Institute
Leksyon 38: Doktrina ug mga Pakigsaad 98–100

“Leksyon 38: Doktrina ug mga Pakigsaad 98–100,” Manwal sa Magtutudlo sa Doktrina ug mga Pakigsaad (2017)

“Leksyon 38,” Manwal sa Magtutudlo sa Doktrina ug mga Pakigsaad

Leksyon 38

Doktrina ug mga Pakigsaad 98–100

Pasiuna ug Timeline

Pagka 1833, ang nagtubo nga populasyon sa mga Santos sa Ulahing mga Adlaw sa Distrito sa Jackson, Missouri, nahimong dako nga kabalaka sa orihinal nga mga lumulupyo sa nasud tungod sa dagkung kalainan sa kultural, politikal, ug relihiyon tali sa duha ka grupo. Pagka Hulyo 20, 1833, usa ka pundok sa mga lumulupyo sa Missouri mimando nga pabiyaon sa Distrito sa Jackson ang mga Santos sa Ulahing mga Adlaw. Sa wala pa makasanong og tarung ang mga Santos, usa ka manggugubot ang miguba sa imprintahanan sa Simbahan ug gibuboan og alkitran ug gipapitlan og balahibo si Bishop Edward Partridge ug Charles Allen. Tulo ka adlaw ang milabay, usa ka dakong pundok sa manggugubot nanghulga og dugang nga kabangis, ug ang mga lider sa Simbahan napugos sa pagpirma og kasabutan nga ang tanang Mormon pabiyaon sa Distrito sa Jackson sa dili pa ang Abril 1, 1834. Pagka Agosto 6, 1833, sa Kirtland, Ohio, si Propeta Joseph Smith nakadawat og pagpadayag nga narekord sa Doktrina ug mga Pakigsaad 98, diin ang Ginoo mitudlo sa mga Santos kon unsaon sa pagsanong ang pagpanglutos. Gitambagan usab sa Ginoo ang mga Santos sa pagsunod “sa batakang balaod sa yuta” (D&P 98:6) ug gipahimangnoan sila sa pagtuman sa ilang mga pakigsaad.

Si John Murdock mipasakop sa Simbahan dihang ang unang mga misyonaryo gikan sa New York nangabut sa Kirtland, Ohio, pagka-Nobyembre 1830. Gisugdan dayon niya ang pagsangyaw sa ebanghelyo. Pagka-Hunyo 1832 mibalik siya sa pagserbisyo og misyon sa mga dapit sa tunga-tungang kasadpan sa Estados Unidos. Sa usa ka pagpadayag nga gihatag ngadto ni Propeta Joseph Smith niadtong Agosto 29, 1832, nga narekord sa Doktrina ug mga Pakigsaad 99, ang Ginoo mitawag ni John Murdock sa pagpadayon nga moserbisyo isip misyonaryo.

Pagka Oktubre 1833, si Propeta Joseph Smith ug Sidney Rigdon mibiya alang sa usa ka mubo nga misyon ngadto sa Upper Canada. Pagka Oktubre 12, 1833, nanghunong sila sa Perrysburg, New York, ug ang Propeta nakadawat og pagpadayag nga narekord sa Doktrina ug mga Pakigsaad 100. Gipaniguro sa Ginoo sa Propeta ug ni Sidney Rigdon nga ang ilang pamilya sa Ohio maayo ra. Siya mihupay usab kanila mahitungod sa mga Santos sa Missouri, kinsa nag-antus og pagpanggukod.

Pahinumdom: Ang pagpadayag nga narekord sa Doktrina ug mga Pakigsaad 99 wala mahan-ay subay sa tuig nga pagkasunod-sunod sa ubang mga seksyon sa Doktrina ug mga Pakigsaad tungod kay dunay sayop nga nahimo diha sa pagbutang og petsa sa mga pagpadayag dihang ang 1876 nga edisyon sa basahon na-imprinta. Kana nga sayop nakorihian sa 1981 nga pag-imprinta, apan ang pagpahimutang sa pagpadayag diha sa Doktrina ug mga Pakigsaad 99 gipreserba aron ang mga pakisayran sa numero sa seksyon sa ubang mga publikasyon magpabiling eksakto. (Tan-awa sa Dennis A. Wright, “Konteksto sa kasaysayan ug overview sa Doktrina ug mga Pakigsaad 99,” sa Dennis L. Largey ug Larry E. Dahl, eds., Doctrine and Covenants Reference Companion [2012], 805). Kini nga leksyon maghisgot sa mga seksyon 98–100 sa han-ay nga kini makita diha sa Doktrina ug mga Pakigsaad.

Hunyo 1832Nauli si John Murdock gikan sa usa ka misyon sa mga dapit sa tunga-tungang kasadpan sa Estados Unidos.

Agosto 29, 1832Ang Doktrina ug mga Pakigsaad 99 nadawat.

Hulyo 20, 1833Usa ka pundok sa manggugubot sa Distrito sa Jackson, Missouri, miguba sa imprintahanan sa Simbahan sa Independence ug gibuboan og alkitran ug gipapitlan og balahibo si Bishop Edward Partridge ug Charles Allen.

Hulyo 23, 1833Tungod sa hulga sa kapintas sa mga manggugubot, ang mga lider sa Simbahan sa Missouri mipirma og kasabutan nga ang tanang Mormon mobiya sa Distrito sa Jackson pagka-Abril 1, 1834.

Agosto 6, 1833Ang Doktrina ug mga Pakigsaad 98 nadawat.

Agosto 9, 1833Si Oliver Cowdery miabut sa Kirtland, Ohio, dala ang balita bahin sa pundok sa bangis nga manggugubot batok sa mga Santos sa Missouri.

Oktubre 5, 1833Si Joseph Smith ug Sidney Rigdon mibiya sa Kirtland, Ohio, sa pagsangyaw sa ebanghelyo sa New York ug sa Mount Pleasant, Upper Canada (nga karon mao ang Ontario).

Oktubre 12, 1833Ang Doktrina ug mga Pakigsaad 100 nadawat.

Mga Sugyot alang sa Pagtudlo

Doktrina ug mga Pakigsaad 98:1–22

Gihupay sa Ginoo ang mga Santos ug gitambagan sila sa pagsunod sa balaod sa yuta ug pagtuman sa ilang mga pakigsaad

Dapita ang mga estudyante sa paghunahuna og higayon sa dihang sila, o usa ka tawo nga ilang nailhan, wala tarunga sa pagtagad ug sa pagpamalandong kon unsay reaksyon niining tawhana.

Dapita ang mga estudyante sa pagpangita og doktrina ug mga baruganan samtang magtuon sila sa Doktrina ug mga Pakigsaad 98 nga makatabang nila sa pagsabut kon unsay gilauman sa Dios nga atong buhaton kon mobati kita nga wala kita ayuha sa pagtagad.

Dapita ang pipila ka mga estudyante nga magpuli-puli sa pagbasa og kusog gikan sa mosunod nga mga parapo [paragraph]. Hangyoa ang mga estudyante sa pagkonsiderar kon unsa kaha ang ilang reaksyon kon usa sila sa nag-unang mga Santos sa Distrito sa Jackson, Missouri.

Pagka Hulyo 20, 1833, “upat o lima ka gatus ka diskontento nga [Missourians] nag-abut sa korte sa Independence. Mipili sila … og komitiba aron sa pagsulat og usa ka dokumento nga naglatid sa ilang mga gipangayo sa mga Mormon. …

“… Ang komitiba misulat og pamahayag nga walay Santos sa Ulahing mga adlaw ang tugutan nga mobalhin o mamuyo sa Distrito sa Jackson, ug kadtong didto nang daan kinahanglang mosaad nga mobiya dayon kutob sa mahimo. … Ang mga kaigsoonan, nga nakurat sa hangyo … , nangayo og tulo ka bulan aron ikonsiderar ang plano ug sa pagkonsulta sa mga lider sa Ohio. Gibalibaran sila niini. Mihangyo sila og napulo ka adlaw, apan gihatagan lang hinoon sila sa komitiba og kinse minutos.

“Ang miting mikalit sa pagkahimong pundok sa manggugubot nga mihukom sa pagguba sa imprintahanan sa [Simbahan] ug sa press. Gilungkab nila … ang press, gipangsalibay ang mga naka-type sa papel, ug giguba hapit tanang inimprinta, lakip ang kadaghanan sa wala pa mahugpong nga mga pahina sa Basahon sa mga Sugo. Dayon ilang gipahagsa ang duha ka andana nga imprintahanan. …”

Ang mga manggugubot mibubu dayon og alkitran ug gipapitlan og balhibo si Bishop Edward Partridge ug Charles Allen atubangan sa korte. Tulo ka adlaw ang milabay, usa ka armadong pundok sa manggugubot “midagkot sa nagtipun-og nga mga dagami ug sa umahan sa lugas ug miguba og daghang balay, mga kamalig, ug mga balay patigayon. Ang manggugubot nga panon sa katapusan mikompronta sa unom ka mga lider sa Simbahan, kinsa, nakakita nga ang mga kabtangan ug mga kinabuhi sa mga Santos anaa sa kakuyaw, mitanyag sa ilang kinabuhi isip tubos. …

“Sa pagsalikway niini nga tanyag, ang mga lider sa manggugubot nga panon mihulga nga ang kada lalaki, babaye, ug bata panglatiguhon gawas kon mouyon sila nga mobiya sa distrito. Tungod sa pamugos ang mga kaigsoonan mipirma og kasabutan nga mobiya sa distrito” (Church History in the Fulness of Times Student Manual [manwal sa Church Educational System, 2nd ed., 2003], 132–34).

  • Kon ikaw usa pa sa mga Santos sa Missouri, unsaon kaha nimo sa pagsanong ang mga manggugubot?

Hangyoa ang mga estudyante sa pagbasa og hilum sa ulohan nga seksyon sa Doktrina ug mga Pakigsaad 98, nga mangita sa ebidensya nga ang Ginoo nahibalo sa pag-antus sa mga Santos sa Missouri.

  • Unsa nga ebidensya ang inyong nakita nga ang Ginoo mahunahunaon sa mga pag-antus sa mga Santos sa Missouri?

Dapita ang usa ka estudyante sa pagbasa og kusog sa Doktrina ug mga Pakigsaad 98:1–3. Hangyoa ang klase sa pagsunod, nga mangita sa unsay gitambag sa Ginoo ngadto sa mga Santos.

  • Unsa nga tambag ang sa inyong hunahuna ang makahupay sa mga Santos sa Missouri? Ngano?

  • Unsa kaha nga tambag ang malagmit lisud nga sundon?

  • Base sa unsay gisaad sa Ginoo sa mga Santos diha sa mga bersikulo 1–2, unsa nga baruganan ang atong makit-an mahitungod sa resulta sa pagpasalamat sa tanang butang ug sa mapailubong paghulat sa Ginoo? (Human makatubag ang mga estudyante, isulat sa pisara ang mosunod nga baruganan: Kon magpasalamat kita sa tanang mga butang ug mapailubon nga maghulat sa Ginoo, ang atong mga kasakit mamaayo ra alang kanato.)

  • Unsa kaha ang gipasabut sa mapailubon nga maghulat sa Ginoo?

  • Sa unsang mga paagi ang atong mga kasakit nagtambayayong alang sa atong kaayohan samtang magpasalamat kita sa tanang butang ug mapailubong maghulat sa Ginoo?

Hangyoa ang mga estudyante sa paghunahuna og usa ka tawo nga ilang nailhan kinsa mipasalamat sa tanang butang ug mapailubong naghulat sa Ginoo atol sa mga pagsulay ug mga hagit. Dapita ang pipila ka estudyante nga ipaambit kini nga mga ehemplo diha sa klase. (Pahinumdumi ang mga estudyante nga dili mopakigbahin og bisan unsa nga personal o pribado ra kaayo.)

I-summarize ang Doktrina ug mga Pakigsaad 98:4−10 pinaagi sa pagpasabut nga ang Ginoo mitambag sa mga Santos nga tumanon ang Iyang tanan nga sugo ug “makighigala,” o mosunod sa, “batakang balaod sa yuta” (bersikulo 6). Gisultihan usab Niya ang mga Santos sa pagtinguha ug pagsuporta sa “matinuoron,” “maayo,” ug “maalamon” nga mga lider sa gobyerno (bersikulo 10).

Dapita ang usa ka estudyante sa pagbasa og kusog sa Doktrina ug mga Pakigsaad 98:11–15. Hangyoa ang klase sa pagsunod, nga mangita kon unsa pay gisugo sa Ginoo nga buhaton sa mga Santos.

  • Unsa ang gisugo sa Ginoo nga buhaton sa mga Santos?

Ipasabut ang mga pulong “Ako mosulay ug motino kaninyo” sa bersikulo 12.

  • Unsa kaha ang buot ipasabut sa “mosulay ug motino kaninyo”? (Ang Ginoo mo-testing sa kamatinud-anon sa mga Santos.)

  • Nganong importante kaha alang sa mga Santos sa Missouri ang pagsabut nga ang mga pagsulay nga ilang nasinati gituyo aron “mosulay [kanila] sa tanan nga mga butang, kon [sila] motuman ba sa pakigsaad [sa Ginoo]” (bersikulo 14)?

I-summarize ang Doktrina ug mga Pakigsaad 98:16–22 pinaagi sa pagpasabut nga gisultihan sa Ginoo ang mga Santos nga “isalikway ang gubat ug ipahayag ang kalinaw” (bersikulo 16). Gipanton Niya ang mga Santos sa Kirtland, Ohio, ug misugo kanila sa paghinulsol ug pagtuman sa ilang mga pakigsaad.

Doktrina ug mga Pakigsaad 98:23–48

Ang Ginoo mitudlo sa mga Santos unsaon sa pag-atubang ang mga pagpanglutos ug mipasabut kon kanus-a ang gubat makiangayon

Dapita ang usa ka estudyante sa pagbasa og kusog sa Doktrina ug mga Pakigsaad 98:23–27. Hangyoa ang klase sa pagsunod, nga mangita kon unsay gitambag sa Ginoo nga buhaton sa mga Santos dihang ngil-ad ang pagtagad sa uban kanila.

  • Unsa ang gitambag sa Ginoo nga buhaton sa mga Santos kon bugal-bugalan o lutuson?

  • Unsa nga baruganan ang atong makit-an gikan sa mga saad sa Ginoo niadtong mga mapailubon nga mopas-an sa ilang mga kasakit nga walay tinguha sa pagpanimalos? (Tabangi ang mga estudyante sa pag-ila sa mosunod nga baruganan: Kon mapailubon kitang mopas-an sa mga pagpanglutos nga walay tinguha sa pagpanimalos, gantihan kita sa Ginoo.)

Ipakita ang mosunod nga pamahayag ni Presidente James E. Faust (1920-2007) sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog.

Presidente James E. Faust

“Kinahanglan dili kita motubag pinaagi sa pagpanimalos apan hinoon pasagdan ang hustisya nga [mohimo niini] ug unya buhian. Dili sayon ang pagbuhi ug haw-angon ang atong kasingkasing sa nagkadako nga kalagot. Ang Manluluwas midalit kanatong tanan og bililhon nga kalinaw pinaagi sa Iyang Pag-ula, apan moabut lamang kini samtang kita andam mopapahawa sa dili maayo nga mga pagbati sa kasuko, kasilag, o panimalos” (James E. Faust, “Ang Makaalim nga Gahum sa PagpasayloLiahona, Mayo 2007, 69).

  • Unsay atong mahimo aron mapailubon natong mapas-an ang mga pagpanglutos ug dili magtinguha sa pagpanimalos?

I-summarize ang Doktrina ug mga Pakigsaad 98:28–48 pinaagi sa pagpasabut nga gi-outline sa Ginoo ang mga kahimtang dihang gihatagan og kaangayan ang gubat. Gisugo usab Niya ang mga Santos sa pagpasaylo sa ilang mga kaaway.

Doktrina ug mga Pakigsaad 99:1–8

Ang Ginoo mitawag ni John Murdock sa pagpahayag sa ebanghelyo

I-summarize ang Doktrina ug mga Pakigsaad 99 pinagi sa pagpasabut nga si John Murdock gitawag nga moserbisyo og misyon ngadto sa kasadpan sa Estados Unidos. Bisan nag-atubang og mga pagsulay ug mga kalisdanan, gidawat ni John Murdock ang iyang tawag sa pagmisyon ug misunod sa tambag sa Ginoo nga sangkapan niya ang iyang mga anak sa dili pa siya mobiya.

Doktrina ug mga Pakigsaad 100:1–17

Ang Ginoo mihupay ug misugo ni Joseph Smith ug Sidney Rigdon

  • Unsa kaha ang maanaa nga mga kabalaka sa mga misyonaryo kon magsugod sa ilang misyonaryo nga pagserbisyo?

Dapita ang usa ka estudyante sa pagbasa og kusog sa mosunod nga makasaysayan nga kaagi alang sa Doktrina ug mga Pakigsaad 100:

Usa ka kinabig nga ginganlan og Freeman Nickerson ang mibiyahe sa Kirtland, Ohio, pagka Septyembre 1833 ug mihangyo sa Propeta sa pag-uban kaniya sa New York ug Canada aron isangyaw ang ebanghelyo ngadto sa iyang pamilya. Si Joseph Smith ug Sidney Rigdon miuyon sa iyang sugyot, ug mibiya sila sa Kirtland pagka Oktubre 5, 1833. Gisangyaw nila ang ebanghelyo samtang nagbiyahe sila sa New York, ug dihang nangabut sila sa balay ni Brother Nickerson sa Perrysburg, New York, nakadawat si Joseph Smith og pagpadayag nga narekord sa Doktrina ug mga Pakigsaad 100 (tan-awa sa Eric Smith, “A Mission to Canada” diha sa Revelations in Context, ed. Matthew McBride and James Goldberg [2016], 202–4, o history.lds.org).

Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 100, nga mangita kon unsay gikabalak-an nila ni Joseph Smith ug Sidney Rigdon.

Dapita ang usa ka estudyante sa pagbasa og kusog sa Doktrina ug mga Pakigsaad 100:1–4. Hangyoa ang klase sa pagsunod, nga mangita unsay gisulti sa Ginoo kang Propeta Joseph Smith ug Sidney Rigdon.

  • Unsay gisaad sa Ginoo kang Joseph Smith ug Sidney Rigdon kabahin sa ilang mga pamilya?

  • Sumala sa bersikulo 3–4, nganong gipadala sa Ginoo si Propeta Joseph Smith ug Sidney Rigdon ngadto niini nga misyon sa New York ug Canada?

Dapita ang usa ka estudyante sa pagbasa og kusog sa Doktrina ug mga Pakigsaad 100:5–8. Hangyoa ang klase sa pagsunod, nga mangita sa unsay gisulti sa Ginoo kang Joseph Smith ug Sidney Rigdon nga buhaton isip mga misyonaryo.

  • Unsa ang gisugo sa Ginoo nga ilang buhaton?

  • Unsa nga baruganan ang atong makita gikan sa saad nga gihatag sa Ginoo kang Joseph Smith ug Sidney Rigdon diha sa mga bersikulo 5-6? (Tabangi ang mga estudyante sa pag-ila sa mosunod nga baruganan: Kon magtinguha kita nga mopaambit sa ebanghleyo ngadto sa uban, tabangan kita sa Ginoo unsay isulti.)

  • Unsa nga baruganan ang atong makita gikan sa saad sa Ginoo diha sa mga bersikulo 7–8? (Tabangi ang mga estudyante sa pag-ila sa mosunod nga baruganan: Kon ipaambit nato ang ebanghelyo pinaagi sa kaligdong sa kasingkasing ug sa espiritu sa kaaghup, ang Espiritu Santo mosaksi sa unsay atong isulti.)

  • Kanus-a nimo nasinati ang usa o duha niini nga mga saad samtang gipaambit nimo ang ebanghelyo ngadto sa uban?

I-summarize ang Doktrina ug mga Pakigsaad 100:9–17 pinaagi sa pagpasabut nga ang Ginoo mipili ni Joseph Smith nga mahimong “tigpadayag” ug si Sidney Rigdon nga mahimong “tigpamaba” sa Propeta (mga bersikulo 9–11). Misaad ang Ginoo sa Propeta og “gahum aron mahimo nga gamhanan sa pagpamatuod … [ug] pagpatin-aw sa tanan nga mga kasulatan” (mga bersikulo 10–11). Misaad usab siya nga ang “Zion pagatubson” (bersikulo 13) ug mipahayag nga sa dili madugay Siya “mopasanay … og usa ka putli nga mga katawhan, nga moalagad [Kaniya] diha sa pagkamatarung” (bersikulo 16).

Tapusa pinaagi sa pagpamatuod sa mga kamatuoran nga gitudlo niini nga leksyon, ug dapita ang mga estudyante sa paggamit kon unsay ilang nakat-unan.