Leksyon 3

Doktrina ug mga Pakigsaad 3; 10

Pasiuna ug Timeline

Sa ting-init niadtong 1828, mibiya si Martin Harris sa Harmony, Pennsylvania, dala ang 116 ka pahina nga manuskrito sa Basahon ni Mormon aron ipakita sa mga sakop sa iyang pamilya nga nagpuyo sa Palmyra, New York. Dihang wala na mobalik si Martin sa Harmony sa gitagal nga panahon, mibiyahe si Joseph Smith ngadto sa balay sa iyang mga ginikanan sa Manchester, New York, diin didto iyang nahibaloan nga nawala ni Martin ang mga pahina sa manuskrito. Dismayado kaayo si Joseph ug mibiya pagkasunod adlaw aron moadto sa iyang balay sa Harmony. Sa pag-abut niya didto pagka Hulyo 1828, nakadawat siya og pagpadayag nga narekord sa Doktrina ug mga Pakigsaad 3. Dinhi sa pagpadayag gibadlong sa Ginoo si Joseph ug gisultihan nga nawala kaniya ang pribilehiyo sa paghubad sulod sa mubo nga panahon, apan mipaniguro usab ang Ginoo kaniya, sa pag-ingon, “Ikaw sa gihapon pinili, ug ikaw gitawag pag-usab ngadto sa buhat” (D&P 3:10). Dugang pa, gipasabut sa Ginoo ang Iyang katuyoan sa pagpatungha sa Basahon ni Mormon ug mipahayag nga ang Iyang buhat mopatigbabaw bisan sa kadautan sa katawhan.

Human gilahutay ni Joseph Smith ang “mubo nga panahon” sa paghinulsol (D&P 3:14), ang mga palid, nga gikuha ni Moroni gikan kaniya sa panahon nga nawala ang manuskrito, giuli ngadto kaniya ug gihatagan na usab siya sa gasa sa paghubad. Human mapadayon ang paghubad, nakadawat si Joseph sa pagpadayag sa Doktrina ug mga Pakigsaad 10 (ang porsyon niini nga pagpadayag tingali nadawat sa sayo nga bahin sa ting-init niadtong 1828). Niini nga pagpadayag, gisugo sa Ginoo si Joseph nga dili hubaron og balik ang mga pahina sa nawala nga manuskrito. Nahibaloan sa Propeta nga gihimo ang dinasig nga mga preparasyon kaniadto sa karaan aron ihulip sa nawala nga manuskrito ug mapreserbar ang mensahe sa Basahon ni Mormon.

Hunyo 14, 1828Gidala ni Martin Harris ang 116 ka mga pahina sa manuskrito sa Basahon ni Mormon gikan sa Harmony, Pennsylvania, ngadto sa Palmyra, New York.

Hulyo 1828Mibiyahe si Joseph Smith sa Manchester, New York, ug nahibaloan nga nawala ang manuskrito.

Hulyo 1828Mibalik si Joseph Smith sa Harmony, Pennsylvania, ug nakadawat sa Dokrina ug mga Pakigsaad 3.

Septyembre 22, 1828Kay wala na ang bulawang mga palid ug ang Urim ug Thummim human sa iyang kalapasan lakip sa manuskrito, nadawat kini og balik ni Joseph Smith gikan ni Moroni.

Abril 5, 1829Miabut si Oliver Cowdery sa Harmony aron sa pag-abag sa paghubad sa Basahon ni Mormon.

Abril 1829Ang Doktrina ug mga Pakigsaad 10 nadawat (ang porsyon tingali nadawat sa ting-init niadtong 1828).

Mga Sugyot alang sa Pagtudlo

Doktrina ug mga Pakigsaad 3:1–20

Gipamahayag sa Ginoo nga ang Iyang buhat dili gayud mapakyas ug gibadlong si Joseph Smith

Mga Sukaranan sa Pagtudlo ug Pagkat-on sa Ebanghelyo

Ang matag leksyon niini nga manwal nagtutok sa usa ka scripture block imbis sa usa ka partikular nga konsepto, tema, doktrina, o baruganan. Samtang tun-an sa mga magtutudlo ug mga estudyante kini nga mga scripture block sa sunod-sunod nga paagi, ilang matipon ang daghang mga Sukaranan sa Pagtudlo ug Pagkat-on sa Ebanghelyo. Kini nga mga sukaranan naglakip sa pagsabut sa konteksto ug sa sulod; sa pagpangita, pagsabut, ug pagbati sa kamatuoran ug kaimportante sa mga doktrina ug baruganan sa ebanghelyo; ug sa paggamit sa mga doktrina ug mga baruganan.

Dapita ang mga estudyante sa paghunahuna og panahon sa dihang may tawo nga miagni nila sa pagbuhat og supak sa mga sugo sa Dios.

• Ngano kaha nga usahay lisud man ang pagbatok sa sosyal nga pagpamugos sa paghimo og sayop?

Ipasabut nga samtang naghubad sa Basahon ni Mormon, nag-atubang si Joseph Smith og pagpamugos nga ihikling ang tambag sa Dios. Dapita ang mga estudyante sa pagpangita og mga kamatuoran samtang tun-an nila ang Doktrina ug mga Pakigsaad 3 ug 10 nga makatabang nila sa pagbatok sa pagpamugos gikan sa uban aron mosupak sa tambag sa Dios.

Dapita ang mga estudyante sa pagpasabut unsay ilang nahibaloan mahitungod sa pagkawala sa 116 ka mga pahina sa manuskrito sa Basahon ni Mormon. Kon gikinahanglan, idugang ang mosunod nga mga detalye sa tubag sa mga estudyante:

Sugod sa Abril hangtud sa Hunyo 1828, ang mga palid gihubad sa Propeta didto sa iyang balay sa Harmony, Pennysylvania, kauban ni Martin Harris, nga usa ka malambuong mag-uuma, nga nagsilbi nga iyang tigsulat. 22 anyos ang pagkamagulang ni Martin kay ni Joseph, mihatag og pinansyal nga tabang kang Joseph ug Emma sa ilang pagbalhin ngadto sa Harmony (diin nagpuyo ang pamilya ni Emma), ug mitabang sa Propeta samtang naghubad siya. Si Lucy, nga asawa ni Martin, nagkadako ang kahingawa mahitungod sa interes ug pinansyal nga pag-apil ni Martin sa gitrabaho ni Joseph. Siya ug ang uban mipugos ni Martin sa pagpakita og ebidensya sa pagkaanaa sa mga palid. Aron mahupay ang ilang mga kahingawa, mihangyo si Martin nga hangyoon ni Joseph ang Ginoo nga itugot ang pagdala sa 116 ka pahina sa manuskrito nga ilang nahuman aron ipakita isip ebidensya.

• Ngano kaha nga kini nga hangyo nagbutang man sa Propeta sa lisud nga kahimtang?

Dapita ang usa ka estudyante sa pagbasa og kusog sa mosunod nga istorya ni Joseph Smith:

“Nangutana ako, ug ang tubag mao nga dili [dad-on ang manuskrito]. Bisan pa niana, wala siya matagbaw niini nga tubag, ug nagtinguha nga mangutana ako pag-usab. Gibuhat nako, ug ang tubag mao lang gihapon. Sa gihapon wala siya makontento, pero miinsister nga ako mangutana sa makausa pa” (Mga Pagtulun-an sa mga Presidente sa Simbahan: Joseph Smith [2007], 73).

• Ngano kaha nga mipadayon si Joseph sa paghangyo sa Dios sa mao ra gihapong pangutana bisan nakadawat na og tin-aw nga tubag?

Dapita ang laing estudyante sa pagbasa sa mosunod nga dugang nga mga detalye sa kasaysayan:

Human sa pagsige og hangyo ni Martin, nangutana si Joseph sa Ginoo sa ikatulong higayon, ug ang Ginoo mihatag og pagtugot kang Martin nga madala ang manuskrito “sa piho nga mga kondisyon” (Mga Pagtulun-an: Joseph Smith, 73). Misaad si Martin nga iyang ipakita ang manuskrito ngadto sa iyang asawa lamang ug sa pipila ka piho nga sakop sa pamilya. Mibalik si Martin sa New York dala ang manuskrito apan wala mobalik human sa pipila ka semana o walay balita sigun sa gikauyunan niya ug sa Propeta. Sa katapusan, mibiyahe si Joseph ngadto sa balay sa iyang mga ginikanan ug gipaadto si Martin aron mahibaloan ang rason sa wala niya pagpakita. Human mikabat og tibuok buntag ang pag-abut, milingkod si Martin aron mokaon dungan sa mga Smith apan diha dayon gibutang ang iyang mga gamit sa pagkaon. Sa dihang gipangutana kon unsay problema, mihilak siya, “Akong nawala ang akong kalag!” ug sa katapusan giangkon nga nawala niya ang 116 ka pahina sa manuskrito (tan-awa sa Lucy Mack Smith, “Lucy Mack Smith, History, 1845,” 130–31, josephsmithpapers.org).

• Unsa kaha ang mga hunahuna, mga pagbati, ug mga kahingawa nga inyong bation kon kamo pa ang naa sa posisyon ni Joseph niadtong panahona?

Ipabasa og kusog sa usa ka estudyante ang mga pulong ni Joseph dihang nahibaloan niya nga nawala ang manuskrito:

“Ang tanan nawala! Ang [t]anan nawala! [U]nsay akong buhaton? Nakasala ko; ako ang hinungdan sa kasuko sa Dios; unta kontento na ko sa unang tubag, nga akong nadawat gikan sa Ginoo—kay misulti siya nako nga dili luwas nga ang mga sinulat mahibulag sa akong kamot” (Joseph Smith, in Lucy Mack Smith, “Lucy Mack Smith, History, 1845,” 131, josephsmithpapers.org).

Ipasabut nga tungod kay “namugos si Joseph sa Ginoo sa pagpangayo og pribilehiyo nga tugutan si Martin Harris nga madala ang mga sinulat” (Manuscript History of the Church, vol. A-1, p. 10, josephsmithpapers.org), gikuha ni Moroni ang mga palid ug ang Urim ug Thummim, ug nawala ni Joseph ang gasa sa paghubad. Hinoon, misaad si Moroni nga madawat ra kini og balik ni Joseph kon magmapainubsanon ug mahinulsulon siya. Human makabalik si Joseph sa Harmony ug nangamuyo nga pasayloon sa Ginoo, temporaryong gibalik ni Moroni ang Urim ug Thummin, diin nadawat ni Joseph ang pagpadayag nga narekord sa Doktrina ug mga Pakigsaad 3.

Dapita ang usa ka estudyante sa pagbasa og kusog sa Doktrina ug mga Pakigsaad 3:1–3. Ipapangita sa klase kon unsay gusto sa Ginoo nga masabtan ni Joseph.

• Unsa nga kamatuoran ang gitudlo sa Ginoo kang Joseph Smith mahitungod sa Iyang buhat? (Kinahanglang mahibaloan sa mga estudyante ang kamatuoran nga susama sa mosunod: Ang buhat sa Dios dili makawang.)

• Sa unsang paagi ang pagkahibalo niini nga kamatuoran nakatabang ni Joseph Smith atol sa lisud nga panahon?

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 3:4–11. Ipapangita sa klase ang tambag ug pagkorihir nga gihatag sa Ginoo kang Joseph Smith mahitungod sa iyang tahas sa pagkawala sa manuskrito.

• Sa unsang paagi si Joseph “nadala diha sa mga pagdani sa mga tawo” ug “[n]ahadlok sa tawo labaw pa kay sa Dios.” (D&P 3:6–7)?

• Unsa ang atong makat-unan gikan niini nga mga hitabo kon unsay posibling mahitabo kon kahadlokan nato ang tawo kay sa Dios?

• Sumala sa bersikulo 8, unsa nga baruganan ang atong mahibaloan mahitungod sa unsay buhaton sa Ginoo kanato kon magmatinud-anon kita Kaniya? (Kon magmatinud-anon kita sa Ginoo, Siya mosuporta kanato batok sa nagdilaab nga mga pana sa kaaway ug makig-uban kanato sa mga panahon sa kasamok.)

• Sa unsang paagi ang pagpamugos sa uban sa paghimo og sayop ikapahisama sa nagdilaab nga mga pana sa kaaway?

Ipahunahuna sa mga estudyante ang mahitungod sa panahon dihang gipili nila ang pagkamatinud-anon ngadto sa Ginoo kay sa monunot sa pagpamugos sa ubang tawo. Dapita ang pipila ka estudyante nga ipaambit ang mga paagi diin ang Ginoo misuporta kanila sa ilang mga pagsulay tungod sa ilang kamasulundon.

Awhaga ang mga estudyante nga karon pa lang determinahon na nila nga magpabiling matinud-anon sa Ginoo ug dili monunot sa mga pagpamugos nga naa sa ilang palibut.

Pangandami ang matag leksyon pinaagi sa paghunahuna sa imong mga estudyante

Samtang nangandam ka sa pagtudlo, hunahunaa kon unsa nga mga sangputanan ang gipanghinaot nimo nga mahitabo sa kinabuhi sa imong mga estudyante isip resulta sa leksyon. Gipahinumduman ni Presidente Thomas S. Monson ang mga magtutudlo sa ebanghelyo nga: “Ang katuyoan sa pagtudlo sa ebanghelyo … dili ang ‘pagbu-bu og impormasyon’ ngadto sa hunahuna sa mga sakop sa klase. … Ang tumong mao ang pagdasig sa indibidwal aron maghunahuna, mobati, ug dayon mobuhat sa pagsunod sa mga baruganan sa ebanghelyo” (sa Conference Report, Okt. 1970, 107).

I-summarize ang Doktrina ug mga Pakigsaad 3:12–20 pinaagi sa pagpasabut nga gipahinumduman sa Ginoo si Joseph nga sa mubong panahon nawala niya ang pribilehiyo nga makahubad tungod kay wala siya mosalig sa tambag sa Ginoo. Hinoon, gipaniguro sa Ginoo kaniya nga ang Iyang buhat magpadayon ug pinaagi sa Basahon ni Mormon, ang katawhan sa Ginoo makaila sa Manluluwas.

Doktrina ug mga Pakigsaad 10:1–29

Gitbutyag sa Ginoo ang plano ni Satanas sa pagdaot ni Joseph Smith ug sa buhat sa Dios

Pasabta nga human makadawat sa pagpadayag nga girekord sa Doktrina ug mga Pakigsaad 3, padayon si Joseph Smith nga nagpaubos sa iyang kaugalingon atubangan sa Dios ug sa katapusan nabalik ra kaniya ang gasa sa paghubad sa Basahon ni Mormon pagka-Septyembre 1828. Niadtong Abril 1829 nakadawat usab siya og pagpadayag nga narekord sa Doktrina ug mga Pakigsaad 10, bisan og tingali nadawat niya ang porsyon niini nga pagpadayag sayo sa milabay nga ting-init. Dapita ang usa ka estudyante sa pagbasa og kusog sa ulohan nga seksyon sa Doktrina ug mga Pakigsaad 10. Ipapangita sa klase kon unsay gisulti sa Ginoo ngadto sa Propeta kabahin sa nawala nga 116 ka pahina nga manuskrito.

Dapita ang usa ka estudyante sa pagbasa og kusog sa Doktrina ug mga Pakigsaad 10:1–7, ug hangyoa ang klase sa pagpangita sa tambag nga gihatag sa Ginoo kang Joseph samtang gisugdan na usab niya ang paghubad. Dapita ang pipila ka mga estudyante sa pagreport kon unsay ilang nakit-an.

• Unsa nga baruganan ang atong makat-unan gikan sa tambag sa Ginoo ngadto kang Joseph diha sa bersikulo 5? (Ang mga estudyante mahimong mogamit og lain-laing mga pulong, apan tabangi sila nga makit-an ang mosunod nga baruganan: Kon mag-ampo kita kanunay, mabuntog nato si Satanas ug kadtong nagsuporta sa iyang buhat.)

• Sa unsa nga paagi ang pag-ampo makatabang nga atong mabuntog si Satanas, ug makalingkawas niadtong nagsuporta sa iyang buhat?

Dapita ang pipila ka mga estudyante sa pagpaambit og mga ehemplo kon sa unsa nga paagi ang pag-ampo nakatabang kanila sa pagbatok sa mga tintasyon ni Satanas. (Pahinumdumi ang mga estudyante nga dili nila ipaambit ang mga kasinatian nga personal o pribado ra kaayo.)

I-summarize ang Doktrina ug mga Pakigsaad 10:8–19 pinaagi sa pagpasabut nga gipasidan-an sa Ginoo si Joseph mahitungod sa dautang plano ni Satanas sa pagdaot sa buhat kon balikon ni Joseph ang paghubad sa nawala nga 116 ka pahina nga manuskrito.

Ipasabut nga sa Doktrina ug mga Pakigsaad 10:20–29, gisulti sa Ginoo ang mahitungod sa impluwensya ni Satanas sa mga tawo kinsa mikuha sa 116 ka pahina nga manuskrito ug sa unsang paagi natuman ang iyang dautang mga katuyoan. Pagdrowing og duha ka kolum sa pisara. Butangi og label ang usa ka kolum og Mga tumong ni Satanas ug ang lain nga kolum Mga estratehiya ni Satanas. Bahina ang klase sa duha ka grupo. Ipabasa og hilum sa usa ka grupo ang Doktrina ug mga Pakigsaad 10:20–29 ug mangita kon unsa ang gitudlo niini nga mga bersikulo bahin sa mga tumong ni Satanas. Hangyoa ang laing grupo sa pagbasa sa mao gihapon nga mga bersikulo ug mangita sa mga estratehiya nga gigamit ni Satanas sa pagtuman sa iyang mga tumong. Human sa igong panahon, dapita ang mga estudyante sa pagreport kon unsay ilang nadiskubrihan ug sa pagrekord sa ilang mga tubag diha sa tukma nga kolum nga naa sa pisara.

• Unsa ang atong nakat-unan gikan niini nga mga bersikulo mahitungod sa mga katuyoan ni Satanas? (Samtang mopaambit ang mga estudyante sa mga baruganan nga ilang nakit-an, ipasabut og maayo ang mosunod nga kamatuoran: Tinguha ni Satanas ang pagdaot sa atong mga kalag ug sa buhat sa Dios. Ikonsiderar ang pagsulat sa pisara niini nga kamatuoran. Mahimo nimong isugyot nga markahan sa mga estudyante ang mga pulong nga nagtudlo niini nga kamatuoran diha sa mga bersikulo 22–23 ug 27.)

• Sa unsang paagi nga ang pagkahibalo sa mga tumong ug mga estratehiya ni Satanas makatabang kanato nga makalikay ug makalingkawas sa iyang mga laang?

Doktrina ug mga Pakigsaad 10:30–70

Nahibaloan ni Joseph Smith ang plano sa Dios nga pagpakyas sa mga paningkamot ni Satanas sa pagdaot sa buhat

I-summarize ang Doktrina ug mga Pakigsaad 10:30–45 pinaagi sa pagpasabut nga misugo ang Ginoo kang Joseph Smith nga dili na ipahubad og balik ang porsyon sa mga palid diin naggikan ang gihubad nga 116 ka mga pahina. Apan hinoon, misugo ang Ginoo sa Propeta nga ihubad ang rekord nga gilangkuban sa gagmayng palid ni Nephi. Tungod kay Siya nahibalo man sa tanan, gidasig sa Ginoo si Mormon nga ilakip sa iyang rekord sa gagmayng palid ni Nephi, nga naghisgot sa gibana-bana nga nahitabo sa susamang panahon sa nawala nga mga pahina. Ipabasa og kusog sa usa ka estudyante ang bersikulo 44–45, ug hangyoa ang klase sa pagpangita unsay gisulti sa Ginoo mahitungod sa nawala nga rekord ikumpara sa rekord nga gikan sa gagmayng mga palid ni Nephi.

I-summarize ang Doktrina ug mga Pakigsaad 10:46–70 pinaagi sa pagpasabut nga ang Ginoo mitudlo usab ni Joseph mahitungod sa tahas sa Basahon ni Mormon sa pag-establisar sa Iyang doktrina.

Tapusa pinaagi sa pagpaambit sa imong pagpamatuod sa doktrina ug mga baruganan nga gitudlo dinhi niini nga mga pagpadayag.

Dugang nga Ideya sa Pagtudlo

Doktrina ug mga Pakigsaad 10:46–70. Mipasabut ang Ginoo sa katuyoan sa Basahon ni Mormon ug sa tahas niini nga pag-establisar sa Iyang Simbahan

Hangyoa ang mga estudyante sa paghunahuna mahitungod sa usa ka panahon nga nag-ampo sila para sa laing tawo, ug gitubag sa Ginoo ang ilang mga pag-ampo. Dapita ang pipila ka mga estudyante sa pagpaambit sa ilang mga kasinatian diha sa klase. (Pahinumdumi ang mga estudyante nga dili ipaambit ang bisan unsa nga personal o pribado ra kaayo mahitungod sa ilang kaugalingon o sa ubang tawo.)

Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 10:46–52. Hangyoa ang klase sa pagpangita kon si kinsa ang nag-ampo alang sa usa ka tawo ug sa unsang paagi gitubag sa Ginoo kadto nga pag-ampo.

• Sa unsang paagi gitubag sa Ginoo ang mga pag-ampo sa Iyang mga disipulo?

• Sa unsang mga paagi ang pagtungha sa Basahon ni Mormon usa ka tubag sa ilang mga pag-ampo?

Ipasabut nga sa Doktrina ug ma Pakigsaad 10:53–60, gipahayag sa Ginoo nga ang pagtungha sa Basahon ni Mormon mopamatuod nga Siya dunay laing mga karnero.

Dapita ang usa ka estudyante sa pagbasa og kusog sa Doktrina ug mga Pakigsaad 10:61–62, ug dapita ang klase sa pagpangita kon unsay gisulti sa Ginoo nga mahatagan og kahayag pinaagi sa Basahon ni Mormon.

• Unsa ang mahatagan og kahayag pinaagi sa Basahon ni Mormon?

• Unsa nga baruganan ang atong mahibaloan gikan niini nga mga bersikulo mahitungod sa unsay atong mahibaloan kon atong tun-an ang Basahon ni Mormon? (Kon tun-an nato ang Basahon ni Mormon, atong mahibaloan ang tinuod nga doktrina ni Kristo.)

• Sumala sa bersikulo 63, unsaon sa Ginoo paggamit ang tinuod nga mga punto sa Iyang doktrina sa pagbuntog sa mga buhat ni Satanas?

Dapita ang mga estudyante nga basahon sa hilum ang Doktrina ug mga Pakigsaad 10:64–70, nga mangita sa mga gisaad sa Ginoo. Human sa igong panahon, dapita ang mga estudyante sa pagpaambit sa ilang mga pagpamatuod mahitungod sa usa o dugang pa niini nga mga saad.