa ka dapit. Sa atong panahon, nagsugo ang Ginoo kanato nga espiritwal nga magpundok ngadto sa mga ward, mga stake, ug mga templo bisan hain kita nagpuyo.

• Sa unsa nga paagi nga ang pagpundok diha sa mga ward, mga stake, ug mga templo nagtabang sa pagpanalipod ug paglig-on kanato?

Ipasabut nga diha sa Doktrina ug mga Pakigsaad 38:34–42 ang Ginoo mihatag og mga sugo ug tambag ngadto sa mga Santos nga motabang kanila diha sa ilang mga paninguha sa pagbalhin ngadto sa Ohio. Dapita ang usa ka estudyante sa pagbasa og kusog sa Doktrina ug mga Pakigsaad 38:37, 39 ug hangyoa ang klase sa pagpangita sa tambag ug saad sa Ginoo.

• Unsay gitambag sa Ginoo sa mga Santos nga buhaton, ug unsay Iyang gisaad kanila?

• Unsa nga kalainan kaha ang nahimo niini nga mga saad ngadto sa mga Santos kinsa gihangyo sa pagbalhin?

• Sa unsa nga paagi kini nga mga saad nagdugang sa inyong tinguha sa pagsunod sa mga sugo sa Ginoo?

Pagpamatuod sa mga panalangin nga moabut kanato samtang kita nagbuhat unsay gisugo sa Ginoo sama lamang nga ang mga Santos gisaaran og mga panalangin tungod sa pagpundok didto sa Ohio.

Dapita ang mga estudyante sa paghunahuna pag-usab mahitungod sa usa ka sugo nga tingali sila adunay kalisud sa pagsunod.

• Sa unsa nga paagi nga ang mga kamatuoran nga atong nakat-unan diha sa Doktrina ug mga Pakigsaad 37–38 nagtabang kanato sa pagbaton og kalig-on sa pagsunod niadto nga mga sugo?

Dapita ang mga estudyante sa paghimo og pasalig sa pagsunod sa mga sugo bisan kon kini tingali ingon og malisud sa pagbuhat sa mao.

Sultihi ang mga estudyante nga human sa komperensya sa Simbahan, ang mga Santos nagpuasa ug nag-ampo aron mahibalo sa kabubut-on sa Ginoo. Human madawat ang usa ka espiritwal nga panghimatuod kabahin sa sugo, daghan kanila mihimo og dako nga mga sakripisyo sa pagpundok uban sa mga Santos didto sa Ohio.

Doktrina ug mga Pakigsaad 41

Ang Ginoo nagtudlo nga ang tinuod nga mga disipulo motuman sa Iyang balaod

Ipasabut nga niadtong Enero 1831, si Joseph Smith ug ang iyang asawa, si Emma, kinsa unom ka bulan nga mabdos, mibalhin gikan sa New York ngadto sa Ohio ug miabut sa Kirtland sa sinugdanan sa Pebrero. Sa dihang miabut ang Propeta, ang mga miyembro sa Simbahan “naninguha sa pagbuhat sa kabubut-on sa Dios, kutob sa ilang nahibaloan niini; bisan tuod og katingad-ang mga hunahuna ug mini nga mga espiritu mihinay-hinay pagsulod diha kanila” (Joseph Smith, Manuscript History of the Church, vol. A-1, p.93, josephsmithpapers.org). Sa iyang pag-abut, nadawat sa Propeta ang pagpadayag nga girekord diha sa Doktrina ug mga Pakigsaad 41.

Dapita ang usa ka estudyante sa pagbasa og kusog sa Doktrina ug mga Pakigsaad 41:1–6 ug hangyoa ang klase sa pagpangita alang sa unsay gisulti sa Ginoo sa Propeta kon siya moabut sa Kirtland.

• Unsa ang gisugo sa Ginoo nga buhaton sa mga elder sa Simbahan?

• Sumala sa bersikulo 5, kinsa ang gihunahuna sa Ginoo nga mahimo Niya nga mga disipulo? (Tabangi ang mga estudyante sa pag-ila sa mosunod nga doktrina: Kadtong kinsa nagdawat ug nagsunod sa balaod sa Ginoo tinuod nga mga disipulo ni Jesukristo.)

• Sa unsa nga paagi kaha kini nga kamatuoran nagtabang niadtong mga Santos sa Kirtland kinsa nagpatalinghug sa bakak nga mga espiritu ug kahibudngang relihiyosong mga hunahuna? Sa unsang paagi kini makatabang kanato?

I-summarize ang Doktrina ug mga Pakigsaad 41:7–12 pinaagi sa pagpasabut nga sa katapusan niini nga pagpadayag misulti ang Ginoo sa mga Santos sa pagtukod og balay alang ni Joseph nga kapuy-an ug makahubad ug nga Iyang tawgon si Edward Partridge isip ang unang bishop sa Simbahan.

Tapusa pinaagi sa pagpamatuod sa mga kamatuoran nga gitudlo niini nga leksyon.