Sa dihang miabut si Propeta Joseph Smith sa Kirtland, Ohio, sa sayong bahin sa Pebrero 1831, nakaobserbar siya nga “pipila ka kahibudngan nga mga ideya ug mini nga mga espiritu ang hinay-hinay nga gisunod” sa mga Santos. Misugod siya sa pagtudlo uban sa “pagpahimangno, ug pipila ka kaalam” aron sa paghunong niining mini nga espiritwal nga mga pagpakita (Manuscript History of the Church, vol. A-1, p. 93, josephsmithpapers.org). Paglabay sa pipila ka bulan, miuli si Elder Parley P. Pratt gikan sa misyon ug nakaobserbar og susama nga linihokan diha sa mga branch sa Simbahan sa gawas sa Kirtland, mao nga siya ug ang pipila ka mga elder nangayo og giya kang Joseph Smith (tan-awa sa Manuscript History, vol. A-1, p. 114, josephsmithpapers.org). Pagka-Mayo 1831, nangutana ang Propeta sa Ginoo ug nakadawat sa pinadayag nga narekord diha sa Doktrina ug mga Pakigsaad 50. Niini nga pinadayag, ang Ginoo mimando sa mga Santos sa paglikay sa pagpanglingla pinaagi sa pagtudlo ug pagdawat sa ebanghelyo pinaagi sa Espiritu sa kamatuoran.
Tingpamulak sa 1831Ang pipila ka mga miyembro sa Simbahan sa Kirtland naimpluwensyahan sa mini nga espiritwal nga mga pagpakita.
Sa ulahing bahin sa Marso o sayong bahin sa Abril, 1831Si Parley P. Pratt mibalik sa Kirtland gikan sa usa ka misyon ngadto sa Teritoryo sa mga Indian ug sa Missouri.
Abril 30, 1831Si Emma Smith nanganak og kaluha, usa ka lalaki ug usa ka babaye, kinsa parehong namatay sulod sa pipila ka oras.
Mayo 9, 1831Gisagop ni Joseph ug Emma Smith ang kaluha nga mga anak ni John ug Julia Murdock human nga si Julia namatay sa pagpanganak sa kaluha niadtong Abril 30.
Ang Ginoo mipasidaan sa mga elder sa Simbahan bahin sa dili tinuod nga mga espiritu
Hangyoa ang mga estudyante sa paghanduraw nga ang usa ka higala o sakop sa pamilya miduol kanila ug mipaambit sa mosunod nga mga kabalaka: “Naningkamot ko nga magpuyo nga takus, apan nanlimbasug ko nga masayud kon ang akong mga hunahuna ug mga pagbati mga inspirasyon ba gikan sa Espiritu o kaugalingon lang nako nga mga ideya.”
Unsaon ninyo sa pagtubag niini nga kabalaka?
Human sa mubo nga diskusyon, hangyoa ang klase sa pagtimaan niini nga kabalaka samtang magtuon sila sa Doktrina ug mga Pakigsaad 50 karon. Dapita sila sa pagpangita sa doktrina ug mga baruganan mahitungod sa Espiritu Santo ug sa pagdawat og kamatuoran gikan sa Dios nga makatabang kanila ug sa uban sa pagtinguha ug pag-ila og espirituhanong direksyon.
Pahinumdumi ang mga estudyante nga human miabut si Propeta Joseph Smith sa Kirtland, Ohio, pagka-Pebrero 1831, misugod siya sa pagtrabaho aron mahunong ang “kahibudngan nga mga ideya ug mini nga mga espiritu nga hinay-hinay nga gisunod” sa mga Santos (Manuscript History, vol. A-1, p. 93, josephsmithpapers.org). Ang Propeta nabalaka nga kining mini nga espiritwal nga mga pagpakita molaglag sa tinuod nga mga baruganan sa gipahiuli nga ebanghelyo (tan-awa sa “Try the Spirits,” Times and Seasons, Abr. 1, 1842, 747, josephsmithpapers.org). Sa sayong bahin sa Marso, ang Propeta nakadawat og pagpadayag diin ang Ginoo mitudlo sa mga Santos unsaon sa paglikay nga madani sa dautang mga espiritu ug sa mga doktrina sa yawa (tan-awa sa D&P 46:7–8). Bisan pa sa mga paningkamot sa Propeta batok niining mini nga mga espiritu, ang kahibudngan nga mga gawi mipadayon. Pagka-Mayo 1831, ang pipila ka mga elder sa Simbahan nangayo og tambag kang Propeta Joseph Smith tungod kay wala nila masabti ang giingon nga espiritwal nga mga pagpakita nga ilang nasaksihan sa pipila sa mga miyembro. Dili makaila ang mga elder kon hain nga espiritwal nga mga pagpakita ang gikan sa Dios ug hain ang dili. Nangutana ang Propeta sa Ginoo mahitungod niini nga mga pagpakita ug nakadawat sa pinadayag nga narekord diha sa Doktrina ug mga Pakigsaad 50.
Dapita ang usa ka estudyante sa pagbasa og kusog sa Doktrina ug mga Pakigsaad 50:1–3. Hangyoa ang klase sa pagsunod, nga mangita kon unsay gitudlo sa Ginoo ngadto sa mga elder mahitungod sa espiritwal nga mga pagpakita nga ilang nasaksihan.
Unsa ang gitudlo sa Ginoo sa mga elder mahitungod sa mga espiritu nga “nangadto sa nagkalain-lain nga mga dapit sa yuta” (D&P 50:2)?
Base sa pasidaan sa Ginoo diha sa bersikulo 3, unsa nga kamatuoran ang atong makat-unan mahitungod ni Satanas? (Tabangi ang mga estudyante nga mahibalo sa mosunod nga kamatuoran: Si Satanas nagtinguha sa paglingla kanato aron makabuntog siya kanato. Ikonsiderar ang pag-awhag sa mga estudyante sa pagmarka niini nga kamatuoran diha sa ilang mga kasulatan.)
Unsa ang pipila ka paagi nga mosulay si Satanas sa paglingla kanato?
Dapita ang mga estudyante sa pagbasa og daklit sa Doktrina ug mga Pakigsaad 50:7–9, nga mangita sa usa ka paagi nga si Satanas nakaangkon og gahum sa paglingla sa pipila sa unang mga miyembro sa Simbahan.
Sumala niini nga mga bersikulo, sa unsang paagi nakaangkon si Satanas og gahum sa paglingla sa pipila sa unang mga miyembro sa Simbahan?
Unsa ang tigpakaaron-ingnon? (Ang usa ka tigpakaaron-ingnon maoy usa ka tawo nga nagpakaaron-ingnon nga matarung apan kansang mga buhat sukwahi niining mini nga imahe sa pagkamatarung. [Tan-awa usab sa Bible Dictionary, “Hypocrite.”])
Sa unsang mga paagi kaha ang mga tigpakaaron-ingnon nakahimo sa paglingla sa mga miyembro sa Simbahan niadtong 1831? Sa unsang paagi sila makalingla sa mga miyembro sa Simbahan karon?
Unsay gisulti sa Ginoo nga mahitabo niini nga mga tigpakaaron-ingnon?
Mitudlo ang Ginoo sa mga elder kon unsaon sa pag-ila tali sa mini nga mga espiritu ug sa Espiritu sa Kamatuoran
Ipasabut nga sa Doktrina ug mga Pakigsaad 50:10–12, ang Ginoo misulti sa mga elder sa Simbahan nga mangatarungan Siya kanila aron sila makasabut. Pahinumdumi ang mga estudyante nga ang mga elder miduol sa Propeta tungod kay wala sila makasabut sa mini nga espiritwal nga mga pagpakita nga nakita nila nga gipakita sa pipila ka mga miyembro sa Simbahan.
Dapita ang usa ka estudyante sa pagbasa og kusog sa Doktrina ug mga Pakigsaad 50:13–16. Hangyoa ang klase sa pagsunod, nga mangita sa mga pangutana nga gipangutana sa Ginoo sa mga elder samtang nangatarungan Siya kanila.
Unsa ang gipangutana sa Ginoo sa mga elder diha sa bersikulo 13?
Unsa nga doktrina ang atong makat-unan mahitungod sa Espiritu Santo gikan sa tubag sa Manluluwas diha sa bersikulo 14? (Human makatubag ang mga estudyante, isulat sa pisara ang mosunod nga doktrina: Mopadala ang Dios sa Espiritu Santo aron sa pagtudlo sa kamatuoran.)
Nganong importante man nga masabtan sa mga elder kini nga doktrina atol niini nga panahon sa kalibug?
Ipasabut nga sa mga bersikulo 15–16, ang Ginoo mipanton sa mga elder tungod sa pagdawat og mini nga mga espiritu nga dili nila masabtan. Bisan pa niana, ang Ginoo misulti kanila nga magmaloloy-on gihapon Siya kanila.
Tungaa ang klase. Dapita ang katunga sa klase sa pagbasa og hilum sa Doktrina ug mga Pakigsaad 50:17–18, nga mangita kon unsay gisulti sa Ginoo mahitungod sa paagi sa pagsangyaw sa Iyang kamatuoran. Dapita ang laing katunga sa klase sa pagbasa og hilum sa Doktrina ug mga Pakigsaad 50:19–20, nga mangita kon unsaon sa pagdawat sa Iyang kamatuoran.
Sa unsang paagi angay nga isangyaw ang “pulong sa kamatuoran” (bersikulo 17)?
Sa unsang paagi kini kinahanglang dawaton?
Unsay gipasabut sa mga pulong nga “kon kini pinaagi sa uban nga paagi kini dili gikan sa Dios” sa bersikulo 18 ug 20?
Unsay usa ka ehemplo sa paagi nga kita tingali mosangyaw o magtinguha ug modawat sa kamatuoran sa “uban nga paagi”?
Dapita ang usa ka estudyante sa pagbasa og kusog sa Doktrina ug mga Pakigsaad 50:21–22. Hangyoa ang klase sa pagsunod, nga mangita kon unsay gusto sa Ginoo nga masabtan sa mga elder mahitungod niadtong mosangyaw sa pulong sa kamatuoran ug niadtong maminaw sa ilang mensahe.
Sumala sa bersikulo 21, unsay gusto sa Ginoo nga masabtan sa mga elder mahitungod sa pagsangyaw ug pagdawat sa pulong sa kamatuoran?
Sumala sa bersikulo 22, unsay gisulti sa Ginoo nga mahitabo kon ang pulong sa kamatuoran isangyaw ug dawaton pinaagi sa Espiritu sa Kamatuoran?
Base sa unsay gitudlo sa Ginoo diha sa bersikulo 22, unsa nga mga pagpakita sa Espiritu ang makatabang kanato sa pag-ila kon unsa ang gikan sa Dios ug unsay dili? (Human makatubag ang mga estudyante, isulat sa pisara ang mosunod nga doktrina: Ang Espiritu sa Ginoo nagdala og panabut, kaayohan, ug kalipay.)
Unsa kaha ang gipasabut sa makadawat og kaayohan? (Matukod o malig-on sa espirituhanong paagi.)
Sa unsang paagi kaha ang pagkasayud niini nga kamatuoran nakatabang sa mga elder nga mibati og kalibug sa kahibudngan nga mga gawi sa pipila ka mga miyembro?
Sa unsang paagi kini nga kamatuoran makatabang kanato nga makabantay sa mga pagpanglingla ni Satanas sa atong panahon?
Dapita ang mga estudyante sa paghunahuna mahitungod sa mga panahon nga nasayud sila nga ang ilang gitudlo o nadunggan gikan sa Espiritu tungod kay nagdala kini kanila og panabut, kaayohan, ug kalipay. Hangyoa ang pipila ka mga estudyante sa pagpakigbahin sa ilang mga kasinatian uban sa klase.
Ipasabut nga aron matabangan ang mga elder sa Simbahan nga mas makaila kon unsay gikan sa Dios ug unsay dili, ang Ginoo migamit sa analohiya sa kahayag ug kangitngit.
Dapita ang usa ka estudyante sa pagbasa og kusog sa Doktrina ug mga Pakigsaad 50:23. Hangyoa ang klase sa pagsunod, nga mangita kon unsay gisulti sa Ginoo sa mga elder mahitungod sa kangitngit.
Unsa ang gisulti sa Ginoo mahitungod sa kangitngit?
Unsaon nimo paghulagway ang imong mga pagbati ug hunahuna kon ang usa ka butang dili makahatag og kaayohan?
Sa unsang paagi kaha ang pagkasayud niini nakatabang sa mga elder sa Simbahan sa pagtubag niadtong mga miyembro nga mipakita og kahibudngan nga mga linihokan?
Dapita ang usa ka estudyante sa pagbasa og kusog sa Doktrina ug mga Pakigsaad 50:24. Hangyoa ang klase sa pagsunod, nga mangita kon unsay gisulti sa Ginoo sa mga elder mahitungod sa kahayag.
Nganong ang kahayag tukma man nga simbolo alang nianang gikan sa Dios?
Unsa ang gisulti sa Ginoo nga mahitabo kon modawat kita sa kahayag ug magpadayon diha sa Dios? (Ang mga estudyante mahimong mogamit og lain-laing mga pulong, apan siguroa nga ilang mahibaloan ang mosunod nga baruganan: Kon modawat kita sa kahayag ug magpadayon diha sa Dios, makadawat kita og labaw pa nga kahayag, nga mag-anam pa og kahayag. Dapita ang mga estudyante sa pagkonsiderar sa pagmarka niini nga baruganan diha sa ilang mga kasulatan.)
Unsa kaha ang gipasabut sa mga pulong nga “magpadayon diha sa Dios”?
Nganong kinahanglan man kitang maningkamot sa paghimo sa atong kahayag nga mohimong “labaw kahayag ug labaw sa kahayag”?
Dapita ang mga estudyante sa paghunahuna mahitungod sa mga panahon nga makanunayon silang andam sa pagdawat sa kahayag ug impluwensya sa Dios diha sa ilang kinabuhi ug nakasinati og dugang nga pagbu-bu sa Iyang Espiritu ug impluwensya. Hangyoa ang pipila ka mga estudyante sa pagpakigbahin sa ilang mga kasinatian uban sa klase.
Unsa ang atong mabuhat aron makadawat og dugang pa nga kahayag sa Dios sa atong kinabuhi?
Dapita ang mga estudyante sa pagbasa og hilum sa Doktrina ug mga Pakigsaad 50:25, nga mangita sa rason nga gitudlo sa Ginoo kini nga mga kamatuoran ngadto sa mga elder.
Unsa nga rason ang gihatag sa Ginoo alang sa pagtudlo niini nga mga kamatuoran ngadto sa mga elder sa Kirtland?
Sa unsang mga paagi ang pagbaton og dugang nga kahayag makatabang kanato nga masayud sa kamatuoran?
Sa unsang paagi ang pagbaton og dugang kahayag ug kamatuoran makatabang kanato nga “mopapahawa sa kangitngit gikan diha [kanato]” (bersikulo 25), o pagwagtang sa mga tintasyon ug impluwensya sa yawa?
Dapita ang mga estudyante sa paghunahuna og higayon nga nakahimo sila sa pagpapahawa sa kangitngit, o sa tintasyon ug dautan, tungod sa kahayag ug kamatuoran nga ilang nadawat. Dapita ang pipila ka andam nga mga estudyante sa pagpaambit sa ilang mga kasinatian diha sa klase.
Ipakita ang mosunod nga pamahayag ni Elder Robert D. Hales (1932–2017) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
Imahe
Elder Robert D. Hales
“Ang kahayag mopapahawa sa kangitngit. Kon ang kahayag anaa, ang kangitngit mabuntog ug kinahanglang mobiya. Labaw nga mahinungdanon, ang kangitngit dili makabuntog sa kahayag gawas kon ang kahayag magkahinay o mobiya. Kon ang espirituhanong kahayag sa Espiritu Santo anaa, ang kangitngit ni Satanas mobiya.
“… Kon atong tugutan ang kahayag sa Espiritu nga moawup o mahanaw pinaagi sa pagkapakyas sa pagsunod sa mga sugo o sa dili pag-ambit sa sakrament o pag-ampo o pagtuon sa mga kasulatan, ang kangitngit sa kaaway siguradong moabut” (Robert D. Hales, “Gikan sa Kangitngit padulong sa Iyang Talagsaong Kahayag,” Liahona, Mayo 2002, 70, 71).
Dapita ang mga estudyante sa pagpamalandong kon unsaon nila sa pagtubag niini nga pangutana:
Unsa ang inyong buhaton aron makadawat og labaw nga kahayag ug magpadayon diha sa Dios aron makahibalo kamo sa kamatuoran ug mapapahawa ang kangitngit gikan sa inyong kinabuhi?
Awhaga ang mga estudyante sa pagsunod sa bisan unsang mga pag-aghat nga ilang madawat.
I-summarize ang Doktrina ug mga Pakigsaad 50:26–37 pinaagi sa pagpasabut nga ang Ginoo mitambag sa mga naghupot sa priesthood kalabut sa gahum ug mga responsibilidad nga nag-uban sa ilang ordinasyon. Mitudlo Siya kanila sa pagserbisyo sa uban ug sa pagpabilin sa ilang kaugalingon nga putli. Ang Ginoo misaad nga kon buhaton nila kini, mohatag Siya kanila og gahum sa pag-ila sa mini nga mga espiritu. Gisangkapan og mga baruganan nga makatabang sa mga Santos sa pag-ila sa mini nga mga espiritu ug sa paglikay sa pagpanglingla, si Parley P. Pratt, John Corrill, ug Edward Partridge gitawag sa “pag-adto ngadto sa mga simbahan ug maglig-on kanila” (D&P 50:37).
Dapita ang mga estudyante sa pagbasa og hilum sa Doktrina ug mga Pakigsaad 50:40–46, nga mangita og makahupay nga tambag gikan sa Ginoo. Hangyoa ang mga estudyante sa pagpaambit og hugpong sa mga pulong gikan niini nga mga bersikulo nga makahuluganon kanila. Ilista sa pisara ang hugpong sa mga pulong nga ipaambit sa mga estudyante.
Sa unsang paagi kaha ang tambag nga nalista sa pisara nakahatag og kahupayan ngadto sa unang mga Santos? Sa unsang paagi kini makahupay kanato?
Tapusa pinaagi sa pagpamatuod sa mga kamatuoran nga gitudlo niini nga leksyon. Dapita ang mga estudyante sa pagpamalandong kon unsay ilang nakat-unan karon ug sa paggahin og panahon sa pagsulat kon unsaon nila sa pagsunod sa unsay ilang nakat-unan.