Agig pagsunod sa sugo sa Ginoo nga mopahigayon og usa ka komperensya sa Simbahan sa Missouri (tan-awa sa D&P 52:2–5), si Propeta Joseph Smith ug pipila pa ka tawo mibiyahe sa gibana-bana nga 1,500 ka kilometro gikan sa Ohio ngadto sa Missouri. Pagka-Hulyo 20, 1831, pipila ka adlaw human miabut sa Distrito sa Jackson, Missouri, nadawat ni Joseph Smith ang pinadayag nga karon nailhan isip Doktrina ug mga Pakigsaad 57. Niini nga pinadayag, mideklarar ang Ginoo nga ang Independence, Missouri, mao ang sentro nga dapit sa siyudad sa Zion uban sa templo niini, ug gitudloan Niya ang pipila ka tawo kabahin sa ilang mga tahas sa pagtukod sa Zion.
Pagka-Agosto 1, 1831, wala kaabut og duha ka semana human nadawat ni Joseph ang pinadayag nga nagtudlo sa Independence isip ang sentro nga dapit sa Zion, pipila ka mga miyembro sa Simbahan miduol sa Propeta nga nagtinguha nga masayud sa kabubut-on sa Ginoo mahitungod sa ilang pag-apil sa pagtukod sa Zion. Agig tubag, mihatag ang Ginoo sa pinadayag nga narekord sa Doktrina ug mga Pakigsaad 58. Niini nga pinadayag, ang Ginoo mitudlo sa mga Santos kalabut sa mga baruganan sa pag-establisar sa siyudad sa Zion, lakip ang pagkamasulundon sa mga sugo, pagkamatinud-anon diha sa kalisdanan, paggamit sa kabubut-on aron sa pagpahinabo sa pagkamatarung, ug paghinulsol ug pagpasaylo.
Hulyo 14, 1831Si Joseph Smith ug ang iyang mga kauban sa biyahe miabut sa Distrito sa Jackson, Missouri.
Agosto 2–3, 1831Ang yuta sa Distrito sa Jackson, Missouri, gipahinungod alang sa pag-establisar sa Zion, ug ang usa ka dapit alang sa templo gipahinungod diha sa Independence, Missouri.
Ang Ginoo mipadayag sa lokasyon sa Zion ug mitudlo sa mga indibidwal kabahin sa ilang mga tahas sa pagtukod niini
Isulat ang mga pulong nga Mga Gilauman ug Aktwal nga Resulta diha sa pisara. Hangyoa ang mga estudyante sa paghunahuna og higayon nga nasagmuyo sila tungod kay ang resulta sa usa ka panghitabo lahi kay sa ilang gilauman o gitinguha. Pagdapit og pipila ka mga estudyante sa pagpakigbahin sa ilang mga kasinatian diha sa klase.
Awhaga ang mga estudyante sa pagpangita og mga kamatuoran samtang magtuon sila sa Doktrina ug mga Pakigsaad 57–58 nga makatabang kanila nga mas makasabut kon unsaon sa pagpabiling matinud-anon ngadto sa Ginoo kon ang mga panghitabo dili mao ang ilang gipaabut o gilauman.
Pahinumdumi ang mga estudyante nga gipadayag na sa Ginoo nga Iyang i-establisar ang siyudad sa Zion “diha sa mga utlanan sa mga Lamanite” (D&P 28:9). Nasabtan sa mga Santos kini nga dapit nga mao ang kasadpan nga bahin sa Missouri, mao nga sa dihang gisugo sa Ginoo si Propeta Joseph Smith ug pipila ka mga elder sa pagpahigayon og usa ka komperensya sa Simbahan sa Missouri (tan-awa sa D&P 52:2), naghinam-hinam sila nga masayud sa tukma nga dapit sa Zion. Matinguhaon ang mga Santos sa pag-establisar sa Zion tungod kay nasayud sila nga ang pagkahimong parte sa Zion magtugot kanila nga makadawat sa katubsanan, panalipod, ug kalinaw gikan sa Ginoo (tan-awa sa Isaias 51:11; 52:7–8; 3 Nephi 21:22–29; D&P 45:66–75; Moises 7:61–64). Agig pagsunod sa sugo sa Ginoo, si Joseph Smith ug pipila ka mga elder mibiya sa Kirtland, Ohio, niadtong Hunyo 1831 ug mibiyahe sa gibana-bana nga 1,500 ka kilometro padulong sa Missouri, miabut paglabay sa usa ka bulan sa pagka-Hulyo 14, 1831 (tan-awa sa The Joseph Smith Papers, Documents, Volume 2: Hulyo 1831–Enero 1833, ed. Matthew C. Godfrey ug uban [2013], 5–6).
Dapita ang usa ka estudyante sa pagbasa og kusog sa ulohan sa seksyon alang sa Doktrina ug mga Pakigsaad 57. Hangyoa ang klase sa pagsunod, nga mangita sa mga gipangutana sa Propeta ngadto sa Ginoo sa dihang miabut siya sa Distrito sa Jackson, Missouri.
Hangyoa ang usa ka estudyante sa pagbasa og kusog sa Doktrina ug mga Pakigsaad 57:1–3. Hangyoa ang klase sa pagsunod, nga mangita kon giunsa pagtubag sa Ginoo ang mga pangutana sa Propeta.
Asa pagatukuron ang siyudad sa Zion?
Sumala sa bersikulo 3, asa pagatukuron ang templo diha sa siyudad sa Zion?
Unsa kaha ang kahulugan nga ipabutang sa Ginoo ang templo diha sa sentro sa siyudad sa Zion?
I-summarize ang Doktrina ug mga Pakigsaad 57:4–16 pinaagi sa pagpasabut nga ang Ginoo misugo sa mga Mga Santos sa pagpalit og yuta sulod ug libut sa Independence, Missouri. Misugo usab ang Ginoo sa pipila ka mga tawo nga gamiton ang ilang indibidwal nga kalig-on aron sa pagtabang sa pagtukod sa Zion.
Ang Ginoo mitambag sa mga elder nga magmatinud-anon samtang magsinati og kalisdanan
Sultihi ang mga estudyante nga ang mga misyonaryo ug mga miyembro sa Colesville Branch kinsa gimandoan sa pag-adto sa Missouri miabut pipila ka adlaw human sa pag-abut sa Propeta ug iyang mga kauban. Ang uban sa bag-ong nangabut naghanduraw nga makakita sila og mauswagon nga komunidad sa bag-ong mga miyembro, apan nasagmuyo sila sa pagkadiskubre nga adunay pipila lamang ka mga kinabig. Ang uban nasagmuyo nga kadaghanan sa yuta sa Distrito sa Jackson wala pa maugmad. Agig dugang, si Propeta Joseph Smith ug Bishop Edward Partridge adunay panagsumpaki kalabut sa yuta nga paliton alang sa mga Santos. Atol niini nga mga sirkumstansya nga nadawat ni Propeta Joseph Smith ang pinadayag nga girekord diha sa Doktrina ug mga Pakigsaad 58. (Tan-awa sa The Joseph Smith Papers, Documents, Volume 2: Hulyo 1831–Enero 1833, 12–13.)
Dapita ang mga estudyante sa pagbasa og hilum sa Doktrina ug mga Pakigsaad 58:1–5, nga mangita kon unsay gusto sa Ginoo nga masabtan sa mga elder sa una nilang pag-abut sa Missouri.
Unsa nga baruganan ang atong makat-unan gikan sa unsay gisulti sa Ginoo ngadto sa mga elder diha sa bersikulo 2? (Human makatubag ang mga estudyante, isulat ang mosunod nga baruganan diha sa pisara: Mas dako ang atong ganti sa kahangturan kon magpabilin kitang matinud-anon diha sa kalisdanan.)
Sa unsang paagi kaha nakatabang sa mga Santos kini nga baruganan sa dihang ang mga sirkumstansya sa ilang bag-ong pinuy-anan dili sama sa ilang gilauman?
Pangutan-a ang klase kon adunay daklit nga makahulagway sa mga pagpanglutos ug mga pagsulay nga masinati sa mga Santos sa mosunod nga pipila ka tuig diha sa Missouri. (Kon gikinahanglan, pahibaloa sa daklit ang mga estudyante nga ang mga Santos miantus sa pagpanghasi ug kagubot gikan sa ilang mga silingan sa Missouri, ug gipatay pa gani ang pipila ka mga miyembro sa Simbahan. Ang pagpanglutos sa katapusan nakapugos sa mga Santos sa pagbiya sa Distrito sa Jackson nianang Nobyembre ug Disyembre 1833, ug sa katapusan hingpit sila nga giabug gikan sa Missouri sa tingtugnaw sa 1838–39 sa dihang ang gobernador sa estado mi-isyu og sugo sa pagpatay batok kanila.)
Sa unsang paagi kaha ang baruganan nga naa sa pisara ug ang mga saad sa Ginoo diha sa mga bersikulo 2–4 nakapalig-on sa mga Santos panahon sa kalisdanan nga ilang ilahutay diha sa Missouri?
Sumala sa bersikulo 3, unsa ang kasagaran nga dili nato makita o masabtan kon nagsinati kita og kalisdanan?
Sa unsang paagi kaha ang mga pagtulun-an niini nga mga bersikulo makatabang nato kon makasinati kita og kasagmuyo ug kalisdanan?
I-summarize ang Doktrina ug mga Pakigsaad 58:6–13 pinaagi sa pagpasabut nga ang Ginoo mipadayag sa pipila ka rason nga Iyang gipaadto ang mga Santos sa Zion, diin ang usa mao nga ang mga elder makapahimutang sa pundasyon sa Zion ug makasugod sa pag-andam sa yuta alang sa Ikaduhang Pag-anhi ni Jesukristo. Sumala sa narekord niini nga mga bersikulo, ang Ginoo naghisgot kalabut sa usa ka sambingay diha sa Bag-ong Tugon (tan-awa sa Mateo 22:1–14; Lucas 14:12–24) nga nagtudlo nga ang katawhan sa tanang kanasuran dapiton sa pag-ambit sa mga panalangin sa ebanghelyo.
Ang Ginoo milatid sa mga katungdanan sa usa ka bishop, mimando sa mga Santos sa pagsunod sa mga balaod sa yuta, ug mitambag kanila sa paggamit sa ilang kabubut-on sa pagbuhat og maayo
Pahinumdumi ang mga estudyante nga si Bishop Edward Partridge, kinsa gitawag nga magpabilin diha sa Missouri aron sa pagdumala sa mga kabtangan sa Simbahan ug sa pagpalit og yuta diha ug libut sa Independence, nagkasumpaki sa propeta kon asa nga mga luna sa yuta ang paliton. Ipasabut nga sigun sa narekord diha sa Doktrina ug mga Pakigsaad 58:15, ang Ginoo mipasidaan kang Bishop Partridge nga kon dili siya maghinulsol sa iyang “pagkawalay pagtuo ug pagkawalay pagbati sa kasingkasing,” siya mapukan. Gidawat ni Bishop Partridge ang pasidaan ug pagbadlong sa Ginoo uban sa pagpaubos (tan-awa sa The Joseph Smith Papers, Documents, Volume 2: Hulyo 1831–Enero 1833, 12–13). I-summarize ang Doktrina ug mga Pakigsaad 58:16–20 pinaagi sa pagpasabut nga ang Ginoo milatid usab sa pipila sa mga katungdanan ug responsibilidad ni Edward Partridge isip bishop sa Missouri. Dayon i-summarize ang Doktrina ug mga Pakigsaad 58:21–23 pinaagi sa pagpasabut nga ang Ginoo misugo sa mga Santos sa Missouri sa pagsunod sa mga balaod sa yuta ug sa mga balaod sa Dios.
Dapita ang usa ka estudyante sa pagbasa og kusog sa Doktrina ug mga Pakigsaad 58:24–28. Hangyoa ang klase sa pagsunod, nga mangita kon unsay gisulti sa Ginoo nga buhaton ni Bishop Partridge ug sa iyang mga magtatambag.
Sumala sa bersikulo 25, unsa ang gisulti sa Ginoo nga buhaton ni Bishop Partridge ug sa iyang mga magtatambag?
Sa unsang paagi kaha ang pakigtambag sa usag usa ug uban sa Ginoo nakatabang kanila sa pagdumala sa mga kalihokan sa Simbahan sa Missouri ug sa pagtukod sa Zion?
Base sa unsay gitudlo sa Ginoo niining mga tawhana diha sa mga bersikulo 26–28, unsa nga doktrina ug mga baruganan ang atong makat-unan kalabut sa unsay gilauman sa Ginoo kanato? (Ang mga estudyante mahimong mohatag og pipila ka mga tubag, apan siguroa nga mahibalo sila sa mosunod nga mga kamatuoran: Kon maghulat kita sa Ginoo nga mosulti kanato sa tanan nga kinahanglan natong buhaton, dili kita makadawat og ganti. Aduna kitay gahum sa paglihok alang sa atong kaugalingon. Kon atong gamiton ang atong kabubut-on sa pagpahinabo sa pagkamatarung, kita pagagantihan. Dapita ang mga estudyante sa pagkonsiderar sa pag-highlight niini nga mga kamatuoran diha sa ilang mga kasulatan.)
Ngano kaha nga importante man alang niadtong gitawag sa pagtukod sa Zion nga makasabut niini nga mga baruganan?
Nganong importante man nga masabtan nato kini nga mga kamatuoran sa atong panahon?
Dapita ang usa ka estudyante sa pagbasa og kusog sa Doktrina ug mga Pakigsaad 58:29–33. Hangyoa ang klase sa pagsunod, nga mangita kon unsay gisulti sa Ginoo nga mahitabo niadtong dili mogamit sa ilang kabubut-on sa pagbuhat og maayo o kinsa nagduha-duha sa Iyang mga sugo.
Unsay mahitabo niadtong kinsa dili mogamit sa ilang kabubut-on sa pagbuhat og maayo o kinsa nagduda sa mga sugo sa Ginoo?
Sumala sa mga bersikulo 32–33, unsa ang reaksyon sa ubang mga tawo kon dili sila makadawat sa mga panalangin nga nagtuo sila nga angay nilang madawat, bisan kon nagtinapulan sila o dili masulundon?
Unsa nga pahimangno ang gihatag sa Ginoo ngadto sa ingon nga mga indibidwal?
Ipamatuod nga bisan tuod gipadayag sa Ginoo ang mahimutangan sa siyudad sa Zion, gikinahanglan gihapon Niya sa mga Santos nga mogamit sa ilang kabubut-on sa pagbuhat og maayo ug sa pagtabang sa pag-establisar niini. Mao usab kanato sa atong panahon. Bisan tuod ang Ginoo naggiya kanato pinaagi sa pagpadayag, naglaum Siya kanato nga atong gamiton ang atong kabubut-on sa pagbuhat og maayo ug sa “[pag]pahinabo sa daghan nga pagkamatarung” (D&P 58:27) aron matuman ang Iyang buhat.
Dapita ang mga estudyante sa pagpamalandong kon unsay ilang mabuhat aron sa pagpahinabo sa daghan nga pagkamatarung. Awhaga sila sa pagbuhat sa bisan unsang mga pag-aghat nga ilang madawat.
Ang Ginoo mihatag og dugang nga mga instruksyon kalabut sa Zion, mitudlo sa mga baruganan sa paghinulsol ug pagpasaylo, ug misugo sa mga elder sa pagsangyaw sa ebanghelyo sa tibuok kalibutan
Ipasabut nga diha sa Doktrina ug mga Pakigsaad 58:34–37, ang Ginoo mihatag og dugang nga instruksyon kalabut sa yuta sa Zion. Mimando Siya nga ipahinungod ni Martin Harris ang iyang kwarta ngadto sa Ginoo, nga ang mga Santos nga manimuyo sa Zion mosunod niini nga ehemplo ug mosunod sa balaod sa pagpahinungod, ug nga mopalit og yuta alang sa usa ka balay tipiganan ug sa gamit sa pag-imprinta.
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 58:38–43, 60. Awhaga ang klase sa pagsunod, nga mangita sa tambag sa Ginoo nga gihatag ngadto ni Martin Harris, William W. Phelps, ug Ziba Peterson samtang nangandam sila nga manimuyo sa Zion.
Sa unsang paagi kaha ang mga sala niining mga tawhana nakapugong kanila sa pagtabang sa pagtukod sa Zion?
Sa unsang paagi ang atong mga sala makalimita sa atong abilidad sa pagserbisyo sa Ginoo?
Unsa nga kamatuoran ang gitudlo sa Ginoo niining mga tawhana mahitungod sa paghinulsol diha sa bersikulo 42? (Tabangi ang mga estudyante nga mahibalo sa mosunod nga baruganan: Kon maghinulsol kita sa atong mga sala, ang Ginoo mopasaylo kanato ug dili na mohinumdom sa atong mga sala.)
Sa unsang paagi kini nga kamatuoran makahatag nato og paglaum?
Unsa nga kamatuoran ang gitudlo sa Ginoo niining mga tawhana mahitungod sa paghinulsol diha sa bersikulo 43? (Tabangi ang mga estudyante nga mahibalo sa mosunod nga kamatuoran: Aron maghinulsol, kinahanglan gayud kitang mokumpisal ug mobiya sa atong mga sala.)
Aron matabangan ang mga estudyante nga makasabut kon unsay kahulugan sa pagkumpisal ug pagbiya sa atong mga sala, dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:
Imahe
Elder Neil L. Andersen
“Ang pagsalikway sa mga sala nagpasabut sa dili na pagbalik. Ang pagsalikway nagkinahanglan og panahon. Aron sa pagtabang kanato, ang Ginoo usahay motugot sa salin sa atong mga sayop nga magpabilin sa atong panumduman. Kini usa ka mahinungdanon nga bahin sa atong mortal nga pagkat-on.
“Samtang kita matinuoron nga mokumpisal sa atong mga sala, mopahiuli kutob sa atong mahimo ngadto sa nasakitan, ug mosalikway sa atong mga sala pinaagi sa pagsunod sa mga sugo, kita anaa sa proseso sa pagdawat sa kapasayloan. Uban sa panahon, kita mobati sa kasakit sa atong kasubo nga nag-anam og kawala, motangtang sa ‘mga kasaypanan gikan sa atong mga kasingkasing’ [Alma 24:10] ug magbaton og ‘kalinaw sa tanlag’ [Mosiah 4:3]” (Neil L. Andersen, “Paghinulsol … Aron Ako Moayo Kaninyo,”Liahona, Nob. 2009, 42).
Pagpamatuod nga tungod sa Pag-ula ni Jesukristo, mahimo kitang hingpit nga mapasaylo sa atong mga sala. Awhaga ang mga estudyante sa paghinulsol sa ilang mga sala pinaagi sa pagkumpisal ug pagbiya niini.
I-summarize ang Doktrina ug mga Pakigsaad 58:44–65 pinaagi sa pagpasabut nga gisugo sa Ginoo ang mga elder kinsa magpabilin sa Missouri sa pagpalit og yuta ug sa pagpangandam alang sa pagpundok sa mga Santos diha sa Zion, nga naglakip sa pagsangyaw sa ebanghelyo ngadto sa tibuok kalibutan.