Niadtong, Pebrero 16, 1832 , samtang si Propeta Joseph Smith ug Sidney Rigdon nagtrabaho sa dinasig nga hubad sa Biblia ug namalandong sa kahulugan sa Juan 5:29, gipakita sila og usa ka panan-awon, nga girekord diha sa Doktrina ug mga Pakigsaad 76. Sa parte sa panan-awon nga narekord diha sa Doktrina ug mga Pakigsaad 76:50–119, gipakita si Joseph ug Sidney sa mga lumulupyo sa celestial, terrestrial, ug telestial nga gingharian ug sa kaimportante sa pagdawat ug pagmaisugon sa pagpamatuod mahitungod ni Jesukristo.
Enero 25, 1832Giorden si Joseph Smith isip Presidente sa Halangdon nga Pagkapari panahon sa usa ka komperensya sa Simbahan sa Amherst, Ohio.
Ulahing bahin sa Enero 1832Si Joseph Smith ug Sidney Rigdon mibalik sa Hiram, Ohio, aron motrabaho sa dinasig nga hubad sa Bag-ong Tugon.
Marso 24–25, 1832Si Joseph Smith ug Sidney Rigdon gikuha sa panon sa mga manggugubot panahon sa kagabhion, gibun-og pag-ayo, ug gipapilitan og alkitran ug mga balahibo didto sa Hiram, Ohio.
Gipakita si Joseph Smith ug Sidney Rigdon niadtong makadawat og celestial nga himaya
Basaha og kusog ang mosunod nga mga sitwasyon, ug hangyoa ang mga estudyante sa paghunahuna unsaon nila sa pagtubag. Siguroa nga mohatag ka og igong panahon human sa matag usa aron mahan-ay nila ang ilang mga hunahuna.
Usa ka batan-ong lalaki nagtuo nga tungod kay ang Dios nahigugma sa tanan Niyang mga anak, mopanalangin Siya kanato bisan unsa pa ang atong buhaton. Nagtuo usab siya nga bisan tuod silotan kita sa atong mga sala, sa katapusan maluwas kitang tanan diha sa gingharian sa Dios.
Usa ka batan-ong babaye nagtuo nga kon hingpit siyang mosunod sa matag sugo, maluwas siya sa gingharian sa Dios.
Usa ka tawo nangangkon nga tungod kay siya natawo pag-usab, maluwas siya sa gingharian sa Dios bisan unsa pa ang iyang buhaton niining kinabuhia.
Sa unsang paagi kining managlahi nga mga panglantaw makaapekto sa mga lihok sa usa ka tawo dinhi sa mortalidad?
Ipasabut nga managlahi ang mga relihiyon sa ilang mga pagtulun-an mahitungod sa kinabuhi human sa kamatayon, karon ug ingon man usab niadtong 1832, sa dihang ang pinadayag nga narekord diha sa Doktrina ug mga Pakigsaad 76 gihatag. Sama pananglit, kadaghanan sa Kristiyano nga mga relihiyon nagtudlo nga ang tanang tawo mahiadto sa langit o sa impyerno human sa kamatayon. Ang ubang mga relihiyon, sama sa mga Universalist, nagtudlo nga si Jesukristo temporaryong mosilot sa mga makasasala apan motubos sa tanang katawhan sa katapusan.
Samtang magtuon ang mga estudyante sa Doktrina ug mga Pakigsaad 76:50–119 karon, dapita sila sa pagpangita sa doktrina ug mga baruganan nga makatabang kanila sa pagsabut sa kinabuhi human sa kamatayon ug unsa ang gikinahanglan alang sa kaluwasan ug kinabuhing dayon.
Ribyuha ang Doktrina ug mga Pakigsaad 76:1–49 pinaagi sa pagdapit og pipila ka mga estudyante sa pag-summarize sa parte sa panan-awon nga gitun-an sa miaging leksyon.
Bahina ang pisara ngadto sa tulo ka kolum, ug sulati kini og sama sa mosunod: Celestial nga Himaya: D&P 76:50–70, 92–96; Terrestrial nga Himaya: D&P 76:71–80, 87, 91, 97; ug Telestial nga Himaya: D&P 76:81–86, 88–90, 98–112. Ipasabut nga diha sa nahibilin sa Doktrina ug mga Pakigsaad 76, ang Ginoo mipadayag og pipila sa unsay gikinahanglan aron makapanunod sa matag usa niini nga mga gingharian sa himaya.
Dapita ang usa ka estudyante sa pagbasa og kusog sa Doktrina ug mga Pakigsaad 76:50–53. Hangyoa ang klase sa pagsunod, nga mangita kon unsay makapahimong takus sa usa ka tawo aron makadawat sa celestial nga himaya. Human sa igong panahon, dapita ang pipila ka mga estudyante sa pag-adto sa pisara aron sa pagsulat niini nga mga kwalipikasyon ubos sa “Celestial nga Himaya.”
Unsa kaha ang gipasabut nga modawat sa pagpamatuod mahitungod ni Jesukristo ug motuo diha sa Iyang ngalan (bersikulo 51)? (Ang mga tubag mahimong maglakip sa pag-angkon og pagpamatuod pinaagi sa personal nga pagpadayag nga si Jesukristo mao ang Manluluwas ug paglihok sumala niana nga pagpamatuod.)
Ipasabut nga ang mga pulong nga “sumala sa sugo” (bersikulo 51) ug “pinaagi sa paghupot sa mga sugo” (bersikulo 52) nagpasabut sa pagsunod sa mga baruganan ug mga ordinansa sa ebanghelyo nga gihulagway diha sa bersikulo 51.
Sa unsang paagi ang usa ka tawo “nakabuntog pinaagi sa hugot nga pagtuo” (bersikulo 53)? (Ang pagbuntog pinaagi sa hugot nga pagtuo nagpasabut sa pagbuntog sa mga tintasyon ug mga sala pinaagi sa pagpakita og hugot nga pagtuo diha ni Jesukristo ug sa matinud-anong paglahutay sa mga pagsulay.)
Unsay ipasabut sa “gibugkos pinaagi sa Balaan nga Espiritu sa saad” (bersikulo 53)? (Tabangi ang mga estudyante nga makasabut nga ang Balaan nga Espiritu sa saad mao ang Espiritu Santo. Mabugkos kita pinaagi sa Balaan nga Espiritu sa saad kon ang Espiritu Santo mopamatuod sa mga ordinansa nga atong nadawat, o mosaksi ngadto sa Langitnong Amahan nga tukma kini nga gipahigayon ug nga kita nagmatinud-anon sa mga pakigsaad nga atong gihimo.)
Balik ngadto sa lista diha sa pisara, ug pangutan-a ang mga estudyante kon unsaon nila pag-summarize ang unsay kinahanglan natong buhaton aron makadawat sa celestial nga himaya. Human makatubag ang mga estudyante, isulat sa pisara ang mosunod nga baruganan: Aron makadawat og celestial nga himaya, kinahanglan kitang makadawat og pagpamatuod mahitungod ni Jesukristo, modawat sa mga ordinansa sa ebanghelyo, ug mobuntog sa sala ug tintasyon pinaagi sa hugot nga pagtuo diha ni Jesukristo.
Dapita ang mga estudyante sa pagbasa og hilum sa Doktrina ug mga Pakigsaad 76:54–68, nga mangita sa mga panalangin nga ihatag sa Ginoo niadtong makadawat sa celestial nga himaya. Human sa igong panahon, dapita ang mga estudyante sa pagreport kon unsay ilang nakat-unan. Kinahanglan tingali nimong ipasabut nga ang mga pulong nga “simbahan sa Unang Natawo” diha sa bersikulo 54 nagpasabut sa mga miyembro sa Simbahan kinsa takus nga makaangkon sa kinabuhing dayon, o kahimayaan (tan-awa sa Joseph Fielding Smith, Doctrines of Salvation, comp. Bruce R. McConkie [1955], 2:41–42).
Hain niini nga mga mga panalangin ang labing makahuluganon kaninyo ug ngano?
Dapita ang usa ka estudyante sa pagbasa og kusog sa Doktrina ug mga Pakigsaad 76:69–70. Hangyoa ang klase sa pagsunod, nga mangita kon giunsa paghulagway kadtong makadawat sa celestial nga himaya.
Ipasabut nga ang pulong “makiangayon nga mga tawo” sa bersikulo 69 nagpasabut sa mga lalaki ug mga babaye kinsa naningkamot nga magpuyo nga matarung apan dili hingpit sa panahon sa ilang mortal nga kinabuhi.
Unsa ang gitudlo kanato niini nga mga bersikulo kon unsaon nato nga mahimong takus sa pagdawat sa celestial nga himaya? (Human makatubag ang mga estudyante, isulat sa pisara ang mosunod nga doktrina: Mamahimo lamang kitang hingpit pinaagi ni Jesukristo.)
Pagpamatuod nga samtang ang atong labing maayong mga paningkamot sa pagsunod sa mga sugo dili makahimo kanato nga hingpit, ang atong mga paningkamot motabang kanato nga makadawat sa grasya sa Manluluwas ug malimpyuhan pinaagi sa Iyang “hingpit nga pag-ula” (D&P 76:69).
Sa unsang paagi ang pagsabut niini nga doktrina makaawhag kanato samtang maningkamot kita alang sa kahimayaan diha sa celestial nga gingharian?
Gipakita si Joseph Smith ug Sidney Rigdon niadtong makadawat og terrestrial nga himaya
Dapita ang usa ka estudyante sa pagbasa og kusog sa Doktrina ug mga Pakigsaad 76:71. Hangyoa ang klase sa pagsunod, nga mangita sa unsay gipakita og sunod ngadto ni Joseph Smith ug Sidney Rigdon.
Sa unsang paagi ang himaya niadtong anaa sa terrestrial nga gingharian makumpara sa himaya niadtong anaa sa celestial nga gingharian?
Ipasabut nga sama nga ang adlaw mas hayag kay sa bulan, kadtong makabaton og celestial nga mga lawas mabanhaw uban sa mas dako nga himaya ug mga panalangin kay sa niadtong makabaton og terrestrial nga mga lawas.
Hangyoa ang mga estudyante sa pagbasa sa Doktrina ug mga Pakigsaad 76:72–80 nga adunay kaparis ug sa paghisgot kon sa unsang paagi kadtong makadawat og terrestrial nga himaya lahi niadtong makadawat og celestial nga himaya. Human sa igong panahon, dapita ang mga estudyante sa paghulagway sa mga kalainan nga ilang nakit-an. Isulat ang ilang mga tubag diha sa pisara ubos sa “Terrestrial nga Himaya.”
Itudlo ang mga hugpong sa mga pulong nga “sila kinsa namatay nga wala masayud sa balaod” diha sa bersikulo 72 ug “kinsa wala midawat sa pagpamatuod ni Jesus diha sa unod, apan sa pagkahuman midawat niini” diha sa bersikulo 74, ug ipasabut nga kini mahimong naghisgot niadtong kinsa wala modawat sa ebanghelyo dinhi sa yuta apan nagpuyo og moral nga mga kinabuhi, ingon man niadtong wala makadungog sa ebanghelyo. Aron matabangan ang mga estudyante nga mas makasabut sa kahulugan niini nga mga tudling, dapita sila sa pagpakli ngadto sa Doktrina ug mga Pakigsaad 137:7–8, ug dapita ang usa ka estudyante sa pagbasa og kusog niini nga mga bersikulo.
Unsa ang giklaro sa Ginoo niini nga mga bersikulo mahitungod niadtong nangamatay nga wala makahibalo sa ebanghelyo? (Kadtong “kinsa makadawat unta niini sa ilang tibuok nga kasingkasing” [D&P 137:8] kon nakabaton pa sila sa oportunidad makapanunod sa celestial nga gingharian.)
Unsa kaha ang gipasabut sa mga pulong nga “nabutaan pinaagi sa pagkamalimbungon sa mga tawo” diha sa Doktrina ug mga Pakigsaad 76:75? Sa unsa nga mga paagi ang mga tawo mahimong mabutaan sa pagkamalimbungon sa mga tawo?
Unsay gipasabut sa mga pulong nga “kini mao sila kinsa dili mga maisug diha sa pagpamatuod ni Jesus” sa bersikulo 79?
Kon ang tawo nga dili maisugon sa iyang pagpamatuod mahitungod ni Jesukristo makadawat og terrestrial nga himaya, unsa nga kamatuoran ang gipasabut niini mahitungod niadtong maisugon sa pagpamatuod mahitungod ni Jesukristo? (Kinahanglang makaila ang mga estudyante og baruganan nga susama sa mosunod: Kon maisugon kita sa pagpamatuod mahitungod ni Jesukristo, makadawat kita og celestial nga himaya.)
Aron matabangan ang mga estudyante nga makasabut kon unsay gipasabut nga mahimong maisugon sa pagpamatuod mahitungod ni Jesukristo, dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie (1915–1985) sa Korum sa Napulog Duha ka mga Apostoles:
Imahe
Elder Bruce R. McConkie
“Ang pagkamaisugon diha sa pagpamatuod mahitungod ni Jesus mao ang pagtuo diha ni Kristo ug sa iyang ebanghelyo uban sa dili matarug nga kombiksyon. …
“Apan dili kini ang tanan. Kini labaw pa kay sa pagtuo ug pagkahibalo. Kinahanglan gayud nga kita mga tigbuhat sa pulong ug dili lamang tigpaminaw. Kini labaw pa kay sa pagsulti lang; kini dili yano nga pagkumpisal pinaagi sa ba-ba sa balaang Pagkaanak sa Manluluwas. Kini ang pagkamasulundon ug pag-uyon ug personal nga pagkamatarung. …
“Ang pagkamaisugon diha sa pagpamatuod mahitungod ni Jesus mao ang … ‘paglahutay ngadto sa katapusan.’ (2 Ne. 31:20.) Kini mao ang pagsunod sa atong relihiyon, ang pagbuhat sa unsay atong gisangyaw, sa pagsunod sa mga sugo.” …
“Ang pagkamaisugon sa pagpamatuod mahitungod ni Jesus mao ang pagdapig sa Ginoo sa tanang butang. … Sa paghunahuna sama sa iyang gihunahuna, sa pagtuo unsay iyang gituhoan, sa pagsulti unsay iyang isulti ug sa pagbuhat unsay iyang buhaton sa sama nga sitwasyon. Mao kini ang pagbaton sa hunahuna ni Kristo ug mahiusa diha kaniya sama nga siya usa sa iyang Amahan” (Bruce R. McConkie, “Be Valiant in the Fight of Faith,” Ensign, Nob. 1974, 35).
Paghunahuna og tawo nga inyong gikonsiderar nga maisugon diha sa iyang pagpamatuod mahitungod ni Jesukristo. Unsa nga mga kinaiya ug mga lihok ang nagpakita sa pagkamaisugon niining tawhana?
Dapita ang mga estudyante sa paghunahuna kon unsa sila ka maisugon sa ilang pagpamatuod mahitungod ni Jesukristo. Dapita ang mga estudyante sa pagpili og usa ka butang nga ilang mabuhat aron mahimong mas maisugon sa ilang pagpamatuod mahitungod ni Jesukristo.
Gipakita si Joseph Smith ug Sidney Rigdon niadtong makadawat sa telestial nga himaya
Dapita ang usa ka estudyante sa pagbasa og kusog sa Doktrina ug mga Pakigsaad 76:81–83, 101, 103. Hangyoa ang klase sa pagsunod, nga mangita kon unsay nakita ni Joseph Smith ug Sidney Rigdon kalabut niadtong makadawat sa telestial nga himaya.
Kinsa ang makadawat sa telestial nga himaya? (Isulat sa pisara ang mga tubag sa mga estudyante ubos sa “Telestial nga Himaya.”)
Dapita ang mga estudyante sa pagbasa og hilum sa Doktrina ug mga Pakigsaad 76:84–85, 104–106, nga mangita kon unsay mahitabo sa mga dautan sa dili pa sila makadawat sa telestial nga himaya.
Unsay mahitabo sa mga dautan sa dili pa sila makadawat sa telestial nga himaya?
Ipasabut nga tungod kay dili sila maghinulsol sa mortalidad, kadtong makadawat sa telestial nga himaya kinahanglang mag-antus sa ilang mga sala sa “impyerno” (D&P 76:84, 106; tan-awa usab sa D&P 19:4–12). Niini nga mga bersikulo, ang impyerno nagpasabut sa bilangguan sa espiritu ug wala magpasabut sa katapusan nga kahimtang sa mga dautan. Sa pagtapos sa Milenyum, kini nga mga tawo mobangon diha sa Pagkabanhaw sa dili makiangayon ug makapanunod sa telestial nga gingharian.
Dapita ang usa ka estudyante sa pagbasa og kusog sa Doktrina ug mga Pakigsaad 76:109–111. Hangyoa ang klase sa pagsunod, nga mangita kon unsay mahitabo kon kadtong makadawat sa telestial nga himaya moduol sa Dios aron pagahukman. Dapita ang mga estudyante sa pagreport kon unsa ang ilang makit-an.
Dapita ang lain nga estudyante sa pagbasa og kusog sa Doktrina ug mga Pakigsaad 137:9. Hangyoa ang klase sa pagsunod, nga mangita kon unsa pa ang atong makat-unan kon sa unsang paagi kita pagahukman.
Unsa nga doktrina ang atong makat-unan gikan niini nga mga bersikulo kon unsay modeterminar sa gingharian sa himaya nga atong mapanunod? (Human makatubag ang mga estudyante, isulat sa pisara ang mosunod nga doktrina: Ang gingharian sa himaya nga atong mapanunod ideterminar pinaagi sa atong mga binuhatan ug sa mga tinguha sa atong kasingkasing.)
Sa unsang paagi ang pagsabut niini nga doktrina makatabang kanato samtang maningkamot kita nga mahimong celestial nga katawhan?
Si Joseph Smith ug Sidney Rigdon mipasabut kon sa unsang paagi ang uban makadawat sa kahibalo nga ilang nadawat pinaagi sa pagpadayag
I-summarize ang Doktrina ug mga Pakigsaad 76:113–19 pinaagi sa pagpasabut nga human sa paghulagway niini nga panan-awon, si Joseph Smith ug Sidney Rigdon namahayag nga ang Ginoo misugo kanila nga dili isulat ang tanan nga gipakita kanila. Mipasabut usab sila nga pinaagi sa gahum sa Espiritu Santo, ang uban mahimong makadawat sa kahibalo nga ilang nadawat.
Ipaambit ang imong pagpamatuod sa mga kamatuoran nga natudlo diha sa leksyon karon. Tapusa pinaagi sa pagsulat sa mga pulong nga Sugod, Hunong, ug Padayon diha sa pisara, ug hangyoa ang mga estudyante sa pagtino kon unsay ilang sugdan, hunungon, o ipadayon sa pagbuhat tungod sa ilang nakat-unan sa leksyon karon.