Leksyon 49

Doktrina ug mga Pakigsaad 125–28

Pasiuna ug Timeline

Sa ting-init niadtong 1839, daghan sa mga Santos kinsa gipugos sa pagbiya sa ilang mga panimalay didto sa Missouri nag-establisar og bag-ong mga pamuy-anan sa yuta nga gipalit sa Simbahan sa Commerce, Illinois, ug sa Teritoryo sa Iowa. Niadtong Marso 1841, si Propeta Joseph Smith nakadawat sa pagpadayag nga narekord sa Doktrina ug mga Pakigsaad 125, diin ang Ginoo mipadayag sa Iyang kabubut-on kalabut sa pagpundok sa mga Santos didto sa Teritoryo sa Iowa.

Human sa iyang bunyag niadtong Abril 1832, si Brigham Young nagserbisyo og mga misyon sa Upper Canada, sa amihanang silangang Estados Unidos, ug sa England. Ang iyang lapad nga misyonaryo nga pagserbisyo maoy nakaaghat kaniya ug sa iyang pamilya sa paghimo og importante nga mga sakripisyo. Niadtong Hulyo 1, 1841, si Brigham Young mipauli gikan sa iyang misyon sa England human mawala og hapit duha ka tuig. Niadtong Hulyo 9, 1841, si Propeta Joseph Smith nakadawat og pagpadayag alang ni Brigham Young, nga narekord sa Doktrina ug mga Pakigsaad 126. Niini nga pagpadayag, ang Ginoo misulti ni Brigham nga wala na kinahanglana nga mobiya siya sa iyang pamilya aron moserbisyo og mga misyon “ingon sa nangaging panahon” (D&P 126:1).

Niadtong Septyembre 1, 1842, si Propeta Joseph Smith misulat ngadto sa mga miyembro sa Simbahan nga nagsugo kanila sa pagtipig og mga rekord sa mga bunyag nga ilang gipahigayon alang sa ilang namatay nga mga katigulangan. Kini nga sulat narekord sa Doktrina ug mga Pakigsaad 127. Ang bag-ong mga pagsiksik nagpakita nga niadtong Septyembre 7, 1842 (imbis unta sa Septyembre 6 sumala sa gikataho sa ulohan sa seksyon), ang Propeta misulat og laing sulat ngadto sa mga miyembro sa Simbahan, diin siya mitudlo kanila og dugang mahitungod sa sakto nga pagpangalagad ug pagrekord sa mga bunyag alang sa mga patay. Gipasabut usab niya ang doktrinal nga kaimportante niini nga ordinansa. Kini nga sulat narekord sa Doktrina ug mga Pakigsaad 128.

Agosto 15, 1840Si Propeta Joseph Smith mihatag sa iyang unang diskurso sa publiko bahin sa mga bunyag alang sa mga patay sa tulumanon sa haya alang ni Seymour Brunson didto sa Nauvoo, Illinois.

Sayo sa Marso 1841Ang Doktrina ug mga Pakigsaad 125 nadawat.

Hulyo 1, 1841Si Brigham Young miabut sa Nauvoo human makaserbisyo og misyon sa England.

Hulyo 9, 1841Ang Doktrina ug mga Pakigsaad 126 nadawat.

Nobyembre 8, 1841Usa ka temporaryo nga bunyaganan ang gipahinungod alang sa mga bunyag alang sa mga patay na sa ilawom [basement] sa wala pa mahuman nga templo sa Nauvoo, Illinois.

Agosto 1842Aron makalikay sa dili pinasubay sa balaod nga pagdakop ug mabalik ngadto sa Missouri, si Propeta Joseph Smith mitago sa lain-laing mga dapit palibut sa Nauvoo, Illinois.

Septyembre 1, 1842Si Propeta Joseph Smith midiktar og sulat ngadto sa mga miyembro sa Simbahan, nga narekord sa Doktrina ug mga Pakigsaad 127.

Septyembre 7, 1842Si Propeta Joseph Smith midiktar og laing sulat ngadto sa mga miyembro sa Simbahan, nga narekord sa Doktrina ug mga Pakigsaad 128.

Mga Sugyot alang sa Pagtudlo

Doktrina ug mga Pakigsaad 125:1–4

Ang Ginoo misugo sa mga miyembro sa Simbahan sa Teritoryo sa Iowa nga magpundok sa gitudlo nga mga dapit

Ipakita ang mapa “Ang Missouri, Illinois, ug Iowa Area sa Estados Unidos.” Pahinumdumi ang mga estudyante nga human giabug ang mga Santos gikan sa Missouri atol sa tingtugnaw niadtong 1838–1839, nakakita sila og kadangpan sa mga pamuy-anan sa daplin sa Suba sa Mississippi sa Illinois ug Teritoryo sa Iowa.

I-summarize ang Doktrina ug mga Pakigsaad 125:1–4 pinaagi sa pagpasabut nga bisan ang Ginoo migiya sa mga miyembro sa Simbahan sa pag-establisar og usa ka stake sa Nauvoo, Illinois, ug sa pagtukod og templo didto, Siya misulti usab kanila nga sila motukod og laing mga siyudad sa Illinois ug tabok sa Suba sa Mississippi sa Teritoryo sa Iowa. Dugang pa, ang Ginoo misulti sa nangabut nga mga Santos sa pagpuyo sa bisan hain sa Iyang gitudlo nga mga siyudad diin ang usa ka stake naestablisar.

Doktrina ug mga Pakigsaad 126:1–3

Ang Ginoo misulti ni Presidente Brigham Young nga wala na kinahanglana nga iya pang biyaan ang iyang pamilya aron moserbisyo og mga misyon

Ipakita ang litrato ni Brigham Young. Aron matabangan ang mga estudyante nga makasabut sa konteksto sa Doktrina ug mga Pakigsaad 126, dapita ang usa ka estudyante sa pagbasa og kusog sa mosunod nga mga parapo [paragraph]:

Human mabunyagi si Brigham Young niadtong Abril 1832, nagserbisyo siya og daghang misyon sa misunod nga siyam ka tuig. Kadaghanan niini nga mga misyon milungtad sulod sa tulo ngadto sa lima ka bulan. Niadtong Abril 1838, si Brigham Young ug ang ubang mga miyembro sa Korum sa Napulog Duha ka mga Apostoles gitawag nga moserbisyo og mga misyon ngadto sa Great Britain, nga kinahanglan silang mobiya sa panimalay sa mas taas nga panahon.

Mibiya si Brigham Young sa Montrose, Teritoryo sa Iowa, padulong sa Great Britain niadtong Septyembre 14, 1839. Malisud kini nga panahon alang kaniya nga mobiya sa panimalay. Niadtong ting-init sa 1839, mikaylap ang malaria sa maong dapit, nga si Brigham, ang iyang asawa nga si Mary Ann, ug daghan sa ilang mga anak nangasakit. Si Mary Ann bag-o lang nanganak sa ilang ikaupat nga anak. Dugang pa, tungod kay sila giabug gikan sa Missouri sa miaging tuig, nawala ang kadaghanan nilang mga kabtangan, ug sa dihang si Brigham mibiya para sa iyang misyon, nabinlan lang niya si Mary Ann og $2.72 nga isuporta sa ilang pamilya. Atol sa dul-an duha ka tuig nga si Brigham Young didto sa England, si Mary Ann naglisud sa pagpangita og igong pagkaon ug igong kapasilongan alang kaniya ug sa iyang mga anak. Niadtong Hulyo 1, 1841, si Brigham Young, nga gitudlo isip Presidente sa Korum sa Napulog Duha ka mga Apostoles atol sa iyang misyon, miabut sa Nauvoo ug nahiusa sa iyang pamilya. Paglabay sa walo ka adlaw, si Propeta Joseph Smith nakadawat og pagpadayag nga narekord sa Doktrina ug mga Pakigsaad 126. (Tan-awa sa Leonard J. Arrington, Brigham Young: American Moses [1985], 74–75, 413–14; Lisa Olsen Tait and Chad M. Orton, “Take Special Care of Your Family,” sa Revelations in Context, ed. Matthew McBride and James Goldberg [2016], 244–46, o history.lds.org.)

Dapita ang usa ka estudyante sa pagbasa og kusog sa Doktrina ug mga Pakigsaad 126:1–3. Hangyoa ang klase sa pagsunod, nga mangita kon sa unsa nga paagi nga kini nga pagpadayag nakahupay ni Brigham Young ug sa iyang pamilya. Dapita ang mga estudyante sa pagreport sa unsay ilang nakit-an.

• Unsa ang matudlo niining nadawat ni Brigham Young nga pagpadayag ngari kanato mahitungod sa Ginoo? (Ang mga estudyante mahimong moila sa kamatuoran sama sa mosunod: Ang Ginoo nakahibalo sa atong piho nga mga sirkumstansya ug mogiya nato sumala sa atong mga panginahanglan.)

Doktrina ug mga Pakigsaad 127:1–12

Si Propeta Joseph Smith mihimaya sa pagpanggukod ug mitambag sa mga Santos sa pagtipig og mga rekord sa ilang mga bunyag alang sa mga patay

Ipasabut nga niadtong Mayo 1842, si Lilburn W. Boggs, ang kanhi gobernador sa Missouri kinsa miisyu og sugo sa pagpatay sa mga Santos, nasamdan sa pagsulay sa pagpatay kaniya. Ang mga awtoridad sa Missouri mipasangil kang Propeta Joseph Smith nga kuno nakigsabut og usa ka tawo nga mopatay kang Boggs, ug ang mga opisyales sa Missouri ug Illinois misulay sa pagdakop sa Propeta didto sa Nauvoo, Illinois, ug gipabalik siya ngadto sa Missouri aron taralon. Nakahibalo nga kon mobalik siya ngadto sa Missouri mapatay siya, ang Propeta mitago gikan niini nga mga opisyal sa daghang panahon sa Agosto, Septyembre, ug Oktubre niadtong 1842 aron makalikay nga madakpan. Pagka-Enero 1843 natino nga dili legal ang mga pamaagi sa pagdakop sa Propeta ug pagdala kaniya ngadto sa Missouri. Ang Doktrina ug mga Pakigsaad 127 naglangkob sa usa ka sulat nga gisulat ni Propeta Joseph Smith ngadto sa mga miyembro sa Simbahan samtang ania niining malisud nga mga sirkumstansya.

Ipares-pares ang klase. Dapita ang mga estudyante sa pagbasa og kusog sa Doktrina ug mga Pakigsaad 127:2–3 sa ilang mga pares, nga mangita kon giunsa ni Propeta Joseph Smith pag-atubang ang iyang “[mga] kalisdanan” (bersikulo 2).

• Unsa nga mga pulong ang importante kaninyo mahitungod sa paagi sa Propeta sa pag-atubang sa iyang mga kalisdanan?

I-summarize ang Doktrina ug mga Pakigsaad 127:4–12 pinaagi sa pagpasabut nga ang Propeta misulti sa mga Santos nga paspason ang ilang mga paningkamot sa pagtukod sa Templo sa Nauvoo. Gilakip usab niya ang mga instruksyon nga gihatag sa Ginoo kaniya kabahin sa mga bunyag alang sa mga patay.

Dapita ang usa ka estudyante sa pagbasa og kusog sa Doktrina ug mga Pakigsaad 127:5–7. Hangyoa ang klase sa pagsunod, nga mangita sa mga instruksyon nga gihatag sa Ginoo kabahin sa mga bunyag alang sa mga patay. Dapita ang pipila ka mga estudyante sa pagreport sa unsay ilang nakit-an.

• Sumala sa bersikulo 7, ngano nga importante sa mga miyembro sa Simbahan ang pagpahigayon sa ilang mga bunyag alang sa mga patay nga anaa ang presensya sa usa ka tigrekord?

Doktrina ug mga Pakigsaad 128:1–18

Si Propeta Joseph Smith mipasabut ngano nga gikinahanglan ang pagtipig og mga rekord sa makaluwas nga mga ordinansa

Ipasabut nga mga usa ka semana human si Propeta Joseph Smith mihimo og sulat nga narekord sa Doktrina ug mga Pakigsaad 127, mihimo siya og laing sulat ngadto sa mga Santos nga naglakip og dugang nga mga pagtulun-an mahitungod sa mga bunyag alang sa mga patay. Kini nga sulat narekord sa Doktrina ug mga Pakigsaad 128.

I-summarize ang Doktrina ug mga Pakigsaad 128:1–14 pinaagi sa pagpasabut nga ang Propeta mitudlo nga ang lokal nga mga tigrekord kinahanglang itudlo sa pagsaksi ug pagrekord sa mga bunyag alang sa mga patay ug nga “ang tigsulat [recorder] sa kinatibuk-an” kinahanglang matudlo sa paghan-ay sa lokal nga mga rekord ngadto sa usa ka “kinatibuk-an nga basahon sa simbahan (bersikulo 4). Iyang gipasabut nga ang mga ordinansa nga gipahigayon ug girekord sa yuta balido didto sa langit tungod sa pag-seal “gahum nga nagsulat o nagbugkos dinhi sa yuta ug nagbugkos didto sa langit” (bersikulo 9). Mitudlo usab ang Propeta nga ang ordinansa sa bunyag nagsimbolo sa kamatayon ug pagkabanhaw (mga bersikulo 12–13).

• Dugang sa bunyag, unsa ang ubang mga ordinansa nga kinahanglan nga madawat sa tanang indibidwal nga may tulubagon aron maangkon ang kinabuhing dayon ug magpuyo sa presensya sa Dios? (Kumpirmasyon [nga maglakip sa pagdawat sa gasa sa Espiritu Santo], pagka-orden ngadto sa Melchizedek Priesthood [alang sa mga lalaki], sa tuga [endowment] sa templo, ug pagbugkos sa kaminyoon. Itudlo nga kini gitawag nga “makaluwas nga mga ordinansa.”)

Dapita ang usa ka estudyante sa pagbasa og kusog sa Doktrina ug mga Pakigsaad 128:15. Hangyoa ang klase sa pagsunod, nga mangita ngano nga ang makaluwas nga mga ordinansa importante “ngadto sa mga patay ug sa mga buhi.”

• Base sa bersikulo 15, ngano nga importante alang nato nga mopahigayon sa makaluwas nga mga ordinansa alang sa atong mga katigulangan nga namatay nga wala makahibalo sa ebanghelyo? (Kon gikinahanglan, idirekta ang atensyon sa mga estudyante ngadto sa mga pulong “nga sila kon wala kita dili mahingpit,” ug tabangi sila sa pagpangita sa mosunod nga doktrina: Ang atong mga katigulangan nga namatay nga wala makahibalo sa ebanghelyo dili makauswag ngadto sa kahingpitan hangtud ang makaluwas nga mga ordinansa gipahigayon alang kanila.)

• Unsa nga doktrina ang atong makat-unan gikan sa mga pulong nga “ni kita kon wala ang atong mga patay mahingpit.” (bersikulo 15)? (Tabangi ang mga estudyante sa pag-ila sa mosunod nga doktrina: Ang kaluwasan sa atong mga katigulangan gikinahanglan ug mahinungdanon sa atong kaluwasan.)

Isulat ang mosunod nga pangutana diha sa pisara: Ngano kaha nga ang “kaluwasan sa atong mga katigulangan gikinahanglan ug mahinungdanon sa atong kaluwasan”?

Dapita ang mga estudyante sa paghisgot sa ilang mga tubag niini nga pangutana sa gagmay nga mga grupo sa tinagurha o tinagutlo. Human sa igong panahon, hangyoa ang mga estudyante gikan sa usa o daghang mga grupo sa pagreport sa ilang mga tubag ngadto sa klase.

I-summarize ang Doktrina ug mga Pakigsaad 128:16–17 pinaagi sa pagpasabut nga sa iyang sulat ngadto sa mga Santos, ang Propeta mikutlo og duha ka tudling gikan sa Biblia mahitungod sa bunyag alang sa mga patay.

Dapita ang usa ka estudyante sa pagbasa og kusog sa Doktrina ug mga Pakigsaad 128:17–18. Hangyoa ang klase sa pagsunod, nga mangita kon sa unsang paagi ang pagpahigayon sa mga bunyag alang sa mga patay makatabang sa pagtuman sa panagna nga narekord sa Malaquias 4:5–6.

• Sumala sa bersikulo 18, sa unsang paagi ang pagpahigayon sa mga bunyag alang sa mga patay makatabang sa pagtuman sa panagna ni Malaquias?

Doktrina ug mga Pakigsaad 128:19–25

Si Joseph Smith nagmaya sa gipahiuli nga ebanghelyo ug miawhag sa mga Santos nga ipadayon ang pagpahigayon sa mga bunyag alang sa mga patay

Ipasabut nga sa ikaduhang sulat nga gisulat ni Propeta Joseph Smith ngadto sa mga Santos kabahin sa bunyag alang sa mga patay, iyang giistorya pag-usab ang daghang importanting mga hitabo sa Pagpahiuli. Dapita ang usa ka estudyante sa pagbasa og kusog sa Doktrina ug mga Pakigsaad 128:19. Hangyoa ang klase sa pagsunod, nga mangita kon giunsa sa paghulagway sa Propeta ang Pagpahiuli.

• Giunsa sa paghulagway sa Propeta ang Pagpahiuli?

• Sa unsang mga paagi ang gipahiuli nga ebanghelyo “usa ka tingog sa kalipay alang sa mga buhi ug mga patay”?

I-summarize ang Doktrina ug mga Pakigsaad 128:20–21 pinaagi sa pagpasabut nga ang Propeta naghulagway sa pipila ka milagroso nga mga panghitabo sa Pagpahiuli, nga naghulagway nga ang mga anghel miabut aron sa pagpahiuli sa “mga katungod,” “mga yawe,” ug “gahum” sa milabay nga mga dispensasyon (bersikulo 21).

Dapita ang usa ka estudyante sa pagbasa og kusog sa Doktrina ug mga Pakigsaad 128:22. Hangyoa ang klase sa pagsunod, nga mangita unsay gisulti sa Propeta nga buhaton sa mga Santos, nga nakahibalo nga ang mga katungod, mga yawe, ug gahum sa priesthood gipahiuli sa atong panahon.

• Unsa ang “hilabihan nga mahinungdanon … nga katuyoan” nga gusto sa Propeta nga “[i]padayon” sa mga Santos?

• Sumala sa bersikulo 22, sa unsa nga paagi nga ang atong pag-apil sa family history ug pagserbisyo sa templo makatabang sa atong mga katigulangan?

Ipasabut nga samtang gitapos sa Propeta ang iyang sulat ngadto sa mga Santos, mikutlo siya sa Malaquias 3:2–3, nga naglakip sa panagna ni Malaquias mahitungod sa ulahing mga adlaw. Dapita ang usa ka estudyante sa pagbasa og kusog sa Doktrina ug mga Pakigsaad 128:24. Hangyoa ang klase sa pagsunod, nga mangita kon unsay gisugo sa Propeta nga buhaton sa mga Santos.

• Sumala niini nga bersikulo, unsa nga “halad sa pagkamatarung” ang atong “ihalad ngadto sa Ginoo”?

• Unsay atong mahimo aron makatampo ngadto niini nga “basahon”? (Tabangi ang mga estudyante nga makasabut nga gibuhat nato kini karon pinaagi sa pagsulod sa mga rekord sa atong mga katigulangan ngadto sa Church’s FamilySearch website ug magpahigayon og mga ordinansa alang kanila diha sa templo. Kon posible, ikonsiderar ang pagpaila sa mga estudyante ngadto sa FamilySearch.org.)

Isulat ang mosunod nga baruganan diha sa pisara: Samtang moapil kita sa family history ug mopahigayon og mga ordinansa diha sa templo alang sa atong patay nang mga katigulangan, nagtabang kita sa paghimo og halad ngadto sa Ginoo diha sa pagkamatarung.

• Unsa ang pipila ka mga paagi nga kamo karon nag-apil sa family history ug pagserbisyo sa templo?

• Unsa nga mga panalangin ang inyong nadawat samtang kamo miapil niini nga pagserbisyo?

Ipakigbahin ang imong pagpamatuod nga kon moapil kita sa family history ug pagserbisyo sa templo, nagtabang kita sa paghatag og halad ngadto sa Ginoo diha sa pagkamatarung. Dapita ang mga estudyante sa paghimo og tumong nga makatabang nila sa ilang mga paningkamot sa pag-apil sa family history ug pagserbisyo sa templo.

I-follow up ang mga pagdapit nga mobuhat

Makaawhag ka sa mga estudyante sa paggamit sa mga baruganan sa ebanghelyo pinaagi sa pag-follow-up sa mga pagdapit nga mobuhat. Paghimo og mubo nga pahinumdom nga mo-follow-up sa mga estudyante mahitungod sa mga tumong nga ilang gihimo dinhi niini nga leksyon. Mahimo usab nimo silang dapiton sa pagreport sa ilang mga kasinatian samtang mibuhat sila sa ilang mga tumong. Kon ikaw mo-follow up sa mga estudyante, siguroha ang pagbuhat sa ingon sa paagi nga sensitibo sa ilang ka pribado ug tahura ang ilang kabubut-on.

Dugang nga Ideya sa Pagtudlo

Doktrina ug mga Pakigsaad 128:24. Pagpasalida sa video—“A Sacrifice of Time”

Sa pagtabang sa mga estudyante nga mobati sa kamatuoran ug sa kaimportante sa doktrina ug mga baruganan nga gihisgutan niini nga leksyon, ikonsiderar ang pagpasalida sa video “A Sacrifice of Time” (2:54), nga anaa sa LDS.org. Samtang ang mga estudyante motan-aw niini nga video, dapita sila sa pagkonsiderar unsa nga mga sakripisyo ang ilang buhaton samtang sila magtinguha sa pag-andam sa ilang matarung nga halad alang sa Ginoo.