Leksyon 37

Doktrina ug mga Pakigsaad 94–97

Pasiuna ug Timeline

Sigun sa narekord sa Doktrina ug mga Pakigsaad 94, misugo ang Ginoo sa pagplano sa siyudad sa Kirtland “sumala sa sumbanan” nga Iyang gihatag kanila (D&P 94:2). Misugo usab ang Ginoo sa mga Santos sa Kirtland sa pagtukod og balay alang sa Kapangulohan sa Simbahan ug usa ka balay nga imprintahanan.

Sa pinadayag nga gihatag pagka-Disyembre 27–28, 1832, misugo ang Ginoo sa mga Santos sa pagtukod og templo sa Kirtland, Ohio (tan-awa sa D&P 88:119). Wala madugay human sa kapin sa mga lima ka bulan, ang mga lider sa Simbahan ug ang mga miyembro wala pa makasugod sa pagtukod sa templo. Pagka-Hunyo 1, 1833, nakadawat si Propeta Joseph Smith og pagpadayag nga narekord sa Doktrina ug mga Pakigsaad 95, diin ang Ginoo kusganong mipanton sa mga Santos sa Kirtland sa paglangay og tukod sa templo. Misaad usab siya nga tugahan ang mga Santos og gahum sulod sa templo ug mihatag og mga instruksyon kabahin sa konstruksyon niini.

Pagka-Hunyo 4, 1833, pipila ka high priest nag-abut sa paghisgot kon unsaon sa paggamit ug pagdumala sa bag-o lang naangkon nga Peter French nga umahan. Kay wala makab-ot ang konsensus, nagpakisayud sila sa Ginoo, ug agig tubag, nadawat ni Propeta Joseph Smith ang pagpadayag nga narekord sa Doktrina ug mga Pakigsaad 96. Sa modernong pagpadayag gihatag sa Ginoo ni Bishop Newel K. Whitney ang responsibilidad sa pagdumala sa umahan sa mga French, nga naglakip sa kabtangan diin ang Templo sa Kirtland tukuron, ug mipili kang John Johnson isip usa ka sakop sa Nagkahiusang Kapunongan.

Sa ting-init sa 1833, agig pagtuman sa mga instruksyon sa Ginoo nga narekord sa Doktrina ug mga Pakigsaad 88, ang mga lider sa Simbahan sa Missouri miorganisar og usa ka tulunghaan nga susama sa Tulunghaan sa mga Propeta, nga gigamit sa Kirtland, Ohio. Sa sayo nga bahin pagka Hulyo kini nga mga lider sa Simbahan misulat kang Propeta Joseph Smith nga nangayo og dugang nga instruksyon kabahin niini nga tulunghaan. Ang Kapangulohan sa Simbahan mipadala og tubag pagka Agosto 6, 1833, nga naglakip sa mga pagpadayag nga narekord sa Doktrina ug mga Pakigsaad 94; 97–98. Diha sa pagpadayag nga narekord sa Doktrina ug mga Pakigsaad 97, ang Ginoo misugo sa mga Santos sa Missouri nga tukuron “sa dali” ang templo sa Missouri (D&P 97:11) ug mihulagway sa mga panalangin nga ilang madawat sa paghimo niini. Gipahimangnoan sa Ginoo ang mga Santos nga makasinati sila og “mahapdos nga kasakitan” kon dili sila mosunod sa Iyang mga sugo (D&P 97:26).

Pahinumdom: Ang 2013 nga edisyon sa mga kasulatan mikorihir sa petsa nga nagpakita kon kanus-a nadawat ang pagpadayag nga narekord diha sa Doktrina ug mga Pakigsaad 94. Kini nga leksyon maghisgot sa mga seksyon 94–97 sa han-ay nga kini nadawat (95, 96, 97, 94) kay sa han-ay nga makita diha sa Doktrina ug mga Pakigsaad.

Disyembre 27–28, 1832Misugo ang Ginoo sa mga Santos sa Kirtland, Ohio, sa pagtukod og templo.

Abril 10, 1833Ang Simbahan mipalit og 41.7 ka ektarya nga yuta sa Kirtland gikan ni Peter French.

Hunyo 1, 1833Ang Doktrina ug mga Pakigsaad 95 nadawat.

Hunyo 4, 1833Ang Doktrina ug mga Pakigsaad 96 nadawat.

Hulyo 20, 1833Usa ka pundok sa manggugubot sa Independence, Missouri, miguba sa buhatan sa pag-imprinta, ug mibutang og alkitran ug gipapitlan og balahibo sila ni Bishop Edward Partridge ug Charles Allen.

Hulyo 23, 1833Tungod sa hulga sa kapintas sa mga manggugubot, ang mga lider sa Simbahan sa Missouri mipirma og kasabutan nga ang tanang Mormon mobiya sa Distrito sa Jackson pagka-Abril 1, 1834.

Agosto 2, 1833Ang Doktrina ug mga Pakigsaad 97 ug 94 nadawat.

Agosto 6, 1833Ang Kapangulohan sa Simbahan misulat ngadto sa mga lider sa Missouri ug milakip sa mga pagpadayag nga narekord sa Doktrina ug mga Pakigsaad 94; 97–98.

Mga Sugyot alang sa Pagtudlo

Doktrina ug mga Pakigsaad 95:1–17

Ang Ginoo mipanton sa mga Santos tungod sa paglangay sa pagtukod sa templo

Dapita ang mga estudyante sa paghunahuna mahitungod sa panahon dihang dunay tawo nga misulay sa pagkorihir kanila.

• Giunsa ninyo sa pagsanong dihang ang uban misulay sa pagkorihir kaninyo?

• Unsa ang pipila ka rason nga angay kitang magtinguha og koreksyon sa atong kinabuhi?

Dapita ang mga estudyante sa pagpangita og baruganan samtang magtuon sila sa Doktrina ug mga Pakigsaad 95 nga makatabang nila sa pagsabut nganong kinahanglan kitang magtinguha og koreksyon gikan sa Dios.

Isulat sa pisara ang Disyembre 27–28, 1832. Pahinumdumi ang mga estudyante nga niining mga petsaha si Propeta Joseph Smith nakadawat og pagpadayag diin misugo ang Ginoo sa pagtukod og “balay sa Dios” (D&P 88:119), o templo.

Dapita ang mga estudyante sa pagbasa og hilum sa ulohan sa seksyon alang sa Doktrina ug mga Pakigsaad 95, nga mangita sa petsa kon kanus-a nahatag ang pagpadayag nga narekord diha sa Doktrina ug mga Pakigsaad 95. Hangyoa sila sa pagbana-bana kon unsa ka taas ang gintang sa panahon diha nga kining duha ka pagpadayag nahatag. Ipasabut nga niining panahona ang mga lider sa Simbahan nakapalit og yuta alang sa templo ug mihimo og komitiba alang sa pagtukod sa templo. Hinoon, pagka Hunyo 1, 1833, ang mga Santos wala pa gihapon makasugod sa konstruksyon.

Dapita ang usa ka estudyante sa pagbasa og kusog sa Doktrina ug mga Pakigsaad 95:1–3. Hangyoa ang klase sa pagsunod, nga mangita unsay gisulti sa Ginoo mahitungod sa pagkalangay sa mga Santos sa pagtukod sa templo.

• Sumala sa bersikulo 2, unsay gisulti sa Ginoo nga kinahanglang mahitabo tungod kay ang mga Santos milangay sa pagtukod sa templo? (Human makatubag ang mga estudyante, ipasabut nga ang pagpanton nagpasabut sa pagdisiplina o pagkorihir.)

• Unsa nga doktrina ang atong makita gikan sa bersikulo 1 kon nganong ang Ginoo mipanton niadtong Iyang mga gihigugma? (Tabangi ang mga estudyante sa pag-ila sa mosunod nga doktrina: Ang Ginoo mipanton niadtong Iyang mga gihigugma aron mapasaylo sila sa ilang mga sala.)

• Unsa kaha ang buot ipasabut sa pagpanton sa Ginoo sa Iyang mga gihigugma?

Ipasabut nga kon ang Ginoo mopanton kanato makapili kita nga modawat o mosalikway niana nga koreksyon. Ipamatuod nga kon pilion nato ang pagdawat niana nga koreksyon pinaagi sa paghinulsol, ang Ginoo mopasaylo kanato ug moandam og paagi alang sa atong “kaluwasan diha sa tanan nga mga butang” (D&P 95:1).

Dapita ang usa ka estudyante sa pagbasa og kusog sa Doktrina ug mga Pakigsaad 95:4–9. Hangyoa ang klase sa pagsunod, nga mangita sa mga rason nganong gisugo sa Ginoo ang mga Santos sa pagtukod og templo sa Kirtland.

• Unsa ang ubang rason nganong gisugo sa Ginoo ang mga Santos sa pagtukod og templo? (Human makatubag ang mga estudyante, isulat sa pisara ang mosunod nga doktrina: Diha sa mga templo, ang Ginoo nag-andam sa Iyang mga sulugoon sa paghimo sa Iyang buhat ug mituga kanila og gahum.)

Ipasabut nga ang pagtuga [endow] nagpasabut sa paghatag og gasa sa usa ka tawo. Niini nga mga bersikulo, misaad ang Ginoo sa mga Santos nga sulod sa templo Iya silang tugahan, o hatagan og gasa sa, espiritwal nga gahum. Ang mao gihapon nga saad maanaa sa tanang takus nga mga Santos karon samtang mosulod sila sa sagradong mga pakigsaad uban sa Ginoo sa Iyang balaan nga mga templo.

Aron matabangan ang mga estudyante nga mas makasabut bahin sa endowment [pagtuga] sa espiritwal nga gahum nga atong madawat sa templo, dapita ang mga estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Kon ang mga lalaki ug mga babaye mangadto sa templo, mahatagan sila sa pareho nga gahum. …

“… Ang tanan nga mihimo og sagradong mga pakigsaad sa Ginoo ug kadtong mitahud sa mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan” (M. Russell Ballard, “Mga Lalaki ug mga Babaye ug ang Gahum sa Priesthood,”Liahona, Sept. 2014, 32).

Ipasabut nga ang pagtukod sa Templo sa Kirtland usa ka dako nga buluhaton alang sa mga Santos. Sa sayo nga bahin sa tuig 1833, may pipila pa lang ka miyembro sa Simbahan sa Ohio, ug kadaghanan nila labihan kakabus.

Dapita ang usa ka estudyante sa pagbasa og kusog sa Doktrina ug mga Pakigsaad 95:11–12. Hangyoa ang klase sa pagsunod, nga mangita kon unsay gisaad sa Ginoo sa mga Santos kon sila motuman sa Iyang mga sugo. Dapita ang mga estudyante sa pagreport sa unsay ilang nakit-an.

• Unsa nga baruganan ang atong makat-unan gikan sa bersikulo 11? (Ang mga estudyante kinahanglang makakita sa baruganan nga susama sa mosunod: Kon motuman kita sa mga sugo, makabaton kita og gahum sa pagbuhat sa unsay gisugo sa Ginoo kanato.)

• Unsa ang pipila ka mga sitwasyon nga inyong atubangon diin magamit kini nga baruganan?

• Kanus-a kamo mibati nga nakadawat kamo sa tabang sa Ginoo sa pagbuhat sa usa ka butang tungod kay gituman ninyo ang mga sugo?

I-summarize ang Doktrina ug mga Pakigsaad 95:13–17 pinaagi sa pagpasabut nga ang Ginoo mihatag og mga instruksyon kabahin sa mga sukod ug mga gamit sa piho nga mga kwarto sa Templo sa Kirtland.

Dapita ang usa ka estudyante sa pagbasa og kusog sa Doktrina ug mga Pakigsaad 95:14. Hangyoa ang klase sa pagsunod, nga mangita og usa ka paagi nga tumanon sa Ginoo ang Iyang saad nga hatagan ang mga Santos og gahum sa pagtukod sa templo. Dapita ang mga estudyante sa pagreport sa unsay ilang nakit-an. (Pwede nimong ipasabut nga ang tulo ka tawo nga gipili mao sila si Joseph Smith, Sidney Rigdon, ug Frederick G. Williams, kinsa mao ang Kapangulohan sa Halangdon nga Pagkapari, o ang Unang Kapangulohan.)

Aron matabangan ang mga estudyante nga makakita kon sa unsang paagi kini nga saad natuman, dapita ang usa ka estudyante sa pagbasa og kusog sa mosunod nga parapo [paragraph]:

Joseph Smith, Sidney Rigdon, ug Frederick G. Williams dungan nga nag-ampo ug nakakita og panan-awon sa templo. Sa ulahing mga adlaw si Frederick G. Williams nga human ilang natan-aw sa detalye ang gawas nga bahin, “ang gambalay sama og diha gayud sa among atubangan” ug ilang nakita ang sulod sa gambalay nga daw anaa gayud sila sa sulod sa gambalay (Mga Pagtulun-an sa mga Presidente sa Simbahan: Joseph Smith [2007], 327).

Doktrina ug mga Pakigsaad 96:1–9

Ang bishop gipili nga maoy modumala sa tanang kabtangan nga gihuptan sa Simbahan

Pahibaloa ang mga estudyante nga pagka Abril 10, 1833, ang mga lider sa Simbahan mipalit sa umahan ni Peter French sa Kirtland, Ohio. Sa usa ka komperensya sa mga high priest pagka Hunyo 4, 1833, ang konseho wala magkasabut kon unsaon sa paggamit o pagdumala niini nga kabtangan. Ang mga sakop sa konseho nagkauyon nga mangutana sa Ginoo, ug tungod niana nadawat ni Joseph Smith ang pagpadayag nga narekord sa Doktrina ug mga Pakigsaad 96. Niini nga pagpadayag, ang Ginoo mitudlo ni Bishop Newel K. Whitney nga modumala sa umahan, mipahayag nga ang templo kinahanglang tukuron sa parte sa kabtangan, ug mipili ni John Johnson isip sakop sa Nagkahiusang Kapunongan.

Doktrina ug mga Pakigsaad 97:1–28

Ang Ginoo mipasabut og maayo sa Iyang kabubut-on nga ang mga Santos sa Missouri motukod og templo

Kon mahimo, pag-display og litrato sa templo nga nahimutang sa layo kaayo sa gipuy-an sa imong mga estudyante.

• Ngano kaha nga gusto man sa Ginoo nga ang tanan Niyang takus nga mga anak dunay akses sa Iyang mga templo?

Pahibaloa ang mga estudyante nga ang Ginoo dili lang gusto nga matukod ang templo sa Kirtland Ohio, apan gusto usab Siya nga ang mga Santos makatukod og templo sa Zion, o sa Independence, Missouri. Dapita ang mga estudyante sa pagpangita sa doktrina samtang magtuon sila sa Doktrina ug mga Pakigsaad 97 nga makatabang nila aron mas masabtan kon nganong ang Ginoo misugo sa Iyang katawhan sa pagtukod og pagsimba sa Iyang mga templo.

Dapita ang mga estudyante sa pagbasa og kusog sa ulohan nga seksyon alang sa Doktrina ug mga Pakigsaad 97, ug hangyoa ang mga estudyante sa pagsusi kon kanus-a kini nga pagpadayag gihatag ug kon unsa nga makahuluganong hitabo nga bag-o lang nahitabo sa Missouri.

• Unsay nahitabo sa mga Santos wala dangti og duha ka semana sa wala pa ihatag kini nga pagpadayag? (Pahibaloa ang mga estudyante nga ang balita bahin sa pugos nga kasabutan nga pagpabiya sa mga Santos sa Distrito sa Jackson wala pa moabut kang Propeta Joseph Smith dihang nadawat kini nga pagpadayag.)

I-summarize ang Doktrina ug mga Pakigsaad 97:1–9 pinaagi sa pagpasabut nga gisultihan sa Ginoo ang mga Santos nga nalipay Siya nga ilang naorganisar ang usa ka tulunghaan sa mga elder sa Zion, sumala sa Iya nang gisugo sa una pa (tan-awa sa D&P 88). Nalipay usab ang Ginoo kang Parley P. Pratt, kinsa nagdumala sa tulunghaan.

Aron matabangan ang mga estudyante nga makasabut sa konteksto sa mga instruksyon sa Ginoo diha sa Doktrina ug mga Pakigsaad 97:10–14, ipasabut nga ang Propeta ug ang iyang mga magtatambag mipadala na sa una og sulat ngadto sa mga Santos sa Missouri, nga nagsugo kanila nga sugdan sa pagtukod ang templo sa Independence, Missouri, diha-diha dayon. Ang sulat naglangkob usab sa mga instruksyon ug sa mga drowing nga nagdetalye kon unsay hitsura sa sulod nga bahin sa templo.

Dapita ang usa ka estudyante sa pagbasa og kusog sa Doktrina ug mga Pakigsaad 97:10–14. Hangyoa ang klase sa pagsunod, nga mangita kon nganong gusto sa Ginoo nga magtukod ang mga Santos og templo sa Zion.

• Unsa ang ubang rason nga gisugo sa Ginoo ang mga Santos sa pagtukod og templo sa Zion?

Dapita ang pipila ka estudyante nga magpuli-puli sa pagbasa og kusog gikan sa Doktrina ug mga Pakigsaad 97:15–21. Hangyoa ang klase sa pagsunod, nga mangita sa mga panalangin nga gisaad sa Ginoo sa mga Santos kon tukuron nila ang templo.

• Unsa nga mga panalangin ang gisaad sa Ginoo sa mga Santos kon tukuron nila ang templo?

• Unsa kaha ang buot ipasabut sa “putli og kasingkasing” (mga bersikulo 16, 21)?

• Unsa nga doktrina ang atong makat-unan gikan sa bersikulo 16 mahitungod sa unsay masinati sa mga putli og kasingkasing sulod sa templo? (Kinahanglang makita sa mga estudyante ang doktrina nga susama sa mosunod: Diha sa templo, ang Dios mopakita sa Iyang kaugalingon niadtong mga putli og kasingkasing.)

• Unsa ang pipila ka paagi nga mopakita ang Dios sa Iyang Kaugalingon sulod sa templo?

• Sa unsang paagi kamo napanalanginan samtang takus kamo nga mitambong sa templo?

I-summarize ang Doktrina ug mga Pakigsaad 97:22-28 pinaagi sa pagpasabut nga gisultihan sa Ginoo ang mga Santos nga silutan Niya ang mga dautan ug ang Zion ipalingkawas ug panalanginan kon ang mga Santos mosunod sa Iyang pulong. Hinoon, kon wala nila buhata ang gisugo sa Dios, ang mga miyembro sa Simbahan makasinati og “mahapdos nga kasakitan” (bersikulo 26).

Doktrina ug mga Pakigsaad 94:1–17

Mihatag og mga instruksyon ang Ginoo alang sa pagtukod sa mga building sa Simbahan ug mimatuod og usab sa panginahanglan sa pagtukod sa templo

I-summarize ang Doktrina ug mga Pakigsaad 94 pinaagi sa pagpasabut nga misugo ang Ginoo sa mga Santos sa pagplano sa siyudad sa Kirtland “sumala sa sumbanan” nga Iyang gihatag. Agig dugang sa pagsugo sa mga Santos sa pagtukod og templo, ang Ginoo misugo usab nila sa pagtukod og balay alang sa Kapangulohan sa Simbahan ug usa ka balay nga imprintahanan.

Ipamatuod ang gahum ug mga panalangin nga anaa alang kanato diha sa balay sa Ginoo. Dapita ang mga estudyante sa mainampuong pagkonsiderar kon unsay ilang mabuhat aron sa pagputli sa ilang kaugalingon ug makatambong sa templo kanunay aron ilang madawat ang talagsaong mga panalangin nga gisaad sa Ginoo.